ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐊᒻᒪᓗ ᓄᓇᓕᖕᒧᑦ-ᑐᕌᖓᔪᓂᒃ ᓇᐅᑦᑎᖅᓱᖅᑏᑦ ᒥᑦᑎᒪᑕᓕᖕᒥ ᐱᔭᕇᕈᑎᖃᕋᑖᓚᐅᕐᒪᑕ ᓇᐅᑦᑎᖅᓱᕐᓂᖏᓐᓂᒃ ᔭᓐᓄᐊᓕ 2020ᒥ.  ᑕᒪᒃᑯᐊ ᐱᒻᒪᕆᐋᓗᐃᑦ ᐱᓕᕆᐊᖑᔪᑦ ᓇᐅᑦᑎᖅᓱᖅᑏᑦ ᐃᑲᔪᖅᐸᒃᑐᑦ ᓴᐃᒪᓐ ᐃᓅᑎᖅ, ᔭᐃᒥᓯ ᑯᓄᒃ, ᓕᐅ ᒪᒃᑖᖅ, ᕋᐃᔭᓐ ᐊᕐᓇᑲᓪᓚᒃ, ᕗᕌᑦ ᓄᑕᕋᕐᓗ ᓇᐅᑦᑎᖅᓱᕆᐊᖃᑦᑕᖅᖢᑎᒃ ᐅᒪᔪᓂᒃ ᑕᕆᐅᕐᒥ ᐊᕙᑎᖓᓂᓗ ᓄᓇᓕᐅᑉ ᓯᓚᑖᓂ.

ᓇᐅᑦᑎᖅᓱᖅᑎᓪᓗᒋᑦ, ᐃᖏᕐᕋᓚᐅᖅᑐᑦ ᐅᐊᖕᓇᖅᐸᓯᐊᓄᑦ ᒥᑦᑎᒪᑕᓕᐅᑉ ᖃᐅᔨᓴᕆᐊᖅᖢᑎᒃ ᓇᒡᒍᑎᓂ, ᓇᑦᑎᖅᓯᐅᓯᓐᓈᕐᓗᑎᒃ ᐊᒻᒪᓗ ᕿᓂᕐᓗᑎᒃ ᐊᓯᖏᓐᓂᒃ ᐅᒪᔪᓂᒃ.  ᓇᒡᒍᑎ ᐋᔪᕋᐅᕗᑦ ᓴᖅᑭᖃᑦᑕᖅᑐᓂᒃ ᐱᑐᕐᓂᓕᖅᑎᓪᓗᒍ ᐊᒻᒪᓗ ᓇᑦᑎᖃᑦᑎᐊᓕᓲᖑᓪᓗᓂ.  .

“ᖁᕕᐊᓇᕐᓂᕆᓚᐅᖅᑕᖓ ᐃᖏᕐᕋᑎᓪᓗᒋᑦ ᓴᐃᒪᓐ ᓯᕗᓪᓕᖅᐹᖑᓪᓗᓂ ᓇᑦᑎᖅᖢᓂ” ᐃᖅᑲᐅᒪᔭᖓ ᕿᑭᖅᑕᓃᒃᑯᓐᓂ ᐃᖅᑲᓇᐃᔭᖅᑎᖓ, ᑏᕕ ᕿᐊᑦᓱᒃ.  “10ᒥᓂᑐᐃᓐᓇᕐᓂᒃ 15ᒥᓂᑐᐃᓐᓇᕐᓂᓘᓐᓃᑦ ᓇᓂᓯᓚᐅᖅᑎᓪᓗᓂ ᐊᒡᓗᒥ ᓇᑦᑎᑲᐅᖅᑐᖅᖢᓂ − ᓴᐃᒪᓐ 20−ᕈᔪᖕᒥ ᐊᕐᕌᒍᓕᒃ ᑕᐃᒫᒃ ᐱᔪᓐᓇᖅᑎᒋᓂᖓ ᐊᒃᓱᐊᓗᒃ ᐅᐱᓐᓇᖅᑐᖅ ᑕᑯᒐᔪᐃᓐᓇᕐᒪᑦ ᐃᓅᓱᒃᑐᓂᒃ ᑕᐃᒫᑐᑦ ᐊᔪᙱᑎᒋᔪᓂ.”

ᓇᐅᑦᑎᖅᓱᖅᑏᑦ ᐊᔾᔨᓕᐅᕆᖃᑦᑕᓚᐅᕐᒥᔪᑦ ᓇᓄᐃᑦ ᑐᒥᖏᓐᓂᒃ ᓇᒡᒍᑎᐅᑉ ᖃᓂᒋᔭᖓᓃᓚᐅᖅᑐᓂᒃ ᐊᒻᒪᓗ ᐊᔾᔨᓕᐅᕆᓪᓗᑎᒃ ᓇᑦᑎᕐᓂᖅ ᐱᑕᕆᔭᐅᔪᓂ.  ᑕᒪᒃᑯᐊ ᑐᑭᓯᒍᑎᒃᓴᐃᑦ ᐊᒥᓱᓄᑦ ᑕᑯᔭᐅᔪᓐᓇᓚᐅᖅᑐᖅ ᐊᑐᖅᑕᐅᓪᓗᓂ ᓯᑯ ᖃᕆᑕᐅᔭᒃᑰᕈᓐᓇᐅᑎᐅᔪᒥᒃ, ᑖᒃᑯᐊ ᖃᕆᑕᐅᔭᒦᑦᑐᑦ ᐃᓕᐅᖅᑲᕐᕕᐅᕈᓘᔮᕈᓐᓇᓲᖅ ᑐᑭᓯᒍᑎᓂᒃ ᐊᒻᒪᓗ ᐅᒪᔪᖅᓯᐅᕐᓂᕐᒧᑦ ᐅᓂᒃᑳᕈᒪᔪᓂᒃ ᐊᓯᖏᓐᓂᓪᓗ.  ᓇᑦᑏᑦ ᓂᕿᖓ ᕿᓯᖓᓗ ᐃᓚᒌᓄᑦ ᑐᓂᔭᐅᓚᐅᖅᑐᑦ ᒥᑦᑎᒪᑕᓕᖕᒥ.

ᓇᐅᑦᑎᖅᓱᖅᑎᕗᑦ ᐊᔾᔨᐅᙱᑦᑐᒥᒃ ᐱᔪᓐᓇᕐᓂᖃᑦᑎᐊᖅᑐᑦ ᐃᓕᓯᒪᖕᒪᑕ ᐃᓐᓇᕐᓂᑦ ᐊᓯᖏᓐᓂᓗ ᐊᖑᓇᓱᒃᑎᓂᑦ.  ᑐᐊᕕᖅᖢᑎᒃ ᐱᓕᕆᔭᕆᐊᖃᓲᖑᖕᒪᑕ ᑖᖅᓯᓴᕋᐃᓐᓂᖓᓂᒃ ᐅᑭᐅᒃᑯᑦ.  ᑖᓐᓇ ᐃᑲᔫᓯᐊᖅᑖᕐᕕᐅᓯᒪᔪᑦ ᐊᑐᖅᑕᐅᖕᒪᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᓴᐳᔾᔭᐅᓯᒪᓪᓗᓂ.  ᑖᒃᑯᐊ ᓇᐅᑦᑎᖅᓱᖅᑎᕗᑦ ᐃᑲᔪᖃᑕᐅᔪᑦ ᐅᓄᖅᓯᒋᐊᖅᑎᑦᓯᓂᖏᓐᓂᒃ ᖃᐅᔨᒪᔭᑐᖃᐅᔪᓂᒃ ᒥᑦᑎᒪᑕᓕᖕᒥᐅᓄᑦ ᐊᒻᒪᓗ ᐊᓯᖏᓐᓄᑦ ᐃᓕᑉᐸᓪᓕᐊᔪᓄᑦ ᐊᕙᑎᒥᒃ.

ᑖᓐᓇ ᓄᓇᓕᖕᒧᑦ-ᑐᕌᖓᔪᒥᒃ ᓇᐅᑦᑎᖅᓱᕐᓂᕐᒧᑦ ᐱᓕᕆᐊᖓ ᐱᒋᐊᓚᐅᖅᑐᖅ ᒪᐃ 2017ᒥ ᐊᒻᒪᓗ ᑲᔪᓯᑎᑕᐅᓂᐊᖅᖢᓂ ᒫᑦᓯ 2020ᒧᑦ ᐃᓕᓐᓂᐊᖅᑎᑕᒃᑲᓐᓂᕐᓂᐊᖅᖢᑎᒃ ᐱᓕᕆᒃᑲᓐᓂᕐᓗᑎᒃ ᓄᓇᒥ/ᓯᑯᒥ ᐃᓱᓕᓚᐅᖅᑎᓐᓇᒍᑦ ᑖᓐᓇ ᐱᓕᕆᐊᖅ.  ᑖᓐᓇ ᑭᖑᓪᓕᖅᐹᖑᑎᓪᓗᒍ ᐊᕐᕌᒍ ᐆᑦᑐᕋᖅᑕᐅᔪᒥᒃ ᐱᓕᕆᐊᖓ, ᑐᕌᒐᖃᕐᓂᖅᓴᐅᓯᒪᔪᑦ ᐃᓕᓐᓂᐊᖅᑎᑦᓯᓂᕐᒥᒃ, ᐱᔪᓐᓇᕐᓂᕆᔭᐅᔪᓂᒃ ᐱᕙᓪᓕᐊᑎᑦᓯᓂᕐᒥᒃ ᐊᒻᒪᓗ ᐱᔪᓐᓇᕐᓂᖅᑖᖅᑎᑦᓯᒃᑲᓐᓂᕐᓂᕐᒥᒃ ᓄᓇᓕᖕᒥᐅᓂ.  ᓱᓕᓗ ᐃᓕᓐᓂᐊᖅᑎᓪᓗᒋᑦ ᐊᕙᑎᒥ ᓇᐅᑦᑎᖅᓱᕐᓂᕐᒥᒃ, ᑖᒃᑯᐊ ᓇᐅᑦᑎᖅᓱᖅᑏᑦ ᐃᓕᓐᓂᐊᖃᑕᐅᓚᐅᖅᑐᑦ ᖁᑭᐅᑎᓕᕆᓂᕐᒥᒃ, ᓄᓇᒥ/ᓯᑯᒥ/ᐃᒫᓂ ᐊᑦᑕᕐᓇᖅᑐᒦᑦᑕᐃᓕᕐᓂᕐᒥᒃ ᐊᒻᒪᓗ ᓯᑯ ᖃᕆᓴᐅᔭᒃᑰᕈᓐᓇᐅᑎᒥᒃ.  ᑖᓐᓇ ᐆᒃᑐᕋᖅᑕᐅᔪᖅ ᐱᓕᕆᐊᖅ ᐊᑐᖅᑕᐅᔪᓐᓇᕐᓂᐊᖅᑐᖅ ᑕᐃᒃᑯᓄᖓ ᓇᐅᑦᑎᖅᓱᖅᑎᐅᓂᐊᖅᑐᓂᒃ ᑕᓪᓗᕈᑎᐅᑉ ᐃᒪᖓᓄᑦ ᐃᓚᒋᔭᐅᑎᓪᓗᒍ ᐋᔩᕋᕈᑎᒋᔭᐅᓯᒪᔪᓂᒃ ᐊᖏᕈᑎᑎᒍᑦ.  ᒥᑦᑎᒪᑕᓕᖕᒥ ᓇᐅᑦᑎᖅᓱᖅᑏᑦ ᐱᓕᕆᐊᖓ ᐱᒋᐊᓪᓚᕆᖕᓂᐊᖅᑐᖅ ᐄᐳᓪ 2020ᒥ.