ᐃᖃᓗᐃᑦ, ᓄᓇᕗᑦ – ᐆᑦᑑᑉᕙ 2, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᐅᓂᒃᑳᕐᕕᐅᒍᓐᓇᓚᐅᖅᑐᑦ ᒪᕐᕉᓐᓂᒃ ᓇᖕᒥᓂᖁᑎᒋᔭᖏᓐᓂᒃ ᑲᑐᔾᔨᖃᑎᒌᓐᓂᒃ: ᑲᑭᕙᒃ ᑲᑐᔾᔨᖃᑎᒌᑦ ᐊᒻᒪᓗ ᕿᑭᖅᑖᓗᒃ ᑯᐊᐳᕇᓴᓐ (QC) ᐅᓪᓗᒥ ᑲᑎᒪᔩᑦ ᑲᑎᒪᓂᖓᓂ ᐃᖃᓗᓐᓂ.

ᐅᓂᒃᑳᕇᕐᒪᑕ, ᕿᑭᖅᑕᓂᒃᑯᑦ ᑐᓂᓯᓚᐅᖅᑐᑦ ᑲᑭᕙᒃᑯᓐᓄᑦ, ᑮᓇᐅᔭᓕᐅᕋᓱᐊᖅᑎᖁᑎᒋᓐᖏᑕᒥᓄᑦ ᓇᖕᒥᓂᖃᕐᓂᕐᒧᑦ ᐱᕙᓪᓕᐊᔪᓕᕆᔨᖁᑎᒥᓄᑦ, ᓯᒃᑭᒥᒃ $852,151. ᑖᓐᓇ ᐅᓄᕐᓯᒋᐊᕈᑎᓕᒃ ᐊᕐᕌᓂᓂᑦ $77,750-ᓂᒃ.

ᑮᓇᐅᔭᑦ ᑐᓂᐅᔭᔪᑦ ᑲᑭᕙᒃᑯᓐᓄᑦ ᑖᒃᑯᓇᓐᖔᖅᑐᑦ ᓄᓇᕗᒻᒥ ᐸᐸᑦᑎᔨᒃᑯᓐᓂᒃ ᓄᓇᓖᑦ ᐱᕙᓪᓕᐊᔪᓕᕆᔨᖏᓐᓄᑦ ᕿᑭᖅᑕᓂ ᓄᓇᖓᓂ. ᑲᑭᕙᒃᑯᑦ ᐊᑐᖃᑦᑕᖅᑕᖏᑦ ᑮᓇᐅᔭᑦ ᒪᓂᒪᑎᑦᓯᓂᕐᒧᑦ ᓇᖕᒥᓂᖁᑎᓄᑦ, ᐃᖅᑲᓇᐃᔮᓄᑦ ᐱᓕᖕᒪᒃᓴᐅᑎᒃᓴᓄᓪᓗ ᐱᔨᑦᓯᕈᑎᓂᒃ ᐱᕚᓪᓕᕈᑎᒃᓴᖏᓐᓂᒃ ᓴᓐᖏᓂᕆᔭᖏᓐᓄᑦ ᐃᓄᐃᑦ ᕿᑭᖅᑕᓂ ᓄᓇᖓᓂ.

ᑲᑎᒪᑎᓪᓗᒋᑦ ᕿᑭᖅᑕᓂᒃᑯᑦ ᑐᓂᔭᐅᓚᐅᕐᒥᔪᑦ ᓯᒃᑭᒥᒃ ᐅᓄᕐᓂᓕᒻᒥᒃ $4,586,392.00 ᓇᖕᒥᓂᖁᑎᒋᔭᒥᓂᒃ QC−ᑯᓐᓂᒃ. ᑖᓐᓇ ᐅᓄᕐᓂᕐᐸᐅᔪᖅ ᖃᖓᓕᒫᖅ ᑐᓂᔭᐅᖃᑦᑕᕐᓯᒪᔪᓂ ᖄᖏᕐᓂᑯᓂᒃ QC−ᑯᓐᓂᒃ ᕿᑭᖅᑕᓂᒃᑯᓐᓄᑦ ᐅᓪᓗᒥᒧᑦ.

QC−ᑯᑦ ᐊᐅᓚᑦᓯᖃᑦᑕᖅᑐᑦ ᒪᑭᒪᔾᔪᑎᒃᓴᓄᑦ ᐱᕙᓪᓕᐊᔪᓕᕆᓂᕐᒥᒃ ᑭᒡᒐᑐᐃᓪᓗᑎᒃ ᕿᑭᖅᑕᓂᒃᑯᓐᓂᒃ ᐊᒻᒪᓗ ᐱᓇᓱᐊᒐᖃᐃᓐᓇᖅᑐᑦ ᐊᖏᓂᕐᐸᐅᓂᕐᒥᒃ ᐃᑲᔫᑎᒃᓴᓂᒃ ᑐᓂᓯᖃᑦᑕᓂᕐᒥᒃ ᓴᓇᕕᓕᒫᓂ ᓄᓇᕗᒻᒥ ᒪᑭᒪᔾᔪᑎᖏᓐᓄᑦ, ᑐᕌᖓᔪᓂᒃ ᐱᓗᐊᖅᑐᒥ ᐃᖃᓗᓕᕆᓂᕐᒥᒃ, ᓂᐅᕕᕐᕕᓕᕆᓂᕐᒥᒃ, ᓇᖕᒥᓂᖁᑎᖃᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᒃ ᐊᐅᓚᑦᓯᓂᕐᒥᓪᓗ. ᑲᒻᐸᓂ ᐱᔨᑦᓯᖃᑦᑕᕐᒥᔪᖅ ᓴᖅᑭᐸᓪᓕᐊᔪᓂᒃ ᐅᔭᕋᓐᓂᐊᕕᒻᒥ ᐊᒻᒪᓗ ᐊᑐᕋᑦᓴᓕᕆᓂᕐᒥᒃ ᐱᕙᓪᓕᐊᔾᔪᑎᒃᓴᓄᑦ ᓴᓇᒡᕕᓐᓂᒃ.

ᑖᒃᑯᐊ ᖄᖏᕐᓂᑯᑖᖏᑦ ᐴᖅᑕᐅᓂᐊᖅᑐᑦ ᕿᑭᖅᑕᓂ ᓴᓂᕐᕚᕆᕕᖓᓄᑦ, ᒪᓕᓪᓗᒋᑦ ᐃᓵᔪᓄᑦ ᐊᑐᐊᒐᖁᑎᕗᑦ, ᕿᑐᕐᖏᐅᖁᓪᓗᒋᑦ ᓯᕗᓂᒃᓴᑎᓐᓂ ᐊᑐᕋᑦᓴᓄᑦ ᐱᓕᕆᐊᒃᓴᓂᒃ ᐊᐅᓚᑦᓯᒍᑎᒃᓴᓂᓪᓗ ᐃᓄᓐᓄᑦ ᓄᓇᑦᑎᓐᓂ. ᓴᓂᕐᕚᕆᕕᒻᒥ ᑮᓇᐅᔭᑦ ᐱᕈᕐᐸᓪᓕᐊᓂᖏᑎᒍᑦ ᑮᓇᐅᔭᒃᑲᓐᓃᑦ ᐃᑲᔫᑎᒃᓴᓅᖃᑦᑕᖅᑐᑦ ᐊᐅᓚᑦᓯᒍᑏᑦ ᐱᓕᕆᐊᒃᓴᓂᒃ ᐃᓄᓐᓄᑦ.

“ᐅᐱᒍᓱᑦᑐᖓ ᐱᖕᒪᕆᐊᓘᔪᒥᒃ ᐃᖅᑲᓇᐃᔮᖓᒍᑦ ᑲᑭᕙᒃᑯᑦ ᑎᒍᓯᕙᓪᓕᐊᓂᕐᒥᒃ ᓇᖕᒥᓂᖁᑎᖃᕐᓂᕐᒥᒃ ᕿᑭᖅᑕᓂ ᓄᓇᖓᓂ ᐃᑲᔪᕐᓗᒋᑦ ᒥᑭᔫᑎᑦ−ᐃᓄᐃᑦ−ᐊᐅᓚᑕᖏᑦ−ᓇᖕᒥᓂᖁᑕᐅᔪᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ ᐲᔭᐃ ᐊᕿᐊᕈᖅ, “ᑕᐃᒫᑦᓴᐃᓐᓇᖅ ᖁᔭᓕᔪᖓ ᑕᑯᒋᐊᒃᓴᖅ ᕿᑭᖅᑖᓗᒃ ᑯᐊᐳᕇᓴᒃᑯᑦ ᑲᔪᓯᐊᑎᑕᖏᓐᓂᒃ ᒪᑭᒪᔾᔪᑎᒃᓴᓂᒃ ᑮᓇᐅᔭᓕᐊᖏᓐᓂ ᑐᓂᔭᐅᓂᐊᖅᑐᑦ ᕿᑭᖅᑕᓂᒃᑯᓐᓄᑦ ᖄᖏᕐᓂᑯᓕᐊᖏᑦ ᐃᑲᔫᑎᒃᓴᑦ ᑮᓇᐅᔭᓕᑕᐅᒍᑎᒃᓴᖏᓐᓄᑦ ᐱᓕᕆᐊᒃᓴᓄᑦ ᕿᑭᖅᑕᓂ ᐃᓄᓐᓄᑦ.”

ᐱᕙᓪᓕᐊᔪᓅᖓᔪᓂᒃ ᖃᐅᔨᒋᐊᖃᑦᑕᕕᒃᓴᖅ;

ᓰᒪ ᓴᕼᐊ ᔨᐅᕆᕼᐃ, ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

(867) 975.8413

1.800.667.2742