ᐅᐱᒍᓱᑦᑐᒍᑦ ᑐᓴᖅᑎᑦᓯᒋᐊᑦᓴᖅ ᐱᓕᕆᔪᒻᒪᕆᐅᖃᑦᑕᕐᓂᖓ ᕿᑭᖅᑕᓂᒃᑯᑦ ᐊᑭᓕᕐᓂᖓᓂᒃ. ᐊᕐᕌᒍᑦᑎᓐᓂ ᐊᕐᕌᒍᑕᒫᕐᓯᐅᒻᒥᒃ ᑮᓇᐅᔭᖅᑑᑎᒃᓴᖁᑎᕗᑦ ᐱᕈᕐᓯᒪᔪᖅ $18 ᒥᓕᔭᓂᒃ $25 ᒥᓕᔭᒧᑦ, ᒪᓂᒪᑎᑦᓯᓂᒃᑯᑦ ᐱᔨᑦᓯᕈᑎᒃᓴᑲᓐᓂᑎᓐᓂᒃ ᕿᑭᖅᑕᓂ ᐃᓄᖏᓐᓄᑦ.

ᑖᓐᓇ ᑮᓇᐅᔭᖅ ᑐᑭᓕᐅᕈᑕᐅᓂᐊᖅᑐᖅ ᐊᑐᕋᑦᓴᑲᓐᓂᕐᓄᑦ, ᐊᐅᓚᑕᐅᔪᓄᑦ ᐊᒻᒪᓗ ᐱᓇᓱᐊᒐᑦᓴᓂᒃ ᐱᔨᑦᓯᕈᑎᒃᓴᓂᒃ ᐃᓄᓐᓂᒃ ᓄᓇᑦᑎᓐᓂ. ᐊᒻᒪᓗ ᐃᖅᑲᓇᐃᔭᖅᑎᑲᓐᓂᕐᓂᒃ ᐊᓪᓚᑉᕕᖓᓄᓪᓗ ᕿᑭᖅᑕᓂᒃᑯᑦ.

ᑖᓐᓇ ᐱᕈᕐᓂᖓ ᑲᑐᔾᔨᖃᑎᒌᓄᑦ ᑮᓇᐅᔭᖅᑑᑎᒃᓴᑎᓐᓄᑦ ᓴᖅᑭᕐᓯᒪᔪᖅ ᐊᒥᓱᒐᓚᓐᓂᒃ ᐱᓕᕆᐊᓪᓗᐊᑕᕐᓂᒃ:

• $19 ᒥᓕᔭᓐ Q-STEP−ᑯᓃᓐᖔᖅᑐᖅ, ᕿᑭᖅᑕᓂ ᐊᔪᕈᓐᓃᓴᐅᑎᓄᑦ ᐱᓕᖕᒪᒃᓴᐅᑎᓄᓪᓗ ᐃᖅᑲᓇᐃᔭᖃᑎᒌᓐᓂᒃᑯᑦ.
  • ᑖᓐᓇ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐱᓕᖕᒪᒃᓴᐅᑎᓄᓪᓗ ᐱᓕᕆᐊᒃᓴᖅ ᑲᔪᓯᐊᖅᑐᖅ ᓯᑕᒪᓂ ᐊᕐᕌᒎᓂᐊᖅᑐᓂ. Q-STEP−ᑯᓐᓂᒃ ᐱᔪᓐᓇᖅᑎᑕᐅᔪᖅ ᑮᓇᐅᔭᖅᑑᑎᒃᓴᑖᕐᓯᒪᓂᕐᒥᒃ ᐊᔪᕈᓐᓃᕐᓴᐅᑎᓄᑦ ᐱᓇᓱᐊᖃᑎᒌᓂᑯᓪᓗ ᑮᓇᐅᔭᓕᑕᐅᒍᑎᓂᒃ. ᐱᓇᓱᐊᖃᑎᕗᑦ ᑖᑦᓱᒧᖓ ᐱᓕᕆᐊᒃᓴᒧᑦ ᐃᓚᒋᔭᐅᓪᓗᑎᒃ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᕐᕕᒃ, ᓄᓇᕗᑦ ᒐᕙᒪᖓ, ᑲᑭᕙᒃ ᑲᑐᔾᔨᖃᑎᒌᑦ ᐊᒻᒪᓗ ᑲᓇᑕ ᒐᕙᒪᒃᑯᖏᓐᓂᒃ.
  • ᓂᕆᐅᒋᔭᕗᑦ ᐊᐅᓚᑦᓯᓂᐊᕐᓂᕐᒥᒃ $2.5 ᒥᓕᔭᓂᒃ SPF ᑮᓇᐅᔭᓂᒃ ᑐᕌᖓᔪᓂᒃ ᐱᓕᖕᒪᒃᓴᐅᑎᒃᓴᓄᑦ ᐊᕐᕌᒍᑦᑎᓐᓂ ᐃᓄᓐᓄᑦ. ᑕᑉᕙᓃᖃᑕᐅᓐᖏᑦᑐᑦ ᑮᓇᐅᔭᒃᑰᖏᑦᑐᖅ ᐃᑲᔫᑏᑦ ᑐᓂᔭᐅᓯᒪᔪᑦ ᐱᓇᓱᐊᖃᑎᒋᔭᑦᑎᓐᓂᒃ.
• $1 ᒥᓕᔭᓐ ᐃᑲᔫᑎᓄᑦ ᐊᖏᖃᑎᒌᒍᑎᓂᒃ ᐊᑎᓕᐅᖃᑎᒋᓯᒪᓪᓗᒋᑦ ᒥᕐᖑᐃᓯᕐᕕᓕᕆᔨᕐᔪᐊᑯᑦ ᑲᓇᑕᒥ ᐋᔩᕋᕈᑎᒃᓴᒧᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑕᓂᕐᒧᓪᓗ ᐊᖏᖃᑎᒌᒍᑎᓄᑦ (IIBA)
  • ᑖᓐᓇ ᓄᑖᖑᒻᒥᔪᖅᑕᐅᖅ ᐊᕐᕌᒍᑦᑎᓐᓂ ᑮᓇᐅᔭᖅᑑᑎᒃᓴᓂ.
  • ᐱᐊᓂᒃᓯᒪᓕᖅᑕᕗᑦ ᓄᓇᓕᓐᓄᑦ ᐳᓚᕋᖃᑦᑕᕐᓂᖅ ᐃᓚᓕᐅᔾᔭᐅᓯᒪᑦᓯᐊᖁᓪᓗᒋᑦ ᐃᓄᐃᑦ ᐃᑲᔫᓯᐊᕈᑎᒃᓴᕆᔪᒪᔭᖏᓐᓄᑦ ᑐᓐᖓᕕᒋᔭᑦᑎᓐᓄᑦ ᐋᔩᕋᕈᑎᒋᔭᑦᑎᓐᓂ.
• $1.9 ᒥᓕᔭᓐ ᕿᑭᖅᑕᓂᒃᑯᑦ ᐃᑲᔫᑎᒃᓴᓄᑦ ᑮᓇᐅᔭᖏᓐᓃᖔᖅᑐᑦ, ᓴᖅᑭᕐᓯᒪᔪᑦ ᕿᑭᖅᑕᓂ ᐃᓵᔪᓄᑦ ᐊᑐᐊᒐᖅᑎᒍᑦ ᐊᒻᒪᓗ ᓴᓂᕐᕚᕆᕕᖕᒥᒃ ᓂᕆᐅᒃᑖᑦᓴᓂᒃ.
  • ᑖᓐᓇᑦᑕᐅᖅ ᓄᑖᖅ ᐊᕐᕌᒍᑦᑎᓐᓂ. $2.2 ᒥᓕᔭᓐ ᕿᑐᕐᖏᐅᕈᑏ ᑖᒃᑯᓇᓐᖔᖅᑐᑦ ᕿᑭᖅᑕᓂ ᓴᓂᕐᕚᕆᕕᒻᒥᒃ ᓂᕆᐅᑦᑖᑦᓴᓂᒃ ᐊᔾᔨᒌᓐᖏᑦᑐᓃᓐᖔᖅᑐᑦ ᑮᓇᐅᔭᑦ ᑮᓇᐅᔭᓕᐅᕈᑕᐅᔪᑦ ᑭᒡᒐᑐᖅᑕᐅᓪᓗᑎᒃ ᕿᑭᖅᑕᓂ ᐃᓄᐃᑦ ᐊᒻᒪᓗ ᒫᓐᓇ ᐊᑐᐃᓐᓇᐅᓕᖅᑐᑦ ᑕᑉᕙᓂ ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓂ ᐱᓕᕆᐊᒃᓴᓄᑦ

• $500,000 ᑮᓇᐅᔭᖅᑖᕆᓚᐅᖅᑕᖏᑦ ᕿᑭᖅᑕᓂᒃᑯᑦ ᒪᑭᒋᐊᖅᑕᑯᓐᓂᒃ ᓄᑕᖅᑲᓄᑦ ᒥᑭᓂᖏᓐᓂ ᐃᓕᓐᓂᐊᕈᑎᒃᓴᑦ
  • ᑖᓐᓇᑦᑕᐅᖅ ᓄᑖᖅ ᑮᓇᐅᔭᖅᑑᑎᒃᓴᑎᓐᓂ. ᐊᐅᓚᑦᓯᓂᐊᕋᓱᒋᔪᒍᑦ $420,000−ᕌᖅᑐᓂᒃ ᐱᓕᕆᐊᒃᓴᓂᒃ ᐊᕐᕌᒍᑦᑎᓐᓂ ᑐᕌᖓᔪᓂᒃ ᓄᑕᖅᑲᓄᑦ ᒥᑭᓂᖏᓐᓂ ᐃᓕᓐᓂᐊᕈᑎᒃᓴᓂᒃ.

ᑲᒻᐸᓂᖁᑎᕗᑦ QC ᑮᓇᐅᔭᓕᐅᕈᓐᓇᑦᓯᐊᓚᐅᕐᒪᑦ 2017/18 ᐊᕐᕌᒍᐊᓂ. ᑕᑉᕙᓐᖓᑦ ᕿᑭᖅᑕᓂᒃᑯᑦ ᑐᓴᖅᑎᑦᓯᒍᓐᓇᕐᓯᓚᐅᖅᑐᑦ $1.8 ᒥᓕᔭᓂᒃ ᐅᑎᕐᕕᐅᓂᕐᒥᒃ ᖄᖏᕐᓂᑯᑖᑦᑎᓐᓂᒃ QC−ᑯᓐᓂᒃ. ᑐᑭᖓ, ᐊᕐᕌᒎᖅᑲᐅᔫᓐᓂ ᒪᕐᕉᓐᓂ, QC-ᑯᑦ ᐃᑲᔪᓚᐅᖅᑐᑦ ᑲᑎᓪᓗᒋᑦ $2.8 ᒥᓕᔭᓂᒃ ᕿᑭᖅᑕᓂᒃᑯᑦ ᐃᓵᔪᓄᑦ ᐊᑐᐊᒐᖏᓐᓄᑦ ᓴᓂᕐᕚᕆᕕᒻᒧᑦ ᓂᕆᐅᑦᑖᑦᓴᓄᑦ ᑐᕌᖅᑐᑦ ᐃᑲᔫᑎᒃᓴᓄᑦ ᑮᓇᐅᔭᖁᑎᑦᑎᓐᓄᑦ ᐱᓕᕆᐊᒃᓴᓄᑦ.

ᓂᕆᐅᒋᔭᕗᑦ ᐊᐅᓚᐃᓐᓇᓂᐊᕐᓂᑎᓐᓂᒃ ᑕᒪᐅᓇ ᐊᕐᕌᒎᓂᐊᖅᑑᓐᓄᑦ ᒪᕐᕉᓐᓄᑦ ᑎᑭᓪᓗᒍ ᓯᑕᒪᓄᑦ ᐊᕐᕌᒍᓄᑦ. ᑭᖑᓂᐊᒍᑦ, ᐱᓕᕆᐊᖑᔪᑦ ᐱᐊᓂᖕᓂᐊᖅᑐᑦ, ᐊᒻᒪᓗ ᑮᓇᐅᔭᖅᑑᑎᒃᓴᕗᑦ ᐅᑎᕆᐊᖃᕐᓂᐊᖅᑐᑦ $18M ᐊᕐᕌᒍᑕᒫᑦ, ᑮᓇᐅᔭᓕᑕᐅᒃᑲᓂᓐᖏᑯᑦᑕ ᐊᓯᖏᓐᓄᑦ ᓄᑖᓄᑦ ᐱᓕᕆᐊᒃᓴᓄᑦ.