ᐃᖃᓗᐃᑦ, ᓄᓇᕗᑦ, ᕖᕝᕗᐊᓕ 9, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐱᓇᓱᐊᕈᑎᖓᑦ ᐃᑲᔪᕈᒪᓪᓗᑎᒃ ᐱᔭᕆᐊᑐᓗᐊᖁᓇᒍ ᓂᕿᔅᓴᖃᑦᑎᐊᖏᓐᓂᖅ ᐊᒻᒪᓗ ᐃᑲᔪᕈᒪᓪᓗᑎᒃ ᐊᓂᑦᑕᐃᓕᑲᐃᓐᓇᕆᐊᓕᓂᑦ ᓄᓇᓕᓐᓂᑦ ᐊᑑᑎᕕᐅᔪᓂᑦ ᓄᕙᕐᔪᐊᓇᖅᑐᒧᑦ ᑲᔪᓯᕗᖅ ᓂᕿᑖᕈᑎᔅᓴᖃᖅᑎᑎᓪᓗᑎᒃ ᖃᐅᓱᐃᑦᑐᕐᒥᐅᓄᑦ.

ᕿᑭᖅᑕᓂ ᓄᓇᓖᑦ ᖃᐅᓱᐃᑦᑐᕐᒥ ᓂᕿᑖᕈᑎᔅᓴᓂᑦ ᐱᖃᑦᑕᕈᓐᓇᓕᕐᒥᔪᑦ ᐊᑭᓕᓐᓂᑦ $250 ᐊᑐᓂᑦ ᐃᓚᒌᑦ. ᐃᓪᓗᒥᐅᖃᑎᒌᑦᑐᒡᒍᑎᐅᒍᔅᓯ ᐊᑕᐅᑦᑎᒥ, ᐅᖃᖃᑦᑕᕆᔅᓯ COVID-19@qia.ca ᐅᖄᓚᓗᓯᓘᓐᓃᑦ 1-867-975-8383 ᐃᑲᔫᓯᐊᔅᓴᑲᓐᓃᑦ ᒥᔅᓵᓄᑦ.

“ᐃᑲᔪᕐᓂᖅ ᓂᕿᔅᓴᖃᑦᑎᐊᕈᑎᔅᓴᓂᑦ ᖃᐅᔨᔭᐅᓯᒪᒻᒪᑦ ᐊᑑᑎᖃᑦᑎᐊᕐᓂᖓᓂᒃ ᖃᓄᖅᑑᕈᑎᖃᕐᓂᕐᒥᒃ ᓯᐊᒻᒪᖁᓇᒍ ᓄᕙᕐᔪᐊᓇᖅᑐᖅ ᐊᓯᖏᓐᓂ ᓄᓇᓕᐅᔪᓂᑦ. ᖁᕕᐊᓱᑉᐳᒍᑦ ᐃᑲᔪᕆᐊᔅᓴᖅ ᖃᐅᓱᐃᑦᑐᕐᒥᐅᓂᑦ ᖃᓄᖅᑑᑎᓪᓗᒋᑦ ᐃᓕᑦᑐᐸᓪᓕᐊᒐᓱᑦᑎᓪᓗᒋᓪᓗ ᐃᓅᓯᖏᓐᓂ ᓄᕙᕐᔪᐊᓇᖅᑐᖅᑕᖃᖅᑎᓪᓗᒍ ᓄᓇᖓᓐᓂ” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ.

“ᖃᐅᓱᐃᑦᑐᕐᒥᐅᑦ ᐊᓂᒍᐃᓂᐊᕐᒥᒻᒪᑕ ᑕᒪᑐᒥᖓ ᒪᓕᓪᓗᑎᒃ ᐃᓄᓕᒫᓄᑦ ᐋᓐᓂᐊᖅᑕᐃᓕᓂᕐᒧᑦ ᐊᑐᖁᔭᐅᓯᒪᔪᓂᑦ. ᖃᐅᔨᒪᑦᑎᐊᖅᑐᖓ ᑲᑐᔾᔨᓗᑕ, ᐱᐅᓯᕆᕙᓚᐅᖅᑕᑎᓐᓄᑦ ᐅᑎᕐᓂᐊᓂᑦᑎᓐᓂᒃ”, ᐅᖃᖅᑐᖅ ᕿᑭᖅᑕᓂᒃᑯᑦ ᑲᑎᒪᔨᖏᓐᓄᑦ ᑲᑎᒪᔨᐅᖃᑕᐅᔪᖅ ᖃᐅᓱᐃᑦᑐᕐᒥᐅᓂᑦ ᐹᓪ ᐊᒪᕈᐊᓕᒃ.

ᕿᑭᖅᑕᓂᒃᑯᑦ, ᑲᑐᔾᔨᖃᑎᖃᖅᑐᑎᒃ ᐅᑭᐅᖅᑕᖅᑐᒥ ᑯᐊᐸᒃᑯᓐᓂᑦ, ᐸᔪᑦᑎᕆᖃᑦᑕᓂᐊᖅᑐᑦ ᓂᕿᑖᕈᑎᔅᓴᓂᑦ ᓄᓇᓕᓐᓄᑦ ᖃᐅᓱᐃᑦᑐᕐᒥ.

ᐃᒫᒃ ᐋᖅᑭᓯᒪᓂᐊᖅᑐᑦ:

• ᐱᒋᐊᖅᑕᐅᑎᒋᓗᙱᒃ, ᕿᑭᖅᑕᓂᒃᑯᑦ ᐅᑭᐅᖅᑕᖅᑐᒥᓗ ᑯᐊᐸᒃᑯᑦ ᐸᔪᑦᑎᕆᖃᑦᑕᓂᐊᖅᑐᑦ ᑲᓲᑎᖃᑎᖃᖅᑕᐃᓕᓗᑎᒃ ᓂᕿᑖᕈᑎᔅᓴᓂᑦ ᐊᒥᓲᓂᓕᓐᓂᑦ $250.
• ᑐᖏᓕᐊᓂ ᓂᐅᕕᐅᑎᔅᓴᐃᑦ ᐊᒥᓲᓂᓖᑦ $250ᓂᑦ ᑐᓂᔭᐅᖃᑦᑕᓛᖅᑐᑦ ᑕᒫᓂ ᖃᓂᒋᔭᖓᓂᓘᓐᓃᑦ ᒫᑦᓯ 2, 2022.

ᑮᓇᐅᔭᑦ ᕿᑭᖅᑕᓂᒃᑯᑦ ᓄᕙᕐᔪᐊᓇᖅᑐᖅᑕᖃᕐᓂᖓᓄᑦ ᐃᑲᔫᑏᑦ ᐅᑯᓇᙶᕐᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᖃᖅᑳᕐᓯᒪᔪᓄᑦ ᓄᓇᓕᓐᓄᑦ ᐃᑲᔫᑎᓂᑦ ᑮᓇᐅᔭᓂᑦ.

 ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᐅᕋᑎ,
ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
kflaherty@qia.ca
867.975.8432 or
1.800.667.2742