ᑕᒫᓂ ᐊᕐᕌᒍᒥ ᕿᑭᖅᑕᓂᒃᑯᑦ ᑲᒪᒋᔭᖃᕐᓯᒪᒻᒪᑕ ᐊᑦᑕᓇᙱᓂᕐᓴᐅᖁᓪᓗᒍ ᓴᓗᒪᓂᕐᓴᐅᖁᓪᓗᒍᓗ ᐃᓄᐃᑦ ᓄᓇᖁᑎᖓᑦ (IOL) ᐃᒪᐅᑉ ᓯᓈᓃᑦᑐᖅ ᐃᖃᓗᓐᓂ.

ᐅᐱᕐᖔᒃᑯᑦ, ᑐᑭᓯᒋᐊᕐᕕᖃᔪᒐᑦᑕ ᐃᓄᓐᓂᑦ ᐃᖃᓗᓐᓂ ᑐᑭᓯᑦᑎᐊᕈᒪᓪᓗᑕ ᖃᓄᖅ ᐃᑉᐱᒍᓱᒻᒪᖔᔅᓯ ᐃᓄᐃᑦ ᓄᓇᖁᑎᖓᑕ ᒥᔅᓵᓄᑦ ᐃᒪᐅᑉ ᓯᓈᓂ ᐊᐅᓚᑕᐅᔭᕆᐊᖃᕐᒪᖔᖅ. ᕿᑭᖅᑕᓂᒃᑯᑦ ᓴᖅᑭᑎᑦᑎᔪᔪᑦ ᖃᐅᔨᓴᐅᑎᖓᓐᓂᒃ, ᑐᑭᓯᔪᒪᓪᓗᑎᒃ ᐃᓄᑐᖃᕐᓂᑦ, ᐊᖑᓇᓱᑦᑎᓂᑦ, ᐃᓪᓗᕋᓛᓕᓐᓂᑦ ᐊᒻᒪᓗ ᐊᓯᖏᓐᓂᒃ ᐊᑑᑎᕕᐅᖃᑕᐅᔪᓂᑦ. ᕿᑭᖅᑕᓂᒃᑯᑦ ᖁᕕᐊᓱᔪᔪᑦ ᑭᐅᔭᐅᔭᕆᐊᔅᓴᖅ 87ᓄᑦ.

ᕿᑭᖅᑕᓂᒃᑯᑦ ᕿᒥᕐᕈᓂᖏᓐᓂ ᖃᐅᔨᒍᑎᒋᓯᒪᔭᖏᓐᓂᒃ ᖃᐅᔨᓴᐅᑎᒋᔪᔭᖏᓐᓂᒃ, ᖃᐅᔨᓯᒪᔪᒍᑦ ᓯᕗᓪᓕᐅᔾᔭᐅᖁᔭᐅᓯᒪᔪᓂᑦ ᐃᓄᓐᓄᑦ ᐃᒪᐅᑉ ᓯᓈ ᓴᓗᒻᒪᓴᖅᑕᐅᒋᐊᒃᑲᓐᓂᖃᑦᑕᖁᓪᓗᒍ ᐊᒻᒪᓗ ᖃᓄᖅᑑᕐᓗᑎᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐃᒪᐅᑉ ᓯᓈ ᐊᑦᑕᓇᙱᓐᓂᖓᓂᒃ ᐃᖃᓗᒻᒥᐅᓄᑦ ᐊᑐᖅᑕᐅᑦᑎᐊᖃᑦᑕᓂᐊᕐᖓᑦ.

ᐊᐅᔭᐅᑎᓪᓗᒍ, ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᖃᖅᑐᑎᒃ ᒪᕐᕉᓐᓂᒃ ᐃᓕᓐᓂᐊᖅᑏᓐᓂᒃ ᐃᖅᑲᓇᐃᔭᖅᑎᑕᐅᔫᓐᓂᒃ, ᐃᖅᑲᓇᐃᔮᖃᓪᓚᕆᔪᔪᑦ ᓴᓗᒻᒪᕐᓴᐃᓂᕐᒥᒃ ᓴᓂᕐᓂᑦ ᑕᒫᓂᖅᑭᔪᓂᑦ, ᐲᔭᐃᓪᓗᑎᒃ ᕿᒪᐃᓐᓇᖅᑕᐅᓂᑯᓂᑦ ᐃᓪᓗᕋᓛᕐᓂᑦ ᐊᒻᒪᓗ ᖃᐅᔨᓇᓱᑉᐸᑦᑐᑎᒃ ᓇᒻᒥᓂᓕᓐᓂᑦ ᓱᕋᔅᓯᒪᔪᓂᑦ ᐃᖏᕐᕋᔾᔪᑎᓂᑦ ᐊᒻᒪᓗ ᓅᑦᑐᕐᓯᐅᑎᓂᑦ. ᕿᑭᖅᑕᓂᒃᑯᑦ ᐱᓕᕆᖃᑎᖃᖃᑦᑕᔪᔪᑦ ᑭᒃᑯᑐᐃᓐᓇᕐᓂᑦ ᑕᒫᓂᒥᐅᓂᑦ ᐊᒻᒪᓗ ᐊᑐᕐᐸᑦᑐᑎᒃ ᖃᕋᓴᐅᔭᒃᑯᑦ ᑭᒃᑯᑐᐃᓐᓇᕐᓄᑦ ᑐᓴᐅᒪᖃᑦᑕᐅᑎᔾᔪᑎᓂᑦ ᐊᒻᒪᓗ ᓈᓚᐅᑎᒃᑯᑦ ᑐᓴᖅᑕᐅᑎᑦᑎᕙᑦᑐᑎᒃ ᖃᐅᔨᒪᔭᐅᓂᐊᕐᖓᑦ ᐃᒪᐅᑉ ᓯᓈ ᐊᒻᒪᓗ ᐃᑲᔪᖅᑕᐅᔪᒪᓪᓗᑎᒃ ᑭᒃᑯᑦ ᓇᒻᒥᓂᖃᕐᒪᖔᑕ ᕿᒪᐃᓐᓇᖅᑕᐅᓯᒪᔪᓂᑦ ᐅᒥᐊᕐᓂᑦ ᖃᒧᑕᐅᔭᓂᓪᓗ. ᕿᑭᖅᑕᓂᒃᑯᑦ ᖁᔭᓐᓇᒦᕈᒪᔪᑦ ᐃᑲᔪᖃᑦᑕᓚᐅᖅᑐᓂᑦ ᑐᑭᓯᑎᑦᑎᓂᕐᒥᒃ ᐊᒻᒪᓗ ᐲᔭᐃᓂᕐᒥᒃ ᑕᒪᒃᑯᓂᖓ ᑭᓱᑐᐃᓐᓇᕐᓂᑦ ᑕᒪᓐᓇ ᐊᑦᑕᓇᙱᓂᕐᓴᐅᑲᓐᓂᕈᑕᐅᓯᒪᒻᒪᑦ ᓴᓗᒻᒪᐃᒍᑕᐅᓯᒪᓪᓗᓂᓗ ᐃᒪᐅᑉ ᓯᓈᓂ.

ᐃᑲᔫᑎᖃᖁᓪᓗᒍ ᐃᒪᐅᑉ ᓯᓈᓂ ᓴᓗᒪᑎᑦᑏᓐᓇᓂᕐᒥᒃ, ᕿᑭᖅᑕᓂᒃᑯᑦ ᐊᒻᒪᓗ ᓄᓇᓕᐸᐅᔭᓕᕆᔨᒃᑯᑦ ᐃᖃᓗᓐᓂ ᑐᖏᓕᐊᓂ ᐊᕐᕌᒍᑕᒫᑦ ᐊᑐᖅᑕᐅᓲᒥᒃ ᑰᖏᓐᓂᒃ ᓴᙱᑎᑦᑎᔪᔪᑦ. ᕿᑭᖅᑕᓂᒃᑯᑦ ᐃᑲᔪᖅᑕᐅᒍᒪᔪᔪᑦ ᐃᖃᓗᒻᒥᐅᓄᑦ ᓴᓗᒻᒪᕐᓴᐃᓂᕐᒥᒃ ᐃᓚᖏᓐᓂᒃ ᑰᖏᓐᓂᒃ ᐃᖃᓗᓐᓃᑦᑐᓂᑦ. ᐋᒡᒌᓯ 20ᑎᓪᓗᒍ ᓴᙱᔪᔪᑦ ᐊᒻᒪᓗ ᐃᑲᔪᖅᑐᑦ ᐃᑲᔪᖅᑎᒌᔪᔪᑦ ᐲᔭᐃᓪᓗᑎᒃ ᓴᓂᕐᓂᑦ ᑕᒫᓂᖅᑭᔪᓂᓪᓗ ᐊᑦᑕᕆᐊᓕᓐᓂᑦ ᑰᖏᓐᓃᑦᑐᑦ.

ᐃᒪᐅᑉ ᓯᓈ ᐊᑦᑕᕐᓇᖁᓇᒍ ᕿᑭᖅᑕᓂᒃᑯᑦ ᖃᐅᔨᓴᖃᑦᑕᔪᔪᑦ ᐅᓐᓄᒃᑯᑦ. ᖃᐅᔨᓴᖃᑦᑕᑎᓪᓗᒋᑦ ᐃᑲᔫᑎᖃᔪᔪᖅ ᐊᑦᑕᓇᖅᑐᒦᑦᑐᓂᑦ ᐊᒻᒪᓗ ᐊᑐᖅᑕᐅᖁᒍᒥᓇᙱᑦᑐᓂᑦ ᓄᖅᑲᑎᑦᑎᕙᑦᑐᑎᒃ ᐃᓄᐃᑦ ᓄᓇᖁᑎᖓᓐᓂ ᐃᒪᐅᑉ ᓯᓈᓂ ᐊᒻᒪᓗ ᐃᓪᓗᕋᓛᕐᓂᑦ ᖃᓂᒋᔭᖏᓐᓂᓘᓐᓃᑦ ᐃᒪᐅᑉ ᓯᓈᓃᑦᑐᓂᑦ.

ᕿᑭᖅᑕᓂᒃᑯᑦ ᓴᓗᒻᒪᕐᓴᐃᖃᑦᑕᓂᐊᖅᑐᑦ ᖃᐅᔨᓴᖃᑦᑕᕐᓗᑎᓪᓗ ᐃᓄᐃᑦ ᓄᓇᖁᑎᖓᓐᓂᒃ ᐃᒪᐅᑉ ᓯᓈᓃᑦᑐᒥᒃ ᑕᒪᓐᓇ ᐊᑦᑕᓇᙱᑦᑑᖁᓪᓗᒍ, ᑐᙵᓇᖁᓪᓗᒍ ᐊᒻᒪᓗ ᐊᑑᑎᖃᖁᓪᓗᒍ ᐃᓄᓐᓄᑦ ᑭᖑᕚᕆᓂᐊᖅᑕᖏᓐᓄᓪᓗ ᓯᕗᓂᔅᓴᑎᓐᓂ.