ᐱᓕᕆᕕᓐᓂᑦ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒧᑦ ᐱᒋᐊᕈᑎᔅᓴᑦ ᑮᓇᐅᔭᑦ ᐋᖅᑭᓱᖅᑕᐅᓯᒪᒧᑦ ᐃᑲᔫᑕᐅᓂᐊᕐᖓᑕ ᐃᖅᑲᓇᐃᔭᕐᕕᓐᓂᑦ ᐱᒋᐊᖅᑎᑦᑎᓂᕐᒧᑦ ᐊᒻᒪᓗ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒧᑦ.
ᐋᖅᑭᑦᑕᐅᓚᐅᕐᓯᒪᔪᑦ ᐃᓛᒃᑯᑦ 6 ᒪᓕᑦᑐᒍ ᓄᓘᔮᓕᕆᓂᕐᒥ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᔅᓴᖏᓐᓄᓪᓗ ᐊᖏᕈᑎᓂᑦ (ᐊᖏᕈᑏᑦ).
ᐱᓕᕆᕕᓐᓂᑦ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒧᑦ ᐱᒋᐊᕈᑎᔅᓴᑦ ᑮᓇᐅᔭᑦ ᑐᕌᖓᔪᑦ ᐃᓄᓐᓄᑦ ᐋᖅᑭᒋᐊᕐᓯᒍᒪᕙᑦᑐᓄᑦ ᐃᖅᑲᓇᐃᔭᕐᕕᖁᑎᖏᓐᓂᒃ ᐅᕝᕙᓘᓐᓃᑦ ᐱᒋᐊᖅᑎᑦᑎᒍᒪᔪᓂᑦ ᓄᑖᕐᓂᑦ ᐃᖅᑲᓇᐃᔭᕐᕕᖁᑎᒋᓂᐊᖅᑕᖏᓐᓂᒃ. ᐅᓪᓗᒥᒧᑦ ᑎᑭᑦᑐᒍ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐹᕕᓐᓛᓐᑯᑦ ᐊᑐᓂᑦ ᐃᑲᔫᑎᖃᕐᓯᒪᔪᑦ $750,000ᓂᑦ (ᑲᑎᑦᑐᒋᑦ $1,500,000) ᑮᓇᐅᔭᐅᓂᐊᖅᑐᓂᑦ, ᓯᕗᓂᔅᓴᑎᓐᓂ ᐃᑲᔫᑕᐅᒍᒫᕐᓂᐊᖅᑐᑎᒃ ᑲᑎᒪᔾᔪᑕᐅᔭᕆᐊᖃᖅᑐᑎᒃ ᐊᖏᖃᑎᒌᓯᒪᔫᓐᓄᒃ.
ᑮᓇᐅᔭᑦ ᐊᐅᓚᑕᐅᕙᑦᑐᑦ ᑲᑐᔾᔨᖃᑎᒌᒃᑯᑦ ᑎᒥᖁᑎᖓᓐᓄᑦ, ᑲᑭᕙᒃ ᑲᑐᔾᔨᖃᑎᒌᒃᑯᓐᓂ ᑖᒃᑯᐊ ᐋᖅᑭᓯᒪᑎᑦᑎᕙᑦᑐᑦ ᑖᒃᑯᓂᖓ ᐃᑲᔫᑎᓂᑦ ᐃᓚᒋᔭᐅᓪᓗᑎᒃ ᐊᓯᖏᓐᓄᑦ ᐃᑲᔫᑎᐅᔪᓄᑦ ᐃᖅᑲᓇᐃᔭᕐᕕᓐᓄᑦ ᐃᑲᔫᑎᐅᖃᑦᑕᓂᐊᖅᑐᓄᑦ.
ᐱᔾᔪᑎᓪᓗᐊᑕᖏᑦ ᑖᒃᑯᐊ ᑮᓇᐅᔭᐃᑦ ᐃᑲᔫᑕᐅᓪᓗᑎᒃ ᓇᓗᓇᐃᖅᑕᐅᓯᒪᔪᓄᑦ ᕿᑭᖅᑕᓂ ᐃᓄᓐᓄᑦ ᑎᒥᐅᔪᓄᑦ ᐱᓕᕆᕕᓐᓂᑦ ᐱᒋᐊᖅᑎᑦᑎᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᖃᑦᑕᕐᓂᖏᓐᓂᒃ ᒪᑯᓂᖓ:
- ᓇᓂᓯᓂᕐᒥᒃ ᐱᒋᐊᕈᑎᔅᓴᓂᑦ ᐊᑭᑐᔫᑎᓄᑦ ᐊᒻᒪᓗ ᑮᓇᐅᔭᓕᕆᔾᔪᑎᔅᓴᓂᑦ
- ᐊᐅᓚᑦᑎᓂᕐᕐᒥᒃ ᐱᕙᓪᓕᐊᑎᑦᑎᓂᕐᒥᒃ (ᐃᓕᓐᓂᐊᓂᕐᒥᒃ)
- ᑲᔪᓰᓐᓇᖅᑐᒥᒃ ᐱᓕᕆᕕᓕᕆᓂᕐᒥᒃ
- ᑮᓇᐅᔭᓕᕆᓂᕐᒥᑦ
- ᑳᓐᑐᓛᓂᑦ ᐊᒻᒪᓗ ᑎᒍᓯᓂᕐᒥᑦ
ᐱᖃᑕᐅᖃᑦᑕᕈᓐᓇᓂᐊᖅᑐᑦ ᐃᖅᑲᓇᐃᔭᕐᕖᑦ ᐅᑯᐊ:
- ᐃᓄᓐᓄᑦ ᓇᒻᒥᓂᕆᔭᐅᔪᑦ ᐊᐅᓚᑕᐅᔪᓪᓗ ᑎᒥᐅᔪᑦ ᐊᐅᓚᓂᓖᑦ ᕿᑭᖅᑕᓂ ᓄᓇᓕᓐᓂᑦ ᐊᒻᒪᓗ ᑎᑎᕋᖅᑕᐅᓯᒪᔪᑦ ᓄᓘᔮᓕᕆᓂᕐᒥ ᓇᓗᓇᐃᖅᑕᐅᓯᒪᔪᓂᑦ ᐃᓄᓐᓄᑦ ᑎᒥᐅᔪᓂᑦ
- ᓯᕗᓪᓕᐸᐅᑦᑎᐅᔾᔭᐅᖃᑦᑕᓂᐊᖅᑐᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᐅᔪᑦ ᐊᐅᓚᓂᓖᑦ ᓇᓕᑐᐃᓐᓇᖏᓐᓂ ᑕᓪᓕᒪᓂᑦ ᓄᓇᓕᐅᔪᓂᑦ ᐃᓚᓕᐅᔾᔭᐅᓯᒪᔪᑦ ᓄᓘᔮᓕᕆᓂᕐᒧᑦ ᐊᖏᕈᑎᓂᑦ. ᑖᒃᑯᐊ ᓄᓇᓖᑦ ᐅᑯᐊᖑᕗᑦ: ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᓴᓂᕋᔭᒃ, ᐃᒡᓗᓕᒃ ᐊᒻᒪᓗ ᒥᑦᑎᒪᑕᓕᒃ.
- ᓯᕗᓪᓕᐸᐅᑦᑎᐅᔾᔭᐅᖃᑦᑕᓂᐊᖅᑐᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᐅᔪᑦ ᐃᓚᐅᔪᒪᔪᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᔪᓐᓇᖅᑐᑦ ᓱᓇᒃᑯᑖᖃᖅᑎᑦᑎᓂᕐᒥᒃ ᐱᔨᑦᑎᕋᐅᑎᖃᕐᓂᒥᓪᓗ ᐃᑲᔪᕐᓗᑎᒃ ᐅᔭᕋᓐᓂᐊᕐᓂᓕᕆᕕᒻᒧᑦ.
ᑲᑎᒪᔨᐅᔪᑦ, ᑎᒥᐅᔪᓪᓗ ᑭᒃᑯᑐᐃᓐᓇᐃᓪᓗ ᐲᕐᓯᕕᐅᓚᐅᖅᑎᓪᓗᒋᑦ ᐊᑭᖃᕋᔭᖅᑐᑦ ᑕᒫᓂ $1 ᒥᓕᐊᓐ ᐊᑐᕋᔅᓴᐅᖏᑦᑐᑦ ᐃᑲᔫᑎᐅᓂᐊᕐᓗᑎᒃ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᕐᕕᔅᓴᖅ ᑕᕝᕗᖓ ᐱᓇᓱᐊᕈᑎᓄᑦ ᐊᑐᐊᒐᕐᓄᑦ.
