ᐃᖃᓗᐃᑦ, ᓄᓇᕗᑦ, ᓯᑎᐱᕆ 11, 2024 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᓄᓐᓂᑦ ᑎᓕᐅᕆᔪᑦ ᑐᔅᓯᕋᐅᑎᖃᕐᓗᑎᒃ ᑐᓂᓯᖃᑦᑕᖁᓪᓗᒋᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᕐᒧᑦ (QCAP) 2024-2025 ᐊᕐᕌᒍᒥ ᑮᓇᐅᔭᓄᑦ ᐊᐅᓚᕕᖓᓐᓂ, ᐅᑭᐊᔅᓵᖅ/ᐅᑭᐅᖅ ᐱᓕᕆᐊᔅᓴᓄᑦ ᑐᕌᖓᔪᓂᑦ.
ᑭᒃᑯᑐᐃᓐᓇᐃᑦ ᐃᓄᐃᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᖃᑎᒌᑦ ᑕᒪᕐᒥᒃ ᕿᑭᖅᑕᓂ ᓄᓇᓕᖏᓐᓃᑦᑐᑦ ᑐᓂᓯᖃᑦᑕᖁᔭᐅᓕᕆᕗᑦ ᑐᔅᓯᕋᐅᑎᓂᑦ ᐱᓕᕆᐊᔅᓴᓄᑦ ᐊᐅᓚᓂᖃᖃᑦᑕᓛᖅᑐᓄᑦ ᓄᕕᐱᕆ 1, 2024ᒥ ᒫᑦᓯ 31, 2025ᒧᑦ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖅ ᑮᓇᐅᔭᖃᖅᑎᑦᑎᖃᑦᑕᓲᑦ ᓄᓇᓕᓐᓂᑦ ᐱᓕᕆᐊᔅᓴᓂᑦ ᓄᓇᖅᑲᑎᖏᓐᓄᑦ ᐃᓚᐅᕕᐅᓂᐊᖅᑐᓂᑦ ᐃᓕᓐᓂᐊᕐᕕᐅᓂᐊᖅᑐᓂᓪᓗ ᐱᖅᑯᓯᖅᑎᒍᑦ ᓴᓇᔾᔪᓯᕐᓂᑦ, ᓲᕐᓗ ᒥᖅᓱᖃᑦᑕᓂᕐᒥᒃ, ᐊᖑᓇᓱᖃᑦᑕᓂᕐᒥᒃ, ᐊᒻᒪᓗ ᓅᓯᒪᑎᑦᑎᓪᓗᑎᒃ ᐱᓕᕆᑎᑦᑎᓂᐅᕙᑦᑐᓂᑦ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖅ ᑮᓇᐅᔭᖅᑖᖅᑎᑕᐅᓲᖅ ᕿᑭᖅᑕᓂᒃᑯᓐᓂᑦ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ. ᑮᓇᐅᔭᐃᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᓃᙶᖃᑦᑕᓲᑦ, ᑐᖅᑯᖅᑕᐅᕙᓪᓕᐊᔪᑦ ᑮᓇᐅᔭᑦ ᐱᕈᐃᓲᑦ ᑮᓇᐅᔭᓂᑦ ᐃᓵᕙᓪᓕᐊᔪᓂᑦ ᑖᒃᑯᐊ ᑐᕌᕐᐸᑦᑐᑎᒃ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᐊᒥᓱᕈᒃᑲᓐᓂᖃᑦᑕᕈᓐᓇᓂᐊᕐᖓᑕ ᐱᓕᕆᐊᔅᓴᐃᑦ ᐃᓄᓐᓄᑦ ᑐᕌᖓᔪᑦ.
ᑐᔅᓯᕋᐅᑏᑦ ᑲᒪᒋᔭᐅᔪᓐᓇᖅᑐᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᐊᓂ https://www.qia.ca/applications/qcap-application/ ᐅᕝᕙᓘᓐᓃᑦ ᐃᑲᔪᖅᑎᖃᕐᓗᓯ ᓄᓇᔅᓯᓐᓂ ᑐᓴᐅᒪᑎᑦᑎᔨᓂᑦ.
ᐃᑲᔪᖅᑕᐅᔭᕆᐊᖃᕈᕕᑦ ᑎᑎᕋᕐᓂᕐᒥᒃ ᖃᕋᓴᐅᔭᒃᑯᑦ ᐅᕝᕙᓘᓐᓃᑦ ᐸᐃᑉᐹᑎᒍᑦ ᑐᔅᓯᕋᐅᑎᓂᑦ, ᐅᖄᓚᒍᓐᓇᖅᑐᓯ ᐅᕗᖓ 867-975-8446 ᐅᕝᕙᓘᓐᓃᑦ ᐃᕐᖐᓈᖅᑕᐅᑎᒃᑯᑦ ᑎᑎᕋᕐᓗᓯ qcap@qia.ca.
ᒪᑐᕕᔅᓴᖓ ᑐᔅᓯᕋᐅᑎᓄᑦ ᐊᒃᑑᕝᕙ 11, 2024 11:59 ᐅᓐᓄᐊᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ.
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐊᕋᓐ ᕙᓚᕋᑎ,
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᔾᔪᑎᓄᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
kflaherty@qia.ca
867.975. 8432 ᐅᕝᕙᓘᓐᓃᑦ
1.800.667.2742
