ᐃᖃᓗᐃᑦ, ᓄᓇᕗᑦ − ᔫᓂ 24, 2021 – ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐊᕿᐊᕈᖅ ᓴᖅᑭᑎᑦᑎᔪᖅ ᑖᔅᓱᒥᖓ ᓇᓗᓇᐃᕈᒻᒥᑦ.

“ᐅᓪᓗᒥ ᐆᒻᒪᑎᒃᑯᑦ ᕿᑭᖅᑕᓂ ᓄᓇᓖᑦ ᐃᓄᐃᑦ ᐃᑉᐱᓂᖃᑕᐅᓯᒪᕗᑦ ᑯᐊᓴᔅ ᐊᓪᓚᓄᑦ. ᐃᑉᐱᓐᓂᐊᖃᑕᐅᕗᒍᑦ ᖁᐊᕐᓵᕐᓯᒪᒍᑎᖃᕐᓂᕐᒥᒃ ᖃᓯᓕᒍᑎᖃᕐᓂᒥᓪᓗ.

ᑯᐊᓴᔅ ᐊᓪᓚᐃᑦ ᐊᒻᒪᓗ ᓄᓇᖃᖅᑳᕐᓯᒪᔪᑦ ᓇᒥᑐᐃᓐᓈᖅᑐᑦ ᑲᓇᑕᒥ ᐃᓚᙵᕐᓯᒪᒻᒪᑕ ᓱᕈᓯᕐᓂᑦ ᐃᓚᙵᕐᓯᒪᑐᐃᓐᓇᕋᑎᒃ ᑲᑉᐱᐊᓇᖅᑐᒃᑰᖅᑎᑕᐅᓯᒪᑎᓪᓗᒋᑦ ᐃᓕᓐᓂᐊᕆᐊᖅᑎᑦᑎᕙᑦᑐᒥᓃᑦ ᐊᖅᑯᑕᐅᓪᓗᑎᒃ, ᑭᓯᐊᓂᑦᑕᐅᖅ ᐊᓯᐅᔨᓯᒪᒻᒪᑕ ᖃᐅᔨᒪᓂᖏᓐᓂᒃ ᐱᖅᑯᓯᖏᓐᓂᓪᓗ ᑲᔪᓯᑎᑕᐅᒐᔭᓚᐅᖅᑐᓂᑦ ᐃᓅᓯᖏᑎᒍᑦ ᐊᒻᒪᓗ ᖃᐅᔨᑎᑦᑎᒍᑎᒋᒐᔭᓚᐅᖅᑕᖏᓐᓂᒃ ᓯᕗᓂᔅᓴᑎᓐᓂ ᑭᖑᕚᖑᓂᐊᖅᑐᓄᑦ.

ᐊᓯᐅᔨᓂᖅ ᐃᓕᖅᑯᓯᕐᒥᒃ ᖃᐅᔨᒪᓂᕐᒥᓪᓗ ᐃᒻᒧᐊᓃᒻᒪᑦ ᓈᒻᒪᖏᑦᑐᓕᕕᐅᓯᒪᓂᖏᓐᓂᒃ ᐊᒻᒪᓗ ᓴᖅᑭᔮᕈᓐᓃᖅᑎᑕᐅᒐᓱᔅᓯᒪᓂᖏᓐᓂᒃ ᓄᓇᖃᖅᑳᕐᓯᒪᔪᑦ ᐊᑐᕐᓯᒪᔭᖏᑎᒍᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᐅᓚᑕᐅᓪᓗᑎᒃ.

ᑕᐃᒫᒃ ᐃᓕᓴᕆᔭᐅᓯᒪᒻᒪᑦ ᓱᓕᔪᒥᒃ ᓴᐃᒻᒪᖃᑎᒌᓐᓂᒧᓪᓗ ᐱᓕᕆᔨᓂᑦ ᐃᓕᖅᑯᓯᕐᒥᒃ ᐊᑐᖅᑕᐅᒍᓐᓃᑎᑦᑎᑎᐊᒻᒪᕆᒐᓱᓐᓂᖅ ᑲᒪᒋᔭᐅᓚᐅᕐᓯᒪᒻᒪᑦ ᑲᓇᑕᒥ ᓄᓇᖃᖅᑳᕐᓯᒪᔪᓄᑦ ᑕᐃᒫᒃ ᐱᐅᓯᖃᖅᑐᑎᒃ. ᐅᓪᓗᒥ ᑐᓴᖅᑕᐅᔪᑦ ᐋᓐᓂᓇᖅᑐᒥᒃ ᐃᑉᐱᓐᓂᕈᑕᐅᓯᒪᔪᓂᑦ ᐃᖅᑲᐃᔾᔪᑎᐅᒻᒪᑦ ᑕᒪᑐᒥᖓ ᑐᖁᕋᐃᓂᐅᓯᒪᔪᒥᒃ.

ᐊᔅᓱᕈᐊᖃᕐᓂᖅ ᐃᓱᒪᒋᔪᓐᓇᐃᖅᑎᒌᓐᓂᒃᑯᑦ ᓴᐃᒻᒪᕈᑎᖃᕐᓂᕐᒥᒃ ᐊᓂᒍᓪᓚᑦᑖᓚᐅᕐᓯᒪᔾᔮᖏᒻᒪᑦ ᑕᒪᓐᓇ ᐱᓕᕆᔾᔪᓯᖓᑦ ᑲᓇᑕᐅᑉ ᑐᑭᓯᔭᐅᓪᓚᑦᑖᕋᓱᓐᓂᖓᓂ ᐊᒻᒪᓗ ᐲᔭᖅᑕᐅᓇᓱᓐᓂᖓᓂ.

ᐃᖅᑲᐃᑎᑕᐅᕗᒍᑦ ᒪᒥᓴᕆᐊᖃᕐᓂᖏᑦ ᓄᓇᖃᖅᑳᕐᓯᒪᔪᑦ ᑖᓐᓇ ᑲᔪᓯᑎᑕᐅᔭᕆᐊᖃᕐᖓᑦ. ᐅᓪᓗᒥ ᕿᔅᓵᒍᑎᖃᖅᑐᒍᑦ ᑯᐊᓴᔅ ᐊᓪᓚᓂᑦ. ᖃᐅᑉᐸᑦ ᐅᑎᓛᖅᑐᒍᑦ ᐊᔅᓱᕈᐊᖃᕐᓗᑕ ᐃᖅᑲᓇᐃᔮᖃᕐᓂᕐᒧᑦ ᓴᐃᒻᒪᖃᑎᒌᓐᓂᖅᑕᖃᖁᓪᓗᒍ ᑲᓇᑕᒥ ᓄᓇᖃᖅᑳᕐᓯᒪᔪᓄᑦ, ᐃᓱᒪᒌᓐᓇᕐᓗᒋᓪᓗ ᐃᓚᙵᕈᑕᐅᓯᒪᔪᑦ ᐅᖁᒪᐃᑦᑐᒃᑯᑦ ᐱᔾᔪᑎᒋᓪᓗᒋᑦ ᐃᓕᓐᓂᐊᕆᐊᕐᕕᐅᕙᑦᑐᒥᓃᑦ.”

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᑖᓐᓇ:

ᐅᐃᓪ Hᐊᑉᑭᓐᔅ, ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᖓᓐᓄᑦ ᑐᓴᐅᒪᖃᑦᑕᐅᑎᑎᑦᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742