ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᓪᓚᕆᑦᑐᑦ ᖁᕕᐊᓲᑎᖃᕆᐊᔅᓴᖅ ᐱᒻᒪᕆᐊᓗᒻᒥᒃ ᓇᓗᓇᐃᕐᓯᒍᑎᖃᕐᓂᖏᓐᓂᒃ ᑕᓪᓗᕈᑎᐅᑉ ᐃᒪᖓᑕ ᑲᓇᑕᒥ ᓴᐳᔾᔨᕕᓕᐊᖑᓂᐊᓂᒃ ᐅᓪᓗᒥ.

ᑕᒫᓂ ᐊᖏᓂᖃᐸᓗᑦᑐᓂ 110,000 ᑭᑉᐹᕆᑦᑐᓂᑦ ᑭᓛᒥᑕᓂᑦ ᐆᑦᑑᑎᑎᒍᑦ, ᑕᓪᓗᕈᑎᐅᑉ ᐃᒪᖓ ᖃᓪᓗᓈᑎᑐᑦ ᐃᒫᒃ ᑕᐃᔭᐅᖃᑦᑕᕆᓪᓗᓂ ᓛᓐᑳᔅᑐ ᐃᒪᖅ (Lancaster Sound) ᐊᖏᓂᕐᐹᖑᓪᓗᓂ ᓴᐳᔾᔨᕕᐅᓂᐊᕐᖓᑦ ᓴᐳᔾᔨᕕᓕᐊᖑᔪᖅ ᑲᓇᑕᒥ.

ᑕᒪᓐᓇ ᑲᒪᒋᔭᐅᔪᓐᓇᕐᓯᒪᔪᖅ ᐱᔾᔪᑎᒋᓪᓗᒋᑦ ᐃᓱᒪᒋᓚᐅᕐᓯᒪᔭᖏᑦ ᑲᔪᓯᑎᑕᐅᖁᒐᔭᙳᐊᖅᑐᖏᑦ ᐃᓄᐃᑦ ᓲᕐᓗ ᐅᑯᐊᑎᑐᑦ ᔮᓐ ᐊᒪᕈᐊᓕᒃ, ᓛᕆ ᐊᐅᓪᓚᓗᒃ ᐊᒻᒪᓗ ᓵᒻ ᐅᒥᒃ. ᑖᒃᑯᐊ ᐃᓄᐃᑦ ᐊᒻᒪᓗ ᑕᐃᒪᐃᒃᑯᐊᖏᑦ ᐃᓱᒪᒋᔭᖃᓚᐅᕐᓯᒪᒻᒪᑕ ᑲᔪᓯᑎᒍᒥᓇᖅᑐᒥᒃ ᑕᓪᓗᕈᑎᐅᑉ ᐃᒪᖓ ᓴᐳᑎᔭᐅᓯᒪᓛᖁᓪᓗᒍ ᕿᑐᕐᖓᖏᑦ ᕿᑐᕐᖓᖏᓪᓗ ᐱᔾᔪᑎᒋᓪᓗᒋᑦ.

ᐱᓇᓱᐊᒐᖃᓚᐅᕐᓯᒪᒻᒪᑕ ᖃᐅᔨᒪᑦᑎᐊᕈᑎᔅᓴᖏᓐᓂᒃ ᐃᓄᐃᑦ ᐅᓪᓗᒥ ᓯᕗᓂᔅᓴᑎᓐᓂᓗ ᓱᓕ ᐊᖑᓇᓱᖃᑦᑕᕈᓐᓇᓛᕐᓂᖏᓐᓂᒃ ᐃᖃᓗᒐᓱᖃᑦᑕᕈᓐᓇᓛᕐᓂᖏᓐᓂᒃ ᑕᓪᓗᕈᑎᐅᑉ ᐃᒪᖓᓂ, ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑦ ᓄᓇᕗᒥ ᐊᖏᖃᑎᒌᒍᑎᓂᑦ, ᑭᓯᐊᓂᓗᑦᑕᐅᖅ ᐱᕚᓪᓕᕈᑎᖃᖁᒋᓪᓗᒋᑦ ᑲᑐᔾᔭᐅᓗᓂ ᐊᐅᓚᑕᐅᓂᐊᕐᓂᖓᓂᒃ ᓴᐳᑎᔭᐅᓯᒪᓗᓂ.

ᐱᒻᒪᕆᐅᓂᖓ ᑕᓪᓗᕈᑎᐅᑉ ᐃᒪᖓ ᐃᓄᓐᓄᑦ

ᐅᓪᓗᒥ, ᐱᒻᒪᕆᐅᒻᒪᑦ ᐅᓪᓗᖅ ᐃᓄᓐᓄᑦ, ᐱᔾᔪᑎᒋᓪᓗᒍ ᐱᒻᒪᕆᐊᓘᓂᖓ ᑕᓪᓗᕈᑎᐅᑉ ᐃᒪᖓ ᓄᓇᓕᖁᑎᑦᑎᓐᓄᑦ ᑕᒫᓂ ᓯᔾᔭᖓᓂ ᐊᕙᑖᓂ. ᑕᒪᓐᓇ, ᐃᒪᕐᒥᐅᑕᐅᕐᓂᑦ ᐆᒪᔪᖃᐅᑦᑎᐊᖅᑐᓂ, ᐃᓕᖅᑯᓯᑦᑎᓐᓄᑦ ᑐᙵᕕᓪᓚᕆᐅᒻᒪᑦ ᓄᓇᖓ ᐊᒻᒪᓗ ᐃᑲᔫᑎᖃᕐᓯᒪᒻᒪᑦ ᓄᓇᓕᖁᑎᑦᑎᓐᓄᑦ ᑕᐃᒪᙵᓂᑐᖃᕐᔪᐊᕌᓗᒃ. ᑭᖑᕚᖏᓐᓄᑦ ᐃᓄᐃᑦ ᑲᔪᓯᓯᒪᓪᓗᓂ ᑕᒪᒃᑯᓂᖓ ᐊᓐᓇᐅᒪᔾᔪᑎᖃᕐᓯᒪᒻᒪᑕ ᓂᕿᖃᖅᑐᑎᒃ ᕿᓚᓗᒐᕐᓂᑦ, ᑑᒑᓕᓐᓂᑦ, ᓇᓄᕐᓂᑦ ᐊᒻᒪᓗ ᓈᒪᑦᑎᐊᖅᑐᒥᒃ ᑭᓱᖃᐅᖅᑐᒥᒃ ᐊᕙᑎᖓᓂᒃ ᐃᒪᐅᑉ.

ᓴᐳᑎᔭᐅᔭᕆᐊᖃᕐᓂᖓ ᑕᒪᔅᓱᒪ ᐱᒻᒪᕆᐊᓘᒻᒪᑦ ᐃᓅᓯᖏᓐᓄᑦ ᐊᒻᒪᓗ ᒪᑭᑕᓂᖏᓐᓄᑦ ᐃᓄᐃᑦ ᖁᑦᑎᑦᑐᒥᐅᑦ – ᑲᑦᑐᖓᒍᑕᐅᓯᒪᔪᖅ ᓄᓇᓕᖁᑎᑦᑎᓐᓄᑦ ᐊᑯᓂᐊᓗᒃ. ᐊᕐᕌᒍᓂᑦ 50ᐸᓗᓐᓂᑦ, ᐃᓄᐃᑦ ᐱᓇᓱᐊᕈᑎᖃᕐᓯᒪᒻᒧᑕ ᖃᐅᔨᒪᑦᑎᐊᕋᓱᐃᓐᓇᖅᑐᑎᒃ ᑕᒪᒃᑯᐊ ᐊᕙᑖᓃᑦᑐᑦ ᐊᑐᐃᓐᓇᖁᓪᓗᒋᑦ ᐃᓕᖅᑯᓯᑦᑎᓐᓄᑦ, ᐱᖅᑯᓯᑦᑎᒍᑦ ᐃᓅᓯᕆᕙᑦᑕᑎᓐᓄᑦ ᐊᒻᒪᓗ ᐊᓐᓇᐅᒪᔭᕆᐊᖃᕐᓂᑎᓐᓄᑦ.

ᐃᓄᐃᑦ ᓴᐳᔾᔨᓂᕐᒥᒃ ᐊᑐᓯᓯᒪᒻᒪᑕ ᑕᓪᓗᕈᑎᐅᑉ ᐃᒪᖓᓂ ᐱᒋᐊᖅᑐᑎᒃ ᑕᒫᓂ 1960 1970ᒥᓗ ᐊᒻᒪᓗ ᐸᕐᓇᐅᑎᓕᐅᕈᑕᐅᓯᓚᐅᕐᓯᒪᓪᓗᓂ ᓯᕗᓪᓕᕐᐹᒥ ᑕᓪᓗᕈᑎᐅᑉ ᐃᒪᖓᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᒻᒥᑦ 1990ᑎᓪᓗᒍ. ᐅᓪᓗᒥ ᓇᓗᓇᐃᖅᑕᐅᓂᖓ ᑲᔪᓯᕗᖅ ᐱᔭᕇᖅᑕᐅᓂᖏᓐᓄᑦ ᐃᖅᑲᓇᐃᔮᕆᓯᒪᔭᖏᑦ ᐊᕐᕌᒍᒐᓴᓐᓂᑦ ᐃᓄᐃᑦ ᐊᑐᖅᑎᑦᑎᒋᐊᒃᑲᓐᓂᕈᒪᓂᕐᒧᑦ ᓴᐳᔾᔨᒍᒪᓂᕐᒧᓪᓗ ᐊᑲᕐᕆᕕᒋᔪᒪᕙᑦᑕᑎᓐᓂᒃ ᑕᒪᔅᓱᒥᖓ.

 

ᐱᒻᒪᕆᐅᔾᔪᑎᖏᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ

ᒫᓐᓇ, ᐋᖅᑭᑦᑕᐅᓂᖏᓐᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᑕᓪᓗᕈᑎᐅᑉ ᐃᒪᖓᓄᑦ, ᐃᓄᐃᑦ ᑕᒫᓂᒥᐅᑦ ᐱᕚᓪᓕᕈᑎᖃᐃᓐᓇᖃᑦᑕᓂᐊᕐᖓᑕ ᑕᒪᔅᓱᒪᙵᑦ ᑕᕆᐅᕐᒥ ᐊᒻᒪᓗ ᐱᕙᓪᓕᐊᒍᑎᖃᕐᓗᑎᓪᓗ ᒪᑭᑉᐸᓪᓕᐊᒍᑎᖃᕐᓗᑎᓪᓗ ᓯᕗᓂᔅᓴᑎᓐᓂ.

ᑖᒃᑯᐊ ᐊᑦᑐᖅᑕᐅᓂᖏᓐᓄᑦ ᐊᖏᕈᑏᑦ ᖃᐅᔨᒪᑦᑎᐊᕈᑕᐅᓂᐊᖅᑐᑦ ᐃᓄᐃᑦ ᑕᒫᓂᒥᐅᑦ ᐊᐅᓚᔾᔪᑎᔅᓴᖃᕐᓂᖏᓐᓂᒃ ᐱᓇᓱᐊᕈᑎᔅᓴᖃᕐᓂᖏᓐᓂᒃ ᐊᑐᕆᐊᖃᖅᑕᖏᓐᓂᒃ ᐱᕙᓪᓕᐊᑎᑦᑎᓂᕐᒧᑦ ᑲᔪᓰᓐᓇᕈᑎᔅᓴᖓᓐᓂᒃ ᓯᕗᓂᔅᓴᑎᓐᓂ ᖁᑦᑎᑦᑐᒥ. ᑕᒪᒃᑯᐊ ᐊᐅᓚᔾᔪᑎᔅᓴᐃᑦ ᐃᑲᔫᑎᖃᕋᔭᖅᑐᑦ ᐊᑐᕆᐊᖃᕋᔭᖅᑕᖏᓐᓄᑦ ᖁᑦᑎᑦᑐᒥᐅᑦ ᐊᒻᒪᓗ ᐊᑐᖃᑦᑕᕈᓐᓇᓂᐊᕐᖓᑕ ᑕᓪᓗᕈᑎᐅᑉ ᐃᒪᖓᓂ ᐊᒻᒪᓗ ᐃᖏᕐᕋᖃᑦᑕᕈᓐᓇᕐᓗᑎᒃ ᓇᓕᐊᓐᓄᕋᖃᑦᑕᕐᓗᑎᒃ ᐅᖓᓯᒌᑦᑐᒡᒍᑎᓂᑦ ᓄᓇᓕᓐᓂᑦ.

ᐃᓄᐃᑦ ᖁᑦᑎᑦᑎᒥᐅᑦ ᑐᓚᑦᑕᕐᕕᓕᐅᒃᑲᓐᓂᖁᔨᓯᒪᒻᒪᑕ ᐊᒻᒪᓗ ᐅᒥᐊᕋᓛᖑᓂᕐᓴᓄᑦ ᐄᒐᕐᕕᓕᐅᖃᑦᑕᖁᔨᓯᒪᓪᓗᑎᓪᓗ ᐊᕐᕌᒍᓂᑦ ᐊᒥᓱᓂᑦ. ᒥᑦᑎᒪᑕᓕᒻᒥᐅᑦ ᓴᓇᔭᐅᒋᐊᖁᔨᖃᑦᑕᕐᓯᒪᒻᒪᑕ ᖃᖓᑕᓲᓄᑦ ᑐᖅᑲᑕᕐᕕᐊᓂᑦ ᐊᑲᕐᕆᓂᕐᓴᐅᖁᓪᓗᒋᑦ ᑎᑭᑉᐸᑦᑐᑦ ᓄᓇᖓᓐᓄᑦ ᐊᐅᓪᓚᐸᑦᑐᓪᓗ ᓄᓇᖓᓐᓂ.

ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᐱᕕᖃᕈᑕᐅᒻᒪᑕ ᑲᒪᒋᔭᖃᕆᐊᕈᓐᓇᓂᕐᒧᑦ ᑕᒪᒃᑯᓄᖓ ᐱᑖᖑᔭᕆᐊᓕᓐᓄᑦ ᐊᒻᒪᓗ ᑕᐃᒫᒃ ᐃᓄᐃᑦ ᐱᕚᓪᓕᕈᑎᑖᕈᓐᓇᖁᓪᓗᒋᑦ ᐊᒻᒪᓗ ᒪᑭᒪᒋᐊᒃᑲᓐᓂᕈᓐᓇᖁᓪᓗᒋᑦ ᑕᓪᓗᕈᑎᐅᑉ ᐃᒪᖓᑕ ᑲᓇᑕᒥ ᓴᐳᔾᔨᕕᓕᐅᖅᑕᐅᓂᖓᓄᑦ.

ᐃᓘᓐᓇᑎᒃ ᒐᕙᒪᒃᑯᑦ ᐱᓇᓱᐊᕈᑎᖃᕐᓂᖓᑦ

ᑲᑐᔾᔨᖃᑎᒌᒃᑯᑦ ᖁᕕᐊᓱᑉᐳᑦ ᒐᕙᒪᑐᖃᒃᑯᑦ ‘ᒐᕙᒪᓕᒫᑦ ᐱᓇᓱᐊᕈᑎᖃᕐᓂᖏᓐᓂᒃ’ ᑕᒪᑐᒥᖓ ᐱᔾᔪᑎᒋᓪᓗᒍ ᑲᑐᔾᔨᖃᑎᒌᑦᑐᐃᓐᓇᐅᔭᕆᐊᖃᕐᓂᐊᕐᖓᑕ ᐊᒥᓱᑦ ᐊᓪᓚᕝᕕᐅᕙᑦᑐᑦ ᑎᑭᑕᐅᔪᒪᓂᐊᖅᑲᑕ ᑐᕌᒐᓕᐊᕆᓯᒪᔭᕗᑦ ᑕᓪᓗᕈᑎᐅᑉ ᐃᒪᖓᓄᑦ ᑐᕌᖓᔪᑦ.

ᑲᑐᔾᔨᖃᑎᒌᓐᓂᖅ ᑕᓪᓗᕈᑎᐅᑉ ᐃᒪᖓᓄᑦ ᐱᒋᐊᔪᔪᖅ ᑲᑐᔾᔨᖃᑎᖃᖅᑐᑕ ᒥᕐᖑᐃᓯᕐᕕᓕᕆᔨᒃᑯᓐᓂ ᑲᓇᑕᒥ – ᑭᓯᐊᓂᓕ ᐱᖃᑕᐅᖃᑦᑕᕆᐊᖃᕐᓂᐊᕐᖓᑕ ᐊᒻᒪᓗ ᐊᖏᕐᓯᒪᓗᑎᒃ ᐊᓯᖏᑦ ᐱᓕᕆᕝᕕᐅᔪᑦ ᒐᕙᒪᑐᖃᒃᑯᓐᓂ ᑎᑭᑦᑐᒪᓂᐊᕈᑦᑎᒍ ᐱᔾᔪᑎᕗᑦ ᐃᓚᒋᔭᐅᓗᑎᓪᓗ ᐃᖏᕐᕋᖃᑦᑕᖅᑐᓕᕆᔨᒃᑯᑦ, ᐃᒪᕐᒥᐅᑕᐅᓕᕆᔨᒃᑯᑦ, ᐊᒻᒪᓗ, ᓄᓇᖃᖅᑐᑐᖃᓕᕆᔩᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᓕᕆᔩᑦ ᑲᓇᑕᒥ (ᐃᓄᓕᕆᔨᑐᖃᒃᑯᑦ ᑲᓇᑕᒥ).

 

ᓯᕕᑦᑐᕆᐊᖅᑕᐅᓯᒪᓂᖓ ᑭᓪᓕᖓ ᑕᓪᓗᕈᑎᐅᑉ ᐃᒪᖓᑕ

ᐱᔾᔪᑎᒋᓪᓗᒋᑦ ᐱᓇᓱᐊᕈᑎᒋᓯᒪᔭᖏᑦ ᐃᓄᐃᑦ ᑕᓪᓗᕈᑎᐅᑉ ᐃᒪᖓ ᐊᖏᓂᕐᐹᖑᓪᓗᓂ ᓴᐳᔾᔨᕕᐅᓂᐊᕐᖓᑦ ᓴᐳᔾᔨᕕᓕᐊᖑᓯᒪᔪᓂᑦ ᑲᓇᑕᒥ. ᖁᑦᑎᑦᑐᒥᐅᑦ ᓄᓇᓖᑦ ᓲᕐᓗ ᒥᑦᑎᒪᑕᓕᒃ, ᐊᔅᓱᕈᐊᖃᕐᓯᒪᒻᒪᑕ ᓯᕕᑦᑐᕆᐊᖅᑕᐅᒃᑲᐃᓇᓱᐊᖅᑐᑎᒃ ᑕᓪᓗᕈᑎᐅᑉ ᐃᒪᖓᑕ ᓴᐳᔾᔨᕕᓕᐊᖑᓂᐊᕐᓂᖓᓂᒃ.

ᐃᒪᐃᑦᑑᓯᒪᒻᒪᓇᐃ, ᐃᓄᐃᑦ ᖃᐅᔨᒪᔭᑐᖃᖏᑦ, ᐅᕝᕙᓘᓐᓃᑦ ᐃᓄᐃᑦ ᐱᖅᑯᓯᖅᑎᒍᑦ ᖃᐅᒪᔨᒪᔭᖏᑦ ᑕᓪᓗᕈᑎᐅᑉ ᐃᒪᖓᑕ ᒥᔅᓵᓄᑦ ᐃᑲᔫᑎᖃᕐᓯᒪᔪᑦ ᑐᑭᓯᑎᑦᑎᓂᕐᒥᒃ ᖃᓄᑎᒋ ᓯᕕᑐᑎᒋᔪᒥᒃ ᐃᓄᐃᑦ ᐊᑐᖃᑦᑕᕐᒪᖔᑕ ᑕᒪᔅᓱᒥᖓ ᐊᕙᑖᓂᒃ ᐊᒻᒪᓗ ᓯᕕᑦᑐᕆᐊᖅᑕᐅᒍᑎᒋᔪᓐᓇᕐᓯᒪᓪᓗᓂᐅᒃ ᓴᐳᔾᔨᕕᐅᑉ ᐅᓪᓗᒥᓗ ᖁᕕᐊᓲᑎᒋᓪᓗᑎᒍ. ᖃᐅᔨᒪᔭᖏᑦ ᐃᓄᑐᖃᐃᑦ ᐃᑲᔫᑎᖃᕐᓯᒪᔪᑦ ᐅᕙᑦᑎᓐᓄᑦ ᖃᓄᑎᒋ ᑕᒪᓐᓇ ᐆᒪᓂᓖᑦ ᓇᔪᒐᖏᑕᓗ ᐊᕙᑖ ᐊᑦᑐᐊᑎᒋᒻᒪᖔᖅ ᐃᓄᓐᓄᑦ ᓄᓇᓕᓐᓄᑦ ᑕᒫᓂ.

ᐱᒻᒪᕆᐅᓂᖓ ᐊᑐᖅᑕᐅᖃᑦᑕᕐᓂᖏᑕ ᐃᓄᒃᑎᑐᑦ ᑕᐃᔭᐅᔾᔪᓯᕆᕙᑦᑕᖏᑦ

ᑭᖑᓪᓕᕐᐹᒥ, ᐱᒻᒪᕆᐅᒻᒪᑦ ᐅᖃᐅᓯᕆᔭᕆᐊᖃᖅᑐᒍᓗ ᑕᓪᓗᕈᑎᐅᑉ ᐃᒪᖓᑕ ᑕᐃᔭᐅᔾᔪᓯᖓᑕ ᑐᑭᖓ. ᑕᐃᒫᔅᓴᐃᓐᓇᖅ ᐃᓄᒃᑎᑐᑦ ᑕᐃᔭᐅᔾᔪᓯᖓ ᑐᑭᖃᕐᒥᒻᒪᑦ ᖃᓄᕐᓗ ᑕᐃᒫᒃ ᑕᐃᔭᐅᓕᕐᓂᕐᒪᖔᖅ. ᑕᓪᓗᕈᑦ ᐃᓄᒃᑎᑐᑦ ᑕᐃᔭᐅᔾᔪᓯᕆᒻᒪᒍ ᑎᐊᕙᓐ ᕿᑭᖅᑕᖓ (Devon Island). ᐃᓄᐃᑦ ᐅᑉᐱᕆᔭᖃᓚᐅᕐᖓᑕ ᑖᓐᓇ ᕿᑭᖅᑕᖅ ᑕᓪᓗᕈᑎᑎᑐᑦ ᑕᐅᑦᑐᖃᕆᐊᔅᓴᖓᓂᒃ ᐃᓄᒃ ᑮᓇᖓᒍᑦ ᑐᓐᓂᖃᖅᑎᓪᓗᒍ ᐊᓪᓕᕈᖏᑎᒍᑦ ᑕᓪᓗᕈᑎᐅᓂᕋᖅᑕᐅᒻᒪᑕ ᑕᕝᕙ ᑖᓐᓇ ᑕᐃᒫᒃ ᑐᑭᖃᖅᑯᖅ. ᐃᒪᖓ ᑐᑭᓕᐅᔾᔭᐅᓯᒪᓪᓗᓂ ᑕᓪᓗᕈᑎᐅᒡᒎᖅ ᐃᒪᖓ.

ᐅᕙᑦᑎᓐᓄᑦ ᐱᒻᒪᕆᐊᓘᒻᒪᑦ ᐊᑎᑐᖃᖓ ᑖᔅᓱᒪ ᓴᐳᔾᔨᕕᐅᑉ ᐅᓪᓗᒥ. ᑐᓪᓗᕈᑎᐅᑉ ᐃᒪᖓ ᑕᐃᒫᒃ ᑕᐃᔭᐅᖃᑦᑕᑎᓪᓗᒍ, ᐃᓕᓴᕐᓯᒍᑎᖃᖅᑐᓯ ᓯᕗᓕᑦᑎᓐᓄᑦ ᐊᑦᑐᐊᓂᖏᓐᓂᒃ ᐃᓄᐃᑦ ᖁᑦᑎᑦᑐᒥᐅᑦ ᑕᒪᔅᓱᒧᖓ ᐊᕙᑖᓄᑦ. ᐆᒪᑎᑦᑎᒐᔅᓯ ᑕᐃᔅᓱᒪᓂᓴᕐᓂᑦ ᐊᑦᑐᐊᔪᓂᑦ ᐃᓄᓐᓄᑦ ᐊᒻᒪᓗ ᑕᒪᔅᓱᒧᖓ ᑕᕆᐅᖓᓄᑦ.