ᐃᖃᓗᐃᑦ, ᓄᓇᕗᑦ, ᐊᒃᑑᕝᕙ 5, 2023 – ᐅᓪᓗᒥᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᖁᕕᐊᓱᑉᐳᖅ ᑐᓴᖅᑕᐅᑎᑦᑎᔪᓐᓇᕋᒥᒃ ᓴᖅᑭᖅᑕᐅᓂᖓᓂᑦ ᕿᑭᖅᑕᓂ ᐱᓕᕆᐊᖑᔪᒧᑦ ᑖᕗᖓᓕᒫᖅ ᑮᓇᐅᔭᖃᖅᑎᑦᑎᓂᐅᔪᒥᑦ, ᐃᓘᓐᓇᖏᓐᓂᑦ ᐊᑐᐊᒐᖏᓐᓂᑦ, ᒪᓕᑦᑕᐅᖁᔭᖏᓐᓂᑦ, ᐊᒻᒪᓗ ᐃᓘᓐᓇᖏᓐᓂᑦ ᑮᓇᐅᔭᖃᖅᑎᑕᐅᔪᒧᑦ ᐊᑑᑎᖃᑦᑎᐊᑐᒃᑯᑦ ᓯᕗᓂᑐᖃᑦᑎᓐᓄᑦ ᓴᐳᒻᒥᑦᑎᔪᓐᓇᓂᐊᖅᑐᒥᑦ ᓄᓇᕐᔪᐊᑉ ᐱᒻᒪᕆᐊᓘᔪᓂᑦ ᐃᓗᓕᖏᓐᓂᑦ ᐱᓕᕆᓂᐅᔪᒥᑦ (Q-PFP). ᑖᒃᓱᒪ ᐱᓕᕆᓂᐅᔫᑉ ᑐᕌᖅᑕᕆᔭᖓ ᑕᒪᓐᓇᐅᕗᖅ ᓴᖅᑭᔮᕆᐊᖅᑎᑦᑎᓂᖅ ᐃᓗᑐᔪᒥᑦ ᐊᑑᑎᖃᓪᓚᕆᑦᑐᒥᓪᓗ ᑲᓱᖅᓯᒪᖃᑎᒌᓐᓂᕆᔭᖏᓐᓂᑦ ᐃᓄᐃᑦ ᐊᒻᒪᓗ ᓯᕗᓂᒥᓂᖏᑕ ᓄᓇᖏᓐᓂᑦ ᐃᒪᖏᓐᓂᓪᓗ ᑕᒪᐅᓇ ᑮᓇᐅᔭᓂᑦ ᐃᓕᐅᖅᑲᐃᓂᒃᑯᑦ ᐃᓄᓐᓄᑦ ᓯᕗᓕᐅᖅᑕᐅᔪᒥᑦ ᓄᖑᑦᑕᐃᓕᑎᑦᑎᓪᓗᑎᒃ ᒪᑭᒪᐅᑎᖃᕐᓂᕆᔭᖏᓐᓂᑦ. ᑖᒃᑯᐊ ᑲᑎᒪᔩᑦ ᑲᑎᑎᑦᑎᕗᑦ ᐃᑲᔪᖅᓰᔨᓪᒪᕆᐅᔪᓂᑦ ᐊᖏᖅᓯᒪᓂᖃᖅᑐᓂᑦ ᓯᕗᒧᐊᖅᑎᑦᑎᓂᕐᒥᑦ ᐊᔾᔨᐅᖏᑦᑐᒥᑦ ᐊᑑᑎᖃᓪᓚᕆᑦᑐᒥᑦ ᐊᓐᓇᐅᒪᑎᑦᑎᓯᒪᔪᒥᑦ ᐃᓄᓐᓂᑦ ᑕᐅᓴᒐᓚᓐᓂ ᐊᕐᕌᒍᓂ.
ᑖᒃᑯᐊ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᑦ ᑲᑎᒪᔨᖃᖅᑐᑦ ᑲᑐᔾᔨᖃᑎᒌᓃᓐᖔᖅᑐᓂᑦ ᖃᐅᔨᓴᖅᑕᐅᓯᒪᔪᓂᑦ ᕿᑭᖅᑖᓃᒃᑯᓐᓄᑦ ᑐᓐᖓᕕᒋᔭᖏᑦ ᐊᔾᔨᖃᕋᓗᐊᕐᒪᖔᑕ ᕿᑭᖅᑕᓃᒃᑯᑦ ᐅᑉᐱᕆᔭᖏᓐᓂᑦ ᓯᕗᒧᓪᓗ ᑕᑯᓐᓇᖑᐊᖅᑕᖏᓐᓂᑦ ᓄᓇᕐᔪᐊᕐᒥᐅᑕᓂᑦ ᓄᖑᑦᑕᐃᓕᑎᑦᑎᓂᕐᒧᑦ. ᑲᑐᔾᔨᓪᓗᑕ ᐊᔾᔨᒌᒥᑦ ᐊᖏᖅᓯᒪᓂᖃᖅᑐᒍᑦ ᐱᒐᓱᐊᕈᓐᓇᖅᑐᑕ ᑎᒍᔭᒃᓴᐅᔪᓂᑦ ᐃᑲᔫᑎᒃᓴᓂᑦ ᐃᓘᓐᓇᖏᓐᓄᑦ ᕿᑭᖅᑕᓂ ᓄᓇᓕᖏᓐᓄᑦ ᑐᕌᒐᓪᓗᑕ ᐊᓯᐅᑦᑕᐅᑎᒋᔪᓐᓇᖏᑦᑐᓂᑦ ᐊᐅᓚᑦᑎᔾᔪᑎᓂᑦ ᓴᖅᑭᖅᓯᔪᒪᓪᓗᑕ ᕿᑭᖅᑖᓗᒻᒥ. ᑕᒪᓐᓇ ᐱᓕᕆᓂᐅᔪᖅ ᐊᔭᐅᖅᑕᐅᔪᖅ ᐱᔪᒪᓂᐅᔪᓄᑦ ᓴᐳᒻᒥᑦᑎᔪᒪᓂᕐᒥᑦ ᓯᕗᒧᐊᑦᑎᑦᑎᔪᒪᓂᐅᔪᓂᓪᓗ ᐃᓄᐃᑦ ᐊᐅᓚᑦᑎᓂᕆᔭᖏᓐᓂᑦ, ᐃᓄᐃᑦ ᓇᐅᑦᓯᖅᑐᖅᑎᐅᓂᖏᓐᓂᑦ, ᑕᒪᑐᒧᖓ ᑐᕌᖅᑎᑕᐅᓯᒪᔪᓄᑦ ᐱᖁᑎᕐᔪᐊᕐᓄᑦ ᐊᖏᓪᓕᒋᐊᖅᑎᑕᐅᓗᑎᓪᓗ ᑮᓇᐅᓕᐅᕈᑎᒃᓴᖏᑦ ᐃᓄᐃᑦ ᑕᒫᓐᖔᖅᑐᓂᑦ ᐃᑭᕐᒥ ᐃᒪᕕᒻᒥ ᕿᑭᖅᑖᓘᑉ ᐊᑦᑐᐊᔭᖏᓐᓂ ᐃᒪᕐᓂ.
ᕿᑭᖅᑕᓂ ᐃᓄᐃᑦ ᐃᒻᒥᓂᒃ ᑕᑯᖃᑦᑕᓕᕐᒪᑕ ᓯᓚᐅᑉ ᐊᓯᔾᔨᕐᓂᖓᑕ ᐊᑦᑐᖅᑕᖏᓐᓂᑦ ᓯᕗᓕᒥᓂᖏᑕ ᓄᓇᑐᖃᖏᓐᓂᑦ, ᐃᒪᖏᓐᓂᑦ, ᐊᒻᒪᓗ ᓂᕐᔪᑎᖏᓐᓂᑦ ᐊᓐᓇᐅᒪᑎᑦᑎᓯᒪᔪᓂᑦ ᐃᓅᓯᖏᓐᓂᑦ ᑕᐃᒪᓐᖓᓕᒫᖅ.
ᐅᖃᐅᔾᔨᒋᐊᖅᑎᓂᑦ ᑲᑎᒪᔨᓂᑦ ᓴᖅᑭᖅᓯᔪᒥᓃᑦ ᐅᑯᓂᖓ ᐃᓚᖃᖅᐳᑦ:
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ: ᐊᔭᐅᕆᔨᐅᓪᓗᑎᒃ ᐱᒋᐊᖅᑎᒃᑎᓯᒪᔪᑦ ᑖᒃᓱᒥᖓ Q-PFP-ᒥᑦ, ᕿᑭᖅᑕᓃᒃᑯᑦ ᑭᒡᒐᖅᑐᐃᒻᒪᑕ ᐱᔪᓐᓇᐅᑎᖏᓐᓂᑦ ᐱᔪᒪᔭᖏᓂᓪᓗ ᐃᓄᐃᑦ ᕿᑭᖅᑕᓂᒥ ᐊᒻᒪᓗ ᐱᓕᕆᓪᓚᕆᒃᓯᒪᓪᓗᑎᒃ ᐋᖅᑭᑦᑎᕆᓪᓗᑎᒃ ᓯᕗᒧᑦ ᑕᑯᓐᓇᖑᐊᑕᐅᔪᓂᑦ ᓄᖑᑦᑕᐃᓕᑎᑦᑎᓂᕐᒧᑦ ᕿᑭᖅᑕᓂ.
ᐱᐅ ᑮᓇᐅᔭᓄᑦ ᐃᑲᔪᖅᑏᑦ ᐸᐸᑦᑎᔩᑦ: ᐊᑐᓲᖑᔪᑦ ᖃᐅᔨᒪᔭᒥᐅᔪᓂᑦ ᐊᓯᔾᔨᖅᑎᑦᑎᒐᓱᐊᖅᑐᑎᒃ ᐊᐅᓚᑦᑎᓂᐅᔪᓂᑦ ᐊᒻᒪᓗ ᐊᑯᐊᓗᒃ ᐃᑲᔪᖅᓰᖃᑦᑕᖅᓯᒪᓪᓗᑎᒃ ᓄᓇᕐᔪᐊᓕᒫᒥ ᓄᖑᑦᑕᐃᓕᑎᑦᑎᒐᓱᐊᖅᑐᓄᑦ ᑲᑐᔾᔨᖃᑎᖃᖅᑐᑎᒃ ᓄᓇᖃᖅᑳᖅᓯᔪᑦ ᓄᓇᓕᖏᓐᓂᑦ.
ᒍᐊᑕᓐ ᐊᒻᒪ ᕕᐊᑎ ᒧᐊᕐ ᕿᒪᒃᑲᑯᖏᑦ ᐃᑲᔫᑎᒃᓴᑦ: ᑕᐃᒫᒃᓴᐃᓐᓇᖅ ᐃᓗᑐᔪᒥᑦ ᐊᖏᖅᓯᒪᓂᖃᖅᑐᑦ ᓯᕗᒧᐊᑦᑎᑦᑎᒐᓱᓐᓂᕐᒥᑦ ᐱᐅᔪᓂᑦ ᓴᖅᑭᖅᑎᒐᒃᓴᐅᔪᓂᑦ ᓯᕗᓂᑦᑎᓐᓂ ᐃᓅᖃᖅᑕᓛᖅᑐᓄᑦ ᓄᓇᕐᔪᐊᓕᒫᒥ ᐊᒻᒪᓗ ᐃᑲᔪᖅᓰᓪᓗᑎᒃ Q-PFP−ᑯᑦ ᓴᖅᑭᕋᓱᐊᖅᑕᖏᓐᓂᑦ.
ᔫᒪᓛᑉ: ᐃᓕᐅᖅᑲᐃᖃᑕᐅᓲᑦ ᑲᑐᔾᔭᐅᔪᓄᑦ ᐱᓕᕆᓂᐅᔪᓄᑦ ᓴᐳᒻᒥᑦᑎᓂᕐᒧᑦ ᐊᔾᔨᐅᖏᑦᑐᓂᑦ ᐊᔾᔨᒌᓐᖏᑦᑐᕈᓘᔭᕐᓂᓪᓗ ᐊᕙᑎᖏᓐᓃᑦᑐᓂᑦ ᐆᒪᔪᖃᖅᕕᐅᔪᑦ ᕿᑭᖅᑕᓂ.
ᐆᓴᓐᔅ ᓄᐊᑦ (ᐅᑭᐅᖅᑕᖅᑐᒥ ᐃᒪᕖᑦ): ᐊᑑᑎᖃᓪᓚᕆᑦᑐᑦ ᐱᖃᑕᐅᓂᖃᖅᐸᑦᑐᖅ ᑐᑭᒧᐊᑦᑎᑦᑎᓐᒃᑯᑦ ᐊᑐᓕᖅᑎᑦᑎᓂᒃᑯᓪᓗ Q-PFP-ᒥᑦ, ᒪᓕᒃᓴᖅᑎᑕᐅᓪᓗᓂ ᑐᕌᖅᑕᕆᔭᖓᓄᑦ ᓴᐳᒻᒥᑦᑎᓂᕐᒥᑦ ᐅᑭᐅᖅᑕᖅᑐᒥ ᐃᒪᕕᖏᓐᓃᑦᑐᓂᑦ ᐊᒻᒪᓗ ᐃᑲᔪᖅᓰᓲᖑᓪᓗᑎᒃ ᓄᓇᖃᖅᑳᖅᑐᒥᓂᕐᓂᑦ ᓯᕗᓕᖅᑎᐅᖁᔨᔪᓄᑦ ᓄᖑᑦᑕᐃᓕᑎᑦᑎᓂᕐᒥ.
ᑐᑭᓯᒋᐊᕈᒪᒍᒃᓯ, ᐅᓇ ᖃᐅᔨᒃᑲᕈᓐᓇᖅᑕᓯ:
ᑭᐊᕋᓐ ᕙᓚᐅᕋᑎ
ᐊᐅᓚᑦᑎᔨ, ᑐᓴᐅᒪᑎᑦᑎᔨᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑎᖓ) 867.975.8398 ᐅᕝᕙᓘᓐᓃᑦ ᐊᑭᖃᓐᖏᑐᒃᑯᑦ 1.800.667.2742
ᖃᕋᓴᐅᔭᒃᑯᑦ: kflaherty@qia.flywheelsites.com
ᓯᕗᓂᕆᓯᒪᔭᖏᑦ
ᑖᓐᓇ ᖃᓄᓕᒫᖅ ᑭᓱᓕᒫᓂᑦ ᑮᓇᐅᔭᖃᖅᑎᑦᑎᓂᐅᔪᖅ ᑮᓇᐅᔭᓕᕆᔾᔪᑎᐅᕗᖅ ᑲᑎᑎᑦᑎᓲᖑᔪᖅ ᒐᕙᒪᓂᑦ, ᓄᓇᓕᓐᓂᑦ, ᑮᓇᐅᔭᖃᖅᑎᑦᑎᔨᓂᑦ ᐊᒻᒪᓗ ᐊᓯᖏᓐᓂᑦ ᑲᑐᔾᔨᖃᑎᒋᔭᐅᔪᓂᑦ ᐊᑦᑐᖏᖅᓯᒐᓱᐊᖅᑐᑎᒃ ᓯᕗᓂᑐᖃᑦᑎᓐᓄᑦ ᓄᖑᑦᑕᐃᓕᑎᑦᑎᓂᕐᒥᑦ, ᐃᓘᓐᓇᖏᓐᓂᑦ ᐊᒻᒪᓗ ᑲᔪᓰᓐᓇᖅᑎᒐᒃᓴᐅᔪᓂᑦ ᑮᓇᐅᔭᓂᑦ, ᐊᒻᒪᓗ ᓄᓇᓖᑦ ᐃᑲᔫᓯᐊᖏᓐᓂᑦ ᑕᒪᐅᓇ ᐊᑕᐅᓯᐅᔪᒃᑯᑦ ᐊᓯᔾᔨᖅᓯᔾᔪᑎᐅᔪᒃᑯᑦ ᐊᖏᖃᑎᒌᒍᑎᐅᔪᒃᑯᑦ. ᐃᓛᒃᑯᑦ ᑕᐃᒪᐃᑦᑐᒃᑯᑦ ᐱᓕᕆᐊᖑᔪᑦ ᐊᖁᑦᑕᐅᓲᖑᕗᑦ ᓴᓐᖏᔪᓄᑦ ᓄᖑᑦᑕᐃᓕᑎᑦᑎᓂᐅᔪᓄᑦ ᐊᒻᒪᓗ ᓄᓇᓖᑦ ᐱᕙᓪᓕᐊᑎᑕᐅᓂᖏᓐᓄᑦ ᐊᖏᖃᑎᒋᒍᑎᖏᓐᓄᑦ ᐊᒻᒪᓗ ᓴᓐᖏᔪᒃᑯᑦ ᑮᓇᐅᔭᖃᖅᑎᑕᐅᓂᒃᑯᑦ, ᐃᓘᓐᓇᖏᑦ ᐊᖏᖅᓯᒪᓂᐅᔪᑦ ᓇᓗᓇᐃᖅᑕᐅᑦᑕᐅᑎᒋᓯᒪᓗᑎᒃ ᖃᐅᔨᒪᓂᐊᕐᒪᑕ ᐊᓯᔾᔨᕋᕐᓂᖏᑦᑐᓂᑦ ᓴᖅᑭᖅᓯᓂᐊᕐᒪᑕ. ᑖᓐᓇ ᒪᓕᑦᑕᐅᓂᐊᖅᑐᖅ ᖃᓄᓕᒫᖅ ᑭᓱᓕᒫᓄᑦ ᐊᖏᖃᑎᒌᒍᑎ ᐃᓚᒋᔭᐅᒻᒪᑦ ᐊᑑᑎᖃᕈᓐᓇᓛᖑᔪᓄᑦ ᑐᑭᒧᐊᒍᑎᒃᓴᕐᓄᑦ ᐋᖅᑭᒃᓯᒍᑎᒃᓴᐅᓪᓗᓂ ᐊᓯᔾᔨᕋᕐᓂᖏᑦᑐᓂᑦ ᓴᐳᒻᒥᑦᑎᔾᔪᑎᐅᔪᓂᑦ ᑕᕝᕙᓴᐃᓐᓇᕐᓗ ᐃᑲᔫᓯᐊᖅᑎᑦᑎᓗᑎᒃ ᓄᓇᓕᓐᓂᑦ ᑕᒪᐅᓇ ᓄᖑᑦᑕᐃᓕᑎᑦᑎᓂᕐᒧᑦ-ᑲᓱᖅᓯᒪᓂᖃᖅᑐᓂᑦ ᓄᓇᓕᓐᓂᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒥᑦ. ᑕᒪᓐᓇ ᖃᓄᓕᒫᖅ ᑭᓱᓕᒫᓂᑦ ᓯᕗᓂᑐᖃᖅᑎᓐᓄᑦ ᑮᓇᐅᔭᖃᖅᑎᑦᑎᓂᖅ ᐱᒋᐊᓚᐅᖅᓯᒪᔪᖅ ᑲᓇᑕᒥ ᒍᕋᐃᑦ ᕕᐅ ᓇᐹᖅᑐᑐᖃᖃᖅᕕᖓᑕ ᐊᖏᖃᑎᒌᒍᑎᖓᒍᑦ ᕗᕆᑎᔅ ᑲᓚᒻᕕᐊᒥ, ᐊᒻᒪᓗ, ᐅᓪᓗᒥᒧᑦ, ᐊᑐᖅᑕᐅᖃᑦᑕᖅᓯᒪᔪᖅ ᑕᓪᓕᒪᓂ ᓄᓇᓕᕐᔪᐊᖑᔪᓂ − ᕗᕆᓯᐅᒥ, ᑳᔅᑕ ᕇᑲᒥ, ᕘᑖᓐᒥ, ᐳᕉᒥ ᐊᒻᒪᓗ ᑲᓚᒻᕕᐊᒥ − ᓱᕐᕋᒐᕐᓂᖏᑦᑐᓂᑦ ᓄᖑᑦᑕᐃᓕᒍᑎᓕᐅᖅᑐᑎᑦ ᓄᓇᒥᑦ ᐊᖏᓂᖃᖅᑐᒥᑦ 120 ᕼᐃᐊᑦᑕᐅᓂᑦ ᐱᑕᖃᕆᐊᖃᓪᓚᕆᑦᑐᓂᑦ ᐊᕙᑎᖏᓐᓂᑦ.
ᑎᓯᐱᕆ 2022-ᒥ, ᑲᓇᑕᐅᑉ ᐊᖏᔪᖅᑳᕐᔪᐊᖓ ᔭᔅᑕᓐ ᑐᕉᑐ ᐃᓕᓯᔪᔪᖅ $800 ᒥᓕᐊᓐ ᑖᓚᓂᑦ ᑲᓇᑕᐅᑉ ᑮᓇᐅᔭᖏᓐᓂᑦ ᓄᓇᖃᖅᑳᖅᑐᒥᓂᕐᓄᑦ ᐊᐅᓚᑕᐅᔪᓄᑦ ᓄᖑᑦᑕᐃᓕᑎᑦᑎᓂᕐᒧᑦ ᐱᒋᐊᖅᑎᑕᐅᓯᒪᔪᓄᑦ, ᐱᖃᓯᐅᑎᓪᓗᒋᑦ ᑭᓱᓕᒫᓄᑦ ᖃᓄᓕᒫᖅ ᓯᕗᓂᑐᖃᖅᑎᓐᓄᑦ ᐊᖏᖃᑎᒋᒍᑎᑦ, ᓇᓗᓇᐃᖅᓯᔾᔪᑎᒋᓪᓗᓂᐅᒃ ᒐᕙᒪᑐᖃᒃᑯᑦ ᐊᖏᖅᓯᒪᓂᕆᔭᖓᓂᑦ ᓯᕗᒧᐊᕆᐊᖅᑎᑦᑎᓂᕐᒧᑦ ᑖᒃᓱᒥᖓ ᐱᓕᕆᐊᖑᔪᒥᑦ. ᑕᐃᒪᓕ ᑭᖑᓂᖓᓂ, ᔫᓂ 2023-ᒥ, ᑲᓇᑕᐅᑉ ᒐᕙᒪᖓ ᐊᑎᓕᐅᔪᔪᖅ ᑐᕌᖅᑕᕆᔭᐅᓂᐊᖅᑐᓂᑦ ᐊᐃᕙᔾᔪᑎᖃᕐᓂᕐᒧᑦ ᐊᖏᖃᑎᒋᒍᑎᒥᑦ, ᓴᖅᑭᔮᕆᐊᖅᑎᑎᓪᓗᑎᒃ ᑮᓇᐅᔭᖅᑖᑲᓐᓂᕆᐊᖃᕐᓂᖏᓐᓂᑦ ᑮᓇᐅᔭᕐᔪᐊᓕᒥᓂᕐᓄᑦ ᕿᒪᒃᑲᑰᔪᓂᑦ ᑐᒃᓯᕌᒃᓴᕐᓄᑦ ᑲᑐᔾᔨᖃᑎᒌᖑᔪᓂᑦ.
ᑕᒪᓐᓇ ᓴᖅᑭᖅᑕᐅᓂᖓ ᐅᖃᐅᔾᔨᒋᐊᖅᑏᑦ ᑲᑎᒪᔩᑦ ᐱᒻᒪᕆᐅᓪᓗᓂ ᐊᓪᓗᕆᐊᕐᓂᐅᕗᖅ ᑮᓇᐅᔭᖅᑖᕆᒋᐊᓕᖏᓐᓂᑦ Q-PFP ᓄᐊᓴᐃᓂᕐᒧᑦ, ᑲᓇᑕᒥ ᓄᓇᕐᔪᐊᓕᒫᒥᓗ ᑮᓇᐅᔭᓂᑦ ᑐᒃᓯᕌᒃᓴᖁᑎᓕᓐᓂᑦ ᐱᖃᑕᐅᓂᖃᓪᓚᕆᑦᑐᓂᑦ ᓴᓂᓕᖃᖅᑐᑎᒃ ᑲᓇᑕᐅᑉ ᒐᕙᒪᖓᑕ ᐃᑲᔪᖅᓰᔾᔪᑎᖏᓐᓂᑦ. ᑖᒃᑯᐊ ᐅᖃᐅᔾᔨᒋᐊᖅᑏᑦ ᑲᑎᒪᔩᑦ ᓇᐅᑦᓯᖅᓱᖃᑦᑕᓂᐊᖅᑐᑦ ᐱᕙᓪᓕᐊᑎᑕᐅᓂᖏᓐᓂᑦ ᐊᑐᓕᖅᑎᑕᐅᓂᖏᓐᓄᓪᓗ ᑮᓇᐅᔭᓂᑦ ᓄᐊᓴᐃᓂᕐᒧᑦ ᑐᑭᒧᐊᒍᑎᒃᓴᑦ.
