ᐃᖃᓗᐃᑦ, ᓄᓇᕗᑦ − ᐄᐳᓗ 1, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᓇᓪᓕᒍᓱᑉᐳᑦ ᐃᓚᖏᓐᓂᒃ, ᐱᖃᑎᖏᓐᓂᒃ ᓄᓇᖅᑲᖏᓐᓂᓪᓗ ᓄᓇᕗᑦ ᐅᖃᖅᑎᒋᓚᐅᖅᑕᖓᑕ ᔫ ᐃᓄᒃ, ᐃᓅᔪᓐᓃᓚᐅᕐᖓᑦ ᐱᓇᓱᐊᕈᓯᐅᓚᐅᖅᑐᒥ ᐊᑯᓂᐅᙱᑦᑐᖅ ᐋᓐᓂᐊᓚᐅᖅᑐᓂ.

“ᐃᓱᒪᒋᕙᒃᑲ ᔫ ᐃᓅᑉ ᐃᓚᖏᑦ, ᐱᓗᐊᖅᑐᒥᑦ ᓄᓕᐊᖓ ᒥᐊᓕ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᔫ ᓴᐳᓐᓂᐊᖅᑎᓪᓚᕆᐅᓚᐅᕐᖓᑦ ᑭᒡᒐᖅᑐᐃᕙᑦᑐᓂ ᓂᕈᐊᖅᑎᒋᓯᒪᔭᒥᓂᒃ, ᐃᖅᑲᓇᐃᔭᕐᐸᑦᑐᓂ ᑕᖃᓱᐃᑦᑑᓪᓗᓂ ᐱᓇᓱᐊᕈᑕᐅᕙᑦᑐᓂᑦ ᐱᓇᓱᐊᕋᔅᓴᖃᕈᑕᐅᓂᐊᖅᑐᓂᑦ ᐊᒻᒪᓗ ᐃᖅᑲᓇᐃᔮᔅᓴᖃᕈᑕᐅᓂᐊᖅᑐᓂᑦ ᐃᓄᓐᓄᑦ ᒥᑦᑎᒪᑕᓕᒻᒥ. ᐃᓅᔪᓐᓃᕐᓂᖓ ᐃᓚᙵᕈᑕᐅᒻᒪᑦ ᓄᓇᕗᒻᒥᐅᓕᒫᓄᑦ ᐃᓄᓐᓄᑦ, ᐱᓗᐊᖅᑐᒥᑦ ᒥᑦᑎᒪᑕᓕᒻᒥᐅᓄᑦ.”

ᔫ ᐃᓄᒃ ᓂᕈᐊᖅᑕᐅᑲᓐᓂᓚᐅᕐᓯᒪᒻᒪᑦ ᐅᑐᐱᕆ 30, 2017ᖑᑎᓪᓗᒍ, ᑭᒡᒐᖅᑐᐃᔨᐅᓂᕐᒧᑦ ᑐᓄᓂᕐᒥᐅᓂᑦ ᑕᓪᓕᒪᒋᓕᖅᑕᖓᓐᓂ ᒪᓕᒐᓕᐅᕐᕕᒻᒧᑦ ᓄᓇᕗᒥ ᓂᕈᐊᖅᑐᖃᖅᑎᓪᓗᒍ. ᐃᓄᒃ ᐃᓕᑐᐃᓐᓇᔪᔪᖅ ᐅᖃᖅᑎᐅᓂᕐᒧᑦ ᓄᕕᐱᕆ 17, 2017ᖑᑎᓪᓗᒍ, ᓄᓇᕗᑦ ᓯᕗᓕᖅᑎᐅᓂᕐᒧᑦ ᑲᑎᒪᓂᖃᖅᑎᓪᓗᒋᑦ.  

ᐃᓄᒃ ᒪᓕᒐᓕᐅᖅᑎᐅᔪᔪᖅ ᐱᖓᔪᒋᓕᖅᑕᖓᓐᓂ ᑎᓴᒪᒋᓕᖅᑕᖓᓐᓂᓪᓗ ᒪᓕᒐᓕᐅᕐᕕᐅᑉ ᐊᐅᓚᓂᖓᓄᑦ. ᑎᓴᒪᒋᓕᖅᑕᖓᓐᓂ ᒪᓕᒐᓕᐅᕐᕕᐅᑉ ᐊᐅᓚᓂᖓᓂ ᐅᖃᖅᑎᒧᑦ ᑐᖏᓕᐅᔪᔪᖅ ᐊᒻᒪᓗ ᐃᔅᓯᕙᐅᑕᐅᓪᓗᓂ ᑲᑎᒪᔨᕋᓛᖏᓐᓄᑦ.

ᓯᕗᓂᐊᒍᑦ ᓂᕈᐊᕐᓇᐅᒍᒫᖅᑑᑉ ᒪᓕᒐᓕᐅᕐᕕᒻᒧᑦ, ᐃᓄᒃ ᓄᓇᓯ ᑯᐊᐳᕇᓴᒃᑯᓐᓂ ᐊᖏᔪᖅᑳᕐᒧᑦ−ᑐᖏᓕᕆᔭᐅᓚᐅᕐᓯᒪᔪᖅ ᓄᓇᕗᑦ ᐊᐅᓚᓂᖏᓐᓂ 2000ᒥ-2011ᒧᑦ. 1994ᒥ-2000ᒧᑦ ᐃᓄᒃ ᐃᖅᑲᓇᐃᔮᖃᓚᐅᕐᓯᒪᔪᖅ ᐊᖏᔪᖅᑳᕐᒧᑦ ᐃᑲᔪᖅᑎᐅᓂᕐᒥᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ.

ᐃᓄᒃ ᐃᔅᓯᕙᐅᑕᕆᔭᐅᓚᐅᕐᓯᒪᒻᒥᔪᖅ ᕿᑭᖅᑖᓗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑲᑎᒪᔨᐅᖃᑕᐅᓚᐅᕐᓯᒪᒋᓪᓗᓂ ᒥᑦᑎᒪᑕᓕᒻᒥᐅᑦ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᓐᓄᑦ. ᐃᖅᑲᓇᐃᔮᖃᖃᑦᑕᕐᓯᒪᓂᑰᓪᓚᕆᑦᑐᖅ ᑲᑎᒪᔨᓂᑦ ᐊᐅᓚᑦᑎᓂᕐᒨᖓᔪᓂᑦ ᑲᒪᒋᔭᖃᖃᑦᑕᓂᕐᒥᓪᓗ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓯᒪ ᓴHᐊ ᔨᐅᕋHᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ

szerehi@qia.ca

867.975.8413

1.800.667.2742