ᑲᑐᔾᔨᓪᓗᑎᒃ ᑐᓴᕋᔅᓴᖁᑎᖓᑦ − ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ− ᐃᖅᑲᕐᓂᐊᕐᓗᑎᒃ ᖃᐅᔨᓴᕐᓂᕐᒧᑦ
(ᐅᑐᐱᕆ 8, ᐃᖃᓗᐃᑦ, ᓄᓇᕗᑦ)– ᑲᒪᒋᔭᐅᔪᓐᓇᓂᐊᕐᖓᑕ ᓄᓇᓕᓐᓂᑦ ᐃᓱᒫᓘᑕᐅᔪᑦ ᐱᔾᔪᑎᒋᓪᓗᒍ ᑲᓇᑕᒥ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ (ᐆᒻᒪᖅᑯᓯᕆᔩᑦ) ᑐᑭᑖᕈᑎᒥᓂᖓᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕐᓂᕐᒧᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐃᓄᐃᑦ ᖃᐅᔨᒪᔭᑐᖃᖏᓐᓂᒃ (ᖃᐅᔨᒪᔭᑐᖃᖏᑦ) ᐃᓕᓐᓂᐊᕐᓂᖃᖅᑎᑦᑎᖃᑦᑕᓛᕐᖓᑕ ᐊᑦᑐᖅᑕᐅᓯᒪᔪᓂᑦ ᓄᓇᓕᓐᓂᑦ ᓄᐊᑦᑎᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐃᓚᓕᐅᔾᔭᐅᒐᔭᖅᑐᑎᒃ ᓴᓇᓯᒪᔭᖏᓐᓄᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᑎᔅᓴᖏᓐᓄᑦ ᐊᒻᒪᓗ ᐊᓯᖏᓐᓄᑦ ᑐᑭᑖᕈᑎᖃᕐᓂᕐᒧᑦ ᐱᓕᕆᓂᐅᖃᑦᑕᓂᐊᖅᑐᓄᑦ ᐱᔾᔪᑎᓕᓐᓂᑦ ᐊᕙᑎᒥᐅᑕᕐᓂᑦ ᕿᓂᖃᑦᑕᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᕿᑭᖅᑕᓂ.
ᕿᑭᖅᑕᓂᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᖁᓅᕐᒥᕐᓯᒪᒻᒪᑕ ᑲᓇᑕᒥ ᐆᒻᒪᖅᑯᓯᕆᓂᕐᒧᑦ ᑲᑎᒪᔩᑦ ᑐᑭᑖᕈᑎᖃᕐᓯᒪᓂᖏᓐᓂᒃ ᔫᓂ 26, 2014ᒥ ᐱᔾᔪᑎᓕᒻᒥᒃ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᓐᓇᐅᑎᑖᖅᑎᑦᑎᓯᒪᓂᖏᓐᓄᑦ, ᐊᒻᒪᓗ ᓄᓇᖃᖅᑳᕐᓯᒪᔪᓅᖓᔪᓂᑦ ᐊᒻᒪᓗ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔩᑦ ᑲᓇᑕᒥ (ᐃᓄᓕᕆᔨᑐᖃᒃᑯᑦ) ᐊᖏᕐᓯᒪᓂᖏᓐᓄᑦ ᑲᓇᑕᒥ ᐃᑲᔫᓯᐊᔅᓴᓄᑦ ᐸᕐᓇᐅᒻᒥᑦ ᑐᕌᖓᔪᒥᒃ ᑕᒪᑐᒧᖓ ᐱᓕᕆᐊᕐᒧᑦ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᐱᔭᕇᕐᓯᓚᐅᖅᑎᓐᓇᒋᑦ ᓱᓕ.
ᐃᓄᐃᑦ ᑐᑭᓯᑎᑦᑎᓯᒪᑦᑎᐊᕐᖓᑕ ᐊᑭᕋᖅᑐᕐᓂᑎᓐᓂᒃ ᐃᖅᑲᕐᓂᐊᕐᓗᑎᒃ ᖃᐅᔨᓴᕐᓂᕐᒥᒃ ᐃᓱᒫᓘᑎᖏᑦ ᑲᒪᒋᔭᐅᑦᑎᐊᖅᑳᓚᐅᙱᓐᓂᖏᓐᓂ ᐊᒻᒪᓗ ᑐᑭᒧᐊᒍᑎᔅᓴᑦ ᐊᕙᑎᓕᕆᓂᕐᒥᒃ ᖃᐅᔨᓴᕐᓂᕐᒥ ᐱᔭᕇᖅᑕᐅᓚᐅᖅᑎᓐᓇᒋᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ. ᐃᓄᐃᑦ ᑐᑭᓯᒋᐊᕐᕕᐅᓯᒪᓪᓚᑦᑖᖏᒻᒪᑕ ᐃᑲᔫᓯᐊᔅᓴᐅᔪᓐᓴᖅᑐᑦ ᐱᓕᕆᐊᕐᒥ ᒥᔅᓴᓄᑦ ᐊᒻᒪᓗ/ᐅᕝᕙᓘᓐᓃᑦ ᐊᑦᑐᐃᓂᐊᕐᓂᖏᑕ ᑕᕆᐅᕐᒥᐅᑕᕐᓄᑦ ᐆᒪᔪᓄᑦ ᒥᔅᓴᓄᑦ.
ᐃᓄᐃᑦ ᐃᓱᒫᓘᑎᖃᕐᖓᑕ ᐊᑦᑐᐃᒍᓐᓇᕐᓂᖓᓂᒃ ᑕᒪᑐᒪ ᐱᓕᕆᐊᑉ ᐊᖑᓇᓱᑦᑕᐅᕙᑦᑐᓄᑦ ᑕᕆᐅᕐᒥᐅᑕᕐᓄᑦ ᐆᒪᒧᓄᑦ ᓄᓇᕗᑦ ᓯᓚᑖᓅᕐᐸᑦᑐᓄᑦ ᐊᒻᒪᓗ ᓇᓕᐊᓐᓄᕋᕐᐸᑦᑐᓄᑦ ᓄᓇᕗᑦ ᐃᓗᐊᓂ. ᐱᒻᒪᕆᐅᒻᒪᑦ ᓄᓇᓖᑦ ᐃᓱᒫᓘᑎᖏᑦ ᑐᓴᖅᑕᐅᔭᕆᐊᖃᕐᓂᖏᓐᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓚᓕᐅᔾᔭᐅᓯᒪᒋᐊᖃᕐᖓᑕ ᑕᒪᕐᒥᒃ ᐱᓇᓱᐊᕈᑎᔅᓴᓕᕆᓂᕐᒧᑦ ᑐᑭᑖᕈᑕᐅᕙᑦᑐᓄᑦ. ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓕᓐᓂᐊᕐᓂᖃᖅᑲᑕ ᓄᓇᓖᑦ ᐃᓱᒫᓘᑎᖏᓐᓂᒃ ᑲᒪᔾᔪᑕᐅᒐᔭᕐᖓᑦ ᐊᒻᒪᓗ ᐃᖅᑲᓇᐃᔭᖃᑎᖃᕈᑕᐅᒐᔭᕐᖓᑦ ᐱᓕᕆᔪᒪᓯᒪᒧᓂᑦ ᐃᓚᓕᐅᔾᔭᐅᓂᐊᕐᖓᑕ ᐃᓄᐃᑦ ᖃᐅᔨᒪᔭᑐᖃᖏᑦ ᐊᑦᑐᖅᑕᐅᓯᒪᔪᓂᑦ ᓄᓇᓕᓐᓂᑦ ᓴᓇᓯᒪᔭᖏᓐᓄᑦ ᐃᖅᑕᕐᓂᐊᕐᓗᑎᒃ ᖃᐅᔨᓴᕈᑎᔅᓴᖏᓐᓄᑦ.
ᓛᕆ ᐊᐅᓪᓚᓗᒃ, ᐊᖏᔪᖅᑳᖑᑲᐃᓐᓇᖅᑐᖅ ᕿᑭᖅᑕᓂᒃᑯᓐᓂ ᓇᓗᖅᑯᑎᙱᑎᐊᖅᑐᖅ, “ᐃᓚᓕᐅᔾᔭᐅᑉᐸᑕ ᐃᓄᐃᑦ ᖃᐅᔨᒪᔭᑐᖃᖏᑦ ᓴᓇᓯᒪᔭᖏᓐᓄᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᑎᔅᓴᖏᓐᓄᑦ ᐸᓚᕐᔫᒥᔪᒥᒃ ᐊᑦᑐᖅᑕᐅᓂᖃᕋᔭᕐᖓᑕ ᑕᕆᐅᕐᒥᐅᑕᐃᑦ ᐆᒪᔪᑦ ᐃᓄᐃᑦ ᓂᕿᒋᕙᑦᑕᖏᑦ.”’
ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑦ ᑳᑎ ᑕᐅᑐᙱ ᐅᖃᕐᓯᒪᔪᖅ, “ᕿᑭᖅᑕᓂᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑲᑦᑐᖓᐃᕐᓯᒪᔪᑦ ᐃᖅᑲᓇᐃᔭᖃᑎᒌᓐᓂᐊᓂᕐᒧᑦ ᓄᓇᓖᑦ ᐃᓱᒫᓘᑎᖏᑦ ᑐᓴᖅᑕᐅᔪᓐᓇᓂᐊᕐᖓᑕ ᐊᒻᒪᓗ ᑲᒪᒋᔭᐅᔪᓐᓇᓂᐊᕐᖓᑕ ᓯᕗᒧᐊᒍᑎᖃᕐᓂᕐᒥᒃ ᑕᒪᒃᑯᓂᖓ.”
ᕿᑭᖅᑕᓂᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑲᑦᑐᖓᐃᕐᓯᒪᔪᑦ ᐋᖅᑭᔅᓱᐃᓂᐊᕐᓂᕐᒧᑦ ᓈᒪᔪᒥᒃ ᐊᒻᒪᓗ ᒪᑭᑕᑦᑎᐊᓂᐊᖅᑐᒥᓪᓗ ᑐᑭᒧᐊᒍᑎᔅᓴᒥᒃ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᐃᓚᓕᐅᔾᔨᓯᒪᔪᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐊᒻᒪᓗ ᑲᑐᔾᔨᓪᓗᑎᒃ ᑎᑎᕋᕐᓯᒪᓪᓗᑎᒃ ᐃᓄᓕᕆᔨᑐᖃᒃᑯᓐᓄᑦ ᑎᓕᐅᕆᓗᑎᒃ ᒐᕙᒪᒃᑯᓐᓂᑦ ᑲᔪᓯᑎᑦᑎᖁᓪᓗᒋᑦ ᑲᑦᑐᖓᐃᕈᑎᒋᓯᒪᔭᖓᓐᓂᒃ ᑲᒪᒋᔭᖃᕐᓂᐊᕐᓂᕐᒧᑦ ᑐᑭᒧᐊᒍᑎᔅᓴᒥᒃ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒥᒃ ᐊᑕᐅᑦᑎᒃᑯᑦ ᑐᔅᓯᕋᐅᑕᐅᓯᒪᔪᒧᑦ ᐃᖅᑲᕐᓂᐊᕐᓗᑎᒃ ᖃᐅᔨᓴᕈᒪᕐᓂᒧᑦ, ᐊᒻᒪᓗ ᑲᑦᑐᖓᐃᕈᑎᖃᕐᓗᑎᒃ ᐱᔭᕇᕐᓯᓂᐊᕐᓂᕐᒧᑦ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᐊᑑᑎᓕᒻᒥᒃ ᐱᖃᑕᐅᒍᑕᐅᓂᐊᖅᑐᒥᒃ ᑕᒪᕐᒥᒃ ᐊᑦᑐᖅᑕᐅᓯᒪᔪᓄᑦ ᓄᓇᓕᓐᓄᑦ ᐃᓚᓕᐅᑎᓗᒍ ᖃᐅᔨᒃᑲᖅᑕᐅᓯᒪᓗᑎᒃ ᑐᑭᑖᕈᑎᖃᖃᑦᑕᓂᐊᕐᓂᕐᒧᑦ ᒪᓕᓪᓗᑎᒃ ᑐᑭᓯᓯᒪᑦᑎᐊᕐᓂᖏᓐᓂᒃ ᐃᓄᑦᑎᒍᑦ−ᒪᑭᒪᓇᓱᐊᕈᑕᐅᕙᑦᑐᓂᑦ ᐊᒻᒪᓗ ᐊᕙᑎᑦᑎᓐᓂ ᐆᒪᔪᓄᑦ ᓇᔪᒐᖏᓐᓄᓪᓗ ᐊᑦᑐᐃᓂᖃᕋᔭᖅᑐᓂᑦ ᐅᖅᓱᐊᓗᓐᓂᐊᓂᕐᒥ ᒑᓯᓐᓂᐊᓂᕐᒥᓪᓗ ᐊᒻᒪᓗ ᐱᕙᓪᓕᐊᔪᓕᕆᓂᕐᒥᒃ, ᐱᖃᓯᐅᑎᓪᓗᒍ ᐃᖅᑲᕐᓂᐊᕐᓗᑎᒃ ᖃᐅᔨᓴᕐᓂᖅ.
-###-
ᑐᓴᕋᔅᓴᓄᑦ ᑐᑭᓯᒋᐊᕐᕕᔅᓵᒃ:
ᒨᑦ ᕗᑐᕋᓐᑦ
ᑐᓴᐅᒪᖃᑦᑕᐅᒍᑎᓕᕆᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
867.975.8400
1.800.667.2742
mbertrand@qia.ca
ᑭᐅᕆ ᒪᒃᓚᔅᑭ
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
867.975.4900
1.888.646.0006
kmccluskey@tunngavik.com
