ᓄᓇᕗᑦ ᒐᕙᒪᒃᑯᖏᑦ ᓴᖅᑭᑎᑦᑎᓚᐅᕐᖓᑕ ᐊᑐᖅᑕᐅᓴᐃᓐᓇᕆᐊᖃᖅᑐᒥᒃ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᑲᐃᓐᓇᕆᐊᖃᕐᓂᕐᒥᒃ ᑭᒃᑯᑐᐃᓐᓇᕐᓄᑦ ᑐᕌᖓᓪᓗᓂ ᓇᓗᓇᐃᖅᑕᐅᓯᒪᔪᓄᑦ ᐋᓐᓂᐊᖅᑐᓕᕆᔨᒧᑦ ᖃᐅᔨᓵᖑᓂᖏᓐᓂᒃ ᐳᕝᕕᕆᓂᕐᒧᑦ ᖃᓂᒪᓇᖅᑐᒧᑦ (ᓄᕙᕐᔪᐊᕐᓇᖅ-19) ᒫᑦᓯ 31, 2020. ᐃᒫᒃ ᑐᑭᓕᒃ ᑖᓐᓇ ᑭᒃᑯᑐᐃᓐᓇᐃᑦ ᐅᖃᐅᔾᔭᐅᓯᒪᔪᑦ ᓇᒻᒥᓂᖅ ᐃᓂᖅᑎᕐᓯᒪᓗᑎᒃ ᐊᓂᑦᑕᐃᓕᑲᐃᓐᓇᕆᐊᖃᕐᓂᐊᕐᓂᖏᓐᓂᒃ ᐊᖏᕐᕋᖏᓐᓂ ᐅᓪᓗᓂᑦ 14ᓂᑦ ᐊᒻᒪᓗ ᓇᒻᒥᓂᖅ ᖃᐅᔨᓴᕐᔫᒥᔭᒐᓪᓗᑎᒃ ᖃᓄᐃᓐᓂᖏᓐᓂᒃ, ᐸᓚᕐᑑᔮᕋᓗᐊᕐᓗᑎᒃ.

ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᓂᖅ ᖃᓄᖅ ᑐᑭᖃᕐᖓᑦ?

ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᓂᖅ ᐃᒫᒃ ᑐᑭᓕᒃ ᐊᖏᕐᕋᕐᓯᒪᐃᓐᓇᕆᐊᖃᖅᑐᑎᑦ ᐊᒻᒪᓗ ᑭᓇᓕᒫᒥᒃ ᐃᓪᓗᒥᐅᖃᑎᒋᙱᑕᕐᓂᒃ ᐳᓚᐅᑎᖃᑎᖃᖅᑕᐃᓕᓗᑎᑦ ᑭᓯᐊᓂ ᐃᓄᓕᒫᓄᑦ ᐋᓐᓂᐊᖅᑐᓕᕆᔨ ᐅᖃᐅᔾᔨᑉᐸᑦ ᐃᓕᓐᓂᒃ ᐃᓱᒫᓗᓇᕈᓐᓃᕆᐊᔅᓴᓐᓂᒃ ᖃᓂᒪᓇᖅᑐᒥᒃ ᐊᐃᑦᑐᐃᑐᐃᓐᓇᕆᐊᖃᕐᓂᕐᒧᑦ.

ᐊᓂᑦᑕᐃᓕᓂᕐᓂᒃ, ᐳᓚᐅᑎᖃᑎᖃᖅᑕᐃᓕᑲᐃᓐᓇᕐᓗᑎᑦ ᐃᓪᓗᒥᐅᖃᑎᒋᙱᑕᕐᓂᒃ ᐊᒻᒪᓗ ᖃᓂᒋᓗᐊᖅᑕᐃᓕᖃᑦᑕᑲᐃᓐᓇᕐᓗᒋᑦ ᐃᓪᓗᒥᐅᖃᑎᑎᑦ. ᑕᐃᒫᒃ ᐊᐃᑦᑐᖅᑕᐅᔾᔭᐃᕐᓯᒪᓂᕐᓴᐅᓂᐊᕐᖓᑕ ᐃᓪᓗᒥᐅᖃᑎᑎᑦ ᐊᒻᒪᓗ ᓄᓇᖅᑲᑎᑎᑦ.

ᐊᖏᕐᕋᕐᓯᒪᓗᑎᓪᓗᓯ ᐊᓪᓚᕈᑎᓂᑦ ᑲᑐᑎᖃᑦᑕᖏᓪᓗᓯ, ᑖᔅᓱᒥᖓᔅᓴᐃᓇᕐᓗ ᐃᕐᖑᓯᕐᒥᒃ ᐊᑐᖃᑦᑕᖏᓪᓗᓯ ᐅᕝᕙᓘᓐᓃᑦ ᓂᕆᖃᑎᒌᖃᑦᑕᖏᓪᓗᓯ ᐊᑕᐅᓯᕐᒥᒃ ᓵᒥᒃ ᑲᑐᑎᓗᓯ. ᑕᒧᕐᕈᔾᔨᖃᑦᑕᖏᓪᓗᓯ ᕿᑐᕐᖓᓯᓐᓂᒃ.

ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᓂᖅ ᐃᒫᒃ ᑐᑭᓕᒃ ᐃᖅᑲᓇᐃᔭᕆᐊᖃᑦᑕᙱᑲᐃᓐᓇᕐᓂᖅ ᐅᕝᕙᓘᓐᓃᑦ ᐃᖅᑲᓇᐃᔮᑎᑦ ᑲᒪᒋᖃᑦᑕᕐᓗᒋᑦ ᐊᖏᕐᕋᕐᓯᒪᓗᑎᑦ ᑭᓯᐊᓂ.

ᒪᓕᑦᑎᐊᕆᐊᖃᓪᓚᕆᓐᓂᖅ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᓂᕐᒥᒃ ᐊᑐᖅᑕᐅᖃᑦᑕᖁᔭᐅᓯᒪᔪᓂᑦ ᐊᑑᑎᖃᓪᓚᕆᑦᑐᐊᓘᒻᒪᑕ ᓴᐳᔾᔨᓂᕐᒥᒃ ᐃᓚᓐᓂᒃ ᓄᓇᖅᑲᑎᓐᓂᓪᓗ, ᐃᓚᒋᔭᐅᓪᓗᑎᒃ ᐃᓄᑐᖃᐃᑦ ᐊᒻᒪᓗ ᐊᓯᖏᑦ ᐃᓱᒫᓗᓇᓗᐊᖅᑐᑦ ᓲᕐᓗ ᐊᓐᓇᐅᒪᔾᔪᑎᓖᑦ ᓴᙲᓂᕐᓴᓂᑦ ᐊᐃᑦᑐᖅᑕᐅᓴᕋᐃᒃᑲᔭᖅᑐᑦ ᖃᓂᒪᓇᖅᑐᒧᑦ.

ᖃᓄᐃᒍᑕᐅᔪᓐᓇᖅᑐᑦ ᒪᓕᙱᑦᑐᒥᓂᐅᓗᓂ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᖁᔭᐅᓯᒪᓂᕐᒥᒃ

ᐊᒥᓱᑦ ᑭᒃᑯᑐᐃᓐᓇᐃᑦ ᐊᐃᑦᑐᖅᑕᐅᓯᒪᔪᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ−19) ᖃᓄᐃᑦᑑᔮᖃᑦᑕᖏᒻᒪᑕ. ᑭᓯᐊᓂᓕ, ᓱᓕ ᐊᐃᑦᑐᐃᒍᑎᒋᔪᓐᓇᕋᕕᐅᒃ ᐊᓯᓐᓄᑦ. ᑕᐃᒫᒃ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᔭᕆᐊᖃᕐᓂᖅ ᐱᒻᒪᕆᐅᓗᐊᖅᑯᖅ.

ᑭᓇᑐᐃᓐᓇᖅ ᒪᓕᙱᑦᑐᖅ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᔭᕆᐊᖃᕐᓂᕐᒥᒃ ᐸᓯᔭᔅᓴᐅᔾᔪᑎᑖᕈᓐᓇᖅᑐᖅ ᐃᓄᓕᒫᓄᑦ ᐋᓐᓂᐊᖅᑐᓕᕆᔩᑦ ᒪᓕᒐᖓᑎᒍᑦ ᐊᒻᒪᓗ ᐊᑭᓖᑎᑕᐅᔭᕆᐊᖃᓕᕈᓐᓇᖅᑐᓂ $50,000ᓅᖓᔪᓂᑦ ᐅᕝᕙᓘᓐᓃᑦ ᐱᖓᓲᔪᖅᑐᓂᑦ ᑕᖅᑭᓂᑦ ᑎᒍᔭᐅᖅᑲᒍᓐᓇᖅᑐᓂ.

ᐱᖁᔭᓕᐊᖑᓯᒪᔪᖅ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᔭᕆᐊᖃᖅᑎᑦᑎᓂᕐᒥᒃ ᐊᑐᙳᓱᒻᒪᑦ ᑖᓐᓇ ᐳᕝᕕᕆᓇᖅᑐᖅ (ᓄᕙᕐᔪᐊᕐᓇᖅ-19) ᐃᓄᓕᒫᓄᑦ ᐋᓐᓂᐊᖅᑐᓕᕆᓂᕐᒧᑦ ᐃᓱᒫᓗᓇᕐᓂᖓᓂ. ᖃᐅᔨᒪᔭᖃᕈᕕᑦ ᑭᓇᑐᐃᓐᓇᕐᒥᒃ “ᖃᐅᔨᓵᖑᔪᒥᒃ” ᐊᒻᒪᓗ ᑕᒪᑐᒥᖓ ᒪᓕᙱᑉᐸᑦ, ᐱᒻᒪᕆᐅᕗᖅ ᐅᖃᐅᓯᕆᒍᕕᐅᒃ ᐸᓖᓯᒃᑯᓐᓄᑦ.

ᓇᒻᒥᓂᖅ−ᓇᐅᑦᑎᕐᓱᖃᑦᑕᕐᓂᖅ

ᖃᓄᐃᑦᑑᔮᙱᒃᑯᕕᑦ, ᐱᒻᒪᕆᐅᕗᖅ ᓇᒻᒥᓂᖅ−ᓇᐅᑦᑎᕐᓱᖃᑦᑕᕆᐊᖃᕐᓃᑦ ᖃᓂᒋᔭᖃᖅᑐᒥᓂᐅᓱᒋᒍᕕᑦ ᑭᓇᑐᐃᓐᓇᕐᒥᒃ ᐳᕝᕕᕆᓇᖅᑐᒥᒃ ᖃᓂᒪᒍᑎᓕᒻᒥᒃ (ᓄᕙᕐᔪᐊᓇᖅᑐᒥᒃ−19).

ᐅᑯᐊ ᖃᐅᔨᒪᓂᐊᖅᑲᑎᑦ ᖃᓄᐃᒍᑕᐅᕙᑦᑐᑦ:

• ᖁᐃᕐᓱᑲᑕᓐᓂᖅ
• ᐆᓇᖅᑐᐊᓘᓂᖅ (ᐆᓐᓂᐊᓇᕐᓗᑎᑦ)
• ᐃᐱᓂᐊᕐᓂᖅ

ᓄᕙᕐᔪᐊᕐᓇᐅᑉ ᒥᔅᓵᓄᑦ ᐅᖄᓚᕕᔅᓴᖅ

ᐅᖃᕐᕕᖃᕆᐊᖃᖅᐱ ᓄᕙᒡᔪᐊᕐᓇᖅ-19 ᐋᓐᓂᐊᕈᑕᐅᖃᑦᑕᖅᑐᒧᑦ ᐊᔾᔨᖏᓐᓂᑦ ᐃᑉᐱᓐᓂᐊᒍᕕᑦ, ᐅᕙᓗ ᐊᐅᓪᓚᖅᓯᒪᓚᐅᕈᕕᑦ ᓄᓇᒧᑦ ᑕᐃᑲᙶᕋᑖᖅᓯᒪᒍᕕᓪᓘᓐᓃᑦ ᐋᓐᓂᐊᔪᖅᑕᖃᐅᖅᑐᓄᑦ ᓄᓇᒋᔭᐅᔪᒥᑦ? ᐅᖄᓚᓗᑎᑦ 975-8601 ᐅᕙᓗ 1-888-975-8601 7:30ᒥᑦ ᐅᓪᓛᒃᑯᑦ 7:30ᒧᑦ ᐅᓐᓄᒃᑯᑦ ᐅᖄᓚᕕᔅᓴᐅᔪᑦ ᐅᖃᕐᕕᖃᕈᒪᓗᓂ. ᐃᖅᑲᐅᒪᒋᔅᓯ ᑖᓐᓇ ᐅᖄᓚᕕᔅᓴᐅᑎᑕᐅᔪᖅ ᑐᕌᖓᒻᒪ ᑭᓯᐊᓂ ᐱᔭᕆᐊᖃᓪᓚᕆᑦᑐᓄᑦ − ᐊᑐᖅᑕᐅᔭᕆᐊᖃᙱᑦᑐᖅ ᑐᑭᓯᒋᐊᕈᒪᑐᐃᓐᓇᖅᑐᓄᑦ ᖃᓄᑐᐃᓐᓇᖅ!

ᐊᐱᖅᑯᑎᔅᓴᖃᕈᕕᑦ ᐅᕙᓗ ᑐᐊᕕᕐᓇᖅᑐᒃᑯᑦ ᐃᑲᔪᖅᑕᐅᔭᕆᐊᖃᕈᕕᑦ, ᐋᓐᓂᐊᕕᔅᓯᓐᓄᑦ ᐅᖄᓚᔪᓐᓇᖅᑐᑎᑦ.

ᖃᓄᖅ ᑕᒪᓐᓇ ᑐᑭᖃᖅᑲ ᐃᓕᓐᓄᑦ?

ᐊᑑᑎᖃᖅᑐᐃᓐᓇᐅᒐᑦᑕ ᓄᓇᖅᑲᑎᑦᑎᓐᓂᒃ ᐊᑦᑕᓇᖅᑐᒦᑎᑦᑎᑦᑕᐃᓕᒋᐊᖃᕐᓂᕐᒥᒃ. ᐃᓄᓕᒫᑦ ᒪᑯᓂᖓ ᐊᑐᖃᑦᑕᕆᐊᓖᑦ ᐃᓅᖃᑎᖏᓐᓂᒃ ᖃᓂᔅᓴᓗᐊᖅᑕᐃᓕᓂᖅ, ᐊᒡᒐᖏᓐᓂᒃ ᐅᐊᓴᕐᔫᒥᔭᒐᓪᓗᑎᒃ ᐊᒻᒪᓗ, ᑕᐃᒪᐃᒋᐊᖃᖅᑲᑕ, ᓇᒻᒥᓂᖅ−ᓇᐅᑦᑎᕐᓱᑲᑕᓪᓗᑎᒃ.

ᖃᓄᐃᒍᑕᐅᕙᑦᑐᓂᑦ ᖃᓂᒪᒍᑎᖃᓕᕈᕕᑦ, ᓇᒻᒥᓂᖅ ᐃᓂᖅᑎᕐᓯᒪᓗᑎᑦ ᐃᓄᓕᓐᓅᕋᔭᑦᑕᐃᓕᓯᑦᑕᐅᑎᒋᒐᖅᑯᑎᑦ ᐊᒻᒪᓗ ᐅᖃᕐᕕᒋᑦᑕᐅᑎᒋᓗᒋᑦ ᐃᓄᓕᒫᓄᑦ ᐋᓐᓂᐊᖅᑐᓕᕆᔩᑦ ᖃᐅᔨᒃᑲᖅᑕᐅᑎᒋᓗᒋᑦ. ᑲᒪᒋᔭᔅᓴᒫᕆᒐᕕᐅᒃ ᓴᐳᔾᔨᒋᐊᖃᕐᓂᖅ ᐊᓯᓐᓂᒃ.

ᕿᑭᖅᑕᓂᒃᑯᑦ ᖃᓄᐃᓕᐅᖅᑲᑦ ᐃᑲᔪᖅᑐᑎᒃ?

ᒫᑦᓯ 30ᑎᓪᓗᒍ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᓗᓇᐃᕐᓯᔪᔪᑦ ᐱᓇᓱᐊᕈᑎᖏᑕ ᒥᔅᓵᓄᑦ ᐃᑲᔫᑎᒋᓪᓗᒋᑦ ᕿᑭᖅᑕᓂᒥᐅᓄᑦ ᐃᓄᓐᓄᑦ ᒫᓐᓇ ᐳᕝᕕᕆᓇᖅᑐᒥᒃ ᖃᓂᒪᓇᖅᑐᖃᕐᓂᖓᓂ (ᓄᕙᕐᔪᐊᕐᓇᖅ−19) ᓄᓇᕐᔪᐊᒫᒥ ᓯᐊᒻᒪᐸᓪᓕᐊᔪᒥᒃ  ᒪᑯᓂᖓ ᐃᓚᖃᖅᑐᑎᒃ ᓂᕿᑖᕈᑎᔅᓴᑦ ᐃᓄᑐᖃᕐᓄᑦ, ᑮᓇᐅᔭᐃᑦ ᓴᖅᑭᖅᑕᐅᕋᑖᕐᓯᒪᔪᑦ ᐊᖑᓇᓱᑦᑎᓄᑦ ᑐᕌᖓᔪᑦ, ᐊᒻᒪᓗ ᐃᑲᔫᑏᑦ ᓱᕈᓯᕐᓄᑦ ᐃᓚᒌᓄᓪᓗ.

ᕿᑭᖅᑕᓂᒃᑯᑦ ᐊᑐᕐᓂᕐᓴᐅᖃᑦᑕᑲᐃᓐᓇᓂᐊᖅᑐᑦ ᑐᓴᐅᒪᖃᑦᑕᐅᑎᒍᑎᒋᕙᑦᑕᖏᓐᓂᒃ ᐊᒻᒪᓗ ᐃᓄᓕᒫᓄᑦ ᑐᓴᐅᒪᑎᑦᑎᒋᐊᕈᑎᒋᕙᑦᑕᖏᓐᓂᒃ ᖃᐅᔨᒃᑲᐃᖃᑦᑕᕐᓗᑎᒃ ᐊᒻᒪᓗ ᑐᑭᓯᑎᑦᑎᖃᑦᑕᕐᓗᑎᒃ ᕿᑭᖅᑕᓂᒥᐅᓂᑦ ᐃᓄᓐᓂᑦ ᐱᔾᔪᑎᒋᓪᓗᒍ ᐳᕝᕕᕆᓂᕐᒧᑦ ᖃᓂᒪᓇᖅᑐᒧᑦ (ᓄᕙᕐᔪᐊᕐᓇᖅ−19) ᖃᓂᒻᒪᑦᑕᐃᓕᒍᑎᔅᓴᐃᑦ ᐊᒻᒪᓗ ᐸᓚᕐᔫᒥᑎᑦᑎᒋᐊᕈᑎᔅᓴᐃᑦ.

ᑖᒃᑯᐊ ᐱᓕᕆᐊᑦ ᕿᒥᕐᕈᔭᐅᖃᑦᑕᓂᐊᖅᑐᑦ ᑕᒪᓐᓇ ᐳᕝᕕᕆᓂᕐᒧᑦ ᖃᓂᒪᓇᖅᑐᖅ (ᓄᕙᕐᔪᐊᕐᓇᖅ−19) ᐃᓄᓕᒫᓄᑦ ᐃᓱᒫᓗᓇᕐᓂᖓᓂ ᐱᔨᑦᑎᕋᐅᑎᖃᑦᑎᐊᕈᒪᓪᓗᑕ ᕿᑭᖅᑕᓂᒥᐅᓄᑦ ᐃᓄᓐᓄᑦ.