ᑲᓇᑕᐅᑉ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖃᐅᔨᓇᓱᐊᖅᑐᑦ ᓴᐳᔾᔨᒍᑎᔅᓴᒥᑦ ᑲᓇᑕᒥ ᐅᑭᐅᖅᑕᖅᑐᕐᐸᓯᐊᓂ

Posted ᐄᑉᐳ 12, 2019

ᑐᑭᓯᓯᒪᖃᑎᒌᑦᑐᑎᒃ ᐊᖏᖃᑎᒌᒍᑦ ᐃᒫᓂ ᓴᐳᔾᔨᕕᔅᓴᐅᒐᔭᙳᐊᖅᑐᒥ ᖁᑦᑎᑦᑑᑉ ᐃᒪᖓᓂ ᐅᕝᕙᓘᓐᓃᑦ ᑐᕙᐃᔪᐃᑦᑐᕐᒥ

ᐊᕙᑎ ᐊᑑᑎᖃᓪᓚᕆᑦᑐᐊᓘᒻᒪᑦ ᐃᓚᒋᔭᐅᓪᓗᓂ ᑲᓇᑕᒥᐅᑦ ᐃᓕᓴᕐᓇᕈᑎᖏᓐᓄᑦ. ᑕᐃᒫᒃ ᑲᓇᑕᐅᑉ ᒐᕙᒪᒃᑯᖏᑦ ᓴᐳᔾᔨᒋᐊᒃᑲᓐᓂᕋᓱᑉᐳᑦ ᐊᕙᑎᖓᓐᓂᒃ ᑲᓇᑕᒦᑦᑐᓂᑦ ᓄᓇᓂᑦ ᐃᒪᕕᖏᓐᓂᓪᓗ.

ᑐᓴᖅᑎᑦᑎᒍᑕᐅᕋᑖᔪᔪᖅ ᑲᓇᑕᒥᐅᑦ ᖃᐅᔨᓴᖅᑎᖏᓐᓄᑦ ᑐᑭᓯᓇᕐᓯᔪᒻᒪᑕ ᓯᑯᖓ ᓇᓗᓇᐃᕐᓯᒍᑕᐅᖃᑦᑕᕐᓯᒪᔪᖅ ᐅᑭᐅᖅᑕᖅᑐᕐᐸᓯᕐᒥ ᐅᕝᕙᓘᓐᓃᑦ ᐃᓄᐃᑦ ᓄᓇᖓᓐᓂᒃ ᓄᖑᑉᐸᓪᓕᐊᒻᒪᑦ. ᐊᕐᕌᒍᐃᑦ 2000 ᕿᑎᖏᓐᓂ, ᓂᕆᐅᒋᔭᐅᒻᒪᑦ ᑕᒪᓐᓇ ᑭᖑᓪᓕᕐᐹᖑᓗᓂ ᐊᐅᔭᒃᑯᑦ ᓯᑯᖃᐃᓐᓇᐸᑦᑐᖅ ᑲᓇᑕᐅᑉ ᖁᑦᑎᑦᑐᖓᑕ ᐃᒫᓂ, ᖃᐅᔨᒪᔭᐅᔾᔪᑎᓕᒃ ᐃᒫᒃ ᑐᕙᐃᔪᐃᑦᑐᖅ ᐃᓄᒃᑎᑐᑦ (ᐃᒫᒃ ᑐᑭᓕᒃ “ᐊᐅᓱᐃᑦᑐᖅ”). ᓯᓚᖓᑕ ᐊᓯᔾᔨᕐᓯᒪᓂᖓ, ᑭᒃᑯᑐᐃᓐᓇᕐᓄᑦ ᓱᕈᖅᑕᐅᕙᓪᓕᐊᓂᖓ, ᐱᕙᓪᓕᐊᔪᖃᓕᕐᐸᓪᓕᐊᓂᖓ ᐊᒻᒪᓗ ᕿᓂᖅᑐᖃᖃᑦᑕᓕᕐᐸᓪᓕᐊᓂᖓ, ᐊᒻᒪᓗᑦᑕᐅᖅ ᐅᒥᐊᕐᔪᐊᖃᖃᑦᑕᕐᓂᖓ, ᐱᕙᓪᓕᐅᑎᓯᒪᒻᒪᑕ ᐊᑐᖅᑕᐅᓚᐅᕐᓯᒪᙱᑦᑐᓄᑦ ᐊᓯᔾᔨᕈᑕᐅᔪᓄᑦ ᐅᑭᐅᖅᑕᖅᑐᒥ, ᑕᒪᓐᓇ ᓱᕐᕋᐃᓪᓚᕆᙳᓱᒻᒪᑦ ᐃᒫᓂ ᐆᒪᓂᓕᓐᓄᑦ ᓇᔪᒐᖏᓐᓄᓪᓗ ᐊᒻᒪᓗ ᐅᑭᐅᖅᑕᖅᑐᒥᐅᓄᑦ ᓄᓇᓕᓐᓄᑦ ᐊᒻᒪᓗ ᐆᒪᓂᓕᓐᓄᑦ ᓇᔪᒐᖏᓐᓄᓪᓗ ᐊᕙᑎᒥ ᐊᓯᔾᔩᓂᐅᓴᔪᖅ.

ᐅᓪᓗᒥ, ᑲᓇᑕᐅᑉ ᒐᕙᒪᒃᑯᖏᑦ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᓇᓗᓇᐃᕐᓯᕗᑦ ᐃᖅᑲᓇᐃᔭᖃᑎᒌᓐᓂᐊᕐᖓᑕ ᖃᐅᔨᓇᓱᐊᕐᓗᑎᒃ ᓴᐳᑎᔭᐅᒍᓐᓇᓂᐊᕐᒪᖔᖅ ᖁᑦᑎᑦᑑᑉ ᐃᒪᖓ ᐅᕝᕙᓘᓐᓃᑦ ᑐᕙᐃᔪᐃᑦᑐᖅ, ᐃᑲᔪᕐᓱᐃᓯᓐᓈᕐᓗᑎᓪᓗ ᐱᕙᓪᓕᐊᔪᓕᕆᓂᕐᒥᒃ ᓴᐳᔾᔨᕕᐅᕙᑦᑐᒥ ᑕᒫᓂ ᓄᓇᒥ.

ᐃᓘᓐᓇᑎᒃ ᐱᖓᓱᑦ ᐱᓕᕆᖃᑎᒌᑦ ᐊᑎᓕᐅᕐᓯᒪᔪᑦ ᑐᑭᓯᖃᑎᒌᓯᒪᓪᓗᑎᒃ ᐊᖏᖃᑎᒌᒍᒻᒥᑦ, ᑕᒪᑐᒥᖓ ᐊᖏᕈᑎᖃᖅᑐᑎᒃ ᖃᐅᔨᓴᕐᓂᐊᕐᓂᕋᖅᑐᑎᒃ ᐃᒫᓂ ᓴᐳᔾᔨᕕᓕᐅᕈᓐᓇᓂᐊᕐᒪᖔᑕ ᑐᕙᐃᔪᐃᑦᑐᕐᒥ, ᐊᒻᒪᓗ ᐃᓚᖃᑐᐃᓐᓇᕆᐊᖃᖅᑐᓂ ᓴᐳᔾᔨᓯᒪᒋᐊᕈᑕᐅᑲᐃᓐᓇᓂᐊᖅᑐᓂᑦ. ᑕᒪᓐᓇ ᐃᖅᑲᓇᐃᔮᖑᓂᐊᖅᑐᖅ ᕿᒥᕐᕈᒍᑕᐅᓂᐊᖅᑐᖅ ᐃᓅᓯᓕᕆᓂᕐᒧᑦ, ᐊᕙᑎᓕᕆᓂᕐᒧᑦ, ᒪᑭᒪᓇᓱᐊᕈᑎᓕᕆᓂᕐᒥᓪᓗ ᐱᕚᓪᓕᕈᑎᔅᓴᓂᑦ ᓴᐳᔾᔨᕕᓕᐅᖅᑲᑕ ᑕᒫᓂ ᓄᓇᖃᕐᕕᐅᔪᒥ, ᐃᓘᓐᓇᖏᓐᓂᒃ ᐃᓱᒪᔅᓴᕐᓯᐅᕈᑎᖃᕐᓯᒪᓂᐊᖅᑐᑦ ᓄᓇᕗᑦ ᐊᖏᖃᑎᒌᒍᑎᖏᓐᓂᑦ ᐊᒻᒪᓗ ᓄᓇᕗᑦ ᒪᓕᒐᕐᔪᐊᖓᓐᓂᒃ.

ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᑦ ᐃᑲᔪᖅᑎᒌᑦᑐᑎᒃ ᐃᖅᑲᓇᐃᔭᖃᑎᓖᑦ ᐃᓄᓐᓂᑦ ᓴᐳᑎᔭᐅᓯᒪᖁᓪᓗᒋᑦ ᓄᓇᖓ ᐃᒪᖓᓗ ᐃᓕᓴᕐᓯᒍᑕᐅᓯᒪᔪᒥᒃ ᐃᑲᔫᑎᖃᕐᓂᖏᓐᓂᒃ ᐃᓄᐃᑦ, ᐊᑐᖃᑦᑕᕐᓯᒪᔭᖏᑦ ᐃᓕᖅᑯᓯᖏᓪᓗ, ᐊᒻᒪᓗᑦᑕᐅᖅ ᐊᔾᔨᐅᖏᑦᑐᒥᒃ ᐊᑕᕕᖃᕐᓂᖏᓐᓄᑦ ᐃᓄᐃᑦ ᓄᓇᓄᑦ ᐃᒪᕐᓄᓪᓗ.

ᓱᓕ, ᓇᓗᓇᐃᖅᓯᒪᖁᓪᓗᒍ ᐅᑭᐅᖅᑕᖅᑐᖅ ᐊᒻᒪ ᐅᑭᐅᖅᑕᖅᑐᒥ ᓄᓇᓕᐅᔪᑦ ᐱᕈᖅᐸᓪᓕᐊᔪᓐᓇᖁᓪᓗᒋᑦ ᐊᒻᒪ ᐊᔪᖅᓴᕈᓐᓃᕐᓗᑎᒃ, ᑮᓇᐅᔭᖅᑑᑎᒃᓴᑦ 2019-ᒥ ᑐᓴᖅᑎᑦᑎᔪᑦ ᐅᖓᑖᓄᑦ $700-ᒥᓕᔭᓐ ᐊᑐᖅᑎᓪᓗᒋᑦ ᐅᖓᑖᓄᑦ ᖁᓖᑦ ᐊᕐᕌᒍᑦ ᓄᑖᓄᑦ ᐊᒻᒪ ᑕᐅᑐᒐᖃᕐᓗᑎᒃ ᑮᓇᐅᔭᖅᑑᑎᒃᓴᑦ ᐊᖏᓂᖅᓴᓄᑦ ᖁᑦᓯᖕᓂᖅᓴᓂ ᐃᓕᓐᓂᐊᕈᓐᓇᕐᓂᕐᒧᑦ, ᐃᓕᓐᓂᐊᕐᓂᕐᒧᑦ ᐊᓯᐊᒎᕈᑕᐅᔪᓐᓇᖅᑐᑦ ᐊᕕᒃᑐᖅᓯᒪᓂᖁᑎᒥᓂ, ᖁᒡᕙᕆᐊᕐᓗᒋᑦ ᐱᖁᑎᕐᔪᐊᑦ ᐊᑕᓂᖃᖅᑐᑦ ᐅᑭᐅᖅᑕᖅᑐᒧᑦ ᐊᒻᒪ ᐅᐸᒃᑕᐅᒐᔪᓐᖏᓐᓂᖅᓴᓄᑦ ᓄᓇᓕᖕᓄᑦ, ᐅᓄᖅᓯᒋᐊᕐᓗᒋᑦ ᑮᓇᐅᔭᓕᐅᕈᑎᖃᓂᕐᒧᑦ ᐱᕙᓪᓕᐊᑎᑕᐅᔪᑦ ᐊᒻᒪ ᐃᑲᔪᖅᓱᖅᑕᐅᓂᖅᓴᐅᓗᑎᒃ ᐱᑕᖃᕆᐊᖃᒻᒪᕆᒃᑐᑦ ᐅᑭᐅᖅᑕᖅᑐᒥ ᖃᐅᔨᓴᕈᑎᒃᓴᑦ.

ᐅᖃᐅᓯᐅᓯᒪᔪᑦ

“ᑲᔾᔮᓇᕐᓂᐊᓗᖏᑦ ᓄᓇᖓᑕ ᑲᓇᑕᒥ ᖃᐅᔨᒪᔭᐅᔾᔪᑎᒋᒐᑦᑎᒍ ᐊᒻᒪᓗ, ᑲᒪᒋᐊᙱᑯᑦᑕ ᓴᐳᔾᔨᓂᕐᒥᒃ ᑕᒪᒃᑯᓂᖓ ᒫᓐᓇ, ᑭᖑᕙᓗᐊᑐᐃᓐᓇᕆᐊᖃᕋᑦᑕ. ᑲᓇᑕᐅᑉ ᒐᕙᒪᒃᑯᖏᑦ ᐊᖏᕐᓯᒪᒻᒪᑕ ᓴᐳᔾᔨᒋᐊᓪᓚᑲᓐᓂᕈᒪᓪᓗᑎᒃ ᐊᕙᑎᒥᒃ ᑲᓇᑕᐅᑉ ᓄᓇᖏᓐᓂᒃ ᐃᒪᕕᖏᓐᓂᓪᓗ, ᓯᔾᔭᖏᓐᓂᑦ ᐊᑐᓂᑦ ᓯᔾᔭᖏᓐᓄᑦ ᓈᕆᓯᒪᓗᑎᒃ. ᖁᕕᐊᓱᑦᑐᒍᑦ ᐱᓕᕆᖃᑎᖃᕆᐊᔅᓴᖅ ᓄᓇᕗᑦ ᒐᕙᒪᒃᑯᖏᓐᓂᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᓯᕕᑦᑐᕆᐊᖅᑕᐅᓂᐊᖅᑎᓪᓗᒋᑦ ᑲᓇᑕᒥ ᐱᓕᕆᖃᑎᒌᒍᑕᐅᔪᑦ ᓴᐳᔾᔨᕕᐅᔪᓄᑦ ᐊᒻᒪᓗ ᓴᐳᔾᔨᓂᕐᒧᑦ ᐆᒪᓂᓕᓐᓂᑦ ᓇᔪᒐᖏᓐᓂᓪᓗ ᐊᕙᑎᒥ, ᐃᑲᔪᕐᓱᐃᓯᓐᓈᑦ ᒪᑭᒪᓇᓱᐊᕈᑎᑎᒍᑦ ᐱᕚᓪᓕᕈᑎᔅᓴᓂᑦ ᐃᓄᓐᓄᑦ ᐊᒻᒪᓗ ᖃᐅᔨᒪᒋᐊᑦᑎᐊᕐᓗᑕ ᐱᖅᑯᓯᖅᑎᒍ ᐊᑐᖅᑕᐅᕙᑦᑐᑦ ᑲᔪᓯᑎᑕᐅᕙᓪᓕᐊᒐᓗᐊᕐᒪᖔᑕ ᑭᖑᕚᕆᔭᐅᓂᐊᖅᑐᓄᑦ.”

ᑳᑐᕆᓐ ᒪᑭᐊᓇ
ᒥᓂᔅᑕ ᐊᕙᑎᓕᕆᓂᕐᑦᒧ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᒻᒪᓗ ᒥᓂᔅᑕ ᑲᒪᒋᔭᓕᒃ ᒥᕐᖑᐃᓯᕐᕕᓕᕆᔨᒃᑯᓐᓂᑦ ᑲᓇᑕᒥ

“ᑖᓐᓇ ᐊᖏᖃᑎᒌᒍᑦ ᐱᒻᒪᕆᐅᓪᓗᓂ ᐱᓇᓱᐊᕈᑕᐅᔪᖅ ᓴᐳᔾᔨᓂᕐᒧᑦ ᑐᕙᐃᔪᐃᑦᑐᕐᒥᑦ ᐊᒻᒪᓗ ᑐᑭᓕᐅᑎᔭᔅᓴᑦᑎᐊᕙᐅᓪᓗᓂ ᐃᖅᑲᓇᐃᔮᖃᓪᓗᐊᑕᖅᑐᑎᒃ ᑲᑐᔾᔨᖃᑎᒌᓐᓂᖏᑦ ᐊᑑᑎᖃᖃᑦᑕᕐᓂᖏᓐᓄᑦ ᑎᑭᐅᑎᑎᑦᑎᖃᑦᑕᓂᕐᒧᑦ ᐊᑑᑎᓕᓐᓄᑦ ᐃᒫᓂ ᓴᐳᔾᔨᕕᓕᐅᖃᑦᑕᓂᕐᒧᑦ. ᒫᓐᓇᓕ ᐱᒻᒪᕆᐅᓗᐊᙳᐊᖅᑯᖅ, ᐃᑲᔪᖅᑎᒌᒋᐊᖃᓪᓚᕆᓐᓂᖅ, ᐃᓱᒪᒋᓪᓗᒋᑦ ᐊᑑᑎᖃᑦᑕᕐᓂᖏᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᐊᒻᒪᓗ ᐃᓯᖅᑕᐅᖃᑦᑕᓂᕐᓴᐅᓕᖅᑎᓪᓗᒍ ᐅᑭᐅᖅᑕᖅᑐᖅ. ᓂᕆᐅᑉᐳᖓ ᓱᓕ ᐱᓕᕆᖃᑎᖃᐃᓐᓇᕐᓂᐊᕆᐊᔅᓴᑎᓐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᑦ ᑲᔪᓯᑎᑦᑎᕙᓪᓕᐊᑎᓪᓗᑕ ᐱᒻᒪᕆᐊᓗᒻᒥᒃ ᐃᖅᑲᓇᐃᔮᖑᔪᒥᒃ ᓴᐳᔾᔨᓂᕐᒥᒃ ᐃᑲᔪᕐᓱᐃᓂᕐᒥᓪᓗ ᓯᕗᓂᔅᓴᖓᓐᓂᒃ ᑕᒪᑐᒥᖓ ᐊᔾᔨᒋᔭᐅᙱᑦᑐᒥᒃ ᓄᓇᒥᒃ ᑲᓇᑕᐅᑉ ᐅᑭᐅᖅᑕᖅᑐᖅᐸᓯᐊᓂᒃ.”

ᔮᓂᓴ ᐅᐃᓪᑭᓐᓴᓐ
ᒥᓂᔅᑕ ᐃᒪᕐᒥᐅᑕᓕᕆᔨᒃᑯᓐᓄᑦ ᐊᒪᓗ ᑲᓇᑕᒥᐅᑦ ᓯᔾᔭᖏᓐᓂᒃ ᐅᐊᑦᑎᔨᓄᑦ

“ᓄᓇᕗᑦ ᒐᕙᒪᒃᑯᖏᑦ ᐊᖏᕐᓯᒪᔪᑦ ᐱᓕᕆᖃᑎᖃᕐᓂᐊᓂᕐᒧᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᑎᑭᐅᑎᖁᓪᓗᒋᑦ ᑐᕌᒐᖏᓐᓄᑦ ᑐᕙᐃᔪᐃᑦᑐᓕᕆᓂᕐᒧᑦ, ᐱᕚᓪᓕᕈᑎᖃᕈᓐᓇᖁᓪᓗᒋᑦ ᓄᓇᖓᑦ ᓄᓇᕗᒻᒥᐅᓪᓗ. ᓂᕆᐅᑉᐳᒍᑦ ᐃᓚᒋᔭᐅᒋᐊᒃᑲᓂᕐᓂᐊᕆᐊᔅᓴᖅ ᑲᑐᔾᔨᖃᑎᑦᑎᓐᓄᑦ ᑕᐃᒫᒃ ᖃᐅᔨᒪᑦᑎᐊᕐᓂᐊᕋᑦᑕ ᐋᖅᑭᔅᓱᐃᓂᑦᑎᓐᓂᒃ ᐊᑑᑎᖃᑯᑖᓐᓂᐊᖅᑐᓂᑦ ᐊᑑᑎᔪᓂᑦ ᐊᒻᒪᓗ ᓈᒻᒪᑦᑐᓂᑦ ᐊᑑᑎᓕᓐᓂᑦ ᓄᓇᑦᑎᓐᓂ.”

ᔫ ᓴᕕᑲᑖᖅ
ᓯᕗᓕᖅᑎ ᓄᓇᕗᒥ ᐊᒻᒪᓗ ᒥᓂᔅᑕ ᐊᕙᑎᓕᕆᓂᕐᒧᑦ

“ᑲᑐᔾᔨᖃᑎᒌᓕᕐᓂᖏᑦ ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑕ ᓯᕗᒧᐊᑦᑎᑦᑎᓂᐊᖅᑐᖅ ᓴᐳᔾᔨᓂᕐᒥᒃ ᑐᕙᐃᔪᐃᑦᑐᕐᒥᑦ, ᐊᒻᒪᓗ ᖃᐅᔨᓇᓱᐊᕈᑕᐅᑐᐃᓐᓇᔾᔮᖏᒻᒪᑦ ᓴᐳᔾᔨᓂᕐᒥᒃ ᓴᒻᒥᑦᑕᐅᓯᒪᙱᑦᑐᒥᒃ ᐃᒫᖓᑕ ᐊᕙᑖᓂ ᑭᖑᕚᕆᔭᐅᓂᐊᖅᑐᑦ ᐃᓱᒪᒋᓪᓗᒋᑦ ᑭᓯᐊᓂᓕᑦᑕᐅᖅ ᐱᙳᖅᑎᑦᑎᓂᐊᕐᖓᑦ ᐱᓪᓚᑦᑖᓂᑦ ᐱᕚᓪᓕᕈᑎᔅᓴᓂᑦ ᐃᓄᓐᓄᑦ ᓄᓇᓕᓐᓄᑦ ᑕᒫᓂ ᓲᕐᓗ ᐊᐅᓱᐃᑦᑐᕐᒥ ᖁᑦᑎᑦᑐᒥ − ᐱᕚᓪᓕᕈᑎᔅᓴᐃᑦ ᓲᕐᓗ ᒪᑯᐊ ᓴᐳᔾᔨᓂᕐᒧᑦ ᐃᖅᑲᓇᐃᔮᔅᓴᑦ, ᐃᓄᓐᓄᑦ−ᓯᕗᓕᖅᑕᐅᔪᓂᑦ ᖃᐅᔨᓴᕐᓂᕐᒧᑦ ᐱᓇᓱᐊᕈᑕᐅᔪᑦ, ᐃᒫᓄᑦ ᐱᖁᑎᕐᔪᐊᔅᓴᑦ ᐊᒻᒪᓗ ᒪᑭᒪᓇᓱᐊᕈᑎᔅᓴᓂᑦ ᐋᖅᑭᐅᒪᑎᑕᐅᕙᑦᑐᓂᑦ ᓴᓇᕕᓕᕆᕕᓐᓂᑦ ᓲᕐᓗ ᐃᖃᓗᓕᕆᓂᕐᒥᑦ.”

ᐸᐅᓗᓯ ᐊᕿᐊᕈᖅ
ᐊᖏᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ

– 30 –

ᑐᑭᓯᐅᒪᔾᔪᑎᔅᓴᑦ ᓇᐃᓈᕐᓯᒪᔪᑦ

ᑮᓇᐅᔭᖅᑑᑎᔅᓴᑦ 2019ᒥ ᓇᓗᓇᐃᖅᑕᐅᔪᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑲᑦᑐᖓᐃᕈᑕᐅᔪᔪᑦ ᖃᐅᔨᓇᓱᐊᕈᑎᖃᕐᓂᐊᕐᓂᖏᓐᓂᒃ ᐱᙳᖅᑎᑕᐅᔪᓐᓇᓂᐊᕐᒪᖔᑕ ᐃᒫᓂ ᓴᐳᔾᔨᕕᔅᓴᐃᑦ ᖁᑦᑎᑦᑐᒥ ᐃᒫᓂ ᐅᕝᕙᓘᓐᓃᑦ ᑐᕙᐃᔪᐃᑦᑐᕐᒥ – ᑭᖑᓪᓕᕐᐹᖅ ᐃᓚᖓᑦ ᑲᓇᑕᐅᑉ ᐅᑭᐅᖅᑕᖅᑐᖓᓃᑦᑐᖅ ᓱᓕ ᐊᐅᔭᒃᑯᑦ ᓯᑯᖃᕐᓂᐊᖅᑐᒋᔭᖅ 2050ᖑᕋᓱᓐᓂᖓᓂ.
ᐅᐊᓐᓇᕐᐸᓯᐊᑕ ᐃᓚᖓᓂ ᑲᓇᑕᒥ ᐅᑭᐅᖅᑕᖅᑐᖅᐸᓯᐊᓂ, ᑐᕙᐃᔪᐃᑦᑐᖅ ᐊᔾᔨᒋᔭᐅᙱᒻᒪᑦ ᐱᔾᔪᑎᒋᓪᓗᒍ ᓯᑯᖃᐃᓐᓇᓕᒫᖃᑦᑕᕐᓂᖓ ᐊᕐᕌᒍᓕᒫᖅ ᐊᑑᑎᖃᓪᓚᕆᑦᑐᓂ ᓇᔪᒐᐅᕙᑦᑐᓂ ᓯᑯᒥᒃ−ᑐᙵᕕᖃᕐᐸᑦᑐᓄᑦ ᐊᒻᒪᓗ ᐃᓕᖅᑯᓯᖏᑎᒍᑦ ᐱᐅᓯᕐᓱᐸᑦᑐᓄᑦ ᐆᒪᔪᓄᑦ ᑕᒫᓂ ᐃᓄᐃᑦ ᓄᓇᓖᑦ ᑐᙵᕕᒋᕙᑦᑕᖏᓐᓂᒃ, ᓲᕐᓗ ᓇᓄᐃᑦ, ᐊᐃᕖᑦ, ᓇᑦᑏᓪᓗ.
ᑮᓇᐅᔭᖅᑑᑎᔅᓴᑎᒍᑦ 2017ᒥ, ᑲᓇᑕᐅᑉ ᒐᕙᒪᒃᑯᖏᑦ ᑲᑦᑐᖓᐃᕈᑎᖃᓚᐅᕐᓯᒪᒻᒪᑕ $11 ᒥᓕᐊᓐᓂᑦ ᑮᓇᐅᔭᓂᑦ ᑎᓴᒪᑦ ᐊᕐᕌᒍᑦ ᓯᕗᒧᐊᑦᑎᑦᑎᒋᐊᕈᒪᓪᓗᑎᒃ ᐃᒫᓂ ᓴᐳᔾᔨᕕᖃᕐᓂᕐᒥᒃ ᑲᓇᑕᒥ ᖁᑦᑎᑦᑐᒥ ᐅᑭᐅᖅᑕᖅᑐᒥ ᑐᑭᓯᒋᐊᕐᕕᖃᕐᓯᒪᓪᓗᑎᒃ ᓄᓇᖃᖅᑐᑐᖃᓕᕆᔨᓂᑦ ᐅᑭᖅᑕᖅᑐᒥᐅᑕᓕᕆᔨᓂᓪᓗ ᑲᑐᔾᔨᖃᑎᒋᕙᑦᑕᖏᓐᓂᒃ.
ᐋᒡᒌᓯ 2017ᖑᑎᓪᓗᒍ, ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᓗᓇᐃᕐᓯᓚᐅᕐᓯᒪᔪᑦ ᑭᓪᓕᖏᓐᓂᑦ ᐊᒻᒪᓗ ᓴᐳᔾᔨᕕᐅᑲᐃᓐᓇᓂᐊᖅᑐᒥᒃ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥᑦ, ᐱᙳᖅᑎᑕᐅᑐᐊᖅᑲᑦ, ᑖᓐᓇ ᐊᖏᓂᕐᐹᓪᓚᕆᐅᓪᓗᓂ ᓴᐳᔾᔨᕕᐅᓕᓛᖅᑐᖅ ᑲᓇᑕᒥ.
ᐅᑐᐱᕆ 30, 2018ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖏᕆᐊᙵᐅᑎᖃᔪᔪᑦ ᐋᔩᖃᑎᒌᒍᑎᖃᕐᓂᐊᓂᕐᒧᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ ᑕᓪᓗᕈᑎᐅᑉ ᐃᒪᖓᓄᑦ ᓴᐳᔾᔨᕕᒻᒧᑦ, ᑖᒃᑯᐊ ᐃᓚᖃᔪᔪᑦ ᐃᓱᒪᔅᓴᕐᓯᐅᕈᑎᖃᕐᓂᕐᒥᑦ ᐊᑐᖅᑕᐅᒍᓐᓇᕋᔭᖅᑐᓂᑦ ᓇᓖᕌᕋᔅᓴᓂᑦ ᐱᓇᓱᐊᕈᑎᖃᕐᓂᕐᒥᒃ ᐃᒫᓂ ᓴᐳᔾᔨᕕᓕᐅᕐᓂᕐᒥᑦ ᑐᕙᐃᔪᐃᑦᑐᕐᒥ.
ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᐃᕐᓯᓯᒪᔪᑦ ᐊᒥᓱᓂᑦ ᐃᒫᓂ ᓴᐳᔾᔨᕕᓐᓂᑦ ᐃᓄᐃᑦ ᓄᓇᖓᓐᓂᑦ, ᐃᓚᒋᔭᐅᓪᓗᓂ ᐊᖑᓂᐊᕐᕕᐊ ᓂᕿᖅᔪᐊᒻ ᐊᒻᒪᓗ ᑕᕆᐅᒻ ᓂᕐᔪᑕᐃᑦ ᐃᒫᓂ ᓴᐳᔾᔨᕖᑦ ᓄᓇᑦᓯᐊᕐᒥ, ᐊᒻᒪᓗ ᓂᖏᖓᓂᖅ, ᐊᒃᐸᐱᑦ, ᖃᖁᓪᓗᐃᑦ ᐊᒻᒪᓗ ᓂᕐᔪᑎᖃᕐᕕᒃ ᑲᓇᑕᒥ ᐆᒪᔪᖃᕐᕖᑦ ᓄᓇᕗᒥ. ᑖᒃᑯᐊ ᓴᐳᔾᔨᕕᐅᕙᑦᑐᑦ ᖃᓄᐃᑦᑐᑐᐃᓐᓇᕐᓂᑦ ᐃᖃᓗᓐᓂᑦ, ᑕᕆᐅᕐᒥᐅᑕᕐᓂᑦ ᑎᖕᒥᐊᓂᑦ ᐊᒻᒪᓗ ᐃᒪᕐᒥᐅᑕᕐᓂᑦ ᐆᒪᔪᓂᑦ, ᐃᓚᒋᔭᐅᓪᓗᑎᒃ ᐱᒻᒪᕆᐅᓂᖏᑦ ᕿᓚᓗᒐᖃᕐᓂᐅᕙᑦᑐᑦ ᐊᕐᕕᖃᕐᓂᐅᕙᑦᑐᓪᓗ.

ᑕᒪᑐᒪ ᒥᔅᓵᓅᖓᔪᑦ ᑕᑯᔭᔅᓴᐃᑦ