ᑖᒃᑯᐊ ᓈᓚᐅᑎᒃᑯᑦ ᐅᖃᐅᓯᐅᖃᑦᑕᓂᐊᖅᑐᑦ ᑐᓂᔭᐅᓯᒪᔪᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᑦᑎᓐᓄᑦ ᐊᒻᒪᓗ ᓄᓇᓕᓐᓂᑦ ᑲᑎᒪᔨᑦᑎᓐᓄᑦ ᐅᖃᐅᓯᐅᖃᑦᑕᓂᐊᕐᖓᑕ ᓄᓇᓖᑦ ᓈᓚᐅᑎᖃᕐᕕᖏᑎᒍᑦ.

ᑐᑭᓯᑎᑦᑎᒋᐊᕈᑎᓖᑦ ᓄᓇᕗᒧᑦ ᐱᔾᔪᑎᒋᓪᓗᒍ ᐳᕝᕕᕆᓇᖅᑐᖅ COVID-19 ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᔪᖅ.

ᐊᓲᔪᓯ ᐃᓘᓐᓇᓯ,

ᐅᕙᖓ ᓄᓇᔅᓯᓐᓂ ᑲᑎᒪᔨᐅᔪᖓ/ᓄᓇᔅᓯᓐᓂ ᑐᓴᐅᒪᑎᑦᑎᔨᐅᔪᖓ for the ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ.

ᑐᑭᓯᑎᑦᑎᒋᐊᕈᒪᓪᓗᖓ ᖃᓄᐃᓕᐅᖅᑐᖃᓕᕐᒪᖔᑕ ᓄᓇᕗᒥ ᑲᒪᒋᔭᖃᖅᑎᓪᓗᒋᑦ ᐊᑑᑎᓂᖃᖅᑎᓪᓗᒍ ᐳᕝᕕᕆᓇᖅᑐᖅ (ᓄᕙᕐᔪᐊᕐᓇᖅ−19).

ᐅᓪᓗᒥᒧᑦ ᑎᑭᑦᑐᒍ ᒫᓐᓇ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ−19) ᖃᐅᔨᔭᐅᒪᔪᖃᙱᑦᑐᖅ ᓄᓇᕗᒥ

ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᑦ ᒫᓐᓇ 116ᓂᑦ ᖃᐅᔨᓴᖅᑐᑦ ᐳᕝᕕᕆᓇᖅᑐᖅ (ᓄᕙᕐᔪᐊᕐᓇᖅ−19) ᓄᓇᕗᒥ. 50 ᒫᓐᓇ ᖃᐅᔨᓴᖅᑕᐅᓯᒪᔪᑦ ᖃᓄᐃᓐᓂᕋᖅᑕᐅᓯᒪᙱᑦᑐᑦ.

ᑲᓇᑕᐅᑉ ᒐᕙᒪᒃᑯᖏᓐᓂ ᓄᓇᖃᖅᑐᑐᖃᕐᓄᑦ ᓄᓇᓕᓐᓂᑦ ᐃᑲᔫᑎᖏᑦ ᑮᓇᐅᔭᑦ

ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᕐᓯᓯᒪᔪᑦ $350 ᒥᓕᐊᓐᓂᑦ ᓄᓇᖃᖅᑐᑐᖃᕐᓄᑦ ᓄᓇᓕᓐᓄᑦ ᐃᑲᔫᑎᓂᑦ ᑮᓇᐅᔭᓂᑦ ᐃᓚᒋᔭᐅᓪᓗᑎᒃ ᑲᓇᑕᒥ ᓄᕙᕐᔪᐊᕐᓇᖅ−19 ᑮᓇᐅᔭᓕᐅᕋᓱᐊᕈᑎᔅᓴᓄᑦ ᖃᓄᖅᑑᕈᑕᐅᓪᓗᑎᒃ ᐸᕐᓇᐅᑏᑦ.

$45 ᒥᓕᐊᓐ ᑖᒃᑯᓇᙵᑦ ᐸᕐᓇᐅᑎᓂᑦ ᐃᓕᔭᐅᓂᐊᕐᖓᑕ ᐃᓄᓐᓄᑦ ᑐᕌᖓᓗᑎᒃ ᑲᓇᑕᓕᒫᒥ.

$22.5 ᒥᓕᐊᓐ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓅᕐᓂᐊᖅᑐᑦ ᐃᖅᑲᓇᐃᔮᓅᖓᓪᓗᑎᒃ ᐃᑲᔪᕐᓂᕐᒧᑦ ᐃᓄᓐᓂᑦ ᐱᔾᔪᑎᒋᓪᓗᒍ ᓄᕙᕐᔪᐊᕐᓇᖅ-19.

ᑮᓇᐅᔭᓕᐊᓄᑦ ᐃᑲᔫᑏ

ᐱᖓᑦᑎᕐᒥ, ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐅᖃᖅᑲᐅᔪᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐊᑑᑎᕕᐅᔪᓄᑦ ᓄᕙᕐᔪᐊᕐᓇᖅ−19ᒧᑦ ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᓂᖓᓄᑦ ᑐᓂᓯᖃᑦᑕᓂᐊᖅᑐᑦ $2,000ᓂᑦ ᑕᖅᑭᑕᒫᑦ ᑎᓴᒪᐅᓂᐊᖅᑐᓂᑦ ᑕᖅᑭᓂᑦ ᐃᑲᔪᕐᓗᒋᑦ ᐊᑭᓕᕐᓱᐃᓂᕐᒧᑦ ᐃᓪᓗᒧᑦ ᐊᑭᓕᕆᐊᓕᖏᓐᓂᒃ ᐊᒻᒪᓗ ᓂᕿᑖᕈᑎᔅᓴᓂᑦ.

ᐱᓕᕆᔾᔪᓯᐅᖃᑦᑕᓂᐊᖅᑐᑦ ᖃᓄᖅ ᐱᓇᓱᐊᖃᑦᑕᓂᐊᕐᒪᖔᑕ ᒫᓐᓇ ᐋᖅᑭᓱᖅᑕᐅᕙᓪᓕᐊᔪᑦ.

ᓂᕆᔭᔅᓴᐃᑦ ᐊᒻᒪᓗ ᐃᓄᔅᓯᐅᑏᑦ ᓂᖀᑦ

ᓄᓇᕗᑦ ᒐᕙᒪᒃᑯᖏᑦ ᑎᓕᐅᕆᕗᑦ ᓄᓇᕗᒻᒥᐅᓂᑦ ᓂᐅᕕᕋᖅᑐᐊᓘᖁᓇᒋᑦ ᓂᕿᓂᑦ ᐊᒥᒐᕐᓯᓂᐊᖅᑐᒋᓗᑎᒃ.

ᓄᓇᕗᑦ ᓱᓕ ᑎᑭᑕᐅᖃᑦᑕᕐᖓᑦ ᑭᓱᑐᐃᓐᓇᕐᓂᑦ ᓂᕿᓂᓪᓗ.

ᐳᕝᕕᕆᓇᖅᑐᖅ (ᓄᕙᕐᔪᐊᕐᓇᖅ−19) ᐊᒥᒐᕐᓯᓕᖅᑎᑎᔾᔮᖏᑦᑐᖅ ᓂᐅᕕᕐᕕᑎᓐᓂᒃ, ᑭᓯᐊᓂ ᓂᐅᕕᕋᕐᔪᐊᕐᓂᖅ ᓄᖑᕈᑎᓂᐊᖅᑐᒋᒧᑦ ᐊᒥᒐᕐᓯᑎᑦᑎᓕᖔᕐᓂᐊᖅᑐᖅ.

ᐱᔭᕆᐊᖃᖅᑕᓯᓐᓂᒃ ᑭᓯᐊᓂ ᓂᐅᕕᖃᑦᑕᕐᓗᓯ ᐊᒻᒪᓗ ᒥᓇᐅᒥᑦᑎᓗᓯ ᐊᓯᔅᓯᓐᓂᒃ.

ᓄᓇᕗᑦ ᒐᕙᒪᒃᑯᖏᑦ ᑐᓂᓯᓂᐊᖅᑐᑦ ᐆᒪᔪᕐᓂᐊᖅᑏᑦ ᑲᑐᔾᔨᖃᑎᒌᖏᓐᓄᑦ $25,000ᓂᑦ ᐊᑐᓂᑦ ᓄᓇᓕᓐᓄᑦ ᐃᑲᔫᑎᓂᑦ ᓄᓇᖏᓐᓂ ᓂᕿᓂᑦ ᖁᐊᒃᑯᕕᖏᓐᓅᖅᑲᐃᔾᔪᑎᔅᓴᓂᑦ.

ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐃᓕᓯᓯᒪᔪᖅ $5,000ᓂᑦ ᐊᑐᓂᑦ ᓄᓇᓕᓐᓄᑦ ᐃᑲᔫᑎᔅᓴᐅᓂᐊᕐᖓᑕ ᐊᖑᓇᓱᑦᑎᓄᑦ ᐱᒪᔨᒋᔭᐅᔪᓄᑦ ᓄᓇᓕᓐᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᐃᒪᓐᓇᓪᓗᐊᖅ ᐊᒥᓲᓂᓕᓐᓂᑦ ᐃᑲᔫᑎᖃᕐᓂᐊᕐᒥᔪᑦ $5,000ᓂᑦ ᐊᑐᓂᑦ ᕿᑭᖅᑕᓂ ᓄᓇᓕᓐᓄᑦ ᐃᑲᔫᑎᓂᑦ ᐊᖑᓇᓱᑦᑎᓄᑦ.

ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ ᑕᐃᒪᓐᓇᓴᐃᓐᓇᖅᑕᐅᖅ ᐃᑲᔫᑎᖃᕐᓂᐊᕐᒥᔪᑦ ᓄᓇᓕᖏᓐᓄᑦ.

ᓇᒻᒥᓂᖁᑎᕋᓛᓕᓐᓄᑦ ᐃᖅᑲᓇᐃᔭᕐᕕᓐᓄᑦ ᐃᑲᔫᑏᑦ

ᓄᓇᕗᑦ ᒐᕙᒪᒃᑯᖏᑦ ᐊᒥᓲᙱᑦᑑᒐᓗᐊᓂᑦ ᐃᑲᔫᑎᖃᕐᓯᒪᒻᒥᔪᑦ ᓇᒻᒥᓂᖁᑎᕋᓛᓕᓐᓄᑦ ᐃᖅᑲᓇᐃᔭᕐᕕᓐᓄᑦ ᐃᑲᔫᑎᓂᑦ ᐃᖅᑲᓇᐃᔭᕐᕕᓐᓄᑦ ᐊᑑᑎᕕᐅᔪᓄᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ−19).

ᐱᕙᓪᓕᐊᔪᓕᕆᔨᒃᑯᑦ ᐊᒻᒪᓗ ᐳᓚᕋᑦᑐᓕᕆᔨᒃᑯᑦ ᓄᓇᕗᒥ ᐃᑲᔫᑎᖃᕐᒥᔪᑦ ᐃᓘᓐᓇᖏᓐᓄᑦ ᓇᒻᒥᓂᖁᑎᕋᓛᓕᓐᓄᑦ ᐃᖅᑲᓇᐃᔭᕐᕕᓐᓂᑦ ᑕᑯᑎᑦᑎᔪᓐᓇᖅᑐᓄᑦ ᐃᑲᔪᖅᑕᐅᑦᑕᐅᑎᒋᔭᕆᐊᖃᕐᓂᖏᓐᓂᒃ ᑮᓇᐅᔭᓂᑦ ᐃᑲᔫᑎᑎᒍᑦ.

ᓇᒻᒥᓂᖁᑎᕋᓛᓖᑦ ᐃᖅᑲᓇᐃᔭᕐᕕᓐᓂᑦ ᑐᔅᓯᕋᐅᓯᐅᕈᓐᓇᖅᑐᑦ ᐊᒥᓲᓂᕐᐹᕆᔪᓐᓇᖅᑐᒋᑦ ᐊᒥᓲᓂᖏᑦ $5,000 (ᐸᐃ ᑕᐅᓴᓐ) ᐊᑐᓂᑦ ᑐᔅᓯᕋᐅᑏᑦ.

ᐊᐅᓚᓂᕐᓄᑦ ᐊᑭᖏᑦ ᐊᑭᓕᖅᑕᐅᓯᒪᔪᓐᓇᖅᑐᑦ ᒪᑯᐊ: ᓇᓪᓕᐅᒃᑯᒫᑦ, ᑮᓇᐅᔾᔭᔅᓵᑦ, ᖃᐅᒪᓯᐅᑏᑦ, ᐊᑐᖅᑐᐊᕈᑏᑦ, ᐊᒻᒪᓗ ᐱᖁᑎᖏᑦ.

ᑐᔅᓯᕋᖅᑐᑦ ᒪᓕᒐᔅᓴᓕᐊᖑᓯᒪᔪᓂᑦ ᒪᓕᒋᐊᖃᕋᔭᖅᑐᑦ ᑕᐃᒫᒃ ᑎᑎᕋᖅᑕᐅᓯᒪᓂᖏᑦ ᒪᓕᓪᓗᒋᑦ ᓄᓇᕗᑦ ᒐᕙᒪᒃᑯᖏᓐᓂ.

ᓄᓇᓕᓐᓂᑦ ᐳᓚᕋᑦᑐᓕᕆᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᓴᓇᕕᓐᓄᑦ ᐱᓕᕆᐊᖅ

ᐱᕙᓪᓕᐊᔪᓕᕆᔨᒃᑯᑦ ᐊᒻᒪᓗ ᐳᓚᕋᑦᑐᓕᕆᔨᒃᑯᑦ ᓄᓇᕗᒥ ᐊᑐᕐᓂᐊᖅᑐᑦ ᓄᓇᓕᖏᓐᓂ ᐳᓚᕋᑦᑐᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᓴᓇᕕᓐᓄᑦ ᐱᓕᕆᐊᖏᓐᓂᑦ ᓴᓇᔪᖁᑎᒋᕙᑦᑕᖏᓐᓄᑦ ᐃᑲᔫᑎᔅᓴᓂᑦ.

ᒫᓐᓇᓕ, ᑖᒃᑯᐊ $200,000ᓄᑦ ᑭᓪᓕᖃᖅᑐᒋᑦ ᐱᓕᕆᐊᕐᒥ ᐃᑲᔫᑕᐅᓂᐊᖅᑐᑦ ᑕᐃᒫᒃ ᓴᓇᕙᑦᑐᑦ ᐃᑲᔪᖅᑕᐅᔭᕆᐊᓖᑦ ᐃᑲᔪᖅᑕᐅᒍᓐᓇᓂᐊᕐᖓᑕ.

ᐱᕙᓪᓕᐊᔪᓕᕆᔨᒃᑯᑦ ᐊᒻᒪᓗ ᐳᓚᕋᑦᑐᓕᕆᔨᒃᑯᑦ ᓄᓇᕗᒥ ᐅᖓᕙᕆᐊᕐᓯᒻᒥᔪᑦ ᒪᑐᕕᔅᓴᖓᓂᒃ ᑐᔅᓯᕋᐅᑎᓄᑦ ᐄᐳᓗᒧᑦ ᒪᐃᒧᓪᓗ.

ᑐᔅᓯᕋᖅᑐᑦ ᒪᓕᒋᐊᖃᕐᓂᐊᖅᑐᑦ ᒪᓕᒐᔅᓴᓕᐊᖑᓯᒪᔪᓂᑦ ᑕᐃᒫᒃ ᑎᑎᕋᖅᑕᐅᓯᒪᓂᖏᑦ ᒪᓕᓪᓗᒋᑦ ᓄᓇᕗᑦ ᒐᕙᒪᒃᑯᖏᓐᓂ.

ᓄᓇᕗᒥ ᐸᖓᒡᒍᔾᔨᓂᖅ

ᑕᒫᓂ ᐊᕐᕌᒍᒥ ᓄᓇᕗᒥ ᐸᖓᒡᒍᔾᔨᓂᖅ ᓄᖅᑲᖅᑎᑕᐅᓚᐅᕐᖓᑦ ᐱᔾᔪᑎᒋᓪᓗᒍ ᐃᓱᒫᓗᓇᕐᓂᖓ ᐳᕝᕕᕆᓂᕐᒧᑦ ᖃᓂᒪᓐᓇᖅ (ᓄᕙᕐᔪᐊᕐᓇᖅ-19).

ᕿᑭᖅᑕᓂᒃᑯᑦ ᐅᐱᒍᓱᑦᑐᑎᒃ ᐃᑲᔪᖃᑦᑕᓲᖑᒻᒪᑕ ᓄᓇᕗᒥ ᐸᖓᒡᒍᔾᔨᓂᐅᕙᑦᑐᒥᒃ.

ᑲᑐᔾᔨᖃᑎᒌᕗᑦ ᑲᑦᑐᖓᐃᕈᑎᖃᕐᓯᒪᒻᒪᑕ $2.9 ᒥᓕᐊᓐᓂᑦ ᕿᒻᒥᓂᑦ ᐊᑐᖅᑕᐅᑎᑦᑎᒋᐊᒃᑲᓂᕐᓂᕐᒧᑦ ᐱᓕᕆᐊᕐᒧᑦ, ᐃᓚᒋᔭᐅᓪᓗᑎᒃ $100,000 ᐊᕐᕌᒍᑕᒪᑦ ᐃᑲᔫᑎᐅᕙᑦᑐᑦ ᓄᓇᕗᒥ ᐸᖓᒡᒍᔾᔨᓂᕐᒧᑦ 2020ᒥ−2027ᒧᑦ.

ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᖃᑎᓖᑦ ᐋᖅᑭᔅᓱᐃᔨᓂᑦ ᑐᑭᓯᓇᓱᑦᑐᑎᒃ ᖃᓄᐃᓕᐅᕐᓂᐊᓕᕐᒥᒻᒪᖔᑕ.

ᕿᑭᖅᑕᓂᒃᑯᑦ ᐱᓕᕆᐊᖏᑦ

ᑕᐃᒫᒃ ᓇᓗᓇᐃᕐᓯᔪᒐᑦᑕ ᐱᓇᓱᐊᕈᓯᐅᓚᐅᖅᑐᒥ, ᕿᑭᖅᑕᓂᒃᑯᑦ ᐊᑐᓕᖅᑎᑦᑎᓯᒪᔪᑦ ᐃᖅᑲᓇᐃᔭᖅᑎᑎᓪᓗᑎᒃ−ᐊᖏᕐᕋᕐᓯᒪᔪᓂᑦ ᑕᐃᒫᒃ ᐊᐅᓚᔾᔪᓯᖃᑲᐃᓐᓇᖅᑐᖅ.

ᐊᓪᓚᕝᕕᕗᑦ ᒪᑐᓯᒪᔪᖅ ᑐᑭᓯᑎᑕᐅᓇᓱᓐᓂᑎᓐᓂ ᖃᓄᐃᓕᖓᓂᐊᕐᒪᖔᑦᑕ.

ᐃᑲᔫᑎᒋᕙᑦᑕᑎᓐᓄᑦ ᐃᑲᔪᖅᑕᐅᔭᕆᐊᖃᓪᓚᕆᒃᑯᔅᓯ ᐅᖄᓚᒍᓐᓇᖅᑐᓯ ᐅᕙᑦᑎᓐᓄᑦ ᐅᕗᖓ 867-975-8400.

ᐅᕝᕙᓘᓐᓃᑦ ᑎᑎᕋᕐᓗᓯ ᐅᕗᖓ ᖃᕋᓴᐅᔭᒃᑯᑦ: info@qia.ca. ᓇᔅᓯᐅᔾᔨᒍᓐᓇᕐᒥᔪᓯ ᓱᒃᑲᔪᒃᑯᑦ ᐅᕗᖓ: 867-979-3238.

ᐃᓘᓐᓇᑎᒃ ᕿᑭᖅᑕᓂᒃᑯᑦ ᐱᓕᕆᐊᕆᕙᑦᑕᖏᑦ ᓄᖅᑲᖓᑎᑕᐅᑲᐃᓐᓇᖅᑐᑦ ᑐᑭᓯᑎᑕᐅᓇᓱᓐᓂᖏᓐᓂ ᖃᓄᐃᓕᖓᓂᐊᕐᒪᖔᑕ.

ᐃᓘᓐᓇᑎᒃ ᐱᓕᕆᐊᑦ ᑮᓇᐅᔭᖅᑖᖅᑎᑕᐅᓯᒪᔪᑦ ᕿᑭᖅᑕᓂᒃᑯᓐᓂ ᓄᖅᑲᖓᑎᑕᐅᑲᐃᓐᓇᕆᐊᓖᑦ ᐃᑲᔪᕐᓗᑎᒃ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ ᖃᓂᒪᓐᓇᖅ (ᓄᕙᕐᔪᐊᕐᓇᖅ−19).

ᐋᖅᑭᓯᒪᕕᒋᓂᐊᕐᓯᒪᔭᖏᑦ ᐅᖓᕙᕆᐊᖅᑕᐅᓂᐊᖅᑐᑦ ᐱᓕᕆᐊᖃᓛᖁᓪᓗᓯ ᓯᕗᓂᔅᓴᑎᓐᓂ.

ᖃᓄᖅ ᓯᐊᒻᒪᑎᑦᑎᑦᑕᐃᓕᒍᓐᓇᕐᒪᖔᑦᑕ ᐳᕝᕕᕆᓇᖅᑐᒥᒃ (ᓄᕙᕐᔪᐊᕐᓇᖅ-19ᒥᒃ)

ᐱᐅᓂᕐᐹᖅ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ (ᓄᕙᕐᔪᐊᕐᓇᖅ−19) ᐃᒫᒃ:

• ᐅᐊᓴᕐᔫᒥᔭᒐᓪᓗᒋᑦ ᐊᒡᒐᓯ
• ᖁᐃᕐᓱᖃᑦᑕᕐᓗᓯ ᑕᒋᐅᖃᑦᑕᕐᓗᓯᓗ ᐊᐃᕐᓯᓐᓄᑦ
• ᐊᑦᑐᐊᑲᑕᑦᑕᐃᓕᓗᓯᐅᒃ ᑮᓇᓯ, ᐱᓗᐊᖅᑐᒥᑦ ᐃᔨᓯ, ᓱᕐᓗᓯ ᖃᓂᓯᓗ
• ᐃᓄᓕᓐᓅᕋᔭᓗᐊᖅᑕᐃᓕᓗᓯ, ᖃᓂᔅᓴᓗᐊᖅᑕᐃᓕᓗᓯ

ᐃᖅᑲᐅᒪᓂᐊᖅᑯᓯ . . . ᓯᐊᒻᒪᖁᓇᒍ ᐳᕝᕕᕆᓇᖅᑐᖅ (ᓄᕙᕐᔪᐊᕐᓇᖅ-19 ᐃᓘᓐᓇᑎᒃ ᐃᓄᓕᒫᓂᑦ ᑲᑎᑎᑦᑎᖃᑦᑕᕆᐊᖃᙱᑲᐃᓐᓇᖅᑐᑦ ᓄᓇᕗᒥ.

ᓄᓇᕗᒻᒥᐅᑕᑐᐊᑦ ᐊᒻᒪᓗ ᐃᖅᑲᓇᐃᔭᕆᐊᕆᐊᖃᓪᓚᕆᑦᑐᑦ ᑭᓯᐊᓂ ᓄᓇᕗᓕᐊᖅᑎᑕᐅᖃᑦᑕᓂᐊᖅᑐᑦ.

ᓴᐳᔾᔨᑦᑎᐊᕈᓐᓇᓂᕐᓴᐅᕗᑎᑦ ᓄᓇᖅᑲᑎᑦᑎᓐᓂᒃ, ᐃᓄᑐᖃᑦᑎᓐᓂ ᐊᒻᒪᓗ ᓇᒻᒥᓂᖅ ᐃᓕᓐᓂᒃ ᐊᖏᕐᕋᕐᓯᒪᑐᐃᓐᓇᕐᓗᑎᑦ ᐊᒻᒪᓗ ᖃᓂᒌᓗᐊᖅᑕᐃᓕᓗᓯ.

ᑕᒫᓂ 2 ᒦᑕᓂᑦ ᐆᑦᑑᑎᑎᒍᑦ ᐅᖓᓯᓐᓂᓕᒻᒥᒃ ᐅᖓᓯᒌᓐᓂᖃᖃᑦᑕᕐᓗᓯ ᑭᓇᑐᐃᓐᓇᕐᒥᑦ ᑕᑯᔭᔅᓯᓐᓂᒃ.

ᐳᓛᕆᐊᖅᑕᐃᓕᒋᔅᓯ ᐱᖃᑎᔅᓯᓐᓂᒃ ᐃᓚᔅᓯᓂᓪᓘᓐᓃᑦ.

ᓱᕈᓯᕐᓂᑦ ᑲᑎᑎᑦᑎᑕᐃᓕᒋᔅᓯ ᐳᓛᖅᑎᒌᓐᓂᐊᖅᑐᓂᑦ ᐅᕝᕙᓘᓐᓃᑦ ᐱᙳᐊᖃᑎᒌᓐᓂᐊᖅᑐᓂᑦ ᑲᑎᑎᑦᑎᑦᑕᐃᓕᒋᔅᓯ.

ᑐᙵᓇᖃᑦᑕᕐᓗᓯ ᐊᒻᒪᓗ ᖃᐅᔨᒋᐊᕐᔫᒥᔭᒐᖃᑦᑕᕐᓯᐅᒃ ᐃᓄᑐᖃᐃᑦ ᐅᕝᕙᓘᓐᓃᑦ ᐃᓱᒫᓗᓇᕐᓂᕐᓴᐃᑦ ᐱᖃᑎᓯ ᐅᕝᕙᓘᓐᓃᑦ ᐃᓚᓯ ᐃᑲᔪᖅᑕᐅᔭᕆᐊᖃᖅᑐᓴᐅᒻᒪᑕ. ᐅᖄᓚᕕᒋᓗᒋᑦ ᐅᕝᕙᓘᓐᓃᑦ ᓂᕿᓂᑦ ᐹᖓᓅᕈᔾᔨᖃᑦᑕᕐᓗᓯ ᑭᓯᐊᓂ ᐳᓛᖅᑕᐃᓕᒋᔅᓯ.

ᐳᐃᒍᖅᑕᐃᓕᒋᔅᓯ ᐊᓂᑦᑕᐃᓕᑲᐃᓐᓇᕆᐊᖃᕐᓂᕐᒥᒃ ᖃᓄᐃᒍᑎᖃᖅᑑᔮᕈᔅᓯ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ-19.

ᑖᒃᑯᐊ ᖃᓄᐃᒍᑕᐅᕙᑦᑐᑦ ᐳᕝᕕᕆᓂᕐᒧᑦ ᐆᓇᕐᓗᓂ ᐆᓐᓂᐊᓇᕐᓗᓂ, ᖁᐃᕐᓱᑲᑕᓪᓗᓂ ᐅᕝᕙᓘᓐᓃᑦ ᐃᐱᓂᐊᕐᓗᓂ.

ᖃᓄᐃᓐᓃᑦ ᐱᓕᐅᒥᑉᐸᑦ ᐅᖄᓚᒐᔭᖅᑯᑎᑦ ᐋᓐᓂᐊᕕᔅᓯᓐᓄᑦ. ᐋᓐᓂᐊᕕᓕᐊᖅᑕᐃᓖᑦ ᐅᖄᓚᓚᐅᙱᓪᓗᑎᑦ.

ᑕᒪᑐᒥᖓ ᐊᑐᖅᑐᐃᓐᓇᐅᒐᑦᑕ ᐊᒻᒪᓗ ᐊᑕᐅᓯᐅᖃᑎᒌᓪᓗᑕ ᓴᐳᔾᔨᒍᓐᓇᕋᑦᑕ ᓄᓇᖅᑲᑎᑦᑎᓐᓂᒃ.

ᐊᑏ ᖃᐅᔨᒋᖃᑦᑕᕆᔅᓯ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓂᒃ ᐅᕗᖓ qia.ca ᑐᑭᓯᒋᐊᒃᑲᓐᓂᕈᒪᒍᔅᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᒫᓐᓇᓕᓴᐅᓂᕐᐹᓂᑦ ᑐᓴᕋᔅᓴᓂᑦ ᑕᑯᖃᑦᑕᕈᓐᓇᕐᒥᔪᓯ ᐊᒻᒪᓗ ᑐᑭᓯᑎᑦᑎᒋᐊᕈᑕᐅᔪᓂᑦ ᐅᕙᙵᑦ ᖃᕋᓴᐅᔭᒃᑯᑦ ᑐᑭᓯᐅᒪᔾᔪᑎᔅᓴᓕᕆᕕᐅᕙᑦᑐᓂᑦ Facebook, Twitter ᐊᒻᒪᓗ Instagram ᐃᑭᐊᖅᑭᔾᔪᑎᑦᑎᓐᓂ.

ᖁᔭᓐᓇᒦᒃ ᐱᕕᖃᖅᑎᑕᐅᑲᐃᓐᓇᕋᒪ. ᐅᓪᓗᖃᑦᑎᐊᕐᓂᐊᕆᕗᓯ ᖃᓄᐃᖁᓇᙱᓚᓯᓗ.