ᔫᓂ 24, 2022, ᐃᖃᓗᐃᑦ, ᓄᓇᕗᑦ – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᖅᑲᐃᑎᑦᑎᒋᐊᖅᑯᑦ ᐃᒃᐱᐊᕐᔪᒻᒥᐅᓂᑦ, ᑲᖏᖅᑐᒑᐱᒻᒥᐅᓂᑦ, ᓴᓂᕋᔭᒻᒥᐅᓂᑦ, ᐃᒡᓗᓕᒻᒥᐅᓂᑦ ᒥᑦᑎᒪᑕᓕᒻᒥᐅᓂᓪᓗ ᑖᒃᑯᐊ ᕿᑭᖅᑕᓂᒃᑯᑦ ᑮᓇᐅᔭᓂᑦ ᑐᔅᓯᕋᕐᕕᐅᖃᑦᑕᕈᓐᓇᕐᖓᑕ ᐊᕐᕌᒍᓕᒫᖅ ᖃᖓᑐᐃᓐᓇᖅ ᐅᑯᓇᙵᑦ ᐃᓚᒌᒃᑐᓄᑦ ᑮᓇᐅᔭᑦ, ᑮᓇᐅᔭᓄᑦ ᐊᐅᓚᕕᖓᓐᓂ ᐊᕐᕌᒍ 2022-23.

ᐃᓚᒌᒃᑐᓄᑦ ᑮᓇᐅᔭᑦ ᐃᓚᒋᔭᐅᒻᒪᑕ ᓄᓘᔮᓐᓂ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᓂᑦ (IIBA), ᐊᒻᒪᓗ ᐋᖅᑭᑦᑕᐅᓯᒪᓪᓗᑎᒃ ᑲᑐᔾᔨᓪᓗᑎᒃ ᐃᑲᔫᑎᖃᕐᐸᑦᑐᑎᒃ ᐹᕕᓐᓛᓐ ᓴᕕᕋᔭᔅᓴᓂᑦ ᐅᔭᕋᓐᓂᐊᖅᑏᑦ (BIMC) ᐊᒻᒪᓗ ᕿᑭᖅᑕᓂᒃᑯᑦ.

ᑮᓇᐅᔭᑦ ᐊᐅᓚᑕᐅᕙᑦᑐᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᐋᖅᑭᑦᑕᐅᓯᒪᓪᓗᑎᒃ ᐱᔾᔪᑎᒋᓪᓗᒍ ᕿᑭᖅᑕᓂᒃᑯᑦ ᐊᒻᒪᓗ ᐃᓄᐃᑦ ᑐᑭᓯᓯᒪᒻᒪᑕ ᐊᑑᑎᖃᓪᓚᕆᑦᑐᓂᑦ ᐋᖅᑭᒋᐊᕈᑎᑕᖃᕆᐊᖃᕐᖓᑦ ᓄᓇᓖᑦ ᐱᓕᕆᔪᓐᓇᕐᓯᑎᑕᐅᕙᓪᓕᐊᓗᑎᒃ, ᐱᓗᐊᖅᑐᒥᑦ ᑕᒫᓂ ᐊᑐᖅᑕᑎᓐᓂ ᐊᖏᓪᓕᕙᓪᓕᐊᑎᓪᓗᒋᑦ ᐊᒻᒪᓗ ᐊᓯᔾᔨᐸᓪᓕᐊᑎᓪᓗᒋᑦ ᓄᓇᒥᐅᑕᓕᕆᓂᕐᒥ ᐱᕙᓪᓕᐊᓂᐅᔪᑦ, ᕿᑭᖅᑕᓂ ᓄᓇᖃᕐᕕᑎᓐᓂ.

ᓄᓇᖃᕈᕕᑦ ᓇᓕᐊᓐᓂᑐᐃᓐᓇᖅ ᑖᒃᑯᓇᓂ ᑕᓪᓕᒪᓂᑦ (5) ᐊᑑᑎᕕᐅᔪᓂᑦ ᓄᓇᓕᓐᓂᑦ ᐊᒻᒪᓗ ᑐᔅᓯᕋᐅᓯᐅᕈᒪᒍᕕᑦ ᑮᓇᐅᔭᓂᑦ ᐊᑏ ᐅᖃᓕᒫᕐᓂᐊᖅᑲᑎᑦ ᐃᓚᒌᒃᑐᓄᑦ ᑮᓇᐅᔭᓄᑦ ᐊᑐᐊᒐᑦ, ᐊᒻᒪᓗ ᖃᕋᓴᐅᔭᕐᒨᑎᓐᓂᐊᖅᑲᑎᑦ ᐃᓚᒌᒃᑐᓄᑦ ᑮᓇᐅᔭᓂᑦ ᑐᔅᓯᕋᐅᑏᑦ ᑎᑎᕋᕐᕕᒋᒋᐊᓖᑦ.

ᒪᕐᕈᐃᓕᖅᑲᖓᒻᒪᑕ ᑮᓇᐅᔭᑦ ᐱᔭᔅᓴᐃᑦ, ᓯᕗᓪᓖᑦ 1 ᑎᑭᐅᒪᔪᑦ $30,000ᓄᑦ ᐊᒻᒪᓗ ᐊᐃᑉᐸᖏᑦ 2 ᑐᔅᓯᕌᖑᔪᓐᓇᖅᑐᑦ ᑮᓇᐅᔭᑦ ᐊᒥᓲᓂᓕᓐᓄᑦ $30,000 ᐅᖓᑖᓄᓪᓗ.  ᕿᑭᖅᑕᓂᒃᑯᑦ ᐃᑲᔪᖃᑦᑕᕐᓯᒪᔪᑦ ᓯᕗᓪᓕᕐᓂᑦ ᐱᓕᕆᐊᔅᓴᓂᑦ ᒪᑯᓂᖓ ᒥᕐᓱᖃᑦᑕᓂᕐᒨᖓᔪᓂᑦ, ᐊᖑᓇᓱᓐᓂᕐᒨᖓᔪᓂᑦ ᐊᒻᒪᓗ ᐊᓐᓇᐅᒪᓂᕐᒥᒃ ᐃᓕᓐᓂᐊᑎᑦᑎᖃᑦᑕᓂᕐᒥᒃ, ᐃᖅᑲᓇᐃᔮᔅᓴᓄᑦ ᐅᐸᓗᖓᐃᔭᕐᓂᕐᒥᒃ ᐃᓕᓐᓂᐊᓂᕐᒥᒃ ᐊᒻᒪᓗ ᐊᐃᑉᐸᖏᓐᓂ ᐱᓕᕆᐊᔅᓴᓂᑦ ᓂᖀᓱᕐᕕᐅᕙᑦᑐᓄᑦ ᐃᑲᔫᑏᑦ, ᖃᑭᒪᒍᑎᔅᓴᓕᐅᕋᓱᐊᖅᑎᐅᒐᑎᒃ ᑎᒥᐅᔪᓄᑦ ᑲᒪᒋᔭᖃᕐᐸᑦᑐᓄᑦ ᓄᓇᓕᓐᓂᑦ ᐃᖃᐃᓕᓴᕐᓂᕐᒨᖓᔪᓂᑦ ᐱᙳᐊᓂᕐᒨᖓᔪᓂᑦ.

ᑐᔅᓯᕋᐅᓯᐅᖃᑦᑕᕈᓐᓇᖅᑐᑦ ᑎᓕᐅᖅᑕᐅᕗᑦ ᐅᖃᕐᕕᖃᖃᑦᑕᖁᔭᐅᓪᓗᑎᒃ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᓕᕆᔨᖓᓐᓂᒃ, ᑐᓐᓂᖅᑯᓯᐊᔅᓴᓂᑦ ᐃᑲᔫᓯᐊᔅᓴᓂᓪᓗ ᑕᕝᕗᖓ ᑐᕌᕈᑎᖓᓄᑦ ᑐᔅᓯᕋᐅᑎᓂᑦ ᑲᒪᓕᕋᐃᑉᐸᑕ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐱᔭᕇᕐᓯᒪᑦᑎᐊᕋᓗᐊᕐᒪᖔᑕ, ᐱᑦᑎᐊᕐᓯᒪᒐᓗᐊᕐᒪᖔᑕ, ᐊᒻᒪᓗ ᑮᓇᐅᔭᓂᑦ ᐱᓇᓱᐊᕈᓐᓇᕐᒪᖔᑕ.

ᑐᔅᓯᕋᐅᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᖃᕋᓴᐅᔭᒃᑯᑦ ᐅᕝᕙᓘᓐᓃᑦ ᐊᖅᑯᑎᒋᓗᒍ ᐃᑲᔫᓯᐊᔅᓴᓕᕆᔨᕗᑦ, ᑐᓐᓂᖅᑯᓯᐊᔅᓴᓂᑦ ᐃᑲᔫᓯᐊᔅᓴᓂᓪᓗ:

ᓘᓯ ᑯᓪᓗᕈᖅᑐᖅ

ᐃᓚᒌᒃᑐᓄᑦ− ᐃᑲᔫᓯᐊᔅᓴᓕᕆᔨ, ᑐᓐᓂᖅᑯᓯᐊᔅᓴᓂᑦ ᐃᑲᔫᓯᐊᔅᓴᓂᓪᓗ

lkuluguqtuq@qia.ca

(ᐅ) 867-975-8400 (ᐅᖓᓯᑦᑐᒥᒃ−ᐊᑭᖃᙱᑦᑐᖅ) 1-800-667-2742