ᑕᒫᓂ ᑕᖅᑭᕐᒥ ᑲᑭᕙᒃ ᑲᑐᔾᔨᖃᑎᒌᒃᑯᑦ ᐊᑭᓖᓂᐊᖅᑐᑦ ᖄᒃᑲᓐᓂᐊᒍᑦ ᐃᑲᔫᓯᐊᖅᑖᕈᑎᓂᑦ 196ᓄᑦ ᐃᖅᑲᓇᐃᔭᖅᑎᓄᑦ 17ᓂᑦ ᐸᐃᕆᕕᐅᕙᑦᑐᓂᑦ ᕿᑭᖅᑕᓂ ᓄᓇᓕᐅᔪᓂᑦ.

ᑲᑭᕙᒃ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᑐᑭᓯᓯᒪᒻᒪᑕ ᐱᔭᕆᐊᑐᔪᒃᑰᕈᑎᖃᖃᑦᑕᓚᐅᕐᓂᖏᓐᓂᒃ ᐸᐃᕆᕕᓐᓂᑦ ᐃᖅᑲᓇᐃᔭᖅᑏᑦ ᓇᓗᓇᖅᑐᒥᒃ ᐃᖅᑲᓇᐃᔭᕐᕕᖏᓐᓂᒃ ᐋᖅᑭᓯᒪᓂᖃᖃᑦᑕᓚᐅᕐᖓᑕ ᐊᓯᔾᔨᖃᑦᑕᕐᓂᖏᓐᓄᑦ ᒪᑐᓯᒪᔭᕆᐊᖃᖅᑎᑕᐅᓂᖏᓐᓄᑦ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᕙᕐᔪᐊᓇᖅᑐᒥᒃ ᓄᓇᕐᔪᐊᓕᒫᒥ. ᐸᐃᕆᕕᓐᓂᑦ ᐃᖅᑲᓇᐃᔭᖅᑏᑦ ᑲᒪᒋᔭᖃᖃᑦᑕᕆᐊᖃᓚᐅᕐᒥᒻᒪᑕ ᐋᖅᑭᔅᓱᐃᓯᒪᓂᕐᒥᒃ ᖃᐅᑕᒫᑦ ᐊᐅᓚᓂᕆᕙᑦᑕᖏᓐᓂᒃ, ᐃᓚᒋᔭᐅᓪᓗᑎᒃ ᒪᑯᐊ ᐋᖅᑭᑎᐊᕐᓯᒪᓗᑎᒃ ᓴᓗᒻᒪᕐᓴᐃᖃᑦᑕᕐᓃᑦ ᓴᓗᒪᑎᑦᑎᖃᑦᑕᕐᓃᑦ ᐊᒻᒪᓗ ᐊᓯᔾᔨᕆᐊᖃᕐᓯᒪᓪᓗᑎᒃ ᐊᐃᔅᓯᐸᑦᑐᑦ ᐸᐃᕆᕕᒻᒨᕈᔾᔨᕙᑦᑐᓪᓗ ᐱᓕᕆᔾᔪᓯᖏᓐᓂᑦ.

“ᖁᕕᐊᓱᑉᐳᒍᑦ ᓇᓗᓇᐃᕐᓯᔭᕆᐊᔅᓴᖅ ᐊᑕᐅᓯᐊᕐᓗᑕ ᐊᑭᓕᐅᑎᖃᕐᓂᐊᕋᑦᑕ ᐃᓄᓐᓄᑦ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᕐᐸᑦᑐᓄᑦ ᐸᐃᕆᕕᓐᓂᑦ ᕿᑭᖅᑕᓂ ᓄᓇᓕᐅᔪᓂᑦ,” ᐅᖃᖅᑐᖅ ᔨᐅᓚᒥ ᑑᕐᖔᓗᒃ, ᐃᔅᓯᕙᐅᑕᖓᑦ ᑲᑭᕙᒃ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑕ. “ᑖᒃᑯᐊ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖃᑦᑕᓚᐅᕐᖓᑕ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᕙᕐᔪᐊᓇᖅᑐᒥᒃ ᓄᓇᕐᔪᐊᓕᒫᒥ ᐸᐃᕆᕕᓐᓂᑦ ᐱᔨᑦᑎᕋᐅᑕᐅᕙᑦᑐᑦ ᐊᑐᖅᑕᐅᔭᕆᐊᖃᕐᓂᕐᓴᐅᑎᓪᓗᒋᑦ ᐊᒻᒪᓗ ᐃᖅᑲᓇᐃᔭᕐᓂᕐᒧᑦ ᐋᖅᑭᓯᒪᓂᕆᕙᑦᑕᖏᑦ ᐱᓕᕆᔾᔪᓯᕆᕙᑦᑕᖏᓪᓗ ᓇᓗᓇᖅᑎᓪᓗᒋᑦ ᐱᔾᔪᑎᒋᓪᓗᒋᑦ ᐊᓯᔾᔨᖃᑦᑕᖅᑐᑦ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᓂᕐᒧᑦ ᐊᑐᖁᔭᐅᓯᒪᔪᑦ.”

ᐊᑐᓂᑦ ᐃᖅᑲᓇᐃᔭᖅᑎᐅᖏᓐᓇᐸᑦᑐᑦ ᐃᖅᑲᓇᐃᔭᖅᑏᑦ $2.50ᒥᒃ ᐊᑭᓕᖅᑕᐅᓂᐊᖅᑐᑦ ᐊᑐᓂᑦ ᐃᑲᕐᕋᑕᒫᑦ ᐃᖅᑲᓇᐃᔭᕐᕕᒋᓯᒪᔭᖏᓐᓄᑦ ᐅᑯᓇᓂ ᐅᓪᓗᓂᑦ ᐄᐳᓗ 1, 2021ᒥ ᒫᑦᓯ 31, 2022ᒧᑦ. ᐃᖅᑲᓇᐃᔭᑲᐃᓐᓇᐸᑦᑐᑦ ᐃᖅᑲᓇᐃᔭᖅᑏᑦ ᐊᑭᓕᖅᑕᐅᓂᐊᖅᑐᑦ $1.25ᒥᒃ ᐊᑐᓂᑦ ᐃᑲᕐᕋᓄᑦ ᑖᒃᑯᓄᖓᔅᓴᐃᓐᓇᖅ ᑕᖅᑭᓄᑦ. ᑲᑎᓕᒫᖅᑐᒋᑦ ᑖᒃᑯᐊ ᐊᒥᓲᓂᖏᑦ $268,440 ᐊᑭᓕᐅᑕᐅᓂᐊᖅᑐᑦ.

ᑮᓇᐅᔭᑦ ᑖᒃᑯᓄᖓ ᑐᕌᖓᔪᑦ ᐅᑯᓇᙶᕐᓯᒪᔪᑦ ᐃᓄᓐᓄᑦ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒧᑦ ᐸᐃᕆᕕᓕᕆᖃᑦᑕᓂᕐᒧᑦ ᐱᓕᕆᐊᕐᒥ (IELCC), ᑖᒃᑯᐊ ᐃᓚᒋᔭᐅᒻᒪᑕ ᑲᑭᕙᒃ ᑲᑐᔾᔨᖃᑎᒌᒃᑯᑦ ᓄᓇᖃᖅᑳᕐᓯᒪᔪᓄᑦ ᐱᓕᒻᒪᔅᓴᐃᓂᕐᒧᑦ ᐃᖅᑲᓇᐃᔮᔅᓴᓄᓪᓗ ᐃᓕᓐᓂᐊᑎᑦᑎᓂᕐᒧᑦ ᐱᓕᕆᐊᕐᒥ ᐊᖏᖃᑎᒌᒍᑕᐅᓯᒪᔪᓂᑦ ᐃᖅᑲᓇᐃᔮᔅᓴᓄᑦ ᐃᓅᓯᓕᕆᓂᕐᒧᓪᓗ ᐱᕙᓪᓕᐊᔪᓕᕆᔨᒃᑯᓐᓂᑦ ᑲᓇᑕᒥ.

ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕐᕕᔅᓴᖅ

ᐄᕙ ᒍᕉᕝᔅ
egroves@kakivak.ca
(867) 979-8955