ᐃᓄᐃᑦ ᐊᑕᐅᓯᐅᖃᑎᒌᒻᒪᑕ ᖃᓂᒪᒍᑕᐅᖃᑦᑕᖁᒍᓐᓃᖅᑐᒍ ᐳᕙᓪᓗᓇᖅᑐᖅ ᓄᓇᓕᑦᑎᓐᓂ. ᐅᓪᓗᒥ ᓄᓇᕐᔪᐊᕐᒥ ᐳᕙᓪᓗᓇᖅᑑᑉ ᒥᔅᓵᓄᑦ ᐅᓪᓗᕆᔭᐅᒻᒪᑦ, ᐊᒻᒪᓗ ᐅᓪᓗᒥ ᓄᓇᕐᔪᐊᓕᒫᒥ ᖃᓂᒪᓐᓇᖅᑐᒥᒃ ᒫᓐᓇ ᐃᓱᒫᓗᓇᖅᑐᒦᒍᑎᖃᖅᑐᑕ ᐳᕝᕕᕆᓇᖅᑐᒥᒃ−19, ᖃᐅᔨᒪᔪᒍᑦ ᑖᒃᑯᓴᐃᓐᓇᐃᑦ ᖃᓄᐃᒍᑕᐅᓲᑦ ᖃᐅᑕᒫᑦ ᐃᓅᓯᑦᑎᓐᓂ ᐃᓄᓐᓄᑦ ᐃᓱᒫᓗᓇᖅᑐᒦᒍᑕᐅᔪᓐᓇᓂᕐᓴᐅᒻᒪᑕ ᐳᕙᓪᓗᓕᕈᓐᓇᓂᕐᒧᑦ ᐊᒻᒪᓗᑦᑕᐅᖅ ᐃᓱᒫᓗᓇᖅᑐᒦᒋᐊᒃᑲᓐᓂᕈᓐᓇᕆᓪᓗᑎᒃ ᐳᕝᕕᕆᓇᖅᑐᒧᑦ−19. ᑕᒪᒃᑯᐊ ᖃᓄᐃᓐᓂᐅᔪᑦ ᓄᓇᓕᓐᓄᑦ ᐅᓂᒃᑳᔅᓴᖃᕈᑕᐅᒻᒪᑕ ᐋᓐᓂᐊᕕᓕᐊᖃᑦᑕᕐᓯᒪᓂᖏᓐᓂᒃ ᑕᒪᒃᑭᓐᓄᑦ ᐳᕙᓪᓗᓂᕐᒧᑦ ᐊᒻᒪᓗ ᐳᕝᕕᕆᓇᖅᑐᒧᑦ−19. ᒫᓐᓇ ᐊᑐᖅᑕᐅᔭᕆᐅᖅᑐᒥᒃ ᖃᓂᒪᓐᓇᖅᑐᖃᖅᑎᓪᓗᒍ ᖃᓄᖅᑑᕈᑕᐅᒐᓱᓪᓚᕆᓕᕐᖓᑦ ᐋᖅᑭᔅᓱᐃᒍᑕᐅᔭᕆᐊᖃᖅᑐᓂ ᐱᐅᓂᕐᓴᓂᑦ ᐋᓐᓂᐊᖅᑐᓕᕆᔾᔪᑎᔅᓴᓂᑦ ᐊᒻᒪᓗ ᐋᖅᑭᐸᓪᓕᑎᑦᑎᒋᐊᕐᓂᕐᒥᒃ ᖃᓄᐃᓐᓂᕆᕙᑦᑕᑎᓐᓂᒃ ᖃᐅᑕᒫᑦ ᐃᓅᓯᕆᕙᑦᑕᑎᓐᓂ ᑕᒪᓐᓇ ᐃᓱᒫᓗᓇᖃᑦᑕᓚᐅᕋᓗᐊᕐᒥᒻᒪᑦ ᐊᑐᖃᑦᑕᓚᐅᖅᑕᖏᑕ ᓴᓂᐊᓂ.

ᓄᓇᕗᒻᒥᐅᓂᑦ ᓱᓕ ᓇᓗᓇᐃᖅᑕᐅᓯᒪᔪᖃᙱᒃᑲᓗᐊᖅᑎᓪᓗᒍ ᐳᕝᕕᕆᓇᖅᑐᒧᑦ ᖃᓂᒪᒍᑎᖃᕐᓂᕐᒥᒃ−19. ᖃᐅᔨᒪᔪᒍᑦ ᐃᓄᐃᑦ ᐊᑐᕐᓯᒪᒻᒪᑕ ᐊᒥᓲᓛᖑᓪᓗᑎᒃ ᐳᕙᓪᓗᓇᖅᑐᒥᒃ ᑕᑯᓪᓗᒋᑦ ᐊᓯᖏᑦ ᓴᓂᐊᓂ ᑲᓇᑕᒥᐅᓕᒫᑦ. ᐃᓄᐃᑦ ᖃᐅᔨᒪᑦᑎᐊᕐᖓᑕ ᐋᓐᓂᐊᒍᑕᐅᕙᑦᑐᑦ ᐊᒻᒪᓗ ᓈᒻᒪᖏᓐᓂᐅᕙᑦᑐᑦ ᑕᒪᒃᑯᓄᖓ ᐊᑕᒻᒪᑕ. ᐳᕙᓪᓗᓇᖅᑐᖅ ᐊᔾᔨᖃᐸᓗᑦᑎᐊᕐᖓᑦ ᐱᐅᓯᕆᔭᐅᓲᓂᑦ ᓄᓇᖅᑲᑎᒌᓂᑦ ᓈᒻᒪᖏᓐᓂᖅᑕᖃᖅᑎᓪᓗᒍ ᒪᑯᓂᖓ ᐃᓪᓗᓂᑦ, ᓂᕿᑦᑎᐊᕙᓐᓂᒃ, ᐊᔪᕐᓴᓂᕐᒥᒃ, ᐊᒻᒪᓗ ᐊᑐᐃᓐᓇᖃᕐᓂᕐᒥᒃ ᐋᓐᓂᐊᓯᐅᖅᑎᐅᕙᑦᑐᓂᑦ. ᐳᕝᕕᕆᓇᖅᑐᖅ-19 ᐊᔾᔨᓴᐃᓐᓇᐸᓗᖏᓐᓂᒃ ᐱᐅᓯᕆᔭᐅᕙᑦᑐᓂᑦ ᒪᓕᓐᓂᐊᕐᕙᓗᑦᑑᔮᕐᖓᑦ, ᓈᒻᒪᑦᑐᓂᑦ ᓱᓇᒃᑯᑖᖃᖅᑎᑦᑎᒍᑕᐅᔭᕆᐊᓕᓐᓂᑦ ᐊᒥᒐᕐᓯᒍᑎᖏᓐᓂᒃ ᒪᑯᓂᖓ ᐃᓪᓗᓕᕆᓂᖅ, ᓂᕿᑦᑎᐊᕙᓂᑦ ᓂᕿᖃᕐᓂᖅ, ᐊᖏᓯᓐᓂᓪᓗ ᓄᓇᓕᓐᓅᖓᔪᓂᑦ ᐋᓐᓂᐊᖅᑕᐃᓕᓂᕐᒨᖓᔪᓂᑦ ᐃᓄᓐᓄᑦ ᐃᓱᒫᓗᓇᖅᑐᒦᒍᑕᐅᓪᓚᕆᑉᐸᑦᑐᓂᑦ ᑕᒪᒃᑮᓐᓄᑦ ᐋᓐᓂᐊᒍᑕᐅᕙᑦᑑᓐᓄᒃ ᐊᓯᖏᑦ ᑕᑯᓪᓗᒋᑦ ᓄᓇᓕᐅᔪᑦ.

ᒫᑦᓯ 8, 2019ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᒪᒥᐊᓚᐅᕐᓯᒪᒻᒪᑕ ᐃᓄᓐᓄᑦ ᐊᐅᓚᑕᐅᓂᒥᓂᖓᓄᑦ ᐳᕙᓪᓗᓇᖅᑐᖅ ᓯᐊᒻᒪᖅᑐᐊᓘᑎᓪᓗᒍ ᑕᐃᔅᓱᒪᓂ 1940ᖏᓐᓂ 1960ᖏᓐᓄᑦ. ᑕᐃᓐᓇ ᒪᒥᐊᒍᑕᐅᔪᔪᖅ ᒪᒥᐊᒍᑕᐅᔭᕆᐊᖃᕐᓯᒪᔪᑐᖃᕐᔪᐊᕌᓘᔪᒻᒪᑦ ᐊᒻᒪᓗ ᓇᓗᓇᐃᒃᑯᑕᐅᔪᒻᒪᑦ ᒪᒥᓴᕐᐸᓪᓕᐊᒍᑕᐅᓂᐊᕐᓂᖓᓂᒃ ᐊᒻᒪᓗ ᐃᓱᒪᒋᔪᓐᓇᐃᖅᑎᒌᒍᑕᐅᓂᐊᕐᓂᖓᓂᒃ. ᒫᑦᓯ 23, 2018ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᑲᑦᑐᖓᐃᕈᑎᖃᓚᐅᕐᓯᒪᒻᒪᑕ ᐋᓐᓂᐊᒍᑕᐅᖃᑦᑕᖁᒍᓐᓃᖅᑐᒍ ᐳᕙᓪᓗᓇᖅᑐᖅ ᐃᓄᐃᑦ ᓄᓇᖓᓐᓂ 2030 ᖃᓂᒋᔭᖓᓂ, ᐊᒻᒪᓗ ᐸᓚᕐᓯᐅᒥᑎᑦᑎᒍᒪᓂᕐᒧᑦ ᐳᕙᓪᓗᖃᑦᑕᖅᑐᓂᑦ ᑕᒫᓂ ᓇᑉᐸᖏᓐᓂᐅᓐᓃᑦ ᐊᒥᓲᓂᖏᑕ 2025 ᖃᓂᒋᔭᖓᓂ.

ᐳᕙᓪᓗᓇᖅᑐᖅ ᐱᒋᐊᕈᑎᖃᓲᖑᒻᒪᑦ ᖁᐱᕐᕈᓂᑦ ᑕᐃᔭᐅᔪᓂᑦ ᖃᓪᓗᓈᑎᑐᑦ ᐃᒫᒃ mycobacterium tuberculosis. ᑭᒃᑯᑐᐃᓐᓇᐃᑦ ᐋᓐᓂᐊᓕᕈᓐᓇᕐᖓᑕ ᐳᕙᓪᓗᓇᖅᑐᒧᑦ ᓂᐅᕈᑎᒃ ᐊᓂᕐᓵᑐᕐᓂᒃᑯᑦ ᐳᕙᓪᓗᓇᖅᑐᖅᑕᓕᒻᒥᒃ, ᑭᓯᐊᓂ ᑎᒥᒃᑯᑦ ᐊᐃᑦᑐᐃᔾᔪᑕᐅᖃᑦᑕᖏᖅᑐᖅ ᐅᕝᕙᓘᓐᓃᑦ ᐊᑐᖃᑦᑕᓂᒃᑯᑦ ᐊᑐᖅᑕᐅᕙᑦᑐᓂᑦ ᓂᕐᕆᑎᓂᑦ ᐊᓐᓄᕌᓂᓪᓘᓐᓃᑦ. ᓂᐅᖅᑕᐅᑐᐊᕋᒥ, ᐳᕙᓪᓗᓇᖅᑐᖅ ᕿᑲᕐᓲᔭᕈᓐᓇᖅᑐᖅ ᖃᓄᐃᑎᑦᑎᕙᓪᓕᐊᖏᓪᓗᓂ (ᐊᐅᓚᓂᖃᙱᓪᓗᓂ) ᑎᒥᒦᓪᓗᓂ ᐊᕐᕌᒍᒐᓴᓐᓂᑦ ᐳᕙᓪᓗᓕᖅᑎᑦᑎᓚᐅᙱᓐᓂᖓᓂ. ᐳᕙᓪᓗᓇᖅᑐᖅ ᓄᖅᑲᖓᑎᑕᐅᔪᓐᓇᖅᑐᖅ ᐊᒻᒪᓗ ᑲᒪᒋᔭᐅᔪᓐᓇᖅᑐᓂ. ᐳᕙᓪᓗᒻᒪᖔᖅ ᖃᐅᔨᓴᖅᑕᐅᓗᓂ ᑖᓐᓇ ᐊᑑᑎᖃᓪᓚᕆᑦᑐᖅ ᐱᔾᔪᑎᒋᓪᓗᒍ ᐃᓕᓐᓂᒃ ᓴᐳᔾᔨᓯᒪᓂᐊᕐᖓᑦ, ᐃᓚᓐᓂᓪᓗ ᓄᓇᖅᑲᑎᓐᓂᓪᓗ. ᐋᓐᓂᐊᕕᔅᓯᓐᓅᖃᑦᑕᕆᔅᓯ ᖃᐅᔨᓴᖅᑕᐅᔭᖅᑐᕐᓗᓯ.

ᐳᕝᕕᕆᓇᖅᑐᖅ-19 ᑖᓐᓇ ᓴᖅᑭᕋᑖᕐᓯᒪᒻᒪᑦ ᐋᓐᓂᐊᓇᖅᑐᖅ ᐃᓅᑉ ᑎᒥᖓᓂ ᖃᐅᔨᔭᐅᓚᐅᕐᓯᒪᙱᒻᒪᑦ. ᐃᓚᒋᔭᐅᒻᒪᑦ ᖁᐱᕐᕈᐊᕐᔪᓄᑦ (coronaviruses) ᑖᒃᑯᐊ ᖃᓂᒻᒪᒍᑕᐅᓲᑦ ᑭᒃᑯᑐᐃᓐᓇᕐᓄᑦ ᐆᒪᔪᓄᓪᓗ. ᑭᒃᑯᑐᐃᓐᓇᐃᑦ ᐋᓐᓂᐊᓕᕈᓐᓇᖅᑐᑦ ᐳᕝᕕᕆᓇᖅᑐᒧᑦ−19 ᓂᐅᕐᓯᓗᓂ ᐊᓂᕐᓵᑐᕐᓂᒃᑯᑦ ᐳᕝᕕᕆᓇᖅᑐᖅᑕᓕᒻᒥᒃ−19 ᖁᐱᕐᕈᓂᑦ, ᐊᑦᑐᕐᓯᓗᓂ ᑲᑕᒐᕐᓂᑯᕈᓗᓐᓂᑦ ᑐᕝᕕᐅᓯᒪᔪᒥᑦ ᐊᒻᒪᓗ ᐊᑦᑐᕐᓯᓕᕐᓗᓂ ᑮᓇᕐᓂᑦ, ᖃᓂᓐᓂᒃ ᐅᕝᕙᓘᓐᓃᑦ ᓱᕐᓗᓐᓂᒃ, ᐅᕝᕙᓘᓐᓃᑦ ᐊᑦᑐᕐᓯᓂᒃᑯᑦ ᓲᕐᓗ ᐃᒫᒃ ᑎᒎᑎᓂᖅ (ᓴᐃᒨᕐᓂᖅ) ᐃᕿᑦᑎᓂᖅ ᐅᕝᕙᓘᓐᓃᑦ ᑯᓃᔅᓯᓂᖅ. ᑭᒃᑯᑐᐃᓐᓇᐃᑦ ᐊᐃᑦᑐᖅᑕᐅᔪᓐᓇᖅᑐᑦ ᐳᕝᕕᕆᓇᖅᑐᒧᑦ−19 ᐅᓪᓗᓂᑦ 14ᓂᑦ ᑕᒪᓐᓇ ᓴᖅᑭᓚᐅᙱᓐᓂᖓᓂ.

ᐳᕝᕕᕆᓇᖅᑐᖅ-19 ᒫᓐᓇ ᐃᓅᓕᓴᐅᑎᓄᑦ ᐋᖅᑭᑦᑕᐅᔾᔪᑎᔅᓴᖃᙱᒻᒪᑦ, ᑭᓯᐊᓂᓕ, ᐃᓄᓕᓐᓃᕋᔭᓗᐊᖅᑕᐃᓕᓂᖅ ᐊᒻᒪᓗ ᓇᒻᒥᓂᖅ−ᓇᐅᑦᑎᕐᓱᖃᑦᑕᕐᓂᖅ ᐃᑲᔫᑎᖃᕈᓐᓇᖅᑐᖅ ᓯᐊᒻᒪᑎᑦᑎᑦᑕᐃᓕᓂᕐᒥᒃ ᖃᓂᒪᓇᖅᑐᒥᒃ. ᐊᖏᕐᕋᕐᓯᒪᑐᐃᓐᓇᕐᓗᑎᑦ, ᐊᒡᒐᑎᑦ ᐅᐊᓴᑲᑕᔾᔫᒥᓗᒋᑦ ᐊᒻᒪᓗ ᓇᒻᒥᓂᖅ−ᐃᓄᑑᑦᑎᐅᑎᓯᒪᑲᐃᓐᓇᕐᓗᑎᑦ ᐊᓂᑦᑕᐃᓕᓗᑎᑦ ᐅᓪᓗᓂᑦ 14ᓂᑦ ᐅᑎᓚᐅᖅᑎᓪᓗᑎᑦ ᐊᐅᓪᓚᕐᓯᒪᔪᓂᐅᓗᑎᑦ ᓇᒧᑐᐃᓐᓇᖅ ᑲᓇᑕᒥ. ᖃᐅᔨᒍᕕᑦ ᓇᓕᑐᐃᓐᓇᖏᓐᓂᒃ ᖃᓄᐃᒍᑕᐅᕙᑦᑐᓂᑦ ᐳᕝᕕᕆᓇᖅᑐᒧᑦ−19 ᓲᕐᓗ ᐆᓐᓂᐊᓇᕐᓗᑎᑦ, ᖁᐃᕐᓱᑲᑕᓪᓗᑎᑦ ᐅᕝᕙᓘᓐᓃᑦ ᐃᐱᓂᐊᕈᕕᑦ, ᐊᓂᑦᑕᐃᓕᑲᐃᓐᓇᕋᔭᖅᑯᑎᑦ ᐊᒻᒪᓗ ᐅᖄᓚᓗᑎᑦ ᓄᓇᔅᓯᓐᓂ ᐋᓐᓂᐊᕕᔅᓯᓐᓄᑦ ᐅᖄᓚᑦᑕᐅᑎᒋᓗᑎᑦ.

ᓱᓕ ᑎᓕᐅᕆᕗᒍᑦ ᒐᕙᒪᑦᑎᓐᓂᒃ ᑐᑭᑖᕈᑎᖃᑦᑎᐊᖁᓪᓗᒋᑦ ᖃᓄᖅᑑᕈᑕᐅᖁᓪᓗᒍ ᐳᕙᓪᓗᓇᖅᑐᖅᑕᖃᕈᓐᓃᖁᓪᓗᒍ ᐊᒻᒪᓗ ᓯᐊᒻᒪᖁᓇᒍ ᐊᐅᓚᑦᑎᔾᔪᑕᐅᖁᓪᓗᒍᓗ ᐳᕝᕕᕆᓇᖅᑐᖅ−19. ᑲᔪᓯᑎᑦᑎᒍᓐᓇᕐᓂᐊᕋᑦᑕ ᑕᒪᒃᑯᓐᓂᖓ ᐊᔾᔨᒌᖑᔪᓂᑦ ᑐᕌᒐᑦᑎᓐᓂᒃ, ᑲᑎᒪᔨᐅᕕᓐᓂᑦ ᑲᑦᑐᖓᐃᕈᑕᐅᔭᕆᐊᖃᕐᖓᑕ ᐋᓐᓂᐊᖅᑕᐃᓕᑎᑦᑎᓂᕐᒧᑦ ᓈᒻᒪᑦᑐᒥᒃ ᐊᑑᑎᕕᐅᖁᓪᓗᒋᑦ ᐃᓄᐃᑦ. ᑕᒪᑦᑕ, ᐃᓕᒍᑎᖃᕈᓐᓇᑐᐃᓐᓇᐅᒐᑦᑕ ᑕᒻᒪᕈᑎᒋᖃᑦᑕᕐᓯᒪᔭᑦᑎᓐᓂᒃ, ᐱᔪᓐᓇᕐᓯᑎᑦᑎᒋᐊᒃᑲᓂᕐᓗᑕ ᐃᓄᐃᑦ ᐊᔪᙱᓐᓂᖏᓐᓂᒃ ᓯᕗᓕᕐᓯᒍᓐᓇᕐᓂᖏᓐᓂᓪᓗ ᓄᓇᓕᕗᑦ ᐊᓐᓇᐅᒪᔪᓐᓇᓂᕐᓴᐅᖁᓪᓗᒋᑦ ᐊᒻᒪᓗ ᐃᓅᓯᖃᑦᑎᐊᖁᓪᓗᒋᑦ.

ᑐᑭᓯᒃᑲᓐᓂᕆᑦ ᐳᕙᓪᓗᓇᖅᑑᑉ ᒥᔅᓴᓄᑦ ᐅᕙᙵᑦ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᑦ ᑲᓇᑕᒥ, ᐊᒻᒪᓗ ᐅᕙᙵᑦ ᓄᓇᕗᑦ ᒐᕙᒪᒃᑯᖏᑦ.

ᑐᑭᓯᒃᑲᓐᓂᕆᑦ ᐳᕝᕕᕆᓇᖅᑑᑉ−19 ᒥᔅᓵᓄᑦ ᐅᕙᙵᑦ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᑦ ᑲᓇᑕᒥ, ᐊᒻᒪᓗ ᐅᕙᙵᑦ ᓄᓇᕗᑦ ᒐᕙᒪᒃᑯᖏᑦ.

ᐃᓚᖏᑦ ᑭᓪᓕᓯᓂᐊᕈᑕᐅᓯᒪᒧᑦ ᓱᒻᒪᑦ ᓄᓇᕗᑦ ᐃᓱᒫᓗᓇᖅᑐᒦᓐᓂᕐᓴᐅᒻᒪᖔᖅ ᐳᕙᓪᓗᓇᖅᑐᒧᑦ ᐊᒻᒪᓗ ᐳᕝᕕᕆᓇᖅᑐᒧᑦ−19ᒧᑦ:

• ᐃᓪᓗᓕᕆᓂᖅ: 56 ᐳᓴᓐᑎᖏᑦ ᐃᓄᐃᑦ ᓄᓇᕗᒻᒥᐅᑦ ᐃᓄᒋᐊᓗᐊᖃᑦᑕᖅᑐᓂᑦ ᐊᖏᕐᕋᖃᖃᑦᑕᕐᖓᑕ.
  • 32 ᐳᓴᓐᑎᖏᑦ ᓄᓇᕗᒻᒥᐅᑦ ᐃᓄᐃᑦ ᑐᔪᕐᒥᑎᑦᑎᖃᑦᑕᕐᓯᒪᒻᒪᑕ (ᖃᐅᔾᔩᑦᑐᓂᑦ ᐊᖏᕐᕋᖃᙱᑦᑐᓂᑦ) ᐊᕐᕌᒍᒋᕋᑖᖅᑕᑎᓐᓂ.
  • ᐃᓄᒋᐊᓗᐊᕐᐸᑦᑐᑦ ᐃᓪᓗᐃᑦ ᐳᕙᓪᓗᓇᖅᑐᒧᑦ ᐃᓱᒫᓗᓇᕐᓂᓴᐅᒻᒪᑕ. ᐃᓱᒫᓗᓇᕐᓂᕐᓴᐅᒋᓪᓗᑎᓪᓗ ᐊᐃᑦᑐᐃᒍᑕᐅᔪᓐᓇᕐᓂᖓᓂᒃ ᐳᕝᕕᕆᓇᖅᑐᒥᒃ−19.

• ᓂᕿᑦᑎᐊᕙᓕᕆᓂᖅ: 70 ᐳᓴᓐᑎᖏᑦ ᓄᓇᕗᒻᒥᐅᑦ ᐃᓄᐃᑦ ᓂᕿᔅᓴᖃᑦᑎᐊᖃᑦᑕᖏᒻᒪᑕ, ᑕᑯᓪᓗᒋᑦ ᓴᓂᐊᓂ 8 ᐳᓴᓐᑎᖏᑦ ᐊᓯᖏᑦ ᑲᓇᑕᒥᐅᑦ.
  • 1,734 ᓱᕈᓰᑦ ᓄᓇᕗᒻᒥᐅᑦ ᓂᕆᔭᔅᓴᖃᖃᑦᑕᖏᑦᑐᑦ ᐅᓪᓗᕐᒥᒃ ᐊᑕᐅᓯᕐᒥᒃ ᐊᕐᕌᒍᑕᒫᑦ.
  • ᓂᕿᑦᑎᐊᕙᓐᓂᒃ ᐊᔪᕐᓴᖃᑦᑕᕐᓂᖅ ᐳᕙᓪᓗᓇᖅᑐᒧᑦ ᐃᓱᒫᓗᓇᖅᑐᖅ. ᐊᑐᐃᓐᓇᖃᕐᓂᖅ ᓂᕿᓂᑦ ᐃᓱᒫᓗᓇᕐᒥᔪᖅ ᒫᓐᓇ ᓯᐊᒻᒪᐸᓪᓕᐊᑎᓪᓗᒍ ᐳᕝᕕᕆᓇᖅᑐᖅ-19, ᐅᓚᕕᑕᐅᓯᒪᓂᖏᓐᓂ ᓂᕿᑖᕐᕕᐅᕙᑦᑐᑦ.

• ᑮᓇᐅᔭᓕᐊᖑᕙᑦᑐᑦ: ᑮᓇᐅᔾᔭᔅᓵᖑᒐᔪᑉᐸᑦᑐᑦ ᐃᓄᓐᓄᑦ ᓄᓇᕗᒥ ᐊᒥᓲᓂᖃᕐᖓᑕ ᑕᒫᓂ $24,768. ᑮᓇᐅᔾᔭᔅᓵᖑᒐᔪᑉᐸᑦᑐᑦ ᖃᓪᓗᓈᕐᓄᑦ ᐃᓄᐃᑦ ᓄᓇᖓᓐᓂ ᐊᒥᓲᓂᖃᕐᖓᑕ ᑕᒫᓂ $84, 139 ᑕᑯᓪᓗᒋᑦ 2018ᓕᓴᐃᑦ

ᐊᒥᓲᒻᒪᑕ ᐃᓕᒍᑎᔅᓴᐃᑦ ᐃᓕᒍᑎᒋᔪᓐᓇᖅᑕᕗᑦ ᐳᕙᓪᓗᓇᖅᑐᒥ ᐊᑐᓯᒍᓐᓇᖅᑕᕗᑦ ᑕᒪᑐᒥᖓ ᓯᐊᒻᒪᑎᑦᑎᑦᑕᐃᓕᓗᑕ ᐳᕝᕕᕆᓇᖅᑐᒥᒃ−19. ᑕᕝᕙᐅᑯᐊ ᐃᓚᖏᑦ ᐱᔾᔪᑕᐅᔪᑦ ᐳᕙᓪᓗᓇᖅᑐᒥ ᑲᓇᑕᒥ, ᐃᓄᐃᑦ ᓄᓇᖓᓐᓂ, ᓄᓇᕗᒥ, ᐊᒻᒪᓗ ᕿᑭᖅᑕᓂ ᓄᓇᓕᓐᓂᑦ:

• ᑲᓇᑕ:
  • 4.8/100,000 = ᐊᒥᓲᓂᖏᑦ ᐳᕙᓪᓗᓕᕋᑖᕐᓯᒪᔪᑦ ᐊᕐᕌᒍᑕᒫᑦ (ᐳᕙᓪᓗᓕᕐᓯᒪᔪᑦ ᐊᒥᓲᓂᖏᑦ) ᐳᕙᓪᓗᑦᑐᑦ (2016)
  • 0.6/100,000 = ᐊᒥᓲᓂᖏᑦ ᑲᓇᑕᒥ−ᐃᓅᓂᑯᐃᑦ ᖃᓪᓗᓈᑦ ᓄᓇᓖᑦ ᐳᕙᓪᓗᐸᑦᑐᑦ ᐊᕐᕌᒍᑕᒫᑦ (2016)

• ᐃᓄᐃᑦ ᓄᓇᖓᑦ:
  • 182.9/100,000 = ᐃᓘᓐᓇᖏᓐᓂ ᐊᒥᓲᓂᕆᕙᑦᑕᖏᑦ ᐳᕙᓪᓗᓂᕐᒧᑦ ᐃᓄᓐᓂᑦ ᓄᓇᓕᓐᓂᑦ ᐃᓄᐃᑦ ᓄᓇᖓᓐᓂ (2016)
    • ᑖᒃᑯᐊ ᓈᓴᐅᑏᑦ ᐊᒥᓲᓂᖏᑦ 300ᕌᖅᑎᖅᑐᑎᒃ ᐊᒥᓲᓂᕐᓴᐃᑦ ᐳᕙᓪᓗᑦᑐᓂᑦ ᖃᓪᓗᓈᕐᓂᑦ ᑲᓇᑕᒥ−ᐃᓅᓂᑯᓂᑦ ᓄᓇᓕᓐᓂᑦ

• ᓄᓇᕗᑦ:
  • 181.1/100,000 = ᐊᒥᓲᓂᖃᕋᔪᔅᓯᒪᔪᑦ ᑕᒫᓂ ᐳᕙᓪᓗᑦᑐᑦ ᐊᕐᕌᒍᓂᑦ ᑖᒃᑯᓂᖓ 2006-2016
    • ᓯᐊᒻᒪᖃᑦᑕᕐᓯᒪᓂᖏᑦ ᓄᓇᓕᓐᓂᑦ ᐅᑯᓇᓂ ᐊᕐᕌᒍᓂᑦ 2010, 2012, 2014, and 2017.
      • 2017ᖑᑎᓪᓗᒍ, 11 25ᖏᓐᓂ ᓄᓇᓕᓐᓂᑦ ᐳᕙᓪᓗᑦᑐᖃᕐᓯᒪᔪᑦ ᑐᓴᖅᑎᑦᑎᒍᑕᐅᓯᒪᔪᓂᑦ.

• ᕿᑭᖅᑕᓂ ᓄᓇᓕᓐᓂ:

ᓄᓇᕗᒥ, ᐳᕙᓪᓗᑦᑐᑦ ᐊᒥᓲᓂᕐᐹᖑᓯᒪᔪᑦ ᕿᑭᖅᑕᓂ ᓄᓇᓕᓐᓂᑦ, ᑕᒫᓂ ᐊᑯᓐᓈᕿᓂᖃᖅᑐᓂ 305.1 ᖃᐅᔨᔭᐅᕋᑖᕐᓯᒪᔪᑦ ᐳᕙᓪᓗᑦᑐᑦ ᐊᕐᕌᒍᑕᒫᑦ ᑖᒃᑯᓇᓂ ᐊᕐᕌᒍᓂᑦ 2006-2016.