ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐊᑎᓕᖅᑕᐅᔪᖅ
ᒫᑦᓯ 5, 2025 (ᐃᖃᓗᐃᑦ, ᓄᓇᕗᑦ) − ᐅᓪᓗᒥ, ᒪᓕᒐᓕᐅᖅᑎ ᒫᒡᒍᓚ ᓇᑲᓱᒃ, ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ, ᐊᒻᒪ ᐅᓛᔪᒃ ᐊᑭᓱᒃ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ (QIA), ᐊᑎᓕᐅᖅᑐᑦ ᑎᑎᕋᖅᓯᒪᔪᓂᑦ ᑐᑭᓯᐅᒪᖃᑦᑕᐅᑎᓂᕐᒧᑦ ᐃᑲᔪᖅᑐᐃᔪᒥᒃ, ᐊᖅᑯᓯᐅᕆᓪᓗᑎᑦ ᐱᓕᕆᖃᑎᒌᓐᓂᔅᓴᒥᑦ ᐱᓕᒻᒪᒃᓴᖅᑕᐅᓗᑎᑦ ᐊᒻᒪᓗ ᖃᐅᔨᓴᕐᓂᕐᒧᑦ ᑐᑭᓯᓇᓱᐊᕐᓂᕐᒥᑦ ᖁᑦᑎᑦᑐᒦᑦᑐᓂᑦ ᐅᑭᐅᖅᑕᖅᑐᒥᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖓ ᐃᓪᓗᓕᐅᕐᖓᑕ ᖃᐅᔨᓴᕐᕕᒻᒥᑦ ᐱᓕᒻᒪᒃᓴᕐᕕᒻᒥ ᒥᑦᑎᒪᑕᓕᒻᒥ, ᑖᓐᓇ ᐱᔭᕇᖅᑕᐅᕕᔅᓴᖃᖅᑐᖅ 2026-ᒥ. ᑖᓐᓇ ᖃᐅᔨᓴᕐᕕᔅᓴᐅᔪᖅ ᓯᕗᓪᓕᐹᖑᓂᐊᖅᑐᖅ ᑕᐃᒪᐃᑦᑐᓂᑦ ᓴᓇᔭᐅᔪᒥᒃ ᖁᑦᑎᖅᑐᒥᑦ ᐅᑭᐅᖅᑕᖅᑐᒦᑦᑐᓂ ᐊᒻᒪᓗ ᑖᓐᓇ ᑐᕌᒐᖃᖅᑎᑕᐅᔪᖅ ᐃᓕᓐᓂᐊᕐᓂᕐᒥᑦ ᐊᒻᒪᓗ ᐱᓕᒻᒪᒃᓴᕐᓂᕐᒥᑦ ᐱᔭᕆᐊᑭᓪᓕᑎᕆᔾᔪᑕᐅᓪᓗᓂ ᐃᓄᐃᑦ ᓄᓇᖓᓐᓂ. ᑖᓐᓇ ᖃᐅᔨᓴᕐᕕᐅᔪᖅ ᐱᒋᐊᕈᑕᐅᔪᖅ ᐃᓄᓐᓂᑦ ᐃᓚᐅᖃᑕᐅᔪᓐᓇᕐᓂᖅᓴᐅᓕᖁᓪᓗᒋᑦ ᐃᖅᑲᓇᐃᔮᔅᓴᓂᑦ ᐱᖃᑕᐅᔪᓐᓇᖅᓯᓂᖅᓴᓗᓂ, ᐃᓂᔅᓴᖃᖅᑎᑕᐅᓗᑎᑦ ᑲᑐᔾᔨᖃᑎᒌᑦ ᐊᒻᒪᓗ ᐃᓕᓐᓂᐊᕐᕕᐅᔪᑦ ᐃᓄᓐᓂᑦ ᐃᓚᐅᑎᑦᑎᓂᖅᓴᐅᔪᓐᓇᖅᓯᖁᓪᓗᒋᑦ ᐊᔾᔨᒌᙱᑦᑐᓂ ᐊᒻᒪᓗ ᐊᓯᔾᔨᖅᐸᓪᓕᐊᕙᒃᑐᓂᓗ ᑮᓇᐅᔭᓕᐅᕋᓱᐊᕐᓂᕐᒧᑦ.
ᐱᓕᕆᖃᑎᒋᓪᓗᒋᑦ ᓄᓇᕗᑦ ᓯᓚᑦᑐᖅᓴᕐᕕᒃᖓ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐋᖅᑭᔅᓱᐃᓚᐅᖅᑐᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒧᑦ ᕿᒥᕐᕈᒍᓐᓇᖁᓪᓗᒋᑦ ᖃᓄᖅᑑᕈᑎᖃᕈᓐᓇᕐᓗᑎᑦ ᐃᓕᓐᓂᐊᖅᑎᑦᑎᖃᑦᑕᕈᓐᓇᖁᓪᓗᒋᑦ ᓄᑖᒥᑦ ᑖᔅᓱᖓ ᖃᐅᔨᓴᕐᕕᔅᓴᒥᑦ. ᑖᓐᓇ ᐊᖏᖃᑎᒌᒍᑕᐅᔪᖅ ᑐᑦᑕᕕᑖᖑᒐᔭᖅᑐᖅ ᐱᓕᒻᒪᒃᓴᕕᔅᓴᐅᓗᓂ ᐊᒻᒪᓗ ᐊᔪᕈᓐᓃᖅᓴᕐᓂᕐᒧᑦ ᑕᒪᒃᑯᓂᖓ ᓲᕐᓗ ᐸᐸᑦᑎᑦᑎᐊᕐᓂᕐᒥᑦ ᑮᓇᐅᔭᓕᕈᑎᔅᓴᓂᑦ, ᐃᓄᐃᑦ ᐊᐅᓚᑦᑎᕝᕕᖃᕐᓗᑎᑦ, ᐅᔭᕋᓐᓂᕐᓂᕐᒥᑦ, ᐃᓄᐃᑦ ᖃᐅᔨᒪᔭᑐᖃᖏᑎᒍᑦ, ᐊᒻᒪᓗᓗ ᖃᐅᔨᓴᕐᓂᕐᒥᑦ. ᑕᕝᕘᓇ ᑲᑐᔾᔨᓂᒃᑯᑦ, ᓂᕆᐅᒋᔭᐅᔪᖅ ᑖᓐᓇ ᖃᐅᔨᓴᕐᕕᔅᓴᐅᔪᖅ ᐃᓕᓐᓂᐊᖅᑎᑦᑎᕕᐅᔪᓐᓇᖁᓪᓗᒍ ᓯᓚᑦᑐᓴᕐᕕᔾᔪᐊᕐᒥᑦ ᐃᓕᓐᓂᐊᖅᑕᐅᖃᑦᑕᖅᑐᑦ ᐊᔾᔨᖏᓐᓂᑦ ᐃᓕᓐᓂᐊᖅᑎᑦᑎᕕᐅᒍᓐᓇᖁᓪᓗᒍ ᐱᓕᒻᒪᒃᓴᖅᑎᑦᑎᓂᕐᒥᑦ ᐃᒻᒥᒃᑰᖅᑎᖓᔪᓂᑦ ᓲᕐᓗ ᓴᓇᔪᓕᕆᓂᕐᒥᑦ, ᐊᕙᑎᓕᕆᓂᕐᒧᑦ ᐊᐅᓚᑦᑎᓂᕐᒥᑦ, ᐊᓪᓚᕝᕕᓕᕆᓂᕐᒥᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒥᓪᓗ.
ᐱᓕᕆᖃᑎᒋᓗᒋᑦ ᓄᓇᕗᒻᒥ ᓯᓚᑦᑐᖅᓴᕐᕕᒃ ᐱᒋᐊᕐᕕᐅᔪᖅ ᑖᒃᑯᓂᖓ ᖁᕕᐊᓇᒻᒪᕆᑦᑐᓂᑦ ᐱᕕᔅᓴᖃᖅᑖᖅᑎᑕᐅᓂᕐᒥᑦ ᑖᒃᑯᐊ ᐃᓂᖃᑦᑎᐊᖁᓪᓗᒋᑦ ᐃᓕᓐᓂᐊᖅᑎᑦᑎᓂᕐᒥᑦ, ᐊᔪᕈᓐᓃᖅᓴᖅᑎᑦᑎᓂᕐᒥᑦ, ᐊᒻᒪᓗ ᓯᕗᓂᔅᓴᖃᑦᑎᐊᖅᑎᑦᑎᓂᕐᒥᑦ ᐃᓄᓐᓂᑦ.
“ᑖᓐᓇ ᑲᑐᔾᔨᓗᑕ ᐱᓕᕆᐊᔅᓴᖅ ᑕᐅᑐᒐᖅᑖᖅᑎᑦᑎᓯᒪᒻᒪᑦ ᓄᓇᕗᑦ ᒐᕙᒪᒃᑯᖏᓐᓂ ᐱᓕᕆᐊᖃᕐᓂᕐᒥᑦ ᐊᐅᓚᔾᔭᒋᐊᖃᑎᖃᕐᓂᕐᒥᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᐃᓕᓐᓂᐊᖅᑐᓕᕆᓂᕐᒥᓪᓗ,” ᐅᖃᖅᑐᖅ ᒫᒡᒍᓚ ᓇᑲᓱᒃ, ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᖓᓐᓂ. “ᑖᓐᓇ ᐊᑎᓕᐅᖅᑕᐅᓂᖓ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐊᒃᓱᐊᓗᒃ ᐃᑲᔪᕐᓂᖃᕐᒪᑦ ᑖᒃᑯᓄᖓ ᐱᓇᓱᐊᕐᓂᐅᔪᓄᑦ. ᑖᓐᓇ ᑐᕌᒐᕆᔭᖓ ᐱᓇᓱᐊᕐᓂᕆᔭᑦᑕ ᐊᔾᔨᙱᒃᑲᓗᐊᖅᑎᓪᓗᓂᐅᒃ, ᑭᓯᐊᓂ ᑖᒃᑯᐊ ᖃᓕᕇᓕᖅᑎᓯᒪᒻᒪᑎᒃ ᐃᑲᔪᖅᑐᐃᓂᕐᒥᑦ ᐱᓕᒻᒪᒃᓴᕐᓂᕐᒥᑦ ᐊᒻᒪᓗ ᐃᓐᓂᐊᕐᓂᔅᓴᖏᓐᓄᑦ ᐃᓄᐃᑦ, ᐃᓚᐅᖃᑕᐅᔪᓐᓇᖃᑦᑕᖁᓪᓗᒋᑦ ᓄᓇᕗᒻᒥ ᐱᕙᓪᓕᐊᑎᑦᑎᓂᕐᒥᑦ. ᓂᕆᐅᒃᐳᖓ ᑕᑯᔭᕆᐊᒃᓴᖅ ᑖᒃᑯᓂᖓ ᐊᒃᓱᕉᑕᐅᔪᓂᑦ ᐊᓂᒍᐃᔪᓂᑦ ᓯᕗᓂᒃᓴᑦᑎᓐᓂᑦ.”
“ᑕᐅᑐᒐᕆᔭᕗᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᑦ ᐃᓄᓐᓂᑦ ᐊᔪᕈᓐᓃᖅᐸᓪᓕᐊᑎᑦᑎᓂᕐᒥᑦ ᐃᖅᑲᓇᐃᔭᕈᓐᓇᖅᓯᑎᑦᑎᕙᓪᓕᐊᓂᕐᒥᑦ, ᐃᓕᓐᓂᐊᕋᔅᓴᐅᔪᓂᑦ ᐊᑐᐃᓐᓇᖃᕆᐊᒃᑲᓐᓂᖅᑎᑦᑎᓂᒃᑯᑦ ᐊᒻᒪᓗ ᖃᓂᓐᓂᖅᓴᐅᓗᑎᑦ ᓄᓇᓕᒋᔭᑦᑎᓐᓄᑦ,” ᐅᖃᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐅᓛᔪᒃ ᐊᑭᓱᒃ. “ᐱᔪᒫᕆᓪᓚᕆᑦᑕᕗᑦ ᐃᒫᒃ ᓯᓚᑦᑐᓴᕐᕕᔾᔪᐊᒻᒥ−ᐃᓕᓐᓂᐊᕈᑎᒥᑦ ᐊᑐᐃᓇᖅᑕᖃᓕᖁᓪᓗᒍ ᐃᓄᓐᓄᑦ ᑕᒫᓂ ᓄᓇᖓᓐᓃᑦᑐᒥ ᐊᒻᒪᓗ ᓇᔪᖅᑕᖓᓐᓂᒃ ᐊᑦᑐᓂᖃᑦᑎᐊᕐᓗᓂ ᓇᔪᒐᕆᖃᑦᑕᖅᑕᖏᓐᓂᒃ. ᐊᔅᓱᕈᐊᕆᓯᒪᐃᓐᓇᖅᑕᕗᑦ ᑖᓐᓇ ᑕᑯᔪᓐᓇᖅᓯᒍᒪᓪᓗᑎᒍ ᐃᓪᓗᒃ ᓴᓇᔭᐅᓂᔅᓴᖓ ᐊᒻᒪᓗ ᒫᓐᓇ ᐃᓇᑦᑎᓕᖅᐳᒍᑦ ᐱᓕᕆᕝᕕᖃᖅᑎᐅᔪᓂᑦ ᐊᒻᒪᓗ ᐃᓕᓐᓂᐊᕐᕕᐅᔪᓂᑦ ᐱᓕᕆᖃᑕᐅᓕᖁᓪᓗᒋᑦ ᐅᕙᑦᑎᓐᓂ ᐃᓕᓐᓂᐊᕐᕕᔅᓴᒥᑦ ᑐᕌᖓᓂᖃᖅᑐᒥᒃ ᖃᐅᔨᓴᕐᓂᕐᒥᑦ ᐱᓕᒻᒪᒃᓴᕐᓂᕐᒥᓪᓗ. ᑖᓐᓇ ᐱᒋᐊᕈᑎᑐᐃᓐᓇᖅ ᐊᒻᒪᓗ ᐊᓯᒃᑲᓐᓂᖏᓐᓂᑦ ᐱᓕᕆᐊᕆᔪᓐᓇᓛᖅᑕᕗᑦ ᓱᓕ ᑕᐃᒪ ᖁᕕᐊᓇᖅᑐᑦ.”
ᑖᓐᓇ ᖃᐅᔨᓴᕐᕕᔅᓴᖅ ᐱᓕᒻᒪᒃᓴᕐᕕᒃ $34-ᒥᓕᐊᓐ ᑮᓇᐅᔭᓂᑦ ᐊᑭᖃᖅᑐᖅ ᐱᓕᕆᐊᔅᓴᖅ ᑮᓇᐅᔭᖃᖅᑎᑕᐅᓂᒃᑯᑦ ᓄᓘᔮᓂᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓄᑦ ᐃᑲᔫᖅᑕᐅᔾᔪᑎᒃᓴᖏᓄᓪᓗ ᐊᖏᕈᑎᖓᑎᒍᑦ, ᐊᒻᒪᓗ ᐃᓄᓐᓅᖓᔪᑦ ᐱᖁᑎᕐᔪᐊᕐᓄᑦ ᑮᓇᐅᔭᖅᑖᕈᓯᐊᑦ ᑐᓂᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓂ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂ.
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑭᐅᕋᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑎᒌᑦᑎᐊᕐᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
(P) 867-975-8398 (TF) 1-800-667-2742
kflaherty@qia.ca
ᓵᓚᑦ ᔫᒥ
ᐊᐅᓚᑦᑎᔨ ᓂᐅᕐᕈᑎᔅᓴᓕᕆᓂᕐᒧᑦ
ᓄᓇᕗᑦ ᓯᓚᑦᑐᖅᓴᕐᕕᒃ
(P) 867-975-7275
Charlotte.joamie@arcticcollege.ca
