ᐱᒻᒪᕆᐊᓗᒻᒥᒃ ᑲᒪᒋᔭᖃᖅᑐᑎᒃ ᑎᑭᐅᑎᕗᑦ ᕿᑭᖅᑕᓂ ᐃᓄᓐᓄᑦ ᓴᐳᔾᔨᕕᐅᓂᐊᖅᑐᒥᒃ
ᐃᖃᓗᐃᑦ, ᓄᓇᕗᑦ, ᑎᓯᐱᕆ 7, 2022 – ᑲᓇᑕᒥᐅᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᑐᑭᓯᓯᒪᒻᒪᑕ ᓴᐳᔾᔨᓂᖅ ᓄᓇᑦᑎᓐᓂᒃ ᐊᕙᑎᑦᑎᓐᓂᒃ ᐃᓚᒋᔭᐅᓪᓚᕆᒻᒪᑦ ᐋᖅᑭᐅᒪᑎᑦᑎᓂᕐᒧᑦ ᐊᕙᑎᑦᑎᓐᓂᒃ, ᒪᑭᒪᓇᓱᐊᕈᑎᓂᑦ ᐊᒻᒪᓗ ᓄᓇᖅᑲᑎᑦᑎᓐᓂᒃ. ᐱᖓᓐᓇᖓᓂ, ᕿᑎᐊᓄᑦ ᑲᓇᓐᓇᖓᓄᑦ ᑎᑭᑦᑐᒍ, ᓄᓇᖃᖅᑐᑐᖃᐃᑦ ᑲᓇᑕᒥᐅᑦ ᓯᕗᓕᕐᓰᓐᓇᓕᒫᕐᖓᑕ ᓴᐳᔾᔨᓂᕐᒥᒃ ᓄᓇᑦᑎᓐᓂᒃ, ᐃᒪᑦᑎᓐᓂᒃ ᐃᒪᕕᑦᑎᓂᓪᓗ.
ᕿᑭᖅᑕᓂᒃᑯᑦ ᐱᒃᑯᒍᓱᑉᐳᑦ ᐊᕕᑦᑐᕐᓯᒪᓂᐅᔪᑎᒍᑦ ᓄᓇᑦᑎᓐᓂ ᐊᑐᖃᑦᑕᓂᐊᖅᑕᑎᓐᓂᒃ ᓴᐳᔾᔨᒍᑎᔅᓴᖃᕐᖓᑕ ᐃᓕᓴᕆᔭᐅᓯᒪᔪᒥᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᑲᑐᔾᔨᓗᑕ ᑲᓇᑕᒥᐅᑦ ᐊᒻᒪᓗ ᓄᓇᕐᔪᐊᕐᒥᐅᑦ ᐃᑲᔫᑎᖃᕐᐸᑦᑐᑦ ᐅᑉᐱᕆᔭᓖᑦ ᐃᓱᒪᒋᓯᒪᔭᑦᑎᓐᓂᒃ ᑲᔪᓯᑎᒍᒪᒐᔭᖅᑐᒋᑦ ᓯᕕᑐᓂᕐᓴᒨᖓᔪᒥᒃ ᐊᑐᖅᑕᐅᖃᑦᑕᓂᐊᖅᑐᒥᒃ ᐃᓄᓐᓄᑦ−ᑐᑭᒧᐊᑦᑎᑕᐅᔪᒥᒃ ᓴᐳᔾᔨᓂᕐᒧᑦ ᐱᓕᕆᓂᐅᔪᓂᑦ ᓄᓇᓕᖁᑎᓕᒫᑦᑎᓐᓂᒃ. ᐋᖅᑭᔅᓱᐃᕙᓪᓕᐊᒐᑦᑕ ᕿᑭᖅᑕᓂᒃᑯᑦ ᒫᓐᓇ ᓇᐅᑦᑎᕐᓱᖅᑎᖃᕐᓂᕐᒧᑦ ᐱᓕᕆᐊᖓᒍᑦ ᑕᒪᓐᓇ ᑲᔪᓯᑎᑕᐅᕙᓪᓕᐊᔭᕇᕐᖓᑦ ᑕᓪᓕᒪᓂᑦ ᕿᑭᖅᑕᓂ ᓄᓇᓕᐅᔪᓂᑦ.
“ᐅᓪᓗᒥ ᓇᓗᓇᐃᖅᑕᐅᖅᑲᐅᒪᑦ ᑐᑭᓯᓇᑦᑎᐊᖅᑐᓂ ᓇᓗᓇᐃᒃᑯᑕᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᑦ ᐅᐸᓗᖓᐃᕐᓯᒪᒻᒪᑕ ᓴᓂᓕᖃᕐᓗᑎᒃ ᐃᓄᓐᓂᑦ ᐋᖅᑮᔪᒪᓂᐊᕐᖓᑕ ᐊᕕᑦᑐᕐᓯᒪᓂᐅᔪᑎᒍᑦ ᓴᐳᔾᔨᕕᒻᒥ ᐊᑐᖅᑕᐅᖃᑦᑕᓂᐊᖅᑐᒥᒃ ᓯᕗᓪᓕᐅᔾᔨᔪᒥᒃ ᐃᓄᓐᓄᑦ ᐊᐅᓚᑕᐅᔪᒥᒃ ᐊᒻᒪᓗ ᐋᖅᑭᐅᒪᑎᑦᑎᓂᕐᒥᒃ ᐃᓚᒋᔭᐅᓪᓚᑦᑖᕐᓗᑎᒃ ᐊᐅᓚᑦᑎᓂᕐᒥᒃ ᓄᓇᑦᑎᓐᓃᑦᑐᓂᑦ” ᐅᖃᖅᑐᖅ ᓕᕙᐃ ᐹᓇᐹᓯ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐊᖏᔪᖅᑳᖑᓂᕐᒧᑦ ᑭᖑᕝᕕᐅᑎᓯᒪᑲᐃᓐᓇᖅᑐᖅ.
ᕿᑭᖅᑕᓂᒃᑯᑦ ᐊᕕᑦᑐᕐᓯᒪᓂᐅᔪᑎᒍᑦ ᐊᑐᖃᑦᑕᓂᐊᖅᑕᖓ ᒪᑯᓂᖓ ᑲᔪᓯᑎᑦᑎᔪᒪᓂᐊᕐᖓᑕ:
- ᒐᕙᒪᒃᑯᓐᓂᑦ ᐱᓕᕆᕕᓕᒫᓂᑦ ᐱᓇᓱᐊᕈᑎᖃᕐᓂᖅ, ᐃᓚᖃᖅᑐᓂ ᑮᓇᐅᔭᖃᖅᑎᑦᑎᓂᕐᒥᒃ, ᐊᑐᐊᒐᕐᓂᑦ ᐊᒻᒪᓗ ᑐᕌᒐᕆᔭᐅᔪᓂᑦ ᐋᖅᑭᓯᒪᓂᐅᔭᕆᐊᓕᓐᓂᑦ ᐊᐅᓚᔾᔪᑎᔅᓴᓂᑦ ᑲᑦᑐᖓᐃᕈᑎᖃᕐᓂᕐᒥᒃ, ᓈᒻᒪᑦᑐᓂᑦ ᐊᖏᓂᖓᓄᑦ ᐊᒻᒪᓗ ᐊᑯᓂ ᐊᑐᖅᑕᐅᓂᐊᖅᑐᓂᑦ ᐊᔾᔨᒋᔭᐅᙱᑦᑐᒥᒃ ᐊᕕᑦᑐᕐᓯᒪᓂᐅᔪᑎᒍᑦ ᓴᐳᔾᔨᕕᒻᒧᑦ ᐊᑐᖅᑕᐅᖃᑦᑕᓂᐊᖅᑐᒥᒃ ᐃᓚᖃᖅᑐᓂ ᐃᓄᓐᓄᑦ−ᑐᑭᒧᐊᑦᑎᑕᐅᔪᒥᒃ ᕿᑭᖅᑕᓂ ᐊᐅᓚᑦᑎᓂᕐᒥᒃ;
- ᐋᖅᑮᓂᖅ ᕿᑭᖅᑕᓂ ᐃᖃᓗᓕᕆᓂᕐᒧᑦ ᐋᖅᑭᒋᐊᕐᓯᓂᕐᒧᑦ ᐱᔭᕆᐊᑭᓪᓕᑎᑦᑎᔨᐅᒐᔭᖅᑐᓂᒃ;
- ᑲᔪᓯᑎᑦᑎᓂᖅ ᕿᑭᖅᑕᓂ ᐃᖃᓗᓕᕆᓂᕐᒧᑦ ᐋᖅᑭᒋᐊᕐᓯᓂᕐᒧᑦ ᐊᖏᖃᑎᒌᒍᑎᓂᑦ, ᐃᓚᖃᕐᓗᓂ ᐃᑲᔪᕐᓯᓂᕐᒥᒃ ᓄᑖᒥᒃ ᓄᓇᕗᒻᒥ ᐃᖃᓗᓕᕆᓂᕐᒧᑦ ᐱᓕᕆᕕᒻᒥ ᐊᑐᐊᒐᕐᓂᑦ, ᐊᖏᓪᓕᒋᐊᕐᓯᑎᑦᑎᓂᐊᖅᑐᒥᒃ ᐃᓄᓐᓄᑦ ᐊᑐᖅᑕᐅᖃᑦᑕᕈᓐᓇᖁᓪᓗᒍ ᐊᒻᒪᓗ ᐃᓚᒋᔭᐅᖃᑦᑕᕈᓐᓇᖁᓪᓗᒋᑦ ᖃᓂᒋᔭᖓᓃᑦᑐᓂᑦ ᐃᖃᓗᓕᕆᓂᕐᒥᒃ;
- ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᓴᐳᔾᔨᕕᔅᓴᒧᑦ ᑐᔅᓯᕋᐅᑕᐅᔪᒧᑦ, ᐃᖃᕐᓗᓂ ᓴᐳᑎᔭᐅᓂᐊᖅᑐᓂᑦ ᐊᒻᒪᓗ ᓴᐳᔾᔨᕕᓐᓂᑦ, ᓴᐳᑎᔭᐅᓗᑎᒃ ᐃᓄᐃᑦ ᓇᐅᑦᑎᕐᓱᖅᑎᖏᑎᒍᑦ ᐊᒻᒪᓗ ᐊᐅᓚᑦᑎᓂᖏᑎᒍᑦ ᑐᙵᕕᖃᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐋᖅᑭᓯᒪᑦᑎᐊᕐᓗᓂ ᐋᖅᑭᐅᒪᑎᑕᐅᒐᔭᖅᑐᒧᑦ ᕿᑭᖅᑕᓂ ᓴᐳᔾᔨᕕᒻᒧᑦ ᐊᑐᖅᑕᐅᖃᑦᑕᓂᐊᖅᑐᒥᒃ ᐃᓘᓐᓇᖏᓐᓄᑦ 13ᓄᑦ ᕿᑭᖅᑕᓂ ᓄᓇᓕᐅᔪᓄᑦ; ᐊᒻᒪᓗ
- ᐃᑲᔪᖅᑎᒌᓪᓗᑎᒃ ᐱᓕᕆᖃᑎᖃᕐᓗᑎᒃ ᓄᓇᓕᓐᓂᑦ, ᓄᓇᕗᑦ ᒐᕙᒪᒃᑯᖏᓐᓂᑦ, ᑲᓇᑕᐅᑉ ᒐᕙᒪᒃᑯᖏᓐᓂᑦ, ᐊᒻᒪᓗ ᐃᑲᔪᖅᑎᐅᕙᑦᑐᓂᑦ ᑮᓇᐅᔭᖃᖅᑎᑦᑎᕙᑦᑐᓂᑦ ᓇᓗᓇᐃᑦᑎᐊᓂᐊᕐᖓᑕ ᓴᐳᑎᔭᐅᓯᒪᒃᑲᓂᕐᓂᐊᖅᑐᑦ, ᐃᒫᓂ ᓄᓇᒥᓗ ᓴᐳᔾᔨᓯᒪᒋᐊᕈᑎᔅᓴᐃᑦ.
ᑕᑯᔪᓐᓇᖅᑕᓯ ᐅᓂᒃᑳᓕᐊᖑᓯᒪᔪᖅ ᓈᒪᔪᖅ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂ:
ᐃᓄᒃᑎᑐᑦ: ᐊᕕᑦᑐᕐᓯᒪᓂᐅᔪᑎᒍᑦ ᓴᐳᔾᔨᕕᒻᒥᑦ ᐱᓇᓱᐊᕈᑕᐅᔪᖅ 2022
ᖃᓪᓗᓈᑎᑐᑦ: A Regional Conservation Approach 2022
ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐅᖓᓯᑦᑐᒥ ᐊᑭᖃᙱᑐᒃᑯᓘᓐᓃᑦ 1.800.667.2742
