ᓇᐅᑦᑎᕐᓱᖅᑏᑦ ᐃᓄᐃᑦ
ᐃᔨᖏᑦ ᓯᐅᑎᖏᓪᓗ ᑕᓪᓗᕈᑎᐅᑉ ᐃᒪᖓᑕ
ᓇᐅᑦᑎᕐᓱᖅᑏᑦ, ᐅᕝᕙᓘᓐᓃᑦ ᐃᓄᐃᑦ ᐅᐊᑦᑎᔩᑦ, ᑖᒃᑯᐊ ᐃᔨᒋᔭᐅᒻᒪᑕ ᓯᐅᑎᒋᔭᐅᓪᓗᑎᓪᓗ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥ − ᓇᐅᑦᑎᕐᓱᑐᐃᓐᓇᖃᑦᑕᖏᑦᑐᑦ ᑕᒪᔅᓱᒥᖓ ᑭᓯᐊᓂᓕ ᐊᖑᓇᓱᖃᑦᑕᕐᒥᔪᑦ ᐃᑲᔫᑎᒋᓂᐊᖅᑕᖏᓐᓂᒃ ᓄᓇᖅᑲᑎᖏᓐᓄᑦ. ᑕᓪᓗᕈᑎᐅᑉ ᐃᒪᖓᓂ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᐊᑭᓖᓯᒪᕙᑦᑐᑦ ᓇᐅᑦᑎᕐᓱᖅᑎᓂᑦ ᐃᓄᓐᓂᑦ.
ᑖᓐᓇ ᐱᓕᕆᐊᖅ ᐃᓄᓐᓂᑦ ᐃᖅᑲᓇᐃᔮᔅᓴᖃᖅᑎᑦᑎᔪᖅ ᐊᕙᑎᒥᒃ ᓇᐅᑦᑎᕐᓱᖅᑎᐅᓂᕐᒥᒃ ᐊᖑᓇᓱᑦᑎᐅᓂᕐᒥᓪᓗ. ᑐᙵᕕᖃᖅᑎᑦᑎᒋᓪᓗᓂ ᐊᔪᕆᕐᓯᐅᔾᔨᖃᑦᑕᕈᓐᓇᓂᕐᒧᑦ, ᐃᓕᓐᓂᐊᑎᑦᑎᖃᑦᑕᕈᓐᓇᓂᕐᒧᑦ ᐊᒻᒪᓗ ᒪᑭᒪᓇᓱᐊᕈᑎᓂᑦ ᐱᕙᓪᓕᐊᑎᑦᑎᓂᕐᒧᑦ ᐃᓄᓐᓄᑦ.
ᔪᓚᐃ 2018ᖑᑎᓪᓗᒍ, ᕿᑭᖅᑕᓂᒃᑯᑦ ᐱᒋᐊᖅᑎᑦᑎᔪᔪᑦ ᑕᓪᓗᕈᑎᐅᑉ ᐃᒪᖓᓂ ᓇᐅᑦᑎᕐᓱᖅᑎᓂᑦ ᐆᑦᑐᕋᐅᑕᐅᓗᓂ ᐱᓕᕆᐊᖑᓂᐊᖅᑐᓂ ᐃᒃᐱᐊᕐᔪᖕᒥ ᐱᕚᓪᓕᕈᑕᐅᒋᐊᙵᖁᓪᓗᒍ ᒥᕐᖑᐃᓯᕐᕕᓕᕆᔨᒃᑯᓐᓂ ᑲᓇᑕᒥ. ᐆᒪᔪᐃᑦ ᐊᖑᓂᒃᑕᐅᕙᑦᑐᑦ ᓇᐅᑦᑎᕐᓱᖅᑎᓂᑦ ᐃᒃᐱᐊᕐᔪᖕᒥ ᓂᕆᕕᔾᔪᐊᑎᑦᑎᒍᑕᐅᖃᑦᑕᕐᓯᒪᔪᑦ ᓄᓇᖓᓐᓂ. ᓂᕆᔭᔅᓴᐅᖏᓐᓂᖏᓪᓕ ᐆᒪᔪᓃᙶᖅᑐᑦ ᑐᓂᔭᐅᖃᑦᑕᕐᓯᒪᔪᑦ ᒥᕐᓱᖅᑎᓄᑦ ᓴᓇᓲᓄᓪᓗ ᐱᕚᓪᓕᕈᑎᖃᖁᓪᓗᒋᑦ ᓄᓇᖓᓐᓂ ᒪᑭᒪᓇᓱᐊᕈᑕᐅᕙᑦᑐᑦ. ᑕᒪᒃᑯᐊ ᐱᓇᓱᐊᕈᑕᐅᕙᑦᑐᑦ ᑕᑯᔾᔪᑕᐅᓯᒪᔪᑦ ᐱᒻᒪᕆᐅᓂᖏᓐᓂᒃ ᐊᖑᓇᓱᑦᑏᑦ ᐊᒻᒪᓗ ᐊᖑᓇᓱᖃᑦᑕᕐᓂᖅ ᓂᕿᔅᓴᓂᑦ ᑲᒪᒋᔭᖃᖃᑦᑕᓂᐊᕐᖓᑕ ᕿᑭᖅᑕᓂ ᓄᓇᓕᓐᓂᑦ.
ᑲᔪᓯᓯᒪᑦᑎᐊᕐᓂᖓ ᐱᓕᕆᐊᑉ ᓯᕕᑦᑐᕆᐊᕐᓯᑎᑦᑎᒍᑕᐅᔪᓐᓇᕐᓯᒪᔪᖅ ᐊᓯᖏᓐᓄᑦ ᑎᓴᒪᓄᑦ ᑕᓪᓗᕈᑎᐅᑉ ᐃᒪᖓᓂ ᓄᓇᓕᓐᓄᑦ − ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᖃᐅᓱᐃᑦᑐᖅ.
ᒥᑦᑎᒪᑕᓕᒻᒥ ᐆᒪᔪᓂᑦ ᓇᐅᑦᑎᕐᓱᖃᑦᑕᕐᓂᖅ
ᓄᓇᓕᓐᓂᑦ ᓇᐅᑦᑎᕐᓱᖃᑦᑕᕐᓂᖅ
ᕿᑭᖅᑕᓂᒃᑯᑦ ᓄᓇᓕᓐᓂᑦ ᓇᐅᑦᑎᕐᓱᖃᑦᑕᓂᕐᒧᑦ ᐱᓕᕆᐊᖓᑦ ᒥᑦᑎᒪᑕᓕᒻᒥ ᐱᒋᐊᖅᑎᑕᐅᓚᐅᕐᓯᒪᔪᖅ 2017ᖑᑎᓪᓗᒍ ᑭᐅᔾᔪᑕᐅᓪᓗᓂ ᓄᓇᓕᓐᓂᑦ ᐃᓱᒫᓘᑎᐅᔪᓄᑦ ᐃᒪᓂ ᐃᖅᑲᓂᐊᖃᑦᑕᓂᕐᒧᑦ ᐊᒻᒪᓗ ᐅᒥᐊᕐᔪᐊᑦ ᐅᓯᑲᑦᑕᖃᑦᑕᐸᑦᑐᑦ ᐊᒥᓱᕈᒃᑲᓂᕐᓂᐊᕐᓂᖏᓐᓂᒃ ᑕᒫᓂ ᐊᕙᑖᓂ.
ᐱᔾᔪᑎᖃᖅᑐᑎᒃ ᑖᔅᓱᒥᖓ ᐱᓕᕆᐊᓖᑦ ᓄᐊᑦᑎᔪᒪᓪᓗᑎᒃ ᑐᑭᓯᐅᒪᔾᔪᑎᔅᓴᓂᑦ ᖃᓄᐃᓐᓂᖏᑕ, ᒪᑭᒪᓂᖏᑕ ᐊᒻᒪᓗ ᐊᒥᓲᓂᖏᑕ ᒥᔅᓵᓄᑦ ᐆᒪᔪᐃᑦ ᐊᕙᑖᓃᑉᐸᑦᑐᑦ ᒥᑦᑎᒪᑕᓕᐅᑉ. ᑐᑭᓯᐅᒪᔾᔪᑎᔅᓴᐃᑦ ᐃᑲᔫᑎᖃᕈᓐᓇᕐᖓᑕ ᖃᐅᔨᒃᑲᐃᔾᔪᑕᐅᖃᑦᑕᕐᓗᑎᒃ ᑐᑭᑖᕈᑎᖃᕆᐊᖃᖅᑎᓪᓗᒋᑦ ᐊᑐᐊᒐᕐᓅᖓᔪᓂᑦ, ᐃᑲᔪᕐᓱᐃᔾᔪᑎᖏᓐᓅᖓᔪᓂᑦ ᐊᒻᒪᓗ ᐊᐅᓚᑦᑎᒍᑕᐅᓂᐊᖅᑐᓂᑦ ᐱᔾᔪᑕᐅᕙᑦᑐᓄᑦ ᐊᑑᑎᕙᑦᑐᓄᑦ ᐃᓄᓐᓄᑦ.
ᐱᓕᕆᐊᖅ ᑮᓇᐅᔭᖅᑖᖅᑎᑕᐅᓯᒪᔪᖅ ᑲᓇᑕᒥ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᓐᓂ ᐊᒻᒪᓗ ᐅᑭᐅᖅᑕᖅᑐᒥᐅᓅᖓᔪᓕᕆᔨᓂᑦ ᑲᓇᑕᒥ.
