ᐅᓪᓗᖓ ᓴᖅᑭᑕᖅ: ᐄᐳᓪ 1, 2019

ᑭᓱᒧᑦ: ᑲᑎᒪᔨᐅᕝᕕᐅᔪᓄᑦ ᑲᑎᒪᔨᐅᒍᒪᓇᔭᖅᑐᓂᒃ; ᓄᓇᕗᑦ ᐸᐸᑦᑎᔨᒃᑯᑦ, ᑲᑭᕙᒃ ᑲᑐᔾᔨᖃᑎᒌᖏᑦ, ᕿᑭᖅᑖᓗᒃ ᑯᐊᐳᕇᓴᓐ, ᑲᑭᕙᒃᑯᑦ ᑐᓐᓂᖅᑯᓯᐊᓕᕆᓂᕐᒧᑦ ᐊᑐᖅᑐᐊᒐᒃᓴᓕᕆᓂᕐᒧᑦ ᑲᑎᒪᔨᕋᓛᖏᑦ, ᑲᑐᔾᔭᐅᔪᓂᒃ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ ᖁᑦᑎᓂᖅᐹᖅ ᐊᒻᒪ ᓯᕐᒥᐅᓕᐅᑉᓗ ᒥᕐᖑᐃᖅᓯᕝᕕᖏᓐᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᕿᓂᕐᒪᑕ ᐱᓪᓗᕆᒃᑐᓂ ᐊᒻᒪᓗ ᐱᕆᔪᓐᓇᑦᑎᐊᖅᑐᓂᒃ ᐃᓄᖕᓂᑦ ᑲᑎᒪᔨᐅᕝᕕᐅᔪᓄᑦ ᑲᑎᒪᔨᐅᒍᒪᓇᔭᖅᑐᓂᒃ.  ᐃᓱᒪᒋᔭᐅᒍᒪᓂᐊᕈᕕᑦ, ᐱᓇᓱᖃᑕᐅᔪᒪᓂᐊᖅᑐᑦ ᐱᓕᕆᑦᑎᐊᕈᓐᓇᕆᐊᓖᑦ ᐊᒻᒪᓗ ᓇᓗᓇᐃᖅᓯᓯᒪᓗᑎᒃ ᐱᓕᕆᔪᒪᓂᖏᓐᓂᒃ ᑭᒡᒐᖅᑐᑦᑎᐊᕐᓗᒋᑦ ᕿᑭᖅᑕᓂ ᐃᓄᐃᑦ ᐊᒻᒪᓗ ᑐᑭᓯᐅᒪᓂᖃᕐᓗᑎᒃ ᓄᓇᕗᒥ ᐊᖏᕈᑎᐊᓂ ᐃᓗᓕᖏᑦ ᑐᕌᖓᔪᓄᑦ ᐱᓕᕆᐊᒃᓴᕆᔭᐅᔪᓂᒃ ᐱᓕᕆᔾᔪᓯᕆᔭᐅᔪᓂᓗ ᐃᓂᒋᔭᐅᔪᓄᑦ.  

ᓄᓇᕗᒥ ᐸᐸᑦᑎᔨᒃᑯᑦ (3ᓄᑦ ᐊᕐᕌᒍᓄᑦ)

ᓄᓇᕗᑦ ᐸᐸᑦᑎᔨᒃᑯᑦ ᐱᓕᕆᔾᔪᓯᖃᖅᑐᑦ ᑮᓇᐅᔭᓕᐅᕋᓱᐊᕐᓂᕐᒥᒃ ᑮᓇᐅᔭᖅᑖᖑᓚᐅᖅᑐᓂᑦ ᓄᓇᕗᑦ ᐱᓐᖑᖅᑎᑕᐅᑎᓪᓗᒍ.  ᑖᒃᑯᐊ ᐸᐸᑦᑎᔩᑦ ᐱᔭᒃᓴᖃᖅᑐᑦ ᐃᓗᓐᓇᖏᓐᓄᑦ ᐊᐅᓚᑦᑎᓂᕐᒥᒃ ᐱᓕᕆᐊᒃᓴᓂᒃ ᓇᓗᓇᐃᔭᖅᑕᐅᓯᒪᔪᓂᑦ ᓄᓇᕗᒥ ᐸᐸᑕᐅᔪᓂᒃ ᐊᖏᕈᑎᐅᔪᒥᒃ, ᐱᖃᓯᐅᑎᓗᒍ ᓇᓗᓇᐃᔭᐃᓂᕐᒥᒃ ᒪᑯᓂᖓ ᑮᓇᐅᔭᓕᐅᕋᓱᐊᕈᑕᐅᓂᐊᖅᑐᓄᑦ ᐊᔾᔨᒌᓐᖏᑦᑐᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᑐᐊᒐᖏᓐᓂᒃ ᑐᕌᒐᕆᔭᖏᓐᓂᓗ, ᐋᖅᑭᒃᓱᖅᓯᒪᔪᓂᒃ ᐱᓕᕆᐊᖑᔪᓂᒃ ᒪᓕᒐᒃᓴᐅᓂᒃ ᐊᑐᖅᑕᐅᕙᑦᑐᓄᑦ ᖃᓄᖅ ᐱᕙᓪᓕᐊᑎᒋᓯᒪᓕᕐᒪᖔᑖᒃ ᑐᕌᒐᓕᐊᖑᓯᒪᔪᓂᒃ ᐊᒻᒪᓗ ᐊᖏᕆᐊᖃᖃᑦᑕᕐᓂᕐᒥᒃ ᑮᓇᐅᔭᓕᐅᕋᓱᐊᖅᑎᐅᓂᐊᖅᑐᓂᒃ.  

ᑲᑭᕙᒃ ᑲᑐᔾᔨᖃᑎᒌᖏᑦ (3ᓄᑦ ᐊᕐᕌᒍᓄᑦ)

ᑲᑭᕙᒃᑯᑦ  ᓄᓇᓕᖕᓄᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᓪᓗ ᑎᒥᖁᑎᒋᔭᐅᔪᖅ ᐱᔨᑦᓯᖅᑐᓄᑦ ᐃᓄᖕᓂ, ᐃᑲᔪᖅᖃᑦᑕᖅᖢᑎᒃ ᓇᖕᒥᓂᕐᓂᒃ, ᐃᖅᑲᓇᐃᔭᕐᕕᓂᒃ ᐊᒻᒪᓗ ᐱᓕᒻᒪᒃᓴᐃᓂᕐᒧᑦ ᑮᓇᐅᔭᖃᖅᑎᑦᑎᕙᒃᖢᒃ ᖃᑭᒋᐊᖅᑎᑦᑎᓇᓱᒃᖢᑎᒃ ᐱᔪᓐᓇᕐᓂᐅᔪᓂᒃ ᕿᑭᖅᑕᓂ ᓄᓇᓕᖏᓐᓂᑦ.  

ᑲᑭᕙᒃᑯᑦ ᐃᑲᔫᓯᐊᖅᑖᖅᑎᑦᑎᒍᑎᒋᕙᑦᑕᖏᓐᓄᑦ ᐊᑐᖅᑐᐊᖅᑎᑦᑎᒍᑎᒋᕙᒃᑕᖏᓐᓄᓗ ᐊᔪᐃᓐᓇᕆᐊᒃᑲᓐᓂᕈᑎᓄᑦ ᑲᑎᒪᔨᕋᓛᑦ (3ᓄᑦ ᐊᕐᕌᒍᓄᑦ)

ᑖᒃᑯᐊ ᑲᑎᒪᔨᕋᓛᑦ ᑲᑎᒪᖃᑦᑕᖅᑐᑦ ᑲᑎᒪᒋᐊᖃᓕᕋᐃᒻᒪᑕ ᕿᒥᕐᕈᒋᐊᖃᖅᑎᓪᓗᒋᑦ ᐊᔪᐃᓐᓈᖅᑕᐅᓯᒪᔪᓂᒃ ᐊᒡᒑᖅᑕᐅᓯᒪᑎᓪᓗᒋᑦ ᐃᑲᔫᓯᐊᖅᑖᖅᑎᑕᐅᓂᕐᒧᑦ ᑲᑭᕙᒃᑯᓐᓂᑦ ᐊᔾᔨᒌᓐᖏᑦᑐᓄᑦ ᐱᓕᕆᐊᒃᓴᕆᔭᖏᓐᓂᑦ ᐱᔨᑦᓯᕈᑎᒋᔭᖏᓐᓂᓗ.  ᐱᓇᓱᒃᑐᑦ ᑲᑭᕙᒃᑯᑦ, ᕿᑭᖅᑕᓃᒃᑯᑦ, ᐅᕝᕙᓘᓐᓃᑦ ᑎᒥᖁᑎᒋᔭᐅᔪᓂᑦ ᐊᐅᓚᑕᐅᔪᓄᑦ ᕿᑭᖅᑕᓃᒃᑯᑦ ᐃᑲᔫᓯᐊᖅᑖᖅᑎᑕᐅᔪᓐᓇᓐᖏᑦᑐᑦ.

ᕿᑭᖅᑖᓗᒃ ᑯᐊᐳᕇᓴᓐ (3ᓄᑦ ᐊᕐᕌᒍᓄᑦ)

ᕿᑭᖅᑖᓗᒃ ᑯᐊᐳᕇᓴᒃᑯᑦ ᓇᖕᒥᓂᖁᑎᒋᔭᐅᔪᖅ ᐃᓄᖕᓄᑦ ᐱᕙᓪᓕᐊᔪᓕᕆᓂᕐᒥᒃ ᑯᐊᐳᕇᓴᐅᓪᓗᓂ ᐱᓕᕆᐊᒃᓴᖃᖅᖢᑎᒃ ᐃᖅᑲᓇᐃᔭᖅᑎᑦᑎᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᐊᕐᕕᖃᓲᖑᓪᓗᑎᒃ ᐃᓄᐃᑦ ᐱᓪᓗᒋᑦ ᕿᑭᖅᑕᓂ ᓄᓇᓕᖕᓂᑦ.  ᕿᑭᖅᑖᓗᒃ ᑯᐊᐳᕇᓴᒃᑯᑦ ᐱᒻᒪᕆᐅᔪᒃᑯᑦ ᐃᑲᔪᖃᑦᑕᖅᑐᑦ ᓄᓇᕗᒥ ᐱᕙᓪᓕᐊᔾᔪᑎᒋᔭᐅᔪᓂᒃ, ᐃᓚᒋᓪᓗᒍ ᐃᖃᓗᓕᕆᓂᖅ, ᓂᐅᕕᕐᕕᓕᕆᓂᖅ, ᐃᓪᓗᕐᔪᐊᓕᕆᓂᖅ ᐊᒻᒪᓗ ᐊᐅᓚᑦᑎᓂᕐᒥᒃ ᐊᒻᒪᓗ ᐱᔨᑦᓯᕐᓂᕐᒥᒃ ᓴᖅᑭᑉᐸᓪᓕᐊᔪᓂᑦ ᐅᔭᕋᕐᓂᐊᕐᕕᖕᓂ ᐊᒻᒪᓗ ᐱᕙᓪᓕᐊᑎᑦᑎᕙᓪᓕᐊᔪᓂᒃ.

ᑖᒃᑯᐊ ᑲᑎᒪᔨᕋᓛᑦ ᑲᑎᒪᔨᒃᓴᓂᑦᑕᐅᖅ ᕿᓂᖅᑐᑦ:

• ᑲᑐᔾᔭᐅᔪᓂᒃ ᒥᕐᖑᐃᖅᓯᕕᖕᒥ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ, ᖁᑦᑎᓂᖅᐹᒧᑦ (3ᓄᑦ ᐊᕐᕌᒍᓄᑦ, ᐊᑕᐅᓯᕐᒥ ᑲᑎᒪᔨᒃᓴᒥ)  
• ᓯᕐᒥᓕᒃ ᒥᕐᖑᐃᖅᓯᕝᕕᓕᕆᔨᒃᑯᖏᓐᓄᑦ (3ᓄᑦ ᐊᕐᕌᒍᓄᑦ, ᒪᕐᕉᒃ ᐃᓂᒃᓴᑦ)
• ᓴᓂᑭᓗᐊᖅ ᒥᕐᖑᐃᖅᓯᕝᕕᖓ (3ᓄᑦ ᐊᕐᕌᒍᓄᑦ, ᐊᑕᐅᓯᕐᒥ ᑲᑎᒪᔨᒃᓴᒥ)

ᕿᑭᖅᑕᓃᒃᑯᑦ ᓇᓗᓇᐃᖅᓯᒍᒪᔪᑦ ᐃᓄᐃᑦ ᐃᓚᐅᑦᑎᐊᕐᓂᖏᓐᓄᑦ ᐊᑐᓕᖅᑎᑕᐅᕙᓪᓕᐊᑎᓪᓗᒍ ᓄᓇᕗᒥ ᐊᖏᕈᑎᐊ.  ᑕᐃᒪᐃᑎᓪᓗᒍ, ᕿᑭᖅᑕᓃᒃᑯᑦ ᐊᑐᓕᖅᑎᑦᑎᓯᒪᔪᑦ ᒪᑐᐃᖓᑦᑎᐊᖅᑐᒥᒃ ᓵᓐᖓᔭᐅᕝᕕᖃᕈᓐᓇᖅᑐᓂᓗ ᖃᓄᐃᓕᐅᕐᓂᕐᒥᒃ ᐃᓱᒪᒋᔭᐅᓂᐊᖅᑎᓪᓗᒋᑦ ᐱᓇᓱᒃᑐᓂᒃ ᐃᓂᒃᓴᓄᑦ.  ᖃᐅᔨᒪᓂᐊᖅᑯᓯ ᐸᓖᓯᒃᑯᓐᓂᑦ ᐱᕋᔭᒃᓯᒪᓐᖏᒃᑲᓗᐊᕐᒪᖔᖅᐲᑦ ᖃᐅᔨᓴᖅᑐᖃᑐᐃᓐᓇᕆᐊᓕᒃ ᑎᒃᑯᐊᒐᒃᓴᐅᔪᓂᒃ/ᓂᕈᐊᒐᒃᓴᓕᐅᖅᑕᐅᓯᒪᔪᓂᓗ.

ᐊᑏᑦ ᓇᒃᓯᐅᑎᓗᓯᐅᒃ ᐱᓇᓲᑎᓯ ᐊᒻᒪᓗ ᑎᑎᖅᑲᕐᒥᒃ ᓱᒻᒪᑦ ᐱᓇᓱᖃᑕᐅᓯᒪᖕᒪᖔᖅᐲᑦ, ᐃᓄᒃᑎᑐᑦ ᖃᓪᓗᓈᑎᑐᓪᓗ, ᓇᓗᓇᐃᔭᐃᓗᑎᒃ ᓇᓪᓕᐊᖕᒧᑦ ᑲᑎᒪᔨᐅᕝᕕᐅᔪᒧᑦ ᐆᑦᑐᕐᒪᖔᖅᐲᑦ ᐅᕗᖓ:

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

ᑎᑎᖅᑲᓐᓂᐊᕐᕕᐊ 1340

ᐃᖃᓗᐃᑦ, ᓄᓇᕗᑦ X0A 0H0

ᐅᖄᓚᐅᑖ: (867) 975-8400

ᓱᑲᑦᑐᒃᑯᑦ: (867) 979-3238

ᐊᑭᖃᓐᖏᑦᑐᖅ: 1-800-667-2742

ᐃᕐᖐᓐᓈᖅᑕᐅᑖ: nominations@qia.ca

ᑐᒃᓯᒃᑲᓐᓂᕈᒪᒍᕕᑦ ᑖᒃᑯᐊ ᒥᒃᓵᓄᑦ ᐱᕕᒃᓴᐅᔪᓂᒃ, ᕿᑭᖅᑕᓃᒃᑯᑦ ᖃᐅᔨᒋᐊᕐᕕᒋᓗᒋᑦ ᐅᕝᕙᓘᓐᓃᑦ ᓄᓇᓕᖕᓂ ᑐᓴᐅᒪᑎᑦᑎᔨᒋᔭᓯ ᖃᐅᔨᒋᐊᕐᕕᒋᓗᒋᑦ.

ᒪᑐᕝᕕᒃᓴᖃᖅᑐᑦ ᒪᐃ 3, 2019  5:00ᒧᐊᖅᑎᓪᓗᒍ ᑲᓇᓐᓇᐅᑉ ᓯᕿᓐᖑᔭᖓ ᒪᓕᓪᓗᒍ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋ ᓯᐊᕋᕼᐃ

ᑐᑭᒧᐊᖅᑎᑦᑎᔨ, ᑐᓴᐅᒪᖃᑦᑕᐅᑎᓂ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

(867) 975.8413

1.800.667.2742