ᐃᖃᓗᐃᑦ, ᓄᓇᕗᑦ − ᐋᒡᒌᓯ 4, 2022 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᒫᓐᓇ ᑐᓂᓯᔭᐅᖃᑦᑕᕈᓐᓇᓕᕐᒥᔪᑦ ᑐᔅᓯᕋᐳᑎᓂᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᔅᓴᓄᑦ (QCAP) ᐊᕐᕌᒍᒧᑦ 2022-2023.
ᐊᑐᓂᑦ ᐃᓄᐃᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᖃᑎᒌᑦ ᕿᑭᖅᑕᓂ ᓄᓇᓕᓐᓃᑦᑐᑦ ᑐᓂᓯᖃᑦᑕᖁᔭᐅᓪᓗᑎᒃ ᑎᓕᐅᖅᑕᐅᕗᑦ ᑐᔅᓯᕋᐅᑎᓂᑦ ᐱᓕᕆᐊᔅᓴᓄᑦ ᐊᐅᓚᓂᖃᕋᔭᖅᑐᓄᑦ ᐅᑐᐱᕆ 1, 2022ᒥ ᒫᑦᓯ 31, 2023ᒧᑦ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᔅᓴᓄᑦ ᐃᑲᔫᑎ ᑮᓇᐅᔭᖅᑖᑎᑦᑎᓲᖑᒻᒪᑕ ᓄᓇᖠᓐᓂᑦ ᐱᓕᕆᐊᔅᓴᓄᑦ ᓄᓇᓕᓐᓂᑦ ᐃᓚᒋᔭᐅᑎᑦᑎᕙᑦᑐᓄᑦ ᐃᓕᓐᓂᐊᑎᑦᑎᒍᑕᐅᕙᑦᑐᓄᓪᓗ ᐱᐅᓯᖅᑎᒍᑦ ᐃᓕᑦᑎᓯᒪᔭᐅᔪᓂᑦ, ᒪᑯᓂᖓ ᓲᕐᓗ ᒥᖅᓱᖃᑦᑕᕐᓂᖅ, ᐊᖑᓇᓱᖃᑦᑕᕐᓂᖅ, ᐊᒻᒪᓗ ᐊᐅᓪᓚᕐᓯᒪᓗᓂ ᐱᓕᕆᓂᐅᕙᑦᑐᓂᑦ. ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕿᐊᖅ ᑮᓇᐅᔭᓕᕆᔾᔪᑎᔅᓴᖃᕐᐸᑦᑐᖅ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᓄᑦ ᑮᓇᐅᔭᓃᙶᖅᑐᓂᑦ.
ᑐᔅᓯᕋᐅᑏᑦ ᑮᓇᐅᔭᓂᑦ ᑎᑎᕋᕐᕕᐅᖃᑦᑕᕈᓐᓇᖅᑐᑦ ᖃᕋᓴᐅᔭᒃᑯᑦ ᐅᕙᙵᑦ, https://www.qia.ca/qcap-application/, ᐅᕝᕙᓘᓐᓃᑦ ᐃᑲᔪᖅᑎᖃᕐᓗᑎᒃ ᓄᓇᔅᓯᓐᓂ ᑐᓴᐅᒪᑎᑦᑎᔨᓂᑦ
ᐃᓚᖏᑦ ᑐᑭᓕᐅᑎᔪᓐᓇᖅᑕᕗᑦ ᐱᓕᕆᐊᖑᖃᑦᑕᕐᓯᒪᔪᑦ ᐊᖏᖅᑕᐅᖃᑦᑕᕐᓯᒪᔪᑦ ᐱᔭᕇᖅᑕᐅᖃᑦᑕᕐᓯᒪᓪᓗᑎᓪᓗ 2021-2022 ᐊᕐᕌᒍᒥ: ᕿᓯᓕᕆᔾᔪᑎᔅᓴᐃᑦ ᐃᒋᕐᕈᑏᑦ ᐊᒻᒪᓗ ᕿᑦᑎᕆᓂᖅ, ᐅᑭᐅᒃᑯᑦ ᐃᖃᓪᓕᐊᕐᓯᒪᖃᑦᑕᕐᓂᖅ ᐊᒻᒪᓗ ᐅᒥᖕᒪᒐᓱᖃᑦᑕᕐᓂᖅ, ᐃᖃᓪᓕᐊᕐᓯᒪᖃᑦᑕᕐᓂᖅ ᐱᑦᑎᓕᐅᖃᑦᑕᓂᕐᓗ, ᖁᓕᑦᑕᐅᔭᓕᐅᖃᑦᑕᕐᓂᖅ ᐊᖑᓇᓱᑦᑎᓄᑦ, ᐱᖅᑯᓯᖅᑎᒍᑦ ᐊᓃᖅᑐᕐᓯᐅᑎᓂᑦ ᓴᓇᖃᑦᑕᕐᓂᖅ, ᐊᒪᐅᓯᐅᕐᓂᖅ ᖁᓕᑦᑕᐅᔭᓕᐅᕐᓂᕐᓗ ᐊᒻᒪᓗ ᑲᒻᒥᐅᕐᓂᖅ.
ᐊᑲᐅᙱᓕᐅᕈᑎᖃᕈᕕᑦ, ᐊᐱᖅᑯᑎᔅᓴᖃᕈᕕᓪᓘᓐᓃᑦ ᑐᑭᓯᒋᐊᒃᑲᓐᓂᕈᒪᒍᕕᓪᓘᓐᓃᑦ ᖃᓄᐃᑦᑑᒻᒪᖔᑕ ᐱᓕᕆᐊᑦ ᑲᒪᒋᔪᓐᓇᖅᑕᑎᑦ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᕈᕕᑦ ᖃᕋᓴᐅᔭᒃᑯᑦ ᐅᕝᕙᓘᓐᓃᑦ ᐸᐃᑉᐹᑎᒍᑦ ᑐᔅᓯᕋᐅᑎᓐᓂᒃ ᑲᒪᑎᓪᓗᑎᑦ, ᐅᖄᓚᒍᓐᓇᖅᑐᑎᑦ ᐅᕙᑦᑎᓐᓄᑦ ᐅᕗᖓ 867-975-8446, ᐊᑭᖃᙱᒃᑯᑦ ᐅᕗᖓ 1-800-667-2742 ᐃᕐᖐᓈᖅᑕᐅᑎᒃᑯᓘᓐᓃᑦ ᐅᕗᖓ qcap@qia.flywheelsites.com
