ᑕᒫᓂ ᐊᕐᕌᒍᒥ ᓄᓇᕗᑦ ᐅᔭᕋᓐᓂᐊᓂᕐᒧᑦ ᑲᑎᒪᕕᔾᔪᐊᕐᓂᖅ ᓵᓚᔅᓴᕈᑕᐅᑦᑎᐊᓚᐅᕐᒥᒻᒪᑦ ᑲᑐᔾᔨᖃᑎᒌᒃᑯᓐᓄᑦ, ᓴᖅᑭᑎᑦᑎᑐᐃᓐᓇᕐᓯᒪᙱᓇᑦᑕ ᑖᔅᓱᒥᖓ ᓄᑖᕐᒥᒃ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ (ᕿᑭᖅᑕᓂ ᐃᓕᓐᓂᐊᑎᑦᑎᓂᖅ ᐱᓕᒻᒪᔅᓴᐃᓂᕐᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᖅ) ᑕᑯᓐᓇᕋᔅᓴᓕᐊᕆᓯᒪᔭᑦᑎᓐᓂᒃ, ᑭᓯᐊᓂᓕ ᐊᖏᕐᕋᐅᔾᔨᓚᐅᖅᑐᒍᑦ ᐱᒻᒪᕆᐊᓗᒻᒥᑦ ᑲᑐᔾᔨᖃᑎᒌᖑᔪᓄᑦ ᐃᓕᓴᕆᔭᐅᔾᔪᑎᒥᒃ.

ᓂᕆᐅᓚᐅᙱᑎᐊᖅᑐᑦ ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ, ᐅᔭᕋᓐᓂᐊᓂᕐᒧᑦ ᑲᑎᒪᕕᔾᔪᐊᓂᕐᒥ ᐊᑎᕗᑦ ᑕᐃᔭᐅᒻᒪᑦ ᐃᓕᓴᕆᔭᐅᔾᔪᑎᑖᕐᓂᑎᓐᓂᒃ ᐅᔭᕋᓐᓂᐊᓂᕐᒧᑦ ᑲᑎᒪᕕᔾᔪᐊᓂᕐᒥ ᑲᑐᔾᔨᖃᑎᒌᖑᔪᓂᑦ ᐃᓕᓴᕆᔭᐅᔾᔪᑎᒥᒃ, ᐃᓕᓴᕐᓯᒍᑕᐅᓲᖅ ᑲᑐᔾᔨᖃᑎᒌᓂᑦ ᐃᑲᔫᑎᒋᕙᑦᑕᖏᓐᓂᒃ ᑲᑐᔾᔨᖃᑎᒌᑦ ᓯᕗᒧᐊᑦᑎᑦᑎᓯᒪᓂᖓᓄᑦ ᐅᔭᕋᓐᓂᐊᕐᓂᓕᕆᓂᕐᒥᒃ ᓄᓇᕗᒥ.

ᐊᖏᔪᖅᑳᖅ, ᐸᐅᓗᓯ ᐊᕿᐊᕈᖅ ᐃᓕᓴᕆᔭᐅᔾᔪᑎᖓᓐᓂᒃ ᐊᐃᔅᓯᓚᐅᖅᑐᖅ ᑲᑐᔾᔨᖃᑎᒌᒃᑯᑦ ᑭᒡᒐᑐᖅᑐᒋᑦ.

ᑲᑎᒪᕕᔾᔪᐊᕐᓂᖅ ᑲᑎᖃᑎᖃᕈᑎᒋᔪᓐᓇᓚᐅᕋᑦᑎᒍ ᑎᒥᐅᔪᓂᑦ, ᑲᑐᔾᔨᖃᑎᒌᖑᔪᓂᑦ ᐃᖅᑲᓇᐃᔭᕐᕕᐅᔪᓂᓪᓗ ᐃᖅᑲᓇᐃᔭᕐᐸᑦᑐᓂᑦ ᐅᔭᕋᓐᓂᐊᕐᓂᓕᕆᓂᕐᒥᒃ ᖃᐅᔨᑎᑦᑎᓂᐊᕐᖓᑕ ᐊᑲᐅᓂᕐᐹᖑᔪᓂᑦ ᐊᑐᖅᑕᐅᓲᓂᑦ ᐊᒻᒪᓗ ᐱᓕᕆᔾᔪᑎᔅᓴᓂᑦ ᑲᔪᓯᑦᑎᐊᕈᑎᔅᓴᓂᑦ.

ᐅᔭᕋᓐᓂᐊᓂᕐᒧᑦ ᑲᑎᒪᕕᔾᔪᐊᕐᓂᖅ ᐱᕕᖃᕈᑕᐅᓚᐅᕐᒥᔪᖅ ᑲᑐᔾᔨᖃᑎᒌᒃᑯᓐᓄᑦ ᓴᖅᑭᑎᑦᑎᓂᕐᒧᑦ ᓄᑖᕐᒥᒃ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ ᑕᑯᓐᓇᕋᔅᓴᓕᐊᖑᓯᒪᔪᓂᑦ ᑕᑯᔅᓴᐅᑎᑦᑎᓪᓗᑎᒃ ᑐᓴᕈᒥᓇᓗᐊᖅᑐᓂᑦ ᐃᓚᒋᔭᐅᓯᒪᔪᓂᑦ ᓯᕗᓪᓕᕐᒥ ᐅᖁᒪᐃᑦᑐᓕᕆᔾᔪᑎᓂᑦ ᐊᖁᑎᐅᓂᕐᒥᒃ ᐃᓕᓐᓂᐊᓂᕐᒥ.

ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔫᑉ ᒥᔅᓵᓄᑦ ᑕᑯᓐᓇᕋᔅᓴᓕᐊᖑᓯᒪᔪᖅ ᐃᓚᒋᔭᐅᓚᐅᖅᑐᖅ ᑲᑐᔾᔨᖃᑎᒌᒃᑯᑦ ᓄᓇᓕᓐᓂᑦ ᑲᑎᒪᔨᖓᑕ, ᓕᕙᐃ ᐹᓇᐹᓯᐅᑉ ᐅᓂᒃᑳᖏᓐᓄᑦ ᑲᑎᒪᕕᔾᔪᐊᓂᕐᒥ ᐃᓚᒋᔭᐅᓪᓗᓂ ᓄᓇᖃᖅᑐᑐᖃᐃᑦ ᐃᓚᒋᔭᐅᓂᖏᓐᓂᒃ ᐅᔭᕋᓐᓂᐊᓂᕐᒥ. ᑕᑯᓐᓇᕋᔅᓴᖅ ᖁᕕᐊᒋᔭᐅᓪᓚᕆᔪᔪᖅ, ᐅᐱᒋᔭᐅᑦᑎᐊᓚᐅᖅᑐᓂ.

ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ ᐃᓕᓐᓂᐊᕈᑦ ᐋᖅᑭᓱᖅᑕᐅᓯᒪᔪᖅ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ ᐃᑲᔫᑕᐅᓪᓗᓂ ᐃᓄᓐᓄᑦ, ᑐᕌᒐᖃᓗᐊᖅᑐᑎᒃ ᐊᕐᓇᓂᑦ ᐃᓅᓱᑦᑐᓂᓪᓗ. ᑖᓐᓇ ᐃᓕᓐᓂᐊᕈᑦ ᐃᓕᑉᐸᓪᓕᕈᑕᐅᓂᐊᖅᑐᖅ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓕᒫᓄᑦ, ᑲᒪᒋᔭᖃᓗᐊᖅᑐᑎᒃ ᐃᓕᓐᓂᐊᑎᑦᑎᓂᕐᒥᒃ ᐅᔭᕋᓐᓂᐊᕐᓂᓕᕆᓂᕐᒥ, ᑎᓴᒪᓂᑦ ᐊᕐᕌᒍᓂᑦ ᐱᔭᕇᕐᕕᔅᓴᖃᖅᑐᓂ ᒫᑦᓯ 2021ᒥ.

ᓴᖅᑭᑎᑦᑎᓚᐅᕐᒥᔪᒍᑦ ᐃᓄᓐᓂᑦ ᐃᖅᑲᓇᐃᔭᖅᑎᒋᔭᐅᔪᓐᓇᖅᑐᓂᑦ ᑐᑭᓯᐅᒪᔾᔪᑎᔅᓴᖃᕐᕕᒻᒥᑦ, ᑐᑦᑕᕐᕕᒃ, ᑖᓐᓇ ᐊᑐᖅᑕᐅᓯᓐᓈᖃᑦᑕᕐᒥᔪᖅ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ. ᑐᑦᑕᕐᕕᒃ ᐊᐅᓚᓂᖃᕐᓂᐊᖅᑐᖅ ᑐᖅᑲᑕᕐᕕᓪᓗᐊᑕᐅᓗᓂ ᐃᑲᔪᖃᑦᑕᕐᓗᑎᒃ ᐃᖅᑲᓇᐃᔭᖅᑎᖃᕐᐸᑦᑐᓂᑦ ᕿᓂᖅᑎᓪᓗᒋᑦ ᓇᓂᓯᖃᑦᑕᓂᕐᒥᒃ ᐃᓄᓐᓂᑦ ᐃᓕᓐᓂᐊᕐᓯᒪᔪᓂᑦ ᐃᖅᑲᓇᐃᔮᔅᓴᓄᑦ ᐃᓕᓐᓂᐊᕋᔅᓴᓄᓪᓘᓐᓃᑦ.

ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ ᑐᕌᒐᐃᑦ ᐃᒫᒃ ᐊᑐᕈᒫᕐᓂᐊᕐᓯᒪᒻᒪᑕ: ᐊᒥᓱᕈᒃᑲᓂᕐᓗᑎᒃ ᐃᓄᐃᑦ ᐃᖅᑲᓇᐃᔭᕐᐸᑦᑐᑦ ᓄᓘᔮᓕᕆᓂᕐᒥ, ᐱᕙᓪᓕᐊᑎᑦᑎᓗᑎᒃ ᐱᔨᑦᑎᕋᐅᑎᖃᕐᓗᑎᓪᓗ ᐃᓕᓐᓂᐊᕈᑎᔅᓴᓂᑦ ᐃᖅᑲᓇᐃᔭᙱᑦᑐᓄᑦ ᐃᓄᓐᓄᑦ (ᑐᕌᒐᖃᓗᐊᕐᓗᑎᒃ ᐊᕐᓇᓂᑦ ᐃᓅᓱᑦᑐᓂᓪᓗ), ᐊᒻᒪᓗ ᐃᓄᓐᓄᑦ ᐃᓕᓴᕆᔭᐅᔾᔪᑎᖃᕐᓗᑎᒃ ᐊᒻᒪᓗ ᐊᓯᖏᓐᓄᑦ ᐊᑐᕋᔅᓴᓂᑦ ᐃᓕᓐᓂᐊᕈᑕᐅᖃᑦᑕᓂᐊᕐᖓᑦ ᐊᒻᒪᓗ ᐃᓕᓯᒪᒍᑕᐅᓂᐊᕐᖓᑦ ᐱᓇᓱᐊᖃᑦᑕᕈᓐᓇᓂᐊᕐᖓᑕ ᐊᓯᖏᓐᓂᒃ ᐃᖅᑲᓇᐃᔮᔅᓴᓂᑦ ᓴᖅᑭᐸᑦᑐᓂᑦ.

ᐃᓚᖏᑦ ᐅᔾᔨᕐᓇᓗᐊᕐᓂᖏᑦ ᐃᓕᓐᓂᐊᕈᑎᔅᓴᐃᑦ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ ᐅᑯᐊᖑᕗᑦ:

• ᐃᖅᑲᓇᐃᔮᔅᓴᓄᑦ ᐅᐸᓗᖓᐃᕐᓯᒪᓂᕐᒧᑦ ᐃᓕᓐᓂᐊᕐᓂᖅ
• ᐅᖁᒪᐃᑦᑐᓕᕆᔾᔪᑎᓂᑦ ᐊᖁᑎᐅᓂᕐᒥᒃ
• ᐃᓕᓐᓂᐊᕐᓯᒪᓂᖅ ᓴᓇᔪᓕᕆᔨᐅᒋᐅᕐᓴᓂᕐᒥᒃ
• ᐅᔭᕋᓐᓂᐊᕐᓂᕐᒨᖓᔪᓂᑦ ᐊᒻᒪᓗ ᐃᓘᓐᓇᖏᓐᓅᖓᔪᓂᑦ ᐃᓕᓐᓂᐊᕐᓂᖅ

ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ ᑲᑐᔾᔨᖃᑎᒌᒃᑯᓐᓂ ᐱᓕᕆᐊᖅ ᐊᐅᓚᑕᐅᓪᓗᓂ ᑲᑐᔾᔨᖃᑎᖃᖅᑐᑎᒃ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᓂᑦ, ᑲᓇᑕᐅᑉ ᒐᕙᒪᒃᑯᖏᓐᓂ, ᓄᓇᕗᑦ ᒐᕙᒪᒃᑯᖏᓐᓂ ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᖏᓐᓂ.