ᕿᑭᖅᑕᓂᒃᑯᑦ ᓴᖅᑭᑎᑦᑎᕗᑦ ᑐᑦᑕᕐᕕᒻᒥᒃ ᖃᕋᓴᐅᔭᕋᓛᕐᓄᑦ/ᐅᖄᓚᐅᑎᕋᓛᕐᓄᑦ ᐊᑐᖅᑕᐅᖃᑦᑕᕈᓐᓇᖅᑐᒥᒃ
ᐃᖃᓗᐃᑦ, ᓄᓇᕗᑦ – ᓄᕕᐱᕆ 7, 2022 – ᑮᓇᐅᔭᖅᑖᖅᑎᑕᐅᓯᒪᓪᓗᑎᒃ ᑲᑭᕙᒃ ᑲᑐᔾᔨᖃᑎᒌᒃᑯᓐᓂᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐳᓚᕋᓛᖅᑐᑦ ᐊᒻᒪᓗ ᓴᖅᑭᔮᖅᑎᑦᑎᒋᐊᒃᑲᓐᓂᓛᖅᑐᑦ ᑐᑦᑕᕐᕕᒻᒥᒃ ᖃᕋᓴᐅᔭᕋᓛᕐᓄᑦ ᐊᑐᖅᑕᐅᖃᑦᑕᕈᓐᓇᖅᑐᒥᒃ ᕿᑭᖅᑕᓂ ᓄᓇᓕᐅᔪᓂᑦ. ᑐᑦᑕᕐᕕᒃ ᖃᕋᓴᐅᔭᕋᓛᕐᓄᑦ ᐊᑐᖃᑦᑕᕋᔅᓴᖅ ᐱᕙᓪᓕᐊᑎᑦᑎᒍᑕᐅᕙᒻᒪᑦ ᑲᔪᓯᑦᑎᐊᕐᓂᖓᓄᑦ ᑐᑦᑕᕐᕕᒃ ᖃᕋᓴᐅᔭᒃᑯᑦ ᑐᑭᓯᖏᐊᕈᑎᖃᕐᕕᒃ ᐊᒻᒪᓗ ᐃᑲᔫᑎᖃᕈᒫᕐᓂᐊᖅᑐᓂ ᐃᓄᓐᓄᑦ ᓇᓂᓯᖃᑦᑕᖁᓪᓗᒋᑦ ᐃᖅᑲᓇᐃᔮᔅᓴᓂᑦ ᐊᒻᒪᓗ ᐃᓕᓐᓂᐊᕈᑎᔅᓴᓂᑦ.
ᑐᑦᑕᕐᕕᒃ ᖃᕋᓴᔭᐅᒃᑯᑦ ᑐᑭᓯᒋᐊᕈᑎᖃᕐᕕᖓ ᐊᒻᒪᓗ ᖃᕋᓴᐅᔭᕋᓛᕐᓄᑦ ᐊᑐᖃᑦᑕᕋᔅᓴᖅ ᐱᓕᕆᔾᔪᑕᐅᓪᓗᐊᑕᖃᑦᑕᓂᐊᖅᑐᖅ ᐃᑲᔫᑎᖃᕐᓗᓂ ᐃᖅᑲᓇᐃᔭᖅᑎᖁᑎᖃᕐᐸᑦᑐᓄᑦ ᐃᖅᑲᓇᐃᔭᖅᑎᑖᖅᑐᖃᑦᑕᕈᒪᔪᓄᑦ ᕿᑭᖅᑕᓂ ᓄᓇᓕᐅᔪᓂᑦ ᐃᓄᓐᓂᑦ ᐃᖅᑲᓇᐃᔭᕐᕕᖁᑎᖏᓐᓂ ᑎᒥᖁᑎᖏᓐᓂᓪᓗ.
ᑐᑦᑕᕐᕕᒻᒥ ᐊᑐᖃᑦᑕᕋᔅᓴᐃᑦ ᐊᑐᕐᓗᒋᑦ, ᕿᑭᖅᑕᓂᒃᑯᑦ ᐱᔭᕆᐊᑭᓪᓕᑎᑦᑎᓯᒪᒻᒪᑕ ᐃᓄᓐᓄᑦ ᐊᑐᖃᑦᑕᕈᓐᓇᓂᐊᕐᖓᑕ ᐅᖄᓚᐅᑎᖏᓐᓂᒃ ᖃᕋᓴᐅᔭᕋᓛᖏᓐᓂᓪᓗ ᐋᖅᑭᔅᓱᐃᔾᔪᑎᒋᖃᑦᑕᕐᓗᒋᑦ ᓇᒻᒥᓂᖅ ᒥᔅᓵᓅᖓᔪᓂᑦ ᐱᖃᓯᐅᔾᔨᓯᒪᔪᓐᓇᖅᑐᒥᒃ ᐃᖅᑲᓇᐃᔮᔅᓴᕐᓯᐅᕈᒻᒥᑦ ᑕᐃᒫᒃ ᐊᑐᒃᑲᓐᓂᖃᑦᑕᓂᐊᕐᖓᑕ ᐊᔪᙱᑕᖏᓐᓂᒃ ᐊᒻᒪᓗ ᐃᖅᑲᓇᐃᔮᔅᓴᓂᑦ ᐃᓕᓐᓂᐊᕋᔅᓴᓂᓪᓗ ᐱᓇᓱᐊᖃᑦᑕᓂᐊᕐᖓᑕ. ᐃᓄᐃᑦ ᐱᖃᓯᐅᔾᔨᔪᓐᓇᖅᑐᑦ ᐱᖅᑯᓯᖅᑎᒍᑦ ᐃᓕᑦᑎᓯᒪᔭᖏᓐᓂᒃ ᒪᑯᓂᖓ ᓲᕐᓗ ᐊᖑᓇᓱᖃᑦᑕᕐᓂᖅ, ᓴᓇᙳᐊᖃᑦᑕᕐᓂᖅ, ᒥᖅᓱᖃᑦᑕᓂᕐᓗ ᐱᔪᒐᕐᓴᐅᑎᖏᓐᓂᒃ ᐃᖅᑲᓇᐃᔮᔅᓴᕐᓯᐅᕈᖏᓐᓂ ᐊᒻᒪᓗ ᐅᔾᔨᓇᕐᓯᑎᖃᑦᑕᕐᓗᒋᑦ ᑕᒪᒃᑯᐊ ᐃᓕᑦᑎᓯᒪᔭᖏᑦ ᐃᖅᑲᓇᐃᔭᖅᑎᖃᕐᐸᑦᑐᓄᑦ. ᐋᖅᑭᔅᓱᐃᔭᕇᖅᑲᑕ ᑐᑭᓯᓯᒪᔾᔪᑎᔅᓴᑦ ᑭᒃᑰᓂᖏᓐᓂᒃ, ᑖᓐᓇ ᐊᑐᕐᓗᒍ ᓇᔅᓯᐅᔾᔨᔪᓐᓇᖅᑐᑦ ᖃᐅᔨᒃᑲᐃᔾᔪᑎᓂᑦ ᐃᖅᑲᓇᐃᔭᖅᑎᖁᑎᖃᕐᐸᑦᑐᓄᑦ ᐃᖅᑲᓇᐃᔮᔅᓴᓄᑦ ᑖᒃᑯᓄᖓ ᓈᒻᒪᑦᑐᓂᑦ.
ᕿᑭᖅᑕᓂᒃᑯᑦ ᓄᓇᓕᓐᓄᑦ ᓇᕈᑲᑕᓛᖅᑐᑦ ᑕᑯᓐᓈᑎᑦᑎᖃᑦᑕᓛᕐᖓᑕ ᖃᓄᖅ ᑖᓐᓇ ᓄᑖᖅ ᐃᓱᕐᕆᐅᑎᔅᓴᖅ/ᐊᑲᕐᕆᔾᔪᑎᔅᓴᖅ ᐊᑐᖅᑕᐅᓲᖑᒻᒪᖔᖅ ᐊᒻᒪᓗ ᑲᔪᖏᕐᓴᐃᒋᐊᒃᑲᓂᕐᓗᑎᒃ ᐃᓄᓐᓂᑦ ᐊᒥᓱᒃᑲᓂᕐᓂᑦ ᐊᒻᒪᓗ ᕿᑭᖅᑕᓂ ᐃᖅᑲᓇᐃᔭᖅᑎᖁᑎᖃᕐᐸᑦᑐᓂᑦ ᐊᑐᖃᑦᑕᖁᓪᓗᒋᑦ ᑐᑦᑕᕐᕕᒻᒥᑦ.
ᑐᑦᑕᕐᕕᒃ ᖃᕋᓴᐅᔭᕋᓛᒃᑯᑦ ᐊᑐᖃᑦᑕᕋᔅᓴᖅ ᐊᑭᖃᙱᑦᑐᖅ ᐊᒻᒪᓗ ᒫᓐᓇ ᐊᑐᐃᓐᓇᐅᓕᖅᑐᓂ ᑕᕝᕘᓇ ᓂᐅᕕᕐᕕᐅᕙᑦᑐᑎᒍᑦ Google Play Store ᐊᒻᒪᓗ Apple App Store. ᑖᓐᓇ ᐊᑐᖃᑦᑕᕋᔅᓴᖅ ᐋᖅᑭᓱᖅᑕᐅᓯᒪᔪᖅ-ᑲᑐᔾᔨᓪᓗᑎᒃ ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᐊᒻᒪᓗ ᐱᙳᐊᖅ ᑲᑐᔾᔨᖃᑎᒌᑦ ᐊᒻᒪᓗ ᑕᐃᒫᒃ ᓯᕗᓪᓕᕐᐹᖑᓪᓗᓂ ᓴᓇᔭᐅᓯᒪᔪᖅ ᕿᑭᖅᑕᓂ.
ᑐᑭᓯᒃᑲᓐᓂᕈᒪᒍᕕᑦ ᕿᑭᖅᑕᓂ ᐃᓕᓐᓂᐊᕐᓂᕐᒨᖓᔪᓂᑦ ᐊᒻᒪᓗ ᑐᑦᑕᕐᕕᐅᑉ ᒥᔅᓵᓄᑦ, ᑕᑯᓂᐊᕆᑦ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂᒃ: https://www.qia.ca/what-we-do/training-and-jobs/#tuttarvik
ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᒍᕕᑦ, ᑐᑭᓯᒋᐊᕐᕕᐅᖃᑦᑕᕐᓕ ᐅᓇ:
ᑭᐊᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐅᖓᓯᑦᑐᒥ ᐊᑭᖃᙱᑐᒃᑯᓘᓐᓃᑦ 1.800.667.2742
