ᐃᖃᓗᐃᑦ, ᓄᓇᕗᑦ – ᐄᐳᓗ 8. 2024 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᖁᕕᐊᓱᑦᑐᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑦ (NTI) ᓄᑖᕈᖅᑎᑦᑎᒋᐊᔪᒻᒪᑕ ᐃᓚᓕᐊᕆᐊᓕᓐᓄᑦ ᐃᓚᐃᖅᑐᓄᓪᓗ ᖃᖓᑦᑕᐅᑎᔅᓴᓄᑦ ᐊᑐᐊᒐᕐᓂᑦ ᑖᒃᑯᐊ ᑲᔪᓯᑎᑕᐅᔪᔪᑦ ᒫᑦᓯᐅᑎᓪᓗᒍ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᓐᓂᑦ ᑲᑎᒪᑎᓪᓗᒋᑦ. ᐃᓚᐃᖅᑐᓄᑦ ᐃᓚᓕᐊᕆᐊᓕᓐᓄᓪᓗ ᖃᖓᑦᑕᐅᑎᔅᓴᓄᑦ ᐃᑲᔫᑏᑦ ᐋᖅᑭᑦᑕᐅᓯᒪᒻᒪᑕ ᐃᑲᔫᑕᐅᖃᑦᑕᕈᒫᕐᓂᐊᖅᑐᑎᒃ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᑕᑯᔭᖅᑐᕈᑎᔅᓴᐅᓪᓗᑎᒃ ᐃᓚᖏᓐᓂᒃ ᐋᓐᓂᐊᔪᒥᒃ ᖁᓚᕐᓇᕐᓯᔪᖃᖅᑎᓪᓗᒍ ᐅᕝᕙᓘᓐᓃᑦ ᐃᓗᕕᖅᑕᐅᔪᖃᕐᓂᐊᑎᓪᓗᒍ ᐃᓚᙵᕈᑎᖓᓂᒃ ᐃᓚᒌᑦ.

ᓄᑖᕈᖅᑎᑕᐅᒋᐊᖅᑐᑦ ᐊᑐᐊᒐᑦ ᐊᑐᓯᓚᐅᕐᖓᑕ ᐄᐳᓗ 1, 2024ᖑᑎᓪᓗᒍ. ᖃᐅᔨᒪᔭᐅᔭᕆᐊᓖᑦ ᓄᑖᑦ ᐃᑲᔫᑎᓂᑦ ᐊᑐᐊᒐᕐᓂᑦ ᐅᑯᐊ:

• ᐱᖓᓱᓄᑦ ᑎᑭᐅᒪᒍᓐᓇᕐᓯᔪᑦ ᐃᓚᒌᑦ ᐃᓚᒌᓄᑦ ᑐᔅᓯᕋᐅᑕᐅᔪᓐᓇᖅᑐᑦ ᐃᓚᓕᐊᕆᐊᖃᖅᑎᓪᓗᒋᑦ ᐊᒻᒪᓗ ᐃᓚᙵᖅᑎᓪᓗᒋᑦ ᖃᖓᑦᑕᐅᑎᔅᓴᓄᑦ ᐃᑲᔫᓯᐊᔅᓴᓂᑦ;
• ᐅᓯᔭᐅᔾᔪᑎᔅᓴᓄᑦ ᑎᒥᒥᒃ ᒫᓐᓇ ᐃᓚᓕᐅᔾᔨᓯᒪᓕᖅᑐᑦ, ᖄᖓᒍᑦ ᐃᓚᐃᖅᑐᓄᑦ ᖃᖓᑦᑕᐅᑎᔅᓴᓄᑦ ᐃᑲᔫᓯᐊᔅᓴᓄᑦ;
• ᑐᔪᕐᒥᔾᔪᑎᓄᑦ ᐊᑭᓕᐅᑎᒥᓃᑦ ᑐᔅᓯᕋᐅᑕᐅᖃᑦᑕᕈᓐᓇᕐᓯᔪᑦ ᐅᑎᖅᑎᑦᑎᕕᐅᔪᒪᓗᑎᒃ, ᑎᓴᒪᓄᑦ ᐅᓪᓗᓄᑦ ᑎᑭᐅᒪᓗᒋᑦ ᐅᕝᕙᓘᓐᓃᑦ $1000 – ᓇᓪᓕᐊᑐᐃᓐᓇᖅ ᐊᑭᑭᓐᓂᕐᓴᖅ ᐊᑐᕐᓗᒍ, ᐃᓚᒌᓄᑦ ᐊᖅᑯᓵᕆᐊᖃᕐᐸᑦᑐᓄᑦ, ᓯᓚ ᐱᔾᔪᑎᒋᓪᓗᒍ, ᐊᓯᐊᓂᒃ ᓄᓇᓕᓐᓂᑦ ᐅᐸᒐᓱᑦᑕᖏᓐᓅᕋᓱᑦᑎᓪᓗᒋᑦ;
• ᒑᓯᑖᕈᑎᒥᓃᑦ ᑐᔅᓯᕋᐅᑕᐅᖃᑦᑕᕈᓐᓇᓕᕐᒥᔪᑦ ᐅᑎᖅᑎᑦᑎᕕᐅᔪᒪᓗᑎᒃ, ᓈᒻᒪᑎᕐᓯᒪᓗᒋᑦ ᑕᒪᕐᒥᒃ ᐱᖓᓱᓄᑦ (3) ᖃᖓᑦᑕᐅᑎᑖᕈᑎᓄᑦ ᐅᕝᕙᓘᓐᓃᑦ $6000 − ᓇᓪᓕᐊᑐᐃᓐᓇᖅ ᐊᑭᑭᓐᓂᕐᓴᖅ ᐊᑐᕐᓗᒍ ᐃᓚᒌᑦ ᐊᐅᓪᓚᕈᒪᓂᐊᖅᑲᑕ ᐅᐸᒋᐊᓕᖏᓐᓄᑦ ᖃᖓᑕᓲᒃᑰᖏᑦᑐᖅ ᐃᖏᕐᕋᓗᑎᒃ.

ᕿᑭᖅᑕᓂᒃᑯᑦ ᑲᒪᒋᔭᖃᕐᐸᑦᑐᑦ ᑖᒃᑯᓂᖓ ᐃᑲᔫᑎᓂᑦ ᐱᔾᔪᑎᒋᓪᓗᒋᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪᓗ ᐅᖃᕐᕕᐅᔪᓐᓇᖅᑐᑎᒃ ᑖᒃᑯᐊ ᑐᕌᕈᑏᑦ ᐊᑐᕐᓗᒋᑦ ᐊᑖᓂ ᑎᑎᕋᕐᓯᒪᔪᑦ. ᑕᑯᔪᓐᓇᖅᑕᓯ ᓄᑖᕈᖅᑎᑕᐅᒋᐊᕐᓯᒪᔪᑦ ᐊᑐᐊᒐᑦ ᐅᕙᓂ www.qia.ca ᐊᒻᒪᓗ ᓄᑖᕈᖅᑎᑕᐅᒋᐊᕐᓯᒪᔪᑦ ᑐᔅᓯᕋᐅᓯᐅᕈᑏᑦ ᑕᕝᕗᖓ ᐃᓕᔭᐅᓂᐊᑐᐃᓐᓇᖅᑐᑦ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓄᑦ ᐊᒻᒪᓗ ᐊᖅᑯᑎᒋᓗᒋᑦ ᓄᓇᓕᓐᓂᑦ ᑐᓴᐅᒪᑎᑦᑎᔩᑦ ᐊᑐᓂᑦ ᕿᑭᖅᑕᓂ ᓄᓇᓕᓐᓂᑦ.

ᕿᔅᓵᑦᑐᓄᑦ ᐃᓚᐃᖅᑐᓄᓪᓗ ᐃᖅᑲᓇᐃᔭᖅᑎ
ᐃᕐᖐᓈᖅᑕᐅᑖ: griefandbereavement@qia.ca
ᐅᖄᓚᐅᑖ: 867-975-8392
ᐅᖓᓯᑦᑐᒥᒃ ᐊᑭᖃᙱᑦᑐᖅ: 1-800-667-2743
ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᒃ: www.qia.ca

ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᙳᐊᑕᕐᓯᓐᓇᖃᑦᑕᕐᓕ:

ᑭᐊᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᒍᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐅᖓᓯᑦᑐᒥᓪᓘᓐᓃᑦ ᐊᑭᖃᙱᑐᒃᑯᑦ 1.800.667.2742
kflaherty@qia.ca