ᓵᓚᔅᓴᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᙱᐅᓯᐅᕐᓂᕐᒧᑦ/ᐅᖃᐅᓗᕋᐅᔭᐅᑎᓕᐅᕐᓂᕐᒧᑦ ᐊᑭᑦᑐᕋᐅᑎᑎᑦᑎᓂᖓᓐᓂ
ᑕᒫᓂ ᐊᕐᕌᒍᒥ ᑲᑐᔾᔨᖃᑎᒌᒃᑯᑦ ᖁᕕᐊᓲᑎᖃᔪᒻᒪᑕ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᕐᒥ ᓴᖅᑭᔮᖅᑎᑦᑎᕈᓘᔭᕐᐸᑦᑐᑎᒃ ᐊᒻᒪᓗ ᐱᓕᕆᑎᑦᑎᕈᓘᔭᕐᐸᑦᑐᑎᒃ ᐊᓪᓛᑦ ᐃᓄᒃᑎᑐᑦ ᐃᙱᐅᓯᐅᕐᓂᕐᒥᒃ ᐅᖃᓗᕋᐅᔭᐅᑎᓕᐅᕐᓂᒥᓪᓗ ᐊᑭᑦᑐᕋᐅᑎᑎᑦᑎᓪᓗᑎᒃ.
ᓂᕈᐊᕐᓂᕐᒧᑦ ᑲᑎᒪᔨᕋᓛᑦ ᓂᕆᐅᙱᑦᑎᐊᔪᒻᒪᑕ ᐊᒥᓱᕐᔪᐊᕌᓗᓐᓂᑦ ᑐᓂᓯᔭᐅᖃᑦᑕᕐᓂᐊᔅᓴᖅ ᑲᒪᓇᕈᑎᒋᔪᔭᖓ ᑐᓂᓯᔭᐅᖃᑦᑕᔪᒐᑦᑕ ᓇᑭᑐᐃᓐᓇᓕᒫᑦᑎᐊᖅ ᕿᑭᖅᑕᓂ ᓄᓇᓕᓐᓂᑦ. ᐅᐱᒍᓱᓗᐊᔪᔪᑦ ᐊᒥᓲᓂᖏᓐᓂᒃ ᐃᓅᓱᑦᑐᐃᑦ ᑐᓂᓯᖃᑦᑕᔪᔪᑦ ᐅᕙᑦᑎᓐᓄᑦ.
ᓖᑎᐊ ᑲᓪᓗᒃ ᓵᓚᖃᔪᔪᖅ ᓄᕐᓗᑦᑐᓂ $400ᓂᑦ
ᓵᓚᖃᔪᔪᖅ ᓄᕐᓗᑦᑐᓂ $400ᓂᑦ ᓵᓚᖃᐅᓯᐊᔅᓴᐅᔪᔪᓂᑦ 18ᓂᒃ ᐅᑭᐅᓕᒃ ᓖᑎᐊ ᑲᓪᓗᒃ ᐃᒃᐱᐊᕐᔪᒻᒥᐅᑕᔅᓴᔭ ᒫᓐᓇ ᐋᑐᕚᒥ ᐃᓕᓐᓂᐊᖅᑐᖅ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕕᒻᒥ. ᓖᑎᐊᑉ ᐃᙱᐅᓯᐊᒥᓂᖓ ᑐᓴᕐᓂᖅᑐᕕᔾᔪᐊᑯᓘᓪᓗᓂ ᐱᔾᔪᑎᓕᒃ ᓇᓪᓕᒍᓱᓐᓂᕐᒥᒃ ᐅᖓᓂᕐᒥᓪᓗ ᑖᓐᓇ ᐱᐅᒋᔭᐅᓗᐊᕈᑎᒋᔪᔭᖓ ᓂᕈᐊᕐᓂᕐᒧᑦ ᑲᑎᒪᔨᕋᓛᕐᓄᑦ. ᓈᓚᒍᓐᓇᖅᑕᓯ ᑐᓂᓯᒪᔭᖓ ᑲᑐᔾᔨᖃᑎᒌᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ.
ᑐᖏᓕᐊᓂ ᓵᓚᖃᔪᔪᖅ $300ᓂᑦ 21ᓂᒃ ᐅᑭᐅᓕᒃ ᔨᐅᕆ ᓚᐃᓴ ᑖᓐᓇ ᐸᓐᓂᑑᕐᒥᐅᑕᔅᓴᔭ ᒫᓐᓇ ᓄᓇᖃᓕᖅᑐᖅ ᐃᖃᓗᓐᓂ. ᐃᙱᐅᓯᐊᒥᓂᖓ ᐱᔾᔪᑎᓕᒃ ᐆᒻᒪᑎᒃᑯᑦ ᐃᑉᐱᓂᕐᓂᕐᒥᒃ ᐋᓐᓂᓇᖅᑐᒥᒃ ᑖᓐᓇ ᑐᓴᕐᓂᕆᔭᐅᓯᑦᑕᐅᑎᒋᔪᔪᖅ ᓂᕈᐊᕐᓂᕐᒧᑦ ᑲᑎᒪᔨᕋᓛᕐᓄᑦ ᑖᒃᑯᐊᓗ ᑕᑯᕋᓐᓂᕈᓱᑦᑎᐊᔪᓪᓗᑎᒃ ᓇᒻᒥᓂᖅ ᑕᕐᕆᔭᐅᓯᐊᒥᓂᖓᓂᒃ ᑐᓂᓯᒪᓪᓗᓂᐅᒃ ᖃᕋᓴᐅᔭᒃᑯᑦ ᕙᐃᔅᐳᒃᑯᑦ ᑐᓴᐅᒪᖃᑦᑕᐅᑎᒍᑕᐅᕙᑦᑐᒃᑯᑦ.
ᐃᓅᓱᓐᓂᕐᐹᖑᓪᓗᓂ ᓵᓚᔅᓴᖅᑐᖁᑎᒋᔪᔭᕗᑦ $200ᓂᑦ 14ᓂᑦ ᐅᑭᐅᓕᒃ ᕕᐊᓐ ᖃᖅᑲᓯᖅ ᐸᓐᓂᖅᑑᕐᒥᐅᑕᖅ. ᕕᐊᓐ ᑖᓐᓇ ᓱᓕ ᐃᓕᓐᓂᐊᖅᑐᖅ ᐃᓕᓐᓂᐊᕐᕕᐊᓗᒻᒥ ᐃᙱᑎᑦᑎᒍᓐᓇᑎᐊᖅᑐᖅ ᐱᐊᓇᑦᑎᐅᓪᓗᓂᓗ ᑖᓐᓇ ᐊᕐᕌᓂ ᐃᙱᑎᑦᑎᓚᐅᕐᓯᒪᔪᖅ ᐊᓕᐊᓇᐃᑦ ᑕᑯᕋᓐᓈᑎᑦᑎᑎᓪᓗᒋᑦ. ᕕᐊᓐ ᑐᓂᓯᔪᔪᖅ ᐃᓅᓯᐅᑉ ᒥᔅᓵᓄᑦ ᓈᒻᒪᑦᑐᓕᓂᕐᒥᒃ ᐅᖃᓗᕋᐅᔭᐅᒻᒥᑦ ᖃᕋᓴᐅᔭᒃᑯᑦ ᑐᐃᑐᒃᑯᑦ ᑐᓴᐅᒪᖃᑦᑕᐅᑎᒍᑕᐅᕙᑦᑐᒃᑯᑦ. ᑲᑎᒪᔨᕋᓛᕗᑦ ᑲᒪᑦᑎᐊᔪᒻᒪᑕ ᑎᑎᕋᑦᑎᐊᕐᓯᒪᕕᐅᑎᓐᓂᖓᓂᒃ, ᐱᓗᐊᖅᑐᒥᓪᓕ ᕕᐊᓐ ᐅᑭᐅᖏᑦ ᐃᓱᒪᒋᓪᓗᒋᑦ ᐅᐱᒋᔭᐅᓗᐊᙳᐊᔪᒻᒪᑦ.
