ᐃᖃᓗᐃᑦ, ᓄᓇᕗᑦ – ᐅᑐᐱᕆ 23, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐸᕕᓐᓛᓐ ᓴᕕᕋᔭᒃᓴᓂ ᐅᔭᕋᕐᓂᐊᕐᕕᓕᕆᔨᒃᑯᑦ ᓴᖅᑭᑎᑦᑎᕗᑦ ᐊᑎᓕᐅᖅᑕᐅᓯᒪᔪᓂᒃ ᐊᔾᔨᖓᓂᒃ ᐋᖅᑭᒋᐊᖅᑕᐅᓯᒪᔪᒥᒃ ᓄᓘᔮᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥ (ᐊᖏᕈᑦ).  ᕿᑭᖅᑕᓃᒃᑯᓐᓂᓐᖔᖅᑐᑦ ᐳᓚᕋᓛᕐᒪᑕ ᑕᓪᓕᒪᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᖕᓄᑦ ᑖᒃᑯᐊ ᐃᑲᔫᓯᐊᒃᓴᐅᔪᐃᑦ ᒥᒃᓵᓄᑦ ᑐᓴᖅᑎᑦᑎᔭᖅᑐᕐᓗᑎᒃ.

“ᑖᓐᓇ ᐋᖅᑭᒋᐊᖅᑕᐅᓯᒪᔪᖅ ᓄᓘᔮᑦ ᐱᓕᕆᐊᖓᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᖓ ᓇᓗᓇᐃᒃᑯᑕᐅᕗᖅ ᖃᓄᑎᒋᒧᑦ ᑖᒃᑯᐊ ᕿᑭᖅᑕᓃᒃᑯᑦ ᑲᔪᓯᑎᑦᑎᓯᒪᓂᖏᓐᓄᑦ ᓴᖅᑭᔮᖅᑐᓂᒃ ᐃᑲᔫᐊᒃᓴᓂ ᕿᑭᖅᑕᓂ ᐃᓄᖁᑎᒋᔭᐅᔪᓄᑦ ᐋᔩᕋᕈᑎᖃᒃᑲᓐᓂᓚᐅᖅᑎᓪᓗᒋᑦ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ, “ᐅᐱᒍᓱᒃᑐᖓ ᓴᖅᑭᑎᑦᑎᔪᓐᓇᕋᑦᑕ ᓄᓇᓖᑦ ᐱᔪᒪᓚᐅᖅᑕᖏᓐᓂᑦ: ᐃᓕᓐᓂᐊᒐᒃᓴᒃᑲᓐᓂᕐᓂᒃ ᐊᒻᒪᓗ ᐃᓄᐃᑦ ᐃᖅᑲᓇᐃᔮᒃᓴᖃᖅᑎᑕᐅᓂᖏᓐᓄᑦ.”  

ᐄᐳᓪᒥ ᕿᑭᖅᑕᓃᒃᑯᓐᓂᖔᖅᑐᑦ ᓯᕗᒃᑲᖅᑎᖃᖅᖢᑎᒃ ᐄᕙ ᐋᕆᐊᕐᒥ, ᐊᖏᕈᑎᒥ ᐊᐃᕙᔨᒻᒪᕆᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓄᓘᔮᑦ ᐱᓕᕆᐊᖓ ᐱᔾᔪᑎᒋᔭᐅᓪᓗᓂ ᐳᓚᕋᓚᐅᕐᒪᑕ ᓄᓇᓕᖕᓄᑦ ᐊᒃᑐᖅᑕᐅᓯᒪᔪᓄᑦ ᐅᔭᕋᕐᓂᐊᕐᕕᖕᒥᑦ ᑐᓴᕈᒪᓪᓗᑎᒃ ᐃᓄᖕᓂᑦ.  ᑖᒃᑯᐊ ᐊᑐᓕᖁᔭᐅᓚᐅᖅᑐᑦ ᐳᓚᕋᖃᑦᑕᕐᓂᕐᒥ ᐊᑐᖅᑕᐅᓚᐅᖅᑐᑦ ᐱᕙᓪᓕᐊᑎᑕᐅᓂᖓᓂᒃ ᕿᑭᖅᑕᓃᒃᑯᑦ ᐸᕐᓇᐅᑎᖓᓂᒃ ᐋᔩᕋᕈᑎᖃᒃᑲᓐᓂᕐᓂᕐᒧᑦ ᑐᓐᖓᕕᒋᔭᐅᓪᓗᑎᒃ.

“ᓄᓇᓕᖕᓄᑦ ᐳᓚᕋᖃᑦᑕᖅᑎᓪᓗᑕ, ᐃᓄᐃᑦ ᐅᖃᖃᑦᑕᓚᐅᖅᑐᑦ ᐃᓕᓐᓂᐊᒐᒃᓴᖃᒃᑲᓐᓂᕆᐊᖃᕐᓂᖓᓂᒃ ᐃᖅᑲᓇᐃᔮᒃᓴᖃᒃᑲᓐᓂᕆᐊᖃᕐᓂᖓᓂᓗ,” ᐅᖃᖅᑐᖅ ᐄᕙ ᐋᕆᐊᒃ, “ ᖁᔭᓕᑦᑎᐊᖅᑐᖓ ᑖᒃᑯᐊ ᓄᑖᖑᔪᑦ ᐃᑲᔫᓯᐊᒃᓴᑦ ᓄᓘᔮᑦ ᐱᓕᕆᐊᖓᑕ ᐊᖏᕈᑎᐊᓂᑦ, ᓱᕐᓗ ᐱᓕᒻᒪᒃᓴᕐᕕᒃᓴᒥᒃ ᒥᑦᑎᒪᑕᓕᖕᒥ, ᑕᒪᒃᑯᐊᓗ ᓴᖅᑭᓯᒪᔪᑦ ᐱᔭᐅᔪᒪᓚᐅᖅᑐᓂᑦ.” ,

ᐋᕆᐊᒃ ᓯᕗᒃᑲᖅᑎᒋᔭᐅᓂᐊᕐᒥᔪᖅ  ᓄᓇᓕᖕᓄᑦ ᐳᓚᕋᕐᓂᐅᓂᐊᖅᑐᒥᒃ ᑐᓴᖅᑎᑦᑎᓂᐊᖅᖢᑎᒃ ᐃᓄᖕᓂᑦ ᑐᓴᒐᒃᓴᓂᒃ ᐋᖅᑭᒋᐊᖅᑕᐅᓯᒪᔪᒥᒃ ᓄᓘᔮᑦ ᐱᓕᕆᐊᖓᓄᑦ ᐊᖏᕈᑎᒥ ᐅᑯᓂᖓ ᓄᓇᓕᖕᓄᑦ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᓴᓂᕋᔭᒃ, ᐃᒡᓗᓕᒃ, ᒥᑦᑎᒪᑕᓕᒡᓗ.

ᐃᓛᒃᑯᑦ 22.2 ᐊᖏᕈᑎᓂᑦ ᑖᒃᑯᓄᖓ ᐸᕕᓐᓛᓐᑯᓐᓄᑦ ᕿᑭᖅᑕᓃᒃᑯᓐᓄᓗ ᐅᖃᖅᓯᒪᔪᖅ ᐊᖏᕈᑎ ᕿᒥᕐᕈᔭᐅᒋᐊᖃᖅᑐᖅ ᐱᖓᓱᑦ ᐊᕐᕌᒍᑦ ᐊᓂᒍᖅᑎᓪᓗᒋᑦ ᐋᖅᑭᒋᐊᖅᑕᐅᑐᐃᓐᓇᕆᐊᖃᕐᓂᖓᓂᒃ.  ᒪᓕᓪᓗᒍᑦ ᑖᓐᓇ ᕿᒥᕐᕈᓂᐅᔪᖅ, ᐊᕐᕌᒍᒥ ᑲᔪᓯᓚᐅᖅᑐᒥᑦ, ᐃᓚᖏᑦ ᐊᖏᕈᑎᐅᑉ ᐃᓗᓕᖏᑦ ᐋᔩᕋᕈᑕᐅᒃᑲᓐᓂᓚᐅᖅᑐᑦ.

ᑖᒃᑯᐊ ᐋᖅᑭᒋᐊᖅᑕᐅᓯᒪᔪᑦ ᐊᖏᕈᑎ, ᐊᑐᐃᓐᓇᐅᔪᖅ ᕿᑭᖅᑕᓃᒃᑯᑦ ᐃᑭᐊᖅᑭᕕᐊᓂ ᐅᕙᓂ ᐊᓯᔾᔩᓂᐊᖅᖢᓂ ᓄᓘᔮᑦ ᐱᓕᕆᐊᖓᓄᑦ ᐊᖏᕈᑎᒥᑦ, ᐊᑎᓕᐅᖅᑕᐅᖅᑳᓚᐅᖅᑐᒥ ᓯᑎᐱᕆ 2013ᒥ.

ᐅᕝᕙ ᐃᓚᖏᑦ ᑐᓴᕈᒥᓇᖅᑐᑦ ᐋᖅᑭᒋᐊᖅᑕᐅᓯᒪᔪᒥᒃ ᓄᓘᔮᑦ ᐱᓕᕆᐊᖓᓄᑦ ᐊᖏᕈᑎᒥ:  

• $10 ᒥᓕᔭᓂ ᑐᕌᖓᓂᐊᖅᑐᖅ ᑎᑎᖅᑐᒐᖅᑕᐅᓂᖓᓄᑦ ᓴᓇᔭᐅᓂᖓᓄᓪᓗ ᐱᓕᒻᒪᒃᓴᕐᕕᒃᓴᒥ ᒥᑦᑎᒪᑕᓕᖕᒥ
• ᐊᑭᑦᑐᕆᐊᖅᓯᒪᔪᓂᒃ ᐃᓄᖕᓄᑦ ᐱᓕᒻᒪᒃᓴᕈᑎᒃᓴᓄᑦ ᑮᓇᐅᔭᐃᑦ
  • $2.25 ᒥᓕᔭᓂ ᐊᕐᕌᒍᑕᒫᑦ 2018ᒥᑦ-2021ᒧᑦ
  • $1.5 ᒥᓕᔭᓂᒃ ᓴᖅᑭᑎᑕᐅᓂᖏᓐᓄᑦ ᐱᓕᒃᓴᕈᑎᒃᓴᑦ ᐃᓄᖕᓄᑦ 2021ᒥᑦ-2031ᒧᑦ
• ᐊᖑᓇᓱᒃᑎᓄᑦ ᐱᖃᖅᑎᑦᑎᓂᕐᒧᑦ ᑮᓇᐅᔭᐃᑦ ($400,000/ᐊᕐᕌᒍᑕᒫᑦ)
  • ᑮᓇᐅᔭᐃᑦ ᐋᖅᑭᒃᑕᐅᓂᐊᖅᑐᑦ ᑐᕌᖓᓂᐊᖅᑐᓂᒃ ᐅᖅᓱᖅᑖᕈᑎᒃᓴᕆᔭᐅᓗᑎᒃ ᐃᓄᖕᓄᑦ ᒥᑦᑎᒪᑕᓕᖕᒥ.
  • ᑖᒃᑯᐊ ᑮᓇᐅᔭᐃᑦ ᓴᖅᑭᑕᐅᓯᒪᔪᑦ ᐃᑲᔪᖅᑕᐅᖁᓪᓗᒋᑦ ᐃᓄᐃᑦ ᐊᖑᓇᓱᒋᐊᖃᑦᑕᖅᑎᓪᓗᒋᑦ, ᐃᓕᓴᕆᔭᐅᓯᒪᓪᓗᓂ ᑖᓐᓇ ᐅᔭᕋᕐᓂᐊᕐᕕᒃ ᖃᓄᐃᓕᐅᕐᓂᕆᔭᖏᑦ ᐱᓪᓗᒋᑦ ᐅᖓᓯᒃᑐᓕᐊᕆᐊᖃᓕᕐᓂᖏᓐᓄᑦ ᐅᒪᔪᖅᓯᐅᕐᓗᑎᒃ.
  • ᑖᓐᓇ ᐱᓕᕆᐊᖑᓂᐊᖅᑐᖅ 10-ᐊᕐᕌᒍᓄᑦ
• ᐅᒥᐊᖅᐸᒃᑖᕈᑎᑦ ($300,000/ᐅᒥᐊᖅᐸᒃ)
  • ᐊᕐᕌᒍᑦ ᐱᖓᓱᑦ ᖃᖏᕋᐃᒻᒪᑕ ᐸᕕᓐᓛᓐᑯᑦ ᓂᐅᕕᖃᑦᑕᕐᓂᐊᖅᑐᑦ ᐊᒻᒪᓗ ᑐᓂᓗᒍ ᐅᒥᐊᖅᐸᒃ ᐊᑐᖅᑕᐅᔪᓇᕐᓂᐊᖅᑐᒥᒃ ᖃᐅᔨᓴᕈᑎᒋᔭᐅᓗᓂ ᒥᑦᑎᒪᑕᓕᖕᒥᐅᓄᑦ, ᐃᒃᐱᐊᕐᔪᖕᒥᐅᓄᑦ, ᑲᖏᖅᑐᒑᐱᖕᒥᐅᓄᑦ, ᐃᒡᓗᓕᖕᒥᐅᓄᑦ ᐊᒻᒪ ᓴᓂᕋᔭᖕᒥᐅᓄᓗ
  • ᑐᕌᒐᕆᔭᐅᔪᖅ ᐊᕐᕌᒍᑦ 12ᖑᔪᓂᑦ ᐊᑐᓂ ᓄᓇᓖᑦ ᐅᒥᐊᖅᐸᒃᑖᕈᓐᓇᖅᓯᓯᒪᓂᐊᕐᓂᖏᓐᓄᑦ
• ᓇᐅᑦᓯᖅᑐᕐᓂᕐᒧᑦ ᑮᓇᐅᔭᐃᑦ ($200,000/ᐊᕐᕌᒍᑕᒫᑦ)
  • ᑖᒃᑯᐊ ᑮᓇᐅᔭᐃᑦ ᑐᕌᒐᔪᑦ ᒥᑦᑎᒪᑕᓕᖕᒥᐅᓄᑦ ᐊᒻᒪᓗ ᐃᑲᔫᑎᒋᔭᐅᔪᓐᓇᖅᖢᑎᒃ ᐃᓛᒃᑰᖅᑐᓂᒃ ᓇᐅᑦᓯᖅᑐᖃᑦᑕᕐᓂᕐᒥᒃ ᐱᓕᕆᐊᕐᒥ. ᑖᒃᑯᐊ ᖃᐅᔨᔭᐅᖃᑦᑕᕐᓂᐊᖅᑐᑦ ᐱᓕᕆᐊᖑᔪᓂᑦ ᐊᑐᖅᑕᐅᔪᓐᓇᖅᖢᑎᒃ ᐃᑲᔫᑎᒋᔭᐅᓗᑎᒃ ᐊᓯᔾᔩᒍᓐᓇᕐᓂᕐᒥᒃ ᒥᒃᖠᒋᐊᖅᑎᑦᑎᓂᕐᒧᑦ ᐅᕝᕙᓘᓐᓃᑦ ᐱᑕᖃᓐᖏᓐᓂᖅᓴᐅᓕᕈᓐᓇᕐᓂᕐᒥᓪᓘᓐᓃᑦ ᐊᒃᑐᐃᒍᑕᐅᔪᓐᓇᖅᑐᓂᒃ ᐱᓕᕆᐊᕐᒥᑦ.

ᕿᑭᖅᑕᓃᒃᑯᑦ ᓂᕆᐅᒋᔭᖃᑦᑎᐊᖅᑯᑦ ᑲᑐᔾᔨᖃᑎᖃᐃᓐᓇᕐᓂᐊᕐᓂᖏᓐᓂᒃ ᐸᕕᓐᓛᓐᑯᓐᓂᑦ ᑲᑐᔾᔭᐅᓯᒪᔪᓂᒃ ᐱᓕᕆᐊᒃᓴᓄᑦ ᐃᑲᔫᓯᐊᖅᑖᕈᑎᒋᔭᐅᓂᐊᖅᑐᓄᑦ ᐃᓄᖕᓄᑦ.

ᓄᓇᓕᖕᓄᑦ ᐳᓚᕋᓂᕐᒥ ᐅᓪᓗᕆᔭᐅᔪᑦ (ᓯᓚᐅᑉ ᖃᓄᐃᓐᓂᕆᔭᖓ ᒪᓕᑦᑕᐅᓇᔭᕐᒥᔪᖅ ᐊᒻᒪᓗ ᑭᖑᕙᕆᐊᕈᑎᒋᔭᐅᔪᓪᓘᓐᓃᑦ):  

ᒥᑦᑎᒪᑕᓕᒃ – ᓄᕖᕝᕙ 2, 2018

ᑲᖏᖅᑐᒑᐱᒃ –  ᓄᕖᕝᕙ 3, 2018

ᓴᓂᕋᔭᒃ –  ᓄᕖᕝᕙ 5, 2018

ᐃᒡᓗᓕᒃ – ᓄᕖᕝᕙ 5, 2018

ᐃᒃᐱᐊᕐᔪᒃ − ᓄᕖᕝᕙ 6, 2018

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋᕐ ᓯᐊᕋHᐃ, ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

›szerehi@qia.ca

867.975.8413

1.800.667.2742