ᓵᓚᔅᓴᖅᑐᖅ ᑲᑐᔾᔨᖃᑎᒌᒃᑯᓐᓂ 2017-2018ᒥ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᓇᓗᓇᐃᖅᑕᐅᕗᖅ
ᐃᖃᓗᐃᑦ, ᓄᓇᕗᑦ – ᓯᑎᐱᕆ 6, 2017 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᖁᕕᐊᓱᑦᑐᑦ ᓇᓗᓇᐃᕐᓯᔭᕆᐊᔅᓴᖅ ᓇᔅᑖᓐᓂᐊ ᒧᓕᓐ ᓂᕈᐊᖅᑕᐅᓚᐅᕐᖓᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᓂᐊᕐᓂᖓᓂᒃ 2017-2018 ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᑖᒃᑯᐊ ᐅᐱᒍᓲᑕᐅᓪᓗᑎᒃ ᐃᑲᔫᑏᑦ ᐱᓇᓱᐊᕈᑎᒋᖃᑦᑕᕐᓯᒪᔭᖏᑦ ᐱᔾᔪᑎᒋᓪᓗᒋᑦ ᔮᓐ ᐊᒪᕈᐊᓕᐅᑉ ᐃᓅᓯᖃᑦᑎᐊᖁᓪᓗᒋᑦ ᐃᓄᐃᑦ ᓄᓇᕗᒻᒥᐅᑕᐃᑦ.
ᐊᕐᕌᒍᑕᒫᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᐅᕙᑦᑐᑦ ᐊᒥᓲᓂᖃᕐᐸᑦᑐᑦ $5,000.00.
ᒧᓕᓐ, ᖃᐅᓱᐃᑦᑐᕐᒥᐅᑕᔅᓴᔭ, ᐊᖏᖅᑕᐅᓯᒪᒻᒪᑦ ᐃᓕᓐᓂᐊᖃᑕᐅᓂᐊᖅᑐᓂ ᓄᓇᕗᒥ ᒪᓕᒐᓕᕆᓂᕐᒥᒃ ᐃᓕᓐᓂᐊᖅᑕᐅᓂᐊᖅᑐᒥ. ᐃᓕᓐᓂᐊᖃᑕᐅᓂᐊᖅᑐᖅ ᖁᕝᕙᓯᓐᓂᕐᓴᒥ ᒪᓕᒐᓕᕆᓂᕐᒥ ᓯᓚᑦᑐᓴᕐᕕᔾᔪᐊᖓᓂ ᓴᔅᑳᑦᑐᐊᓐ ᐃᓕᓐᓂᐊᑎᑦᑎᒍᑕᐅᓂᐊᖅᑐᓂ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒻᒥ ᑕᒫᓂ ᓯᑎᐱᕆᐅᓂᐊᖅᑐᒥ.
“ᑖᓐᓇ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖅ ᐃᑲᔫᑎᖃᓪᓚᕆᓐᓂᐊᖅᑐᖅ ᐅᕙᓐᓄᑦ ᓅᓐᓂᐊᑎᓪᓗᖓ ᐃᖅᑲᓇᐃᔮᕆᓚᐅᖅᑕᕐᓂᒃ ᒪᓕᒐᓕᕆᓂᕐᒥᒃ ᐃᓕᓐᓂᐊᖔᕐᓂᐊᓕᖅᑐᖓ, ᐱᓗᐊᖅᑐᒥᒃ ᐃᓄᑑᔾᔨᓪᓗᖓ ᕿᑐᕐᖓᖃᕐᓂᕐᓄᑦ,” ᐅᖃᖅᑐᖅ ᓇᔅᑖᓐᓂᐊ ᒧᓕᓐ.
ᒧᓕᓐ ᐃᓄᑑᔾᔨᓪᓗᓂ-ᕿᑐᕐᖓᓕᒃ ᐱᖓᓱᓂᑦ, ᒫᓐᓇ ᐃᖃᓗᓐᓂ ᓄᓇᓕᒃ ᐃᑲᔫᑎᓄᑦ ᐊᖏᔪᖅᑳᖑᓚᐅᖅᑐᖅ ᓄᓇᕗᑦ ᒐᕙᒪᒃᑯᖏᓐᓂ ᓇᒻᒥᓂᕐᓱᓂᕐᒧᑦ ᑎᑎᕋᕐᕕᐊᓂ.
ᓵᓚᖃᓚᐅᖅᑐᖅ ᐅᓂᒃᑳᓕᐊᒥᓂᖓᓂᒃ, ᐃᓚᖓᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᑐᔅᓯᕋᐅᑎᖓᓂ, ᒧᓕᓐ ᑲᓲᒪᑎᑦᑎᓚᐅᕐᖓᑦ ᐃᖅᑲᓇᐃᔮᕆᕙᑦᑕᖓᓂ ᓇᒻᒥᓂᕐᓱᓂᕐᒥᒃ ᐊᒻᒪᓗ ᔮᓐ ᐊᒪᕈᐊᓕᐅᑉ ᐃᖅᑲᓇᐃᔮᕆᓯᒪᔭᖏᓐᓂᒃ ᐋᔩᖃᑎᒌᒐᓱᐊᖅᑎᐅᓯᒪᔪᓂᑦ ᐱᙳᖅᑎᑦᑎᓯᒪᔪᓂᑦ ᓄᓇᕗᒻᒥᑦ.
“ᓇᒻᒥᓂᕐᓱᕐᓂᖅ ᑖᓐᓇ ᐊᑐᖅᑕᐅᙳᓱᒻᒪᑦ ᑕᒪᑐᒥᖓ ᐱᕙᓪᓕᐊᓂᐅᔪᒥᑦ,” ᐅᖃᖅᑐᖅ ᒧᓕᓐ.
ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᐱᓇᓱᐊᕋᔅᓴᐅᕙᒻᒪᑕ ᐃᓄᓐᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᓕᓐᓂᑦ ᐃᓕᓐᓂᐊᕆᐊᕐᓂᐊᖅᑐᓄᑦ ᓯᓚᑦᑐᓴᕐᕕᒻᒥ. ᑲᑐᔾᔨᖃᑎᒌᒃᑯᑦ ᓯᕗᓪᓕᐸᐅᑦᑎᐅᔾᔨᕙᒻᒪᑕ ᑐᔅᓯᕋᐅᑎᓂᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕆᐊᕐᓂᐊᖅᑐᓂᑦ ᐊᑐᖅᑎᑦᑎᒋᐊᒃᑲᓂᕐᓂᐊᖅᑐᓂᑦ ᐃᓄᑦᑎᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ.
“ᖁᕕᐊᓱᑦᑐᖓ ᑕᑯᔭᕆᐊᔅᓴᖅ ᐃᓐᓇᓵᓂᑦ ᐃᓕᓐᓂᐊᖅᑎᓂᑦ, ᓲᕐᓗ ᓇᔅᑖᓐᓂᐊ ᒧᓕᓐᑎᑐᑦ, ᑲᔪᓯᑎᑦᑎᕙᓪᓕᐊᓂᖏᓐᓂᒃ ᐃᖅᑲᓇᐃᔮᖑᓯᒪᔪᓂᑦ ᐱᒋᐊᖅᑎᑕᐅᓯᒪᔪᓂᑦ ᐅᕙᒍᑦ ᑕᐃᒪᐃᒃᑯᐊᖏᓐᓄᑦ ᓄᓇᕗᑦ ᒪᑭᑕᑦᑎᐊᖁᓪᓗᒍ, ᓇᒻᒥᓂᕐᓱᖁᓪᓗᒍ ᐊᒻᒪᓗ ᐱᕙᓪᓕᐊᑦᑎᐊᖏᓐᓇᖁᓪᓗᒍ,” ᐅᖃᖅᑐᖅ ᔮᓐ ᐊᒪᕈᐊᓕᒃ.
“ᐃᓕᓐᓂᐊᕐᓂᖅ ᐃᓐᓇᓵᓄᑦ ᐱᓕᕆᔾᔪᑕᐅᒍᓐᓇᓂᐊᕐᖓᑦ ᐊᑐᕆᐊᖃᕐᓂᐊᖅᑕᖏᓐᓂᒃ ᓯᕗᓂᔅᓴᑎᓐᓂ ᓯᕗᓕᖅᑎᐅᓂᐊᖅᑎᓪᓗᒋᑦ ᐊᒻᒪᓗ ᑖᒃᑯᐊ ᑲᑐᔾᔨᖃᑎᒌᒃᑯᓐᓂ ᐃᓕᓐᓂᐊᕈᓯᐊᔅᓴᑦ ᐊᑐᕐᓗᒋᑦ ᐃᓕᓐᓂᐊᖅᑎᓂᑦ ᓇᔅᑖᓐᓂᐊ ᒧᓕᓐᑎᑐᑦ ᐃᑲᔪᖃᑦᑕᓂᐊᖅᑐᒍᑦ ᑲᔪᓯᑎᑦᑎᓇᓱᐊᖅᑎᓪᓗᒋᑦ ᐊᑐᕈᒪᓯᒪᔭᖏᓐᓂᒃ.”
ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᒃᑲᓂᕐᕕᔅᓴᖅ:
ᓰᒪ ᓴHᐋ ᓯᐊᕆHᐃ, ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
szerehi@qia.ca
(867) 975.8413
1.800.667.2742