ᐃᖃᓗᐃᑦ, ᓄᓇᕗᑦ, ᔮᓐᓄᐊᓕ 6, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ (ᕿᑭᖅᑕᓂᒃᑯᑦ) ᐱᓇᓱᐊᕈᑎᖏᑦ ᐃᑲᔪᕈᒪᓪᓗᑎᒃ ᓂᕿᔅᓴᖃᑦᑎᐊᑎᑦᑎᓂᕐᒥᒃ ᐊᒻᒪᓗ ᐃᓄᑑᑦᑎᐅᕐᓯᒪᓗᑎᒃ ᐊᓂᑦᑕᐃᓕᑲᐃᓐᓇᕆᐊᓕᓐᓄᑦ ᓄᕙᕐᔪᐊᓇᖅᑐᒧᑦ ᐊᐃᑦᑐᖅᑕᐅᓯᒪᔪᓂᑦ ᓄᓇᓕᐅᔪᓂᑦ ᑲᔪᓯᕗᑦ ᓄᑖᓂᑦ ᓂᕿᑖᕈᑎᔅᓴᓂᑦ ᐃᑲᔫᑎᖃᖅᑐᑎᒃ ᑭᙵᕐᓂᑦ. ᕿᑭᖅᑕᓂ ᓄᓇᓖᑦ ᐃᓄᐃᑦ ᑭᙵᕐᓂᑦ ᓂᕿᑖᕈᑎᔅᓴᓂᑦ ᐱᖃᑦᑕᕈᓐᓇᓂᐊᕐᖓᑕ $250ᒥᑦ ᐊᑭᓕᓐᓂᑦ ᐊᑐᓂᑦ.

“ᓄᕙᕐᔪᐊᓇᖅᑐᖅ ᓯᐊᒻᒪᐸᓪᓕᐊᑎᓪᓗᒍ ᐊᒥᓱᒃᑲᓂᕐᓄᑦ ᓄᓇᓕᓐᓄᑦ, ᕿᑭᖅᑕᓂᒃᑯᑦ ᐃᑲᔪᕐᓂᐊᕐᖓᑕ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ, “ᕿᑭᖅᑕᓂᒃᑯᑦ ᐅᖁᒪᐃᓪᓕᐅᖏᓐᓂᕐᓴᐅᖁᔨᒻᒪᑕ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ ᐃᓚᒌᒡᒍᑎᓂᑦ ᑕᐃᒫᒃ ᒪᑭᑉᐸᓪᓕᐊᓴᕋᐃᓐᓂᕐᓴᐅᓂᐊᕋᑦᑕ.”

“ᑭᙵᕐᒥᐅᑦ ᒪᑭᑕᒋᐊᒃᑲᓂᕐᓯᑎᐊᓘᒻᒪᑕ,” ᐅᖃᖅᑐᖅ ᕿᑭᖅᑕᓂᒃᑯᓐᓄᑦ ᑲᑎᒪᔨᐅᖃᑕᖅ ᑲᑎᒪᔨᓂᑦ ᒫᑎᐅ ᓴ. ᔮ. “ᑖᒃᑯᐊ ᐃᑲᔫᑎᑖᖅᑲᐅᑦ ᐊᑐᕐᓗᒋᑦ ᕿᑭᖅᑕᓂᒃᑯᓐᓂᑦ ᖃᐅᔨᒪᔪᖓ ᒪᓕᒃᑯᑦᑕ ᐃᓄᓕᒫᓄᑦ ᐋᓐᓂᐊᖅᑕᐃᓕᑎᑦᑎᓂᕐᒧᑦ ᐊᑐᖁᔭᐅᓯᒪᔪᓂᑦ, ᐃᑲᔪᕐᓂᐊᕐᒥᒐᑦᑕ ᓄᓇᖅᑲᑎᑦᑎᓐᓂᒃ ᖃᓄᐃᙱᑎᑦᑎᓂᕐᒥᒃ ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒥᓪᓗ.”

ᕿᑭᖅᑕᓂᒃᑯᑦ ᑐᓂᓯᐅᖅᑲᐃᒻᒪᑕ ᓂᕿᑖᕈᑎᔅᓴᓂᑦ ᑭᙵᕐᓂᑦ ᑲᑐᔾᔨᖃᑎᖃᖅᑐᑎᒃ ᐅᑭᐅᖅᑕᖅᑐᒥ ᑯᐊᐸᒃᑯᓐᓂᑦ. ᑮᓇᐅᔭᑦ ᕿᑭᖅᑕᓂᒃᑯᑦ ᓄᕙᕐᔪᐊᓇᖅᑐᖅᑕᖃᖅᑎᓪᓗᒍ ᐃᑲᔫᑎᖏᑦ ᑲᓇᑕᐅᑉ ᒐᕙᒪᒃᑯᖏᓐᓃᙶᕐᓯᒪᔪᑦ ᓄᓇᖃᖅᑳᕐᓯᒪᔪᓄᑦ ᓄᓇᓕᐅᔪᓄᑦ ᐃᑲᔫᑎᓂᑦ ᑮᓇᐅᔭᓂᑦ.

ᐃᒫᒃ ᐋᖅᑭᓯᒪᓂᐊᖅᑐᑦ:

• ᐱᒋᐊᖅᑕᐅᑎᒋᓗᑎᒃ ᐃᕐᖐᓐᓇᖅ, ᕿᑭᖅᑕᓂᒃᑲᑦ ᐅᑭᐅᖅᑕᖅᑐᒥᓗ ᑯᐊᐸᒃᑯᑦ ᑐᓂᓯᐅᖅᑲᐃᓯᓂᐊᖅᑐᑦ ᓂᕿᑖᕈᑎᔅᓴᓂᑦ ᐊᒥᓲᓂᓕᓐᓂᑦ $250.  
• ᓂᕿᑦ ᐸᔪᑦᑎᕆᖃᑦᑕᓂᐊᕐᒥᔪᑦ ᑲᓲᑎᖃᑎᖃᖅᑕᐃᓕᓗᑎᒃ ᐊᑐᓂᑦ ᐃᓄᓐᓂᑦ ᐃᓪᓗᒥᐅᖃᑎᒌᓄᑦ ᑭᙵᕐᓂᑦ.
• ᑐᖏᓕᐊᓂ ᓂᐅᕕᐅᑎᔅᓴᐃᑦ ᐊᒥᓲᓂᓖᑦ $250ᓂᑦ ᑐᓂᐅᖅᑲᖅᑕᐅᓛᖅᑐᑦ ᑕᒫᓂ ᖃᓂᒋᔭᖓᓂᓘᓐᓃᑦ ᔮᓐᓄᐊᓕ 17, 2022.

ᐃᓄᐃᑦ ᐃᓪᓗᒥᐅᖃᑎᒌᒐᓴᐃᑦ ᐊᑕᐅᑦᑎᒥ ᐅᖄᓚᖃᑦᑕᖁᔭᐅᒐᓗᐊᑦ ᕿᑭᖅᑕᓂᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖓᓐᓄᑦ ᑐᑭᓯᒋᐊᒃᑲᓐᓂᖃᑦᑕᕐᓗᑎᒃ ᐃᑲᔫᑎᔅᓴᑲᓐᓃᑦ ᒥᔅᓵᓄᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ, ᑎᑎᕋᕈᓐᓇᖅᑐᓯ ᖃᕋᓴᐅᔭᒃᑯᑦ ᐃᕐᖐᓐᓈᕈᑎᒃᑯᑦ: COVID-19@qia.ca ᐅᖄᓚᓗᓯᓗᓐᓃᑦ ᐅᕗᖓ: 1-867-975-8383.

ᐊᑏ ᖃᐅᔨᒋᐊᖃᑦᑕᕆᔅᓯ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓄᑦ ᐅᕗᖓ qia.ca ᑐᑭᓯᑦᑎᐊᕐᓂᐊᕋᔅᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:
ᐅᐃᓪ Hᐊᑉᑭᓐᔅ, ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742