ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᒃᑯᔾᔨᓂᖏᓐᓂᒃ ᓇᓗᓇᐃᕐᓯᒍᒪᒻᒪᑕ ᐃᓘᓐᓇᖏᓐᓄᑦ 2023ᒥ ᐱᔭᕇᖅᓯᔪᓄᑦ ᕿᑭᖅᑕᓂ ᓄᓇᓕᓕᒫᓂᑦ ᐃᓱᓕᑦᑎᒻᒪᑕ ᐃᓕᓐᓂᐊᕐᕕᐊᓗᒻᒥ. ᐱᓇᓱᐊᑦᑎᐊᖁᓇᖅᑯᓯ ᐃᓘᓐᓇᖏᓐᓂᒃ ᐱᓇᓱᐊᕈᑎᒋᖃᑦᑕᓂᐊᖅᑕᓯᓐᓂᒃ ᐊᒻᒪᓗ ᓇᓗᓇᙱᐊᖅᑐᓂ ᓯᕗᓂᔅᓴᑎᓐᓂ ᓄᓇᕗᑦ ᖁᕕᐊᓇᕐᓂᕐᓴᐅᓂᐊᕐᓂᖏᓐᓂᒃ ᐃᓕᔅᓯᓐᓄᑦ ᐱᔭᕇᖅᑐᑯᓗᓐᓄᑦ!

ᑕᒫᓂ ᐊᕐᕌᒍᒥ ᓯᕗᓪᓕᕐᐹᒥ ᔫ ᐊᑕᒍᑦᑖᓗᒃ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᐃᓕᓴᕐᓯᒍᑕᐅᖃᑦᑕᓂᐊᖅᑐᖅ ᐱᒋᐊᕐᕕᖃᕐᖓᑦ, ᑖᒃᑯᐊ ᕿᑭᖅᑕᓂᒃᑯᑦ ᑐᓂᓯᓚᐅᕐᖓᑕ 13ᓄᑦ ᐱᔭᕇᖅᑐᓄᑦ ᐃᓕᓐᓂᐊᖅᑎᓄᑦ ᑕᑯᑎᑦᑎᓯᒪᔪᓄᑦ ᑐᓂᓯᒪᑦᑎᐊᖃᑦᑕᕐᓂᖏᓐᓂᒃ ᐊᒻᒪᓗ ᐊᔪᐃᓐᓇᖃᑦᑕᓚᐅᕐᓂᖏᓐᓂᒃ ᐃᓄᒃᑎᑐᑦ ᐅᖃᐅᓯᓕᕆᓂᕐᒥᒃ.

ᕿᑭᖅᑕᓂᒃᑯᑦ ᐃᖅᑲᓇᐃᔮᖃᕐᖓᑕ ᓴᐳᔾᔨᓂᕐᒥᒃ ᐊᑐᖅᑕᐅᖏᓐᓇᖁᔨᓪᓗᑎᓪᓗ ᐃᓄᒃᑎᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ, ᓴᖅᑭᔮᖅᑎᑦᑎᒋᐊᒃᑲᓂᕐᓂᕐᒥᒃ ᐋᖅᑭᐸᓪᓕᐊᓂᖓᓂᒃ ᐊᒻᒪᓗ ᐊᑐᖅᑕᐅᖏᓐᓇᖃᑦᑕᖁᓪᓗᒍ ᐃᓄᒃᑎᑐᑦ ᖃᐅᑕᒫᑦ ᐃᓅᓯᕆᕙᑦᑕᑎᓐᓂᒃ. ᑖᓐᓇ ᐃᖅᑲᐅᒪᑦᑎᔾᔪᑎᒋᓪᓗᒍ ᖁᔭᒋᓪᓗᒍ ᐃᓕᓴᕐᓯᔾᔪᑎᐅᖃᑦᑕᓂᐊᖅᑐᖅ ᐃᓚᒋᕙᓚᐅᖅᑕᑎᓐᓂᒃ ᔫ ᐊᑕᒍᑦᑖᓗᒻᒥᒃ ᐱᔾᔪᑎᒋᓪᓗᒍ ᑕᒪᒃᑯᓂᖓᓕᒫᖅ ᐊᑐᖃᑦᑕᓚᐅᕐᖓᑦ, ᐊᒻᒪᓗ ᖁᔭᒋᓪᓗᑎᒍ ᐃᑲᔪᖃᑦᑕᕐᓯᒪᓂᖓᓄᑦ ᑐᓂᓯᒪᑦᑎᐊᕐᓂᕆᓚᐅᖅᑕᖓᓄᓪᓗ ᐃᓄᓐᓄᑦ ᕿᑭᖅᑕᓂ ᓄᓇᓕᐅᔪᓂᑦ.

ᑕᒫᓂ ᐊᕐᕌᒍᒥ, ᑐᓂᓚᐅᖅᑕᕗᑦ ᑖᒃᑯᐊ ᐱᒃᑯᓇᑦᑎᐊᖅᑐᑦ ᐃᓕᓐᓂᐊᖅᑏᑦ ᐱᔭᕇᕐᓂᖃᖅᑎᓪᓗᒋᑦ.

ᔭᐃᒥ ᐅᖄᓪᓚᒃ, ᐃᒃᐱᐊᕐᔪᒻᒥ

ᔭᐃᑦ ᐸᓂᓗ, ᑲᖏᖅᑐᒑᐱᒻᒥ

ᔭᐃᒥᓯ ᖃᐅᓐᓇᖅ, ᐊᐅᓱᐃᑦᑐᕐᒥ

ᓵᓚᑦ ᐊᖑᒑᑦᓯᐊᖅ, ᐃᒡᓗᓕᒻᒥ

ᑳᓚᐃ ᐃᖃᓗᒃ, ᐃᖃᓗᓐᓂ

ᑯᕆᔅᑎᓐ ᑎᒥᓛ, ᑭᒻᒥᕈᕐᒥ

ᔮᓐ Hᐊᐃᕗᑦ, ᑭᙵᕐᓂᑦ

ᓅᓚᓐ ᑯᓪᓗᕈᖅᑐᖅ, ᐸᓐᓂᖅᑑᒥ

ᓲᓯ ᓴᐃᒨᓂ, ᒥᑦᑎᒪᑕᓕᒻᒥ

ᐋᔅᑕ ᐃᓪᓚᐅᑦ, ᖃᐅᓱᐃᑦᑐᕐᒥ

ᐊᐃᓚ ᒪᕇ ᖃᕝᕕᒃ−ᒥᑭᔪᖅ, ᓴᓂᑭᓗᐊᕐᒥ

ᒍᓗᐊᕆᐊ ᓇᖕᒪᓕᒃ, ᓴᓂᕋᔭᒻᒥ

ᕿᑭᖅᑕᕐᔪᐊᕐᒥ ᓇᓗᓇᐃᖅᑕᐅᓛᑐᐃᓐᓇᖅᑐᖅ ᐃᓕᓐᓂᐊᓕᕐᒥᑉᐸᑕ.

ᕿᑭᖅᑕᓂᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᖁᕕᐊᒃᑯᔾᔨᕗᑦ 2023ᒥ ᐱᔭᕇᖅᑐᓂᒃ ᐃᓕᓴᕆᔭᐅᔾᔪᑎᑖᖅᑐᓂᓪᓗ!