ᐅᓪᓗᒥ ᓄᓇᕐᔪᐊᓕᒫᒥ ᐊᕐᓇᓄᑦ ᐅᓪᓗᕆᔭᐅᒪᑦ. ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑯᕕᐊᓱᒍᑎᖃᕐᒪᑕ ᐃᓄᒃᓂ ᐊᕐᓇᓂᒃ ᐅᓪᓗᒥ.

ᑕᒫᓂ ᐊᕌᒎᔪᒥ ᑕᑯᒃᓴᐅᑎᐸᕗᑦ ᒪᓚᐃᔭ ᔪᐊᑎᓐ ᒫᒃᒧ ᐸᖕᓂᕐᑑᕐᒥᐅᑕᕐᒃ.

ᕼᐊᑭᕐᓂᕐᒃ ᐱᒻᒪᕆᒋᔭᐅᒪᑦ ᑖᑯᓄᖓ ᐃᓛᒋᒃᓄᑦ ᐊᒪᓗ ᔪᐊᑎᓐ ᒥᑭᓐᓂᕐᓴᓂᒃ ᕼᐊᑭᕈᑎᒥᒃ ᐊᓇᐅᑎᒥᒃ ᑎᒍᒥᐊᕐᐸᓕᓚᐅᕐᑐᕐᒃ ᐱᓱᒋᐅᓚᐅᖏᑎᓪᓗᓂᓘᓃᑦ!

ᒪᕐᕉᓐᓂᒃ ᐅᑭᐅᖃᕐᓕᕐᑎᑦᓗᓂ ᕼᐊᑭᕐᓯᐅᑎᓂᒃ ᐊᑎᔭᕌᖓᒥ ᐅᖃᕐᐸᓚᐅᕐᓯᒪᔪᕐᒃ ᕼᐊᑭᒋᐊᕐᑐᓂᐊᓕᕌᒥᒎᕐᒃ.

ᔪᐊᑎᓐ ᓯᐊᕆᔮᕐᕆᐅᓴᕐᐸᓕᓚᐅᕐᑐᕐᒃ ᐅᑭᐅᖃᑐᐃᓇᕐᑐᓂ ᐱᖓᓱᓂᒃ, ᑕᓪᓕᒪᓂᒃ ᐅᑭᐅᖃᓕᕋᒥ ᐊᔪᕈᕐᓃᕐᐸᓪᓕᐊᓚᕐᕆᓕᓚᐅᕐᑐᕐᒃ ᓱᑲᓐᓂᕐᓴᐅᓕᕐᑐᓂᓗ ᐃᒦᓃᓇᑯᓗᒃ ᐊᔪᕈᓃᕐᐸᓕᐊᓕᕐᑐᓂ.

ᐊᔪᕈᓃᕐᐸᓕᐊᓂᖓ ᐃᓐᒥᓃᓇᕐ ᐱᓇᓱᐊᖏᓇᕐᓂᕐᒧᑦ ᐊᒃᓱᕈᕐᓂᕐᒧᑦᓗ, ᑭᓯᐊᓂ ᐊᐳᕐᑕᕈᑎᑕᖃᓚᐅᕐᑐᕐᒃ ᐸᖕᓂᕐᑑᒥ. ᓯᑯᖑᐊᕐᑕᖃᖏᒪᑦ ᐊᒪᓗ ᐊᓐᓂᑭᑦᑐᕐᕕᒃ ᒪᑐᐃᑕᐃᓇᕐᐸᒃᑐᓂ ᓯᓚ ᓂᒃᓕᔭᕌᖓᑦ ᔮᓄᐊᕆᐅ ᓄᖑᐊᓂ ᐊᒪᓗ ᒪᑐᐃᖓᓗᓂ ᑕᕝᕗᖓ ᐄᐳᕆᒧᑦ ᐅᐱᖓᕐᓵᖑᕐᐸᓕᐊᓕᕐᑎᑦᓗᒍ.

ᐃᑲᔪᕈᓇᕐᑐᓂᒃ ᐊᑐᐃᓇᕐᑕᖃᕐᐸᖏᒥᒃᒪᑦ ᐸᖕᓂᕐᑑᒥ, ᑕᒪᑯᐊ ᐃᓕᒌᑐᑦ ᕼᐊᑭᕐᐸᒃᑐᑦ ᐃᒻᒥᒎᕐᐸᒃᑐᑎᒃ ᐊᒻᒪᓗ ᐊᒥᓲᓗᐊᖏᑐᑦ ᐃᑲᔪᕈᓇᓲᖑᓇᕐᒪᑕ ᕼᐊᑭᕐᒃᑎᓂᑦ ᐊᔪᕈᓃᕐᓴᕐᓂᕐᒧᑦ ᖃᓄᑕᐃᓇᕐᒃ ᕼᐊᑭᕐᒃᓂᕐᑯᑦ.

ᔪᐊᑎᓐ ᓯᕗᓕᕐᐹᒥᒃ ᐱᖑᐊᖃᑕᐅᓚᐅᕐᓯᒪᔪᕐᒃ ᐸᖕᓂᕐᑑᑉ ᓯᓚᑖᓂ ᐃᖃᓗᒃᓄᖓᐅᓗᓂ ᑐᓂᒃᑕᐃᕐᒃᑎᓗᒋᑦ ᕼᐊᑭᕆᐊᕐᑐᕐᒃᑐᓂ. ᑕᕿᕆᓚᐅᕐᑕᑦᑎᓐᓂ ᕕᕗᐊᕆᒥ, ᔪᐊᑎᓐ ᐋᑐᕙᒨᓚᐅᕐᑐᕐᒃ ᐱᖑᐊᖃᑎᖃᕆᐊᕐᒃᑐᕐᒃᑐᓂ U15 ᐊᕐᓇᐃᑦ ᕼᐊᑭᕐᑎᖏᓐᓂᒃ. ᐱᓇᓱᐊᕈᓯᕐᒃ ᐊᓂᒍᕐᒪᑦ ᔭᓗᓇᐃᒻᒧᑦ ᐊᔪᕈᓐᓃᕐᓴᕆᐊᕐᑐᓕᕐᑐᓂ. ᔪᐊᑎᓐ ᐅᑎᒃᑲᓐᓂᕐᓂᐊᕐᑐᕐᒃ ᐊᑐᕚᒧᑦ ᑕᕿᑦᑕ ᓄᖑᐊᓂ ᐱᖑᐊᖃᑎᖃᕆᐊᕐᑐᕐᓗᓂ U19 ᐊᕐᓇᐃᑦ ᕼᐊᑭᕐᒃᑎᖏᓂᒃ.

ᓄᕕᐱᕆ 2022ᖑᑎᑦᓗᒍ, ᖃᐃᖁᔭᐅᓚᐅᕐᓯᔪᕐᒃ ᐊᕐᓇᐃᑦ ᕼᐊᒃᑭᕐᒃᑏᑦ ᐊᔪᖏᓂᖏᑦ ᕼᐊᑭᒃᓂᕐᑯᑦ ᖃᐅᔨᓴᕐᑕᐅᑎᑦᓗᒋᑦ ᐃᖃᓗᒃᓂ, 11ᐸᓂᒃ ᐅᑭᐅᖃᑐᐃᓇᕐᑐᓂ. ᐱᕕᖃᕐᑎᑦᑎᓚᐅᕐᐳᕐᒃ ᐃᓕᓐᓂᐊᑲᓐᓂᕐᓕᕐᑐᓂ ᕼᐊᑭᒃᓂᐅ ᒥᒃᓵᓄᑦ ᐸᖕᓂᕐᑑᕐᒃ ᓯᓚᑖᓂ. ᔪᐊᑎᓐ ᓂᕈᐊᕐᑕᐅᓚᐅᕐᑐᕐᒃ ᐱᖑᐊᖃᑕᐅᓂᐊᕐᓗᓂ ᐅᑭᐅᕐᑕᕐᑐᒥ ᐱᖑᐊᕐᕕᒃᔪᐊᓕᕐᐸᑕ, ᐊᖓᔪᖄᖏᑦ ᑕᐸᐃᓚᐅᕐᓯᒪᔪᑦ ᐊᓯᖏᑦ ᐱᖑᐊᖃᑎᒋᔭᖏᑦ ᑕᒫᓂ 19ᖏᓐᓂ ᐅᑭᐊᖃᕐᑎᑦᓗᒋᑦ.

ᔪᐊᑎᓐ ᓯᕗᓕᕐᒃᐹᒥᒃ ᐱᖑᐊᖃᑕᐅᔭᕐᑐᓚᐅᕐᓯᒪᔪᕐᒃ ᐅᑭᐅᕐᑕᕐᒃᑐᒥ ᐱᖑᐊᕕᒃᔪᐊᕐᒃᑎᑦᓗᒋᑦ ᕗᑦ ᐸᕙᓘ, ᐊᐃᓪᐴᑕᒥ ᔮᓄᐊᕆ 2023.

ᐱᖃᑕᐅᓇᓱᒃᑲᓐᓂᓕᕋᒥ ᐱᖑᐊᕐᕕᒃᔪᐊᕆᐊᓛᕐᑐᓄᑦ ᐃᖃᓗᖕᓄᖓᐅᓚᐅᕐᑐᕐᒃ ᓄᕕᐱᕆ 2023ᒥ ᓂᕈᐊᕐᒃᑕᐅᑲᓐᓂᕆᓗᓂ ᑭᒐᕐᒃᑐᐃᖃᑕᐅᓗᓂ ᓄᓇᕗᒻᒥ ᐱᖑᐊᕕᒃᔪᐊᓕᕐᒃᐸᑕ.

ᐊᒃᓱᕈᕐᓇᕋᓗᐊᕐᑎᑦᓗᒍ, ᔪᐊᑎᓐ ᐊᔪᖐᓇᑦᑎᐊᕐᓯᒪᔪᕐᒃ. ᓂᕈᐊᕐᑕᐅᓂᐊᕐᑎᑦᓗᒍ ᑕᒪᑮᓐᓄᑦ ᐱᖑᐊᕐᕕᔪᐊᕐᓂᕐᓄᑦ ᓯᐊᕇᔮᓚᐅᕐᓯᒪᖏᑦᓱᓂ ᓱᓕ ᐸᖕᓂᕐᑑᒥ ᓂᕈᐊᕐᑕᐅᖃᑦᑕᓚᐅᕐᑐᕐᒃ.

ᐸᕐᓇᖃᑦᑕᕐᑐᒃ ᐱᖑᐊᕆᐊᕐᑐᓚᐅᕋᓂ ᐊᔪᕈᓃᕐᓴᕐᒃᓂᒃᑯᑦ, ᐊᑖᑕᖓ ᑕᐃᕕᑎ ᓴᓇᓚᐅᕐᑐᕐᒃ ᐊᔪᕈᓃᕐᓴᕐᕕᒋᓂᐊᕐᑕᖓᓐᓂᒃ ᐃᒡᓗᖓᑕ ᓯᓚᑖᓂ, ᓈᒪᑦᑎᐊᕐᑐᒥᒃ ᕼᐊᑭᕐᒃᑐᓄᑦ ᐊᑐᕐᑕᐅᕙᒃᑐᒥᒃ ᐃᓯᕐᕕᐅᔪᑕᐅᕙᒃᑐᒥ ᐱᑕᖃᕆᓗᓂ ᓇᑎᖃᕆᓗᓂ ᐊᐅᒃᑕᔫᒥᒃ ᓴᕕᕋᔭᒥᒃᓘᓃᑦ.

ᐃᒡᓗᖓᑕ ᓯᓚᑖᓂ ᐊᔪᕈᓃᕐᓴᐸᒃᑐᓂ ᐊᒪᓗ ᐊᖏᕋᒥᓂ ᐅᒃᓚᒍᑎᑯᑦ ᐅᒃᓚᕐᐸᒃᑐᕐᒃ ᐃᖃᐃᓕᓴᕐᑐᓂ, ᐃᓕᓐᓂᐊᕐᕕᒃᒧᐊᖃᑕᕆᓪᓗᓂ ᐅᖁᒪᐃᑐᓂᒃ ᑭᕕᒃᓯᔪᑎᓂᒃ ᑭᕕᒃᓯᕙᒃᑐᓂ ᓄᑭᒃᓴᐃᔾᔪᑎᓂᒃ ᐱᓇᓱᐊᕈᓯᕐᒃ ᐱᖓᓱᐊᕐᑎᑦᑐᒍ, ᖃᓄᑐᐃᓇᕐᓗ ᐃᖃᐃᓕᓴᕐᐸᒃᑐᓂ ᐊᒪᓗ ᐃᓕᓐᓂᐊᕐᕕᒃᒥ ᐱᖑᐊᖃᑕᐅᕈᓘᔭᕐᐸᒃᑐᓂ. ᑕᐃᑯᐊᓗ ᐱᖑᐊᕐᕕᒃᔪᐊᕐᑎᑎᔨᑦ ᐃᑲᔪᕐᑎᒋᖅ ᐱᓕᒻᒪᒃᓴᐃᔩᑦ ᐃᑲᔪᕐᓱᑎᒃ ᓯᐊᕆᔮᖏᑕᕌᖓᑦ ᐃᖃᐃᓕᓴᕈᑎᒃᓴᓂᒃ ᐊᑐᐃᓐᓇᐅᑎᒃᑎᕙᒃᓱᑎᒃ.

ᔪᐊᑎᓐ ᖃᐅᐸᑦ ᐊᐅᓪᓚᕐᓂᐊᕐᑐᕐᒃ ᐊᓛᔅᑲᓕᐊᕐᑐᓂ ᒫᔨ 9 ᐱᖑᐊᕕᒃᔪᐊᕆᐊᑐᖃᑕᐅᓗᓂ 2024ᒥ ᐱᖑᐊᕐᕕᒃᔪᐊᕐᓂᐊᕐᑐᓂᒃ.

ᐊᖓᔫᖄᖏᑦ ᓰᓇ ᐊᒪᓗ ᑕᐃᕕᑎ ᐅᐱᒍᓱᒃᓚᕆᒃᑐᑦᐸᓂᖕᒥᓂᒃ – ᐃᓱᒪᒋᓗᓂᒋᑦ ᖃᓄᐃᓕᐅᕐᓯᒪᔭᖏᑦ ᐅᓪᓗᒻᒥᒧᑦ ᑎᑭᑦᑐᒍ ᐃᒥᓂᒃ ᐊᓱᕈᕐᓱᓂ ᕼᐊᑭᒃᓂᕐᒥᒃ ᖁᕕᐊᒋᔭᖃᕋᒥ. ᐊᓈᓇᖓ ᖁᕕᐅᕐᐸᒃᑐᕐᒃ ᐅᔾᔨᕆᓕᕋᒥ ᐊᒃᓱᕈᕐᓯᒪᓂᖓ ᐸᓐᓂᖓ ᐱᖑᐊᕐᑎᑦᑎᐊᕙᐅᔪᒪᓂᕐᒥᓄᑦ.

ᔪᐊᑎᓐ ᐃᒻᒥᓐᓂᒃ ᐱᒋᐊᕐᑎᑦᑎᓲᕐᒃ ᕼᐊᑭᓂᕐᒥᒃ ᖁᕕᐊᒋᔭᖃᕋᒥ ᐊᒻᒪᓗ ᐊᕌᒎᑐᐃᓇᓐᒥᒃ ᓇᓗᓇᕈᓃᕐᑐᕐᒃ ᐱᔪᓇᕐᓂᕐᓴᓛᓘᓕᕐᑐᕐᒃ ᑲᖑᓱᖏᓂᕐᓴᐅᓕᕐᒃᑐᓂᓗ. ᖃᐅᔨᒪᓕᕐᓱᓂᓗ ᓄᓇᓕᖓᑕ ᓯᓚᑖᓂ ᕼᐊᑭᓐᓂᕐᒃ ᖃᓄᐃᑑᒪᖔᑦ ᐊᒻᒪᓗ ᐱᒋᐊᕐᑎᑦᑎᓪᓚᕆᕐᓯᒪᔪᕐᒃ ᐊᒃᓱᕈᕐᑲᓐᓂᕈᑎᒋᓕᕐᑐᓂᐅᕐᒃ ᐱᖑᐊᕐᑎᑦᑎᐊᕙᖑᕋᓱᒃᓂᕐᒧᑦ ᐊᒃᓱᕈᕐᑎᑕᐅᕙᓕᕋᒥ.

ᐊᖓᔪᖄᖏᑦ ᖁᔭᓕᔪᒪᔪᑦ ᑭᒃᑯᓕᒫᓂᒃ ᑭᒃᑯᑐᐃᓐᓇᑦᑎᐊᓂᒃ ᐃᑲᔪᕐᒃᓯᒪᔪᓂᒃ ᐸᓂᖓᓐᓂᒃ ᐅᓪᓗᒥᒧᑦ ᑎᒃᑭᓪᓗᒍ. ᐱᖃᓇᕆᔭᖏᑦ ᐹᖕᓂᕐᑑᕐᒥ, ᐃᓕᓴᐃᔨᒌᕙᓚᐅᕐᑕᖏᑦ ᐃᓕᓴᐃᔨᒋᓕᕐᑕᖏᓗ, ᐃᑲᔪᕐᐸᒃᑐᑦ ᕼᐊᑭᓂᕐᒥᒃ, ᕼᐊᑭᕐᒃᑎᓪᓕᕆᔩᑦ ᑎᒥᖏᑦ ᐊᒪᓗ ᐃᓚᖏᑦ ᐊᒻᒪᓗ ᐱᖃᓇᓐᕆᔭᖏᑦ ᑲᔪᖏᓴᐃᖏᓇᕐᐸᒃᑐᑦ ᐸᓂᖓᓐᓂᒃ!

ᐱᖑᐊᑎᑦᐊᓛᕐᐳᓯ ᐊᓛᔅᑲᒥ ᐊᒻᒪᓗ ᖁᕕᐊᓱᒍᑎᒋᕙᕗᑦ ᓄᓇᕐᔪᐊᕐᒃᒥ ᐊᕐᓇᓄᑦ ᐅᓪᓗᕆᔭᐅᑎᑦᓗᒍ.