ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓯᕗᓪᓕᕐᐹᒥ ᑲᑎᒪᑎᑦᑎᔪᒻᒪᑕ ᑐᓵᔨᓂᑦ ᑐᑭᓕᐅᕆᔨᓪᓗ ᕖᕝᕗᐊᓕ 3-6, 2025ᖑᑎᓪᓗᒍ ᐃᖃᓗᓐᓂ.
ᑖᓐᓇ ᑲᑎᒪᓂᐅᓚᐅᖅᑐᖅ ᐊᕐᕌᒍᒥ ᐸᕐᓇᑕᐅᔪᒻᒪᑦ 55ᖑᓪᓗᑎᒃ ᑲᑎᒪᔭᖅᑐᕐᓯᒪᓚᐅᖅᑐᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᑦ. ᕌᕗᑦ ᒍᐊᑦ, ᖃᐅᔨᒪᔭᐅᑦᓯᐊᖅᑐᖅ ᐃᓅᓪᓗᓂ ᓄᓇᕕᒻᒥᐅᑦᓴᔭ, ᑲᑎᒪᑎᑦᑎᔪᔪᑦ ᐱᓇᓱᐊᕈᓯᓕᒫᖅ ᑲᑎᒪᓂᕐᒥ. ᕌᕗᑦ ᐃᖅᑲᓇᐃᔭᖅᑎ ᑲᒥᓯᓇᐅᑉ ᐊᓪᓚᕝᕕᐊᓂ ᓄᓇᖃᖅᑳᖅᑐᓄᑦ ᐅᖃᐅᓯᓕᕆᓂᕐᒧᑦ ᐋᑐᕚᒥ ᐊᒻᒪᓗ ᐊᑯᓂᐊᓗᒃ ᐃᖅᑲᓇᐃᔭᖃᑦᑕᕐᓯᒪᔪᑦ ᐅᖃᐅᓯᕐᒥᒃ ᐊᑐᖅᑕᐅᖏᓐᓇᖁᔨᓂᕐᒧᑦ.
ᕿᑭᖅᑕᓂᒃᑯᑦ ᑲᑎᒪᑎᑦᑎᒍᒪᖃᑦᑕᕐᓯᒪᒻᒪᑕ ᑐᕌᒐᖃᖅᑐᑎᒃ ᑐᑭᓯᒍᒪᓪᓗᑎᒃ ᖃᓄᐃᑦᑐᒥᒃ ᐊᑐᖃᑦᑕᕋᔅᓴᓂᑦ ᐊᒻᒪᓗ ᐃᑲᔪᖅᑕᐅᔾᔪᑎᖃᕆᐊᖃᕐᒪᖔᑕ ᑐᓵᔩᑦ ᑐᑭᓕᐅᕆᔩᓪᓗ ᐱᕙᓪᓕᐊᑦᑎᐊᖁᓪᓗᒋᑦ ᐃᖅᑲᓇᐃᔮᕆᕙᑦᑕᖓᓐᓂ. ᐊᒻᒪᓗᑦᑕᐅᖅ, ᑐᓵᔩᑦ ᑐᑭᓕᐅᕆᔩᓪᓗ ᐅᖃᐅᓯᖃᖃᑦᑕᕈᓐᓇᓂᐊᕐᖓᑕ ᐊᑐᖃᑦᑕᕐᓯᒪᔭᖏᓐᓂᒃ ᖃᐅᔨᒪᔭᖏᓐᓂᓪᓗ ᑲᑎᒪᖃᑎᖃᖅᑎᓪᓗᒋᑦ ᓄᑲᖅᑎᓂᑦ ᑕᒪᑐᒥᖓ ᐃᖅᑲᓇᐃᔮᖅᑖᐸᓪᓕᐊᔪᓂᑦ.
ᑲᑎᒪᓂᕐᒥ ᑲᑎᒪᔭᖅᑐᕐᓯᒪᔪᔪᑦ ᑐᓵᔩᑦ ᑐᑭᓕᐅᕆᔩᓪᓗ ᐊᔾᔨᒌᙱᑐᒡᒍᑎᓂᑦ ᐃᖅᑲᓇᐃᔮᖃᖃᑦᑕᕐᓯᒪᔪᑦ ᑐᖏᓕᕇᖑᓪᓗᑎᒃ, ᑐᓴᕋᔅᓴᓕᕆᔩᑦ ᓯᐱᓯᒃᑯᓐᓂᑦ ᐃᓄᒃᑎᑐᑦ ᐱᕙᓪᓕᐊᔪᕆᕙᑦᑐᑦ ᐊᒻᒪᓗ ᐃᓕᓐᓂᐊᖅᑏᑦ ᑐᓵᔨᐅᓂᕐᒥᒃ ᑐᑭᓕᐅᕆᔨᐅᓂᕐᒥᓪᓗ ᐃᓕᓐᓂᐊᖅᑐᑦ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒻᒥ.
ᑲᑎᒪᓂᖓᑦ ᐱᕕᖃᖅᑎᑦᑎᔪᔪᖅ ᐊᒻᒪᓗ ᑲᔪᖏᕐᓴᐅᑕᐅᔪᔪᖅ ᐃᓱᒪᕐᓱᑎᐊᕐᓗᑎᒃ ᐅᖃᐅᓯᖃᖃᑦᑕᕈᓐᓇᖁᓪᓗᒋᑦ ᐋᖅᑭᔅᓱᐃᓂᕐᒧᑦ ᐃᓄᒃᑎᑑᖓᔪᓂᑦ ᐅᖃᐅᓰᑦ ᑐᑭᖏᓐᓂᒃ, ᐊᑐᖅᑕᐅᖃᑦᑕᕈᓐᓇᖅᑐᓂᑦ ᓄᐊᑦᑎᖃᑦᑕᓂᕐᒥᒃ ᐊᒻᒪᓗ ᑐᑭᓯᑎᑦᑎᓂᕐᒥᒃ ᐊᒻᒪᓗ ᐃᑲᔪᕐᓯᕆᐊᕈᑎᖃᕐᓂᕐᒥᒃ ᐊᐳᖅᑕᕈᑕᐅᕙᑦᑐᓄᑦ ᓇᓗᓇᙱᑦᑐᓄᑦ ᑕᒪᒃᑯᓇᙵᑦ ᑎᒥᐅᔪᓂᑦ, ᒐᕙᒪᒃᑯᓐᓂᑦ ᐊᒻᒪᓗ ᐃᖅᑲᓇᐃᔭᖅᑎᑕᐅᕙᑦᑐᓂᑦ ᓴᓇᖁᔨᓪᓗᑎᒃ ᐅᖃᐅᓰᑦ ᑐᑭᖏᓐᓂᒃ.
ᐅᓂᒃᑳᕆᐊᖅᑐᕐᓯᒪᖃᑦᑕᓚᐅᖅᑐᑦ ᐅᑯᐊ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ, ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓯᓇ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐱᕈᕐᕕᒃᑯᑦ ᖃᐃᖁᔭᐅᓯᒪᓪᓗᑎᒃ ᐅᓂᒃᑳᕆᐊᖅᑐᖁᔭᐅᓪᓗᑎᒃ ᑲᑎᒪᓂᕐᒧᑦ, ᐊᒻᒪᓗ ᐅᖃᐅᓯᖃᖃᑦᑕᓚᐅᖅᑐᑦ ᐃᖅᑲᓇᐃᔮᕆᕙᑦᑕᖏᓐᓂᒃ ᐅᖃᐅᓯᕐᒥᒃ ᐊᑐᖅᑕᐅᖏᓐᓇᖁᔨᓪᓗᑎᒃ ᐊᒻᒪᓗ ᐊᑐᖅᑕᐅᑎᑦᑎᒋᐊᒃᑲᓐᓂᖃᑦᑕᓂᕐᒥᒃ. ᑕᒪᒃᑯᐊ ᑐᑭᓯᒃᑲᓐᓂᕈᑕᐅᔪᔪᑦ ᐅᖃᐅᓯᓕᕆᓂᕐᒧᑦ ᑎᒥᐅᔪᓂᑦ ᕿᑭᖅᑕᓂ ᐊᒻᒪᓗ ᓇᒧᑦ ᐅᖃᖃᑦᑕᕈᓐᓇᕐᒪᖔᑕ ᐊᐱᖅᑯᑎᔅᓴᓕᑦᑕᖃᖅᑲᑦ ᐅᕝᕙᓘᓐᓃᑦ ᐃᑲᔪᖅᑎᔅᓴᐃᓕᕿᔪᖃᖅᑲᑦ.
ᑎᓴᒪᓂᑦ (4) ᐅᓪᓗᓂᑦ ᑲᑎᒪᑎᓪᓗᒋᑦ, ᑲᑎᒪᔭᖅᑐᕐᓯᒪᔪᑦ ᐅᖃᐅᓯᖃᖃᑦᑕᔪᔪᑦ ᖃᓄᑎᒋᒃ ᖁᔭᓕᑎᒋᒻᒪᖔᑕ ᑕᐃᒫᒃ ᑲᑎᒪᖃᑕᐅᔭᕆᐊᔅᓴᖅ ᐅᖃᐅᓯᖃᖃᑦᑕᕈᓐᓇᓚᐅᕐᖓᑕ ᐊᑐᕐᓯᒪᔭᖏᓐᓂᒃ, ᐅᖃᐅᓰᑦ ᑐᑭᖏᓐᓂᒃ ᓴᓇᒋᐊᖃᕐᓂᖏᓐᓂᒃ ᐊᒻᒪᓗ ᖃᓄᖅ ᐃᑉᐱᒋᖃᑦᑕᐅᑎᑦᑎᐊᕈᓐᓇᕐᒪᖔᑕ ᐊᒻᒪᓗ ᓇᒻᒥᓂᖅ ᐱᔭᕆᐊᑐᔪᓂᑦ ᑲᑎᒪᔪᓃᓚᐅᖅᑎᓪᓗᒋᑦ ᐊᒻᒪᓗ ᐱᔭᕆᐊᑐᔪᓂᑦ ᑲᑎᒪᒍᑎᓕᓐᓃᖃᑦᑕᑎᓪᓗᒋᑦ. ᐃᓱᒪᖃᑦᑎᐊᓂᕐᒧᑦ ᐊᒻᒪᓗ ᐃᑉᐱᓐᓂᐊᓂᒃᑯᑦ ᐃᑲᔪᖅᑎᖃᕆᐊᖃᕐᓂᖅ ᐱᒻᒪᕆᐅᓂᕐᐹᖑᒻᒪᑦ ᑕᐃᒫᒃ ᐃᖅᑲᓇᐃᔮᖃᕐᐸᑦᑐᓂ − ᑐᑭᓯᔪᔪᒍᑦ ᐱᔭᕆᐊᑐᔪᓂᑦ ᑲᑎᒪᒍᑎᓕᓐᓃᖃᑦᑕᖅᑐᓂ ᐅᕙᑦᑎᑎᒎᑐᐃᓐᓇᖃᑦᑕᖏᒻᒪᑕ ᑐᑭᓕᐅᕆᔨᐅᑎᓪᓗᑕ ᑭᓯᐊᓂᓕ ᐊᑦᑐᐃᓲᖑᒻᒥᒻᒪᑕ ᐊᒻᒪᓗ ᓇᒻᒥᓂᖅ ᐃᓅᓯᖏᓐᓄᑦ ᐊᑑᑎᓲᖑᓪᓗᑎᒃ. ᖃᓄᖅ ᐊᓂᒍᐃᖃᑦᑕᕐᓯᒪᒻᒪᖔᑕ ᐱᔭᕆᐊᑐᔪᓂᑦ ᐊᒻᒪᓗ ᐊᑐᕐᓯᒪᔭᖏᓐᓂᒃ ᐅᖃᐅᓯᖃᖃᑦᑕᔪᔪᑦ, ᑕᒪᓐᓇ ᐱᕚᓪᓕᐅᑕᐅᖁᓪᓗᒍ ᐃᓕᓐᓂᐊᖅᑎᓄᑦ ᐊᓯᖏᓐᓄᓪᓗ ᑕᒪᑐᒥᖓ ᐃᖅᑲᓇᐃᔮᖃᕐᐸᑦᑐᓄᑦ ᐃᓄᑑᔾᔨᒐᔪᖃᑦᑕᖅᑐᓄᑦ.
ᑖᓐᓇ ᑲᑎᒪᓂᖅ ᐃᑲᔫᑎᖃᔪᒻᒥᔪᖅ ᐃᓕᓐᓂᐊᖅᑎᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑐᓄᑦ, ᐊᐱᕐᓱᖃᑦᑕᔪᔪᑦ ᐅᕝᕙᓘᓐᓃᑦ ᑐᑭᓯᒃᑲᓐᓂᖃᑦᑕᔪᔪᑦ ᐊᑐᖅᑕᐅᓯᒪᔪᓂᑦ ᑐᓵᔨᐅᓕᒪᔪᓂᑦ ᑐᑭᓕᐅᕆᔨᐅᓕᒪᔪᓂᓪᓗ.
ᑐᓵᔩᑦ ᑐᑭᓕᐅᕆᔩᓪᓗ ᐊᑑᑎᖃᓪᓚᕆᑦᑐᒥᒃ ᐃᖅᑲᓇᐃᔮᖃᕐᐸᒻᒪᑕ ᑐᓴᐅᒪᖃᑦᑕᐅᑎᖃᑦᑕᓂᕐᒥᒃ ᐊᒻᒪᓗ ᐋᖅᑭᔅᓱᐃᖃᑕᐅᓯᒪᓪᓗᑎᒃ ᐃᑲᔪᖅᑎᒋᔭᐅᓪᓗᑎᒃ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᒻᒪᓗ ᒐᕙᒪᒃᑯᓐᓂᑦ ᐃᖅᑲᓇᐃᔭᕐᕕᓕᒫᓂᑦ.
ᐱᒻᒪᕆᐅᓂᕐᐹᒥᒃ ᐊᑑᑎᖃᓪᓚᕆᑦᑐᒥᓪᓗ ᐃᖅᑲᓇᐃᔮᖃᕐᐸᑦᑐᑦ ᑐᑭᓕᐅᕆᔨᐅᕙᑦᑐᓄᑦ ᐊᒻᒪᓗ ᓯᕗᓕᖅᑎᐅᕙᑐᓄᑦ, ᐋᓐᓂᐊᖅᑐᓕᕆᔨᓄᑦ ᐊᒻᒪᓗ ᐊᒥᓱᓄᑦ ᐊᓯᖏᓐᓄᑦ ᑐᙵᕕᖃᕐᐸᑦᑐᓄᑦ ᑕᒪᒃᑯᓂᖓ ᑐᑭᓕᐅᕆᕙᑦᑐᑎᒃ ᑐᑭᓯᓯᒪᒍᑕᐅᒋᐊᓕᓐᓂᑦ ᐃᓄᑦᑎᑐᐃᓐᓇᖅ ᐅᖃᐅᓯᓕᓐᓄᑦ ᐃᓄᓐᓄᑦ ᑐᑭᓯᐊᔭᐅᒐᔭᙱᑦᑐᓂᑦ.
ᑖᓐᓇ ᓯᕗᓪᓕᕐᐹᒥ ᕿᑭᖅᑕᓂᒃᑯᑎᒍᑦ ᑐᓵᔨᓂᑦ ᑐᑭᓕᐅᕆᔨᓂᑦ ᑲᑎᒪᑎᑦᑎᒍᑕᐅᓚᐅᕋᓗᐊᖅᑎᓪᓗᒍ, ᑐᑭᓯᓇᕐᓯᔪᔪᖅ ᑕᐃᒫᒃ ᑲᑎᒪᒃᑲᓐᓂᖃᑦᑕᕆᐊᖃᕐᓂᖏᓐᓂᒃ ᐱᒻᒪᕆᐅᒻᒪᑦ ᐊᒻᒪᓗ ᑕᐃᒫᒃ ᑲᑎᒪᖃᑦᑕᕆᐊᖃᖅᑐᑎᒃ. ᐃᑲᔪᒃᑲᓐᓂᖃᑦᑕᕈᑦᑕ ᑐᓵᔨᓂᑦ ᑐᑭᓕᐅᕆᔨᓂᑦ ᒫᓐᓇ ᑐᓵᔨᒋᕙᑦᑕᑎᓐᓂᒃ, ᑐᑭᓯᒃᑲᓐᓂᖃᑦᑕᓂᐊᖅᑐᒍᑦ ᐊᒻᒪᓗ ᐃᑲᔪᖃᑦᑕᕈᓐᓇᓂᐊᖅᑐᒍᑦ ᑐᓵᔨᓂᑦ ᑐᑭᓕᐅᕆᔨᓂᓪᓗ ᓯᕗᓂᔅᓴᑎᓐᓂ.
