ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐅᓪᓗᒥ ᓇᓗᓇᐃᖅᓯᕗᑦ ᑖᒃᑯᐊ ᑲᑭᕙᒃ ᑲᑐᔾᔨᖃᑎᒌᖏᑦ ᑮᓇᐅᔭᖃᖅᑎᑦᑎᓂᐊᕐᓂᖏᓐᓂᒃ ᑭᒡᓕᒋᓗᒍ  $2,642,640ᓂ ᓄᑖᒧᑦ ᐸᐃᕆᕕᒃᓴᓕᐅᕐᓂᕐᒧᑦ ᐃᖃᓗᓐᓂ.  ᑖᒃᑯᐊ ᑮᓇᐅᔭᐃᑦ ᐱᓯᒪᔪᑦ ᐃᓄᐃᑦ ᓱᕈᓯᓛᖏᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᐊᒻᒪ ᐸᐃᕆᕕᓕᕆᓂᕐᒧᓪᓗ ᐱᓕᕆᐊᖓᓂᑦ, ᐃᓚᒋᔭᐅᓪᓗᓂ ᑲᑭᕙᒃᑯᑦ ᓄᓇᖃᖅᑳᖅᑐᑐᖃᕐᓄᑦ ᐱᓕᒻᒪᒃᓴᐃᓂᕐᒧᑦ ᐃᖅᑲᓇᐃᔭᕆᐅᖅᓴᑎᑦᑎᓂᕐᒧᓪᓗ ᐱᓕᕆᐊᖓᓂᑦ ᐊᖏᖃᑎᒌᒍᑎᖃᖅᖢᑎᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐃᓅᓯᕐᓅᖓᔪᓂᓪᓗ ᐱᕙᓪᓕᐊᑎᑦᑎᔨᖏᓐᓂᑦ ᑲᓇᑕᒥ.

“ᖁᕕᐊᓱᒃᐳᒍᑦ ᐱᕕᖃᕋᑦᑕ ᐊᒻᒪ ᑮᓇᐅᔭᖃᕋᑦᑕᓗ ᓴᖅᑭᑎᑦᑎᒍᑕᐅᓂᐊᖅᑐᒥᒃ ᓄᑖᒥᒃ ᐸᐃᕆᕕᖕᒥ”, ᐅᖃᖅᑐᖅ ᔨᐊᕆᒥ ᑑᕐᖔᓗᒃ, ᐃᒃᓯᕙᐅᑕᖓ ᑲᑭᕙᒃ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᓐᓄᑦ. “ᑲᑭᕙᒃᑯᑦ ᐃᑲᔪᖅᑐᐃᖏᓐᓇᕐᒪᑕ ᐃᓄᖕᓂ  ᓱᕈᓯᓛᓂ ᐃᓕᓐᓂᐊᖅᑎᑦᑎᓂᕐᒥᒃ ᐊᒥᓱᓄᑦ ᐊᕐᕌᒍᓄᑦ, ᐊᒻᒪᓗ ᒫᓐᓇ ᐱᕕᖃᓕᖅᐳᒍᑦ ᐃᓚᓯᒃᑲᓐᓂᕈᓐᓇᕐᖢᑕ ᐃᑲᔫᑎᒋᔭᐅᒃᑲᓐᓂᕐᓂᐊᖅᑐᒥᒃ ᑖᒃᑯᐊ ᑮᓇᐅᔭᐃᑦ ᐊᑐᕐᓗᒋᑦ.”

ᑖᒃᑯᐊ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑦᑕᕐᕕᖓ ᓴᓇᓂᐊᖅᑐᑦ, ᐊᐅᓚᑦᑎᓗᑎᒃ, ᐊᒻᒪᓗ ᓇᖕᒥᓂᖃᕐᓗᑎᒃ ᐊᔾᔨᒌᙱᑦᑐᓄᑦ ᐊᑐᖅᑕᐅᔪᓐᓇᖅᑐᒥᒃ ᐃᒡᓗᕐᔪᐊᕐᒥ ᐃᖃᓗᓐᓂ ᑕᐃᔭᐅᓂᐊᖅᑐᒥᒃ ᐃᓅᓯᕐᕕᒃ ᓄᓇᓕᖕᒥ ᖃᓄᐃᑦᑕᐃᓕᖓᓂᕐᒧᑦ ᑐᑦᑕᕐᕕᖓ.  ᑖᓐᓇ ᖃᓄᐃᑦᑕᐃᓕᖓᓂᕐᒧᑦ ᑐᑦᑕᕐᕕᖓ ᐱᖃᓯᐅᑎᓂᐊᖅᑐᑦ ᐃᒡᓗᒥᒃ ᐸᐃᕆᕕᖕᒥ ᐃᓄᖃᕈᓐᓇᕐᓂᐊᖅᑐᒥᒃ 28ᓂ ᓱᕈᓯᓛᓂ.

“ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑦᑕᕐᕕᒃ ᖁᕕᐊᓱᑉᐳᑦ ᐃᑲᔪᖅᑕᐅᔪᓐᓇᓚᐅᕐᒪᑕ ᑲᑭᕙᒃ ᑲᑐᔾᔨᖃᑎᒌᒃᑯᓐᓂᑦ ᐱᒻᒪᕆᐊᓗᖕᒥᑦ ᐱᓕᕆᐊᒃᓴᒧᑦ.” ᐅᖃᖅᑐᖅ ᓘᑦᑖᖅ ᒡᕕᓐ ᕼᐄᓕ ᐊᕿᐊᕈᖅ, ᓯᕗᓕᖅᑎ ᐊᒻᒪᓗ ᖃᐅᔨᓴᖅᑐᓕᕆᓂᕐᒧᑦ ᑐᑭᒧᐊᒃᑎᑦᑎᔨ ᖃᐅᔨᒋᐊᖅᑏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑦᑕᕐᕕᖕᒥ. “ᓴᖅᑭᑎᑦᑎᓂᖅ ᐃᓂᒃᓴᓂ ᓄᓇᓕᑦᑎᓐᓄᑦ ᑲᑐᔾᔨᒍᑕᐅᓗᓂ ᑭᓯᐊᓂ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᕐᕕᐅᔪᓂᑦ ᐊᒻᒪᓗ ᖁᔭᓕᒻᒪᕆᒃᑐᒍᑦ ᐃᑲᔪᖅᑕᐅᓯᒪᒐᑦᑕ.  ᓂᕆᐅᒋᔭᖃᖅᐳᒍᑦ ᑖᓐᓇ ᓄᑖᖅ ᐸᐃᕆᕕᒃ ᒪᑐᐃᕈᓐᓇᖅᓯᓛᕐᒪᑦ!”

“ᕿᑭᖅᑕᓃᒃᑯᑦ ᑐᑭᓯᔪᑦ ᐊᑐᐃᓐᓇᖃᕐᓂᖅ ᐸᐃᕆᕕᖕᒥ ᕿᑭᖅᑖᓗᖕᒥ ᐱᒻᒪᕆᐅᖕᒪᑦ ᐃᑲᔪᖅᑕᐅᑎᓪᓗᒋᑦ ᓄᓇᓖᑦ.  ᐃᑲᔪᖅᑐᐃᓂᖅ ᑕᐃᒪᐃᑦᑐᓂᒃ ᐃᒡᓗᓂᒃ, ᑲᔪᖏᖅᓴᐃᕗᒍᑦ ᐃᓄᖕᓂᑦ ᕿᑭᖅᑕᓂᒥᐅᓂᒃ ᐊᒻᒪ ᐃᓚᒌᓂᒃ ᑲᔪᓯᑎᑦᑎᔪᓐᓇᖅᓯᓗᑎᒃ ᑐᕌᒐᕆᔭᖏᓐᓂᒃ ᐃᖅᑲᓇᐃᔮᒃᓴᖃᕐᓂᕐᒧᑦ ᐅᕝᕙᓘᓐᓃᑦ ᐃᓕᓐᓂᐊᕐᓂᒨᖓᑉᐸᓪᓘᓐᓃᑦ.” ᐅᖃᖅᑐᖅ ᐅᓛᔪᒃ ᐊᑭᓱᒃ, ᐊᖓᔪᖅᑳᖅ, ᕿᑭᖅᑕᓃᒃᑯᓐᓄᑦ.

ᑐᑭᓯᒃᑲᓐᓂᕆᐊᖃᕈᕕᑦ ᓇᓕᖓ ᖃᐅᔨᒋᐊᕐᕕᒃᓴᖅ: