ᐃᖃᓗᐃᑦ, ᓄᓇᕗᑦ – ᔪᓚᐃ 6, 2017 – ᑖᒃᑯᐊ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᒃᑎᓕᒫᖏᑦ ᑐᑭᑖᖅᑎᑦᑎᓚᐅᕐᒪᑕ ᐃᑲᔪᖅᑐᐃᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ, ᑮᓇᐅᔭᓕᐅᖅᑎᐅᓐᖏᖦᖢᑎᒃ ᑲᑐᔾᔨᖃᑎᒌᖑᔪᒧᑦ ᑭᒡᒐᖅᑐᐃᓲᖑᓪᓗᑎᒃ 14,000ᕈᔪᖕᓂ ᐃᓄᖕᓂᑦ ᕿᑭᖅᑖᓗᖕᒥ, ᓄᓇᕗᒥ.  ᑖᒃᑯᐊ ᕿᑭᖅᑕᓃᒃᑯᑦ ᑎᒃᑯᐊᖅᑕᐅᓯᒪᓪᓗᑎᒃ ᑎᒥᖁᑎᒋᔭᐅᔪᑦ ᒪᓕᒃᖢᒍ ᓄᓇᕗᒥ ᐊᖏᕈᑎᖓ ᑖᓐᓇᓗ ᐊᖏᕈᑎ ᐊᐅᓚᑦᑎᓪᓗᓂ ᐃᓄᐃᑦ ᓄᓇᖁᑎᖏᓐᓂᒃ ᓄᓇᕗᒥ, ᐃᓚᒋᓪᓗᒍ ᕿᑭᖅᑖᓗᖕᒥ.

ᑖᒃᑯᐊ ᓈᓚᒃᑏᑦ ᓇᓗᓇᐃᖅᓯᓚᐅᖅᑐᑦ ᑖᒃᑯᐊᒎᖅ ᐸᕕᓐᓛᓐᑯᑦ, ᑲᓇᑕᒥᐅᖑᓪᓗᑎᒃ ᑲᒻᐸᓂᕆᔭᐅᔪᑦ, ᐊᐅᓚᑦᑎᓪᓗᑎᒃ ᓄᓘᔮᑦ ᐱᓕᕆᐊᖓᓂᑦ, ᐅᔭᕋᕐᓂᐊᖅᖢᑎᒃ ᓴᕕᕋᔭᒃᓴᒥ ᕿᑭᖅᑖᓗᖕᒥ, ᐊᑭᓕᒃᓴᖃᕐᒪᑕᒎᖅ ᕿᑭᖅᑕᓃᒃᑯᓐᓄᑦ ᑮᓇᐅᔭᓂᒃ $7.3ᒥᓕᔭᓂ.

“ᑲᑎᓪᓗᒋᑦ ᑮᓇᐅᔭᐃᑦ ᐊᑮᑦᑐᕆᔭᐅᔪᑦ ᔪᓂ 30, 2017ᒥᑦ ᐋᖅᑭᒋᐊᖅᑕᐅᓯᒪᓕᖅᑎᓪᓗᒋᑦ ᐊᑭᑦᑐᕆᐊᕈᑎᓂᒃ, ᕿᑐᕐᖏᐅᕈᑎᓂᒃ ᐊᒻᒪᓗ ᓂᖏᖅᑕᐅᓂᕐᒧᑦ ᐊᑭᓕᖅᑕᐅᒋᐊᖃᖅᑐᓄᑦ $7,265,442.74ᖑᔪᑦ” ᓈᓚᒃᑏᑦ ᓇᓗᓇᐃᓚᐅᖅᑕᖓᓂᒃ ᑎᑎᖅᑲᑎᒍᑦ ᑐᑭᑖᕈᑎᒋᔭᖓᓂᑦ.

ᑖᓐᓇ ᑎᑎᖅᑲᑎᒍᑦ ᑐᑭᑖᕈᑎᒋᔭᐅᔪᖅ ᑕᑯᔭᐅᔪᓐᓇᖅᓯᔪᖅ ᑭᓇᒃᑯᑐᐃᓐᓇᕐᓄᑦ ᕿᑭᖅᑕᓃᒃᑯᑦ ᐃᑭᐊᖅᑭᕕᖓᓂ ᐅᕙᓂ qia.ca. ᑕᐃᒃᑯᐊ ᐃᓄᒃᑎᑑᖅᑐᑦ ᑐᑭᑖᕈᑎᒋᔭᐅᓯᒪᔪᒥ ᐊᑐᐃᓐᓇᐅᑎᑕᐅᓛᖅᑐᑦ ᐊᑯᓂᐅᓐᖏᑦᑐᒥ.

ᐱᔾᔪᑎᒋᔭᐅᓚᐅᖅᑐᖅ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᒃᑎᓅᖅᑕᐅᒋᐊᖃᕐᓂᖓᑦ ᑐᑭᓕᐅᖅᑕᐅᓯᒪᓂᕆᔭᖓᑦ ᑖᓐᓇ ᓯᑎᐱᕆ 6, 2013ᒥ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐱᕚᓪᓕᕈᑎᒃᓴᖏᓐᓂᒃ ᐊᖏᕈᑎᖓ ᓄᓘᔮᑦ ᐱᓕᕆᐊᖓᓄᑦ, ᐊᒻᒪᓗ ᓇᓗᓇᐃᖅᑕᐅᓗᓂ ᖃᔅᓯᐅᔪᓂᒃ ᐊᑭᓕᕆᐊᖃᕐᒪᖔᑖᒃ ᓯᕗᓂᖓᓂᒃ ᐊᑭᓕᖅᑕᐅᓂᐊᓚᐅᖅᑐᓄᑦ ᕿᑭᖅᑕᓃᒃᑯᓐᓄᑦ ᒪᓕᒃᖢᒍ ᐊᖏᕈᑎᒋᔭᐅᓯᒪᔪᑦ.

“ᖁᕕᐊᓱᒃᑐᖓ ᑖᒃᑯᐊ ᓈᓚᒃᑏᑦ ᓇᓗᓇᐃᖅᓯᓚᐅᕐᓂᖏᓐᓂᒃ ᑐᑭᓕᐅᖅᓯᒪᔭᑦᑎᓐᓂᒃ ᐊᖏᕈᑎᒥᒃ; ᐊᖏᖃᑎᒌᒍᑎᒋᔭᐅᔪᑦ ᐃᓄᖕᓄᑦ ᑲᔪᓯᑎᑕᐅᑦᑎᐊᕆᐊᖃᕐᒪᑕ ᑲᒻᐸᓂᐅᔪᓄᑦ ᐃᖅᑲᓇᐃᔭᖃᑎᖃᕈᒪᔪᓄᑦ ᐅᕙᑦᑎᓐᓂ, “ ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ.

“ᑖᒃᑯᐊ ᐃᓄᐃᑦ ᑮᓇᐅᔭᖁᑎᒋᖕᒪᒋᑦ ᐊᑐᖅᑕᐅᓛᖅᑐᓄᑦ ᓄᓇᓕᖕᒥᐅᓄᑦ ᑭᖑᕚᕆᔭᐅᓛᖅᑐᓄᓪᓗ.”

ᑖᓐᓇ ᓇᓗᓇᐃᖅᑕᐅᓂᕆᔭᖓᑦ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᒃᑎᓄᑦ ᑮᓇᐅᔭᑎᒍᑦ ᐊᒃᑐᐃᓂᖃᕐᓂᐊᕐᒪᑦ ᐃᓄᖕᓄᑦ ᐱᓪᓗᒍ ᑖᒃᑯᐊ ᑮᓇᐅᔭᐃᑦ ᐃᓕᔭᐅᓂᐊᕐᒪᑕ ᑕᐃᒃᑯᓄᖓ  ᑮᓇᐅᔭᓄᑦ ᑐᖅᑯᖅᑕᐅᓯᒪᔪᓄᑦ.  ᑖᒃᑯᐊ ᑮᓇᐅᔭᐃᑦ ᑐᖅᑯᖅᑕᐅᓯᒪᔪᑦ ᓇᓗᓇᐃᔭᖅᑕᐅᓲᖑᖕᒪᑕ ᖃᔅᓯᐅᔪᓂᒃ ᑮᓇᐅᔭᓂᒃ ᐊᑐᕈᓐᓇᕐᒪᖔᑖᒃ ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᖁᑎᖏᓐᓅᖅᑕᐅᓇᔭᖅᑐᓂᒃ.  ᑮᓇᐅᔭᐃᑦ ᑐᓂᔭᐅᓯᒪᓕᖅᑎᓪᓗᒋᑦ, ᑖᒃᑯᐊ $7.3 ᒥᓕᔭᓐᖑᔪᑦ ᐊᖏᓪᓕᖅᑎᑦᑎᓂᐊᕐᒪᑦ ᑮᓇᐅᔭᓂᒃ ᐊᑐᖅᑕᐅᔪᓐᓇᕐᓂᐊᖅᑐᓄᑦ ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓂ.

“ᑖᒃᑯᐊ ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᑦ ᐊᑐᖅᑕᐅᖃᑦᑕᕐᓂᐊᖅᑐᑦ ᐃᑲᔪᕈᑎᒋᔭᐅᓗᑎᒃ ᐊᔾᔨᒌᓐᖏᑦᑐᓂᒃ ᐱᓕᕆᐊᒃᓴᓄᑦ ᐃᓅᓯᕐᓄᑦ ᐱᕙᓪᓕᐊᔾᔪᑎᒃᓴᓄᑦ ᐃᓚᒋᓗᒋᑦ ᐅᖃᐅᓯᓕᕆᓂᕐᒥᒃ ᐃᓕᖅᑯᓯᓕᕆᓂᕐᒥᓪᓗ, ᐃᓅᓯᓕᕆᔨᐅᓂᕐᒧᑦ ᐃᓕᓐᓂᐊᖅᑎᑦᑎᓂᕐᒥᒃ, ᓄᓇᓕᖕᓂ ᐊᒻᒪᓗ ᖃᕋᓴᐅᔭᒃᑰᕈᓐᓇᐅᑎᖃᖅᑎᑦᑎᓂᕐᒥᒃ ᐃᓄᐃᑦ ᐱᕙᓪᓕᐊᔪᖁᑎᒋᔭᖏᓐᓂᒃ, ᐃᓄᐃᑦ ᐱᐅᓯᐊᒍᑦ ᐃᓕᓐᓂᐊᖅᑎᑦᑎᓂᕐᒥᒃ, ᐃᓐᓇᕐᓂᑦ ᐃᓅᓱᒃᑐᓂᓪᓗ ᐱᓕᕆᐊᒃᓴᓄᑦ ᐊᒻᒪᓗ  ᓄᓇᓕᖕᒥᐅᑦ ᐊᖑᓇᓱᒋᐊᕐᓂᖏᑦ, “ ᓈᓚᒃᑏᑦ ᐅᖃᖅᑐᑦ ᑐᑭᑖᕈᑎᒋᔭᖓᓂᑦ.  “ᑖᒃᑯᐊ ᑮᓇᐅᔭᐃᑦ ᓯᕗᓂᖓᒍᑦ ᐊᑭᓕᖅᑕᐅᒋᐊᖃᓚᐅᖅᑐᖅ ᐃᓕᔭᐅᑦᓴᐃᓐᓇᕋᔭᖅᑐᑦ ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓄᑦ ᐊᒻᒪᓗ ᓇᓗᓇᐃᔭᕈᑎᒋᔭᐅᓗᑎᒃ ᑖᒃᑯᐊ ᑮᓇᐅᔭᐃᑦ ᐃᑲᔪᑦᓯᐊᕐᓂᐊᕐᓂᖏᑦ ᐃᓄᖕᓂᒃ ᑭᖑᕚᕆᔭᐅᓛᖅᑐᓄᓪᓗ.”

ᕿᑭᖅᑕᓃᒃᑯᑦ ᑐᓂᔭᐅᓯᒪᓕᖅᑐᑦ ᓈᓚᒃᑏᑦ ᑐᑭᑖᕈᑎᒋᔭᖓᓂᒃ ᑎᑎᖅᑲᑎᒍᑦ ᐊᒻᒪᓗ ᓱᓕ ᕿᒥᕐᕈᐃᓐᓇᖅᖢᑎᒃ ᑕᒪᑐᒥᖓ.  ᑕᐃᒪ ᕿᑭᖅᑕᓃᒃᑯᑦ ᑐᓂᓯᓛᖅᑐᑦ ᑎᑎᖅᑲᕐᒥ ᐱᔾᔪᑎᒋᓪᓗᒍ ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᓚᐅᖅᑐᓂᒃ ᓈᓚᖕᓂᖃᖅᑎᓪᓗᒋᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᑐᑭᓯᒋᐊᕐᕕᒃᓴᖅ:

ᓰᒪ ᓴᕼᐋ ᓯᐊᕋᕼᐃ, ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

867.975.8413 or 1.800.667.2742

szerehi@qia.ca  2017 – 07 – 06 – Decision on QIA Baffinald arbitration – WIN INUK