ᓴᖅᑭᑕᐅᑲᐅᑎᒋᔪᒃᓴᖅ

ᕿᑭᖅᑕᓂᒃᑯᑦ ᑐᙵᓱᑦᑎᑦᑎᕗᑦ ᒐᕙᒪᑐᖃᒃᑯᑦ ᐱᖁᑎᕐᔪᐊᓕᕆᓂᕐᒧᑦ ᐱᓇᓱᐊᕈᑎᖏᑦ ᕿᑭᖅᑕᕐᔪᐊᕐᒥ ᑐᓚᑦᑕᕕᔅᓴᖅ ᐊᒻᒪᓗ ᒥᑭᓐᓂᕐᓴᓄᑦ ᑐᓚᑦᑕᕕᔅᓵᖕᓄᒃ ᑲᖏᖅᑐᒑᐱᒃ ᐊᒻᒪᓗ ᐃᑉᐱᐊᕐᔪᒃ

ᐃᖃᓗᐃᑦ, ᓄᓇᕗᑦ − ᐋᒡᒌᓯ 4, 2021 – ᐅᓪᓗᒥ, ᐊᖏᔪᖅᑳᖅ ᐸᐅᓗᓯ ᐊᕿᐊᕈᖅ ᑲᑎᖃᑎᖃᖅᑲᐅᕗᖅ ᒐᕙᒪᑐᖃᒃᑯᑦ ᒥᓂᔅᑕᖓᓂᒃ ᐱᖁᑎᕐᔪᐊᓕᕆᓂᕐᒧᑦ ᐊᒻᒪᓗ ᓄᓇᓕᐅᔪᓄᑦ, ᐅᐱᓐᓇᖅᑐᖅ ᑲᑐᕋᓐ ᒪᒃᑲᓇ, ᓯᕗᓕᖅᑎᐅᑉ ᑐᒡᓕᐊ ᑕᐃᕕᑎ ᐊᕿᐊᕈᖅ, ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖅ ᓇᑖᓐ ᐆᐱᑦ ᓇᓗᓇᐃᖅᑕᐅᑎᓪᓗᒋᑦ $50−ᒥᓕᐊᓐ ᐅᖓᑖᓃᑦᑐᑦ ᑮᓇᐅᔭᑦ ᑐᕌᖓᓂᐊᖅᑐᑦ ᓄᑖᓂᒃ ᐱᖁᑎᕐᔪᐊᓕᕆᓂᕐᒧᑦ ᓴᓇᕙᓪᓕᐊᓂᐊᖅᑎᓪᓗᒋᑦ ᑐᓚᑦᑕᕕᓐᓂᒃ ᕿᑭᖅᑕᕐᔪᐊᕐᒥ ᐊᒻᒪᓗ ᒥᑭᓂᕐᓴᓂᒃ ᑐᓚᑦᑕᕕᓐᓂᒃ ᑲᖏᖅᑐᒑᐱᖕᒥ ᐊᒻᒪᓗ ᐃᑉᐱᐊᕐᔪᒻᒥ.

“ᐅᓪᓗᒥ ᓇᓗᓇᐃᕐᓯᕗᑦ ᓇᓗᓇᐃᒃᑯᑕᐅᓪᓗᓂ ᑲᔪᓯᕙᓪᓕᐊᑎᐊᕐᓂᖓᓂ ᐃᒫᓂ ᒪᑭᒪᓇᓱᐊᕈᑎᔅᓴᐅᓂᐊᖅᑐᑦ ᓄᓇᕗᒻᒥᒃ”. ᐅᖃᖅᑐᖅ ᕿᑭᖅᑕᓂᑯᑦ ᐊᖏᔪᖄᖓᑦ ᐸᐅᓗᓯ ᐊᕿᐊᕈᖅ.  “ᓴᓇᔭᐅᕙᓪᓕᐊᓂᐊᖅᑎᓪᓗᒋᑦ ᑐᓚᖅᑕᕐᕕᒃ ᕿᑭᖅᑕᕐᔪᐊᕐᒥ, ᐊᒻᒪᓗ ᑐᓚᑦᑕᕐᕕᕋᓛᓕᐊᕆᔭᐅᓂᐊᖅᑐᑦ ᐃᑉᐱᐊᕐᔪᒻᒥ ᐊᒻᒪᓗ ᑲᖏᖅᑐᒑᐱᖕᒥ, ᑲᔪᓯᕙᓪᓕᐊᓂᕆᔭᖏᑦ ᑕᐅᑐᓚᐅᖅᑕᕗᑦ ᓯᕗᓂᑦᑎᓐᓂ ᓴᖅᑭᐸᓪᓕᐊᓕᕐᖓᑕ ᓄᓇᕗᒻᒥ ᑲᔪᓯᓂᖃᑦᑎᐊᐸᓪᓕᐊᓕᕐᖓᑕ ᐃᒫᓂ ᒪᑭᒪᓇᓱᐊᕈᑎᔅᓴᐃᑦ ᐆᑦᑑᑎᒋᓗᒍ ᐃᖃᓗᓕᕆᓂᖅ”.

“ᐊᖏᔪᖅᑳᖅ ᐊᕿᐊᕉᑉ ᑕᐅᑐᑦᑕᖓ ᐃᒫᓂ ᒪᑭᒪᓇᓱᐊᕈᑎᔅᓴᐃᑦ ᑐᕌᖓᑐᐃᓐᓇᖏᒻᒪᓐ ᓄᓇᕘᒧᑦ ᑭᓯᐊᓂᑦᑕᐅᖅ ᓄᓇᕐᔪᐊᓕᒫᒧᑦ”, ᐅᖃᖅᑐᖅ ᒥᓂᔅᑕ ᒪᒃᑲᓇ.

$40-ᒥᓕᐊᓐ ᒐᕙᒪᑐᖃᒃᑯᓐᓄᑦ ᑮᓇᐅᔭᑦ ᑐᓂᔭᐅᔪᑦ ᑐᕌᖓᓂᐊᖅᑐᖅ ᑐᓚᑦᑕᕐᕕᓕᐊᖑᓂᐊᖅᑐᒧᑦ ᕿᑭᖅᑕᕐᔪᐊᒧᑦ.  ᐱᓕᕆᐊᔅᓴᐅᔪ ᐊᓪᓗᕆᐊᕈᑎᐅᓂᐊᖅᑐᖅ ᐃᒫᓂ ᒪᑭᒪᓇᓱᐊᕈᑎᓄᑦ ᖃᓄᖅᑑᕈᑎᓄᑦ ᑕᒫᓂ ᕿᑭᖅᑲᓃᒥ.  ᑐᓚᑦᑕᕐᕕᐅᓂᐊᖅᑐ ᕿᑭᖅᑕᕐᔪᐊᒥ ᐃᑲᔫᑎᖃᒻᒪᕆᓐᓂᐊᑐᖅ ᐃᖃᓗᒐᓲᑏᑦ ᐅᒥᐊᕐᔪᐊᕐᓄᑦ ᑐᓚᒍᓐᓇᖃᑦᑕᓂᐊᓕᕐᖓᑕ ᓄᓇᖁᑎᑦᑎᓐᓄᑦ ᐊᒻᒪᓗ ᐃᑲᔫᑎᖃᓪᓚᕆᓐᓂᐊᖅᑐᓂᓗ ᐸᕐᓴᐃᔨᒃᑯᓐᓂ ᕿᓂᖅᑕᐅᔪᖃᕆᐊᖃᓕᖅᑲᑦ.  ᑖᓐᓇ ᓇᓗᓇᐃᖅᑕᐅᓂᖓ ᓇᓗᓇᐃᖅᓯᑲᓐᓂᖅᑐᖅ ᓱᓕᒻᒪᑕ ᑮᓇᐅᔭᓕᐅᕋᓱᐊᕐᓂᒥᒃ, ᐃᓄᓕᕆᓂᕐᒥᒃ ᐊᒻᒪᓗ ᐃᓕᖅᑯᓯᑦᑎᓐᓄᑦ ᐱᕚᓪᓕᕈᑕᐅᓂᐊᕐᒪᑦ ᕿᑭᖅᑕᓂ ᓄᓇᖁᑎᖏᓐᓄᑦ ᐊᒻᒪᓗ ᓄᓇᕘᑦ ᐃᓗᐃᑦᑑᓗᒍ.

$15.588−ᒥᓕᐊᓐ ᒐᕙᒪᑐᖃᒃᑯᑦ ᑮᓇᐅᔭᑦ ᑐᓂᔭᑦ ᑐᕌᖓᓂᐊᕆᓪᓗᑎ ᒥᑭᓂᕐᓴᐅᔪᓄᑦ ᑐᓚᑦᑕᕐᕖᓐᓄᒃ ᑲᖏᖅᑐᒑᐱᖕᒧᑦ ᐊᒻᒪᓗ ᐃᑉᐱᐊᕐᔪᒧᑦ.  ᑖᒃᑯᐊ ᐃᑲᔪᑎᖃᕐᓂᐊᕐᒥᔪᒃ ᐃᓄᖕᓂ ᓄᓇᓕᒋᔭᖏᓐᓂᒃ ᐊᖑᓇᓱᓐᓂᒃᑯᑦ ᐊᒻᒪᓗ ᐱᐅᓯᑐᖃᖏᑦ ᑲᔪᓯᓂᖃᑦᑎᐊᕐᓂᐊᕈᓪᓗᑎ ᐊᕐᕌᒍᓂᒃ ᐊᒥᓱᓂᒃ.

ᑐᑭᓯᒋᐊᒃᑲᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᐅᓇ:

ᐅᐃᓪ Hᐊᑉᑭᓐᔅ,
ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᒧᑦ ᑐᓴᐅᒪᖃᑦᑕᐅᑎᑎᑦᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

whopkins@qia.ca

867.975.8413/1.800.667.2742