ᐅᖃᐅᓯᕆᓯᒪᔭᕗᒻᒥ: ᐅᖃᐅᓯᕆᖃᑦᑕᖅᓯᒪᔭᑦᑎᓐᓂ
2016ᖑᑎᓪᓗᒍ ᒐᕙᒪᑐᖃᒃᑯᑦ ᓄᖅᑲᑎᑦᑎᔪᒻᒪᑕ ᐅᖅᓱᐊᓗᓐᓂᐊᓂᕐᒥᒃ ᒑᓯᔅᓴᓂᐊᕐᓂᒥᓪᓗ ᐱᓕᕆᓂᐅᔪᓂᑦ ᐃᓘᓐᓇᖏᓐᓂ ᐃᑭᕐᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐃᒪᕕᒻᒥ. ᑖᓐᓇ ᑐᑭᑖᕈᑕᐅᔪᔪᖅ ᕿᒥᕐᕈᔭᐅᒃᑲᓐᓂᓛᖅᑐᖅ 2021ᖑᓕᖅᑲᑦ.
ᓄᓇᕗᑦ ᐊᕙᑎᓕᕆᓂᕐᒧᑦ ᑲᑎᒪᔨᖏᑦ ᐱᒋᐊᖅᑎᑦᑎᓚᐅᕐᓯᒪᒻᒪᑕ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕈᑎᖃᕐᓂᕐᒥᒃ ᐅᖅᓱᐊᓗᓐᓂᐊᓂᕐᒥ ᒑᓯᔅᓴᓂᐊᕐᓂᒥᓪᓗ ᐱᓕᕆᒍᑕᐅᔪᓂᑦ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ ᑭᐅᔾᔪᑎᒋᓪᓗᒍ ᓄᖅᑲᖓᑎᑦᑎᒍᑕᐅᔪᒧᑦ. ᐱᔾᔪᑎᖃᖅᑐᑎᒃ ᖃᐅᔨᓴᕈᑎᓖᑦ ᑐᑭᓯᔪᒪᓪᓗᑎᒃ ᑕᒪᑐᒧᖓ ᐊᑦᑐᐊᔪᓂᑦ ᐃᓱᒫᓗᓇᕐᓂᖏᓐᓂᒃ, ᐃᑲᔫᑎᖃᕐᓂᖏᓐᓂᒃ, ᐊᒻᒪᓗ ᐊᐅᓚᑦᑎᓂᕐᒧᑦ ᑐᑭᒧᐊᒍᑎᔅᓴᓂᑦ ᐃᑭᕐᒥ ᐅᖅᓱᐊᓗᓐᓂᐊᓂᕐᒧᑦ ᒑᓯᔅᓴᓂᐊᕐᓂᒧᓪᓗ ᓴᓐᓂᕈᑎᐅᑉᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ. ᖃᐅᔨᓴᕐᓂᕐᒥ ᐅᓂᒃᑳᓕᐊᖑᓯᒪᔪᑦ ᐊᒻᒪᓗ ᑕᒪᑐᒪ ᒥᔅᓵᓅᖓᔪᑦ ᐊᑐᓕᖁᔨᔾᔪᑕᐅᓯᒪᔪᑦ ᖃᐅᔨᒃᑲᐃᒍᑕᐅᓂᐊᕐᖓᑕ ᒐᕙᒪᑐᖃᒃᑯᓐᓄᑦ ᑐᑭᑖᕈᑕᐅᓛᖅᑐᒧᑦ 2021ᖑᓕᖅᑲᑦ.
2017ᒥ ᐱᒋᐊᖅᑐᑎᒃ, ᕿᑭᖅᑕᓂᒃᑯᑦ ᐃᓚᒋᔭᐅᓯᒪᒻᒪᑕ ᐱᔭᕆᐊᑭᓪᓕᑎᑦᑎᔨᓄᑦ ᖃᐅᔨᓴᕐᓂᕐᒥ ᖃᐅᔨᓴᕈᑕᐅᔪᒥ. ᑲᒪᒋᔭᖃᓪᓗᐊᑕᕐᓯᒪᔪᒍᓪᓕ ᐱᓕᕆᖃᑎᖃᖅᑐᑕ ᐃᓄᓐᓂᑦ ᓄᐊᑦᑎᓪᓗᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᖃᐅᔨᒃᑲᐃᒍᑕᐅᓂᐊᖅᑐᓂᑦ ᑭᖑᓪᓕᕐᐹᒥ ᐊᑐᓕᖁᔨᔾᔪᑕᐅᒐᔭᖅᑐᓄᑦ ᖃᐅᔨᓴᕐᓂᕐᒨᖓᔪᓂᑦ.
ᖃᐅᔨᓴᕈᑎᕗᑦ ᐊᒻᒪᓗ ᑐᑭᓯᐅᒪᔾᔪᑎᔅᓴᓂᑦ ᓄᐊᑦᑎᓂᕗᑦ ᑐᑭᒧᐊᑦᑎᑕᐅᓯᒪᔪᖅ ᐱᖓᓱᓄᑦ ᐊᐱᖅᑯᑕᐅᓯᒪᔪᓄᑦ:
- ᖃᓄᖅ ᐊᑑᑎᓂᖃᕐᓂᐊᖅᑲᑦ ᐃᒪᕐᒥᐅᑕᕐᓄᑦ ᐆᒪᔪᓄᑦ ᐅᖅᓱᐊᓗᓐᓂᐊᓂᕐᒥ ᒑᓯᔅᓴᓂᐊᕐᓂᒥᓪᓗ, ᐱᓕᕆᓂᐅᔪᑦ ᐅᑮᕕᖏᓐᓃᓕᖅᑎᓪᓗᒋᑦ, ᐊᐅᓪᓛᐸᓪᓕᐊᑎᓪᓗᒋᑦ ᐊᒻᒪᓗ ᓯᔾᔭᕐᐸᓯᕐᒦᑎᓪᓗᒋᑦ ᐊᐅᔭᒃᑯᑦ?
- ᖃᓄᖅ ᐃᓄᐃᑦ ᐊᑑᑎᕕᐅᓂᐊᖅᑲᑦ ᑕᒪᒃᑯᓄᖓ ᐊᑑᑎᔪᓐᓇᖅᑐᓄᑦ ᐊᑑᑎᕕᐅᑉᐸᑕ ᐃᒪᕐᒥᐅᑕᐃᑦ ᐆᒪᔪᑦ ᐅᖅᓱᐊᓗᓐᓂᐊᓂᕐᒧᑦ ᒑᓯᔅᓴᓂᐊᕐᓂᒧᓪᓗ, ᐊᒻᒪᓗ ᐊᓯᔾᔨᕐᓂᐊᖅᑲ ᓂᕿᔅᓴᓂᕝᕕᒋᕙᑦᑕᖏᓐᓅᖃᑦᑕᕈᓐᓇᕐᓂᖅ ᐊᒻᒪᓗ ᐃᓄᔅᓯᐅᑎᓂᒃ ᓂᕿᑖᖅᑎᑦᑎᖃᑦᑕᕐᓂᖅ?
- ᖃᓄᐃᑦᑑᒐᔭᖅᑲᑦ ᐱᕚᓪᓕᕈᑕᐅᔪᓐᓇᖅᑐᑦ ᐊᒻᒪᓗ ᐱᓇᓱᐊᕋᔅᓴᐅᒐᔭᖅᑐᑦ ᑕᕝᕙᙵᑦ ᐅᖅᓱᐊᓗᓐᓂᐊᖅᑐᓕᕆᔨᓂᑦ? ᐊᔾᔨᒌᙱᓐᓂᖏᑦ ᕿᒥᕐᕈᔭᐅᔪᓐᓇᖅᑳᑦ ᐊᑑᑎᒐᔭᙳᐊᖅᑐᓄᑦ?
ᐃᑲᔪᕈᒪᓪᓗᑎᒃ ᑭᐅᔭᐅᑎᑦᑎᓂᕐᒥᒃ ᑖᒃᑯᓂᖓ ᐊᐱᖅᑯᑎᓂᑦ, ᕿᑭᖅᑕᓂᒃᑯᑦ ᐋᖅᑮᓚᐅᕐᓯᒪᔪᑦ ᐱᖓᓲᔪᖅᑐᓂᑦ ᐃᓄᐃᑦ ᖃᐅᔨᒪᔭᑐᖃᖏᑕ ᒥᔅᓵᓄᑦ ᑲᑎᒪᔨᕋᓛᕐᓂᑦ, ᐊᑕᐅᓯᕐᒥᒃ ᐊᐅᓱᐃᑦᑐᕐᒥᑦ, ᐃᒃᐱᐊᕐᔪᒻᒥᑦ, ᒥᑦᑎᒪᑕᓕᒻᒥᑦ, ᑲᖏᖅᑐᒑᐱᒻᒥᑦ, ᕿᑭᖅᑕᕐᔪᐊᕐᒥᑦ, ᐸᓐᓂᖅᑑᒥᓪᓗ. ᑖᒃᑯᐊ ᑲᑎᒪᔨᕋᓛᑦ ᓇᓗᓇᐃᔭᐃᓯᒪᔪᑦ ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒥᒃ, ᓂᕿᔅᓴᕐᓯᐅᖃᑦᑕᓂᕐᒥᒃ, ᐊᒻᒪᓗ ᐃᓄᔅᓯᐅᑎᓂᑦ ᓂᕿᓂᑦ ᐊᐃᑦᑐᕐᓱᐃᖃᑦᑕᕐᓂᕐᒥᒃ ᖃᐅᔨᓴᕈᑕᐅᓯᒪᔪᓂᑦ.
ᕿᑭᖅᑕᓂᒃᑯᑦ ᐱᓕᕆᖃᑎᖃᖃᑦᑕᔪᔪᑦ ᑲᑎᒪᔨᕋᓛᕐᓂᑦ ᓄᐊᑦᑎᓪᓗᑎᒃ ᓄᓇᓖᑦ ᖃᐅᔨᒪᔭᖏᓐᓂᑦ ᐊᕙᑎᖏᓐᓂᑦ ᐊᒻᒪᓗ ᓴᓇᓪᓗᑎᒃ ᑕᖅᑮᑦ ᒪᓕᑦᑐᒋᑦ ᐅᓪᓗᕐᓯᐅᑎᓂᑦ ᓂᕐᔪᑏᑦ ᐱᐅᓯᕆᓲᖏᓐᓂᑦ ᐃᒫᓂ ᐊᕙᑖᓂ.
ᑖᒃᑯᐊ ᐊᖅᑯᑎᒋᓪᓗᒋᑦ ᑲᑎᒪᔨᕋᓛᑦ, ᐊᒻᒪᓗ ᐊᖅᑯᑎᒋᓪᓗᒍ ᐃᓛᒃᑰᖓᔪᖅ ᖃᐅᔨᓴᕈᑕᐅᓯᒪᔪᖅ ᒪᕐᕉᓐᓂᒃ ᐊᕐᕌᒎᓐᓂᒃ ᐊᓂᒍᖅᑑᓐᓂᒃ. ᕿᑭᖅᑕᓂᒃᑯᑦ ᓄᐊᑦᑎᓯᒪᔪᑦ ᑐᑭᓯᐅᒪᔾᔪᑎᔅᓴᓂᑦ ᐱᔾᔪᑎᓕᓐᓂᑦ ᐊᑑᑎᓂᕆᒐᔭᖅᑕᖏᓐᓂᒃ ᐅᖅᓱᐊᓗᓐᓂᐊᕐᓂᐅᑉ ᒑᓯᔅᓴᓂᐊᕐᓂᐅᓪᓗ
ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ ᑎᓴᒪᓂᑦ ᐱᔾᔪᑕᐅᔪᓂᑦ:
• ᐆᒪᔪᐃᑦ ᐊᒻᒪᓗ ᐆᒪᔪᐃᑦ ᓇᔪᒐᕆᕙᑦᑕᖏᑦ
• ᐃᓄᐃᑦ ᐃᓕᖅᑯᓯᖏᑕ ᐊᓯᔾᔨᕐᓂᖏᑦ
• ᐃᓄᐃᑦ ᓂᕿᓂᑦ ᐊᐅᓚᑦᑎᖃᑦᑕᕐᓂᖏᑦ
• ᐱᕚᓪᓕᕈᑎᔅᓴᑦ ᐊᒻᒪᓗ ᐱᓇᓱᐊᕋᔅᓴᐃᑦ ᐃᓄᓐᓄᑦ ᑐᕌᖓᔪᑦ
ᖃᐅᔨᓯᒪᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ, ᕿᑭᖅᑕᓂᒃᑯᑦ ᑐᓂᓯᓂᐊᖅᑐᑦ ᐊᕙᑎᓕᕆᔨᒃᑯᓐᓄᑦ 80ᓂᑦ ᐊᑐᓕᖁᔨᔾᔪᑎᖏᓐᓂᒃ. ᐊᑐᓕᖁᔨᔾᔪᑎᖏᑦ ᑎᑎᕋᖅᑕᐅᓯᒪᔪᑦ ᐊᑐᓂᑦ ᑎᓴᒪᓂᑦ ᐱᔾᔪᑎᒋᓗᐊᖅᑕᖏᓐᓂᒃ. ᐊᒻᒪᓗ ᓱᓕ, ᐊᑐᓕᖁᔨᔾᔪᑕᐅᔪᑦ ᐃᓛᒃᑰᖓᒻᒪᑕ ᐱᔭᕇᖅᑕᐅᒋᐊᖃᓛᖅᑐᑎᒃ ᑐᖔᓂ ᓄᖅᑲᖓᑎᑦᑎᒍᑕᐅᔫᑉ ᐊᓂᒍᕐᕕᔅᓴᖓᑕ, ᐊᒻᒪᓗ ᑕᐃᒃᑯᓄᖓ ᐃᓚᒋᔭᐅᒋᐊᖃᓛᖅᑐᓄᑦ ᖃᓄᑐᐃᓐᓇᖅ ᓚᐃᓴᓕᕆᓂᕐᒧᑦ ᐱᔾᔪᑎᓕᓐᓂᑦ ᓄᖅᑲᖓᑎᑦᑎᔾᔪᑕᐅᔪᖅ ᐊᑐᕈᓐᓃᖅᑎᑕᐅᓂᐊᖅᑲᑦ.
ᕿᑭᖅᑕᓂ ᓄᓇᓖᑦ ᐃᓄᐃᑦ ᐊᑐᖃᑦᑕᕐᖓᑕ ᐊᑑᑎᕙᓪᓕᐊᓂᖏᓐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐊᕙᑎᑦᑎᓐᓂ. ᕿᑭᖅᑕᓂᒃᑯᑦ ᐃᓱᒪᒋᔭᓖᑦ ᖃᐅᔨᓴᖅᑕᐅᔭᕆᐊᖃᖅᑐᒋᑦᑎᓪᓗᑎᒃ ᐅᖅᓱᐊᓗᓕᕆᓂᕐᒥᒃ ᒐᓯᓕᕆᓂᕐᒥᓪᓗ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ ᐊᑐᕐᓗᑎᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓅᖓᔪᓂᑦ ᖃᐅᔨᓴᕈᑕᐅᔪᓂᑦ.
ᕿᑭᖅᑕᓂᒃᑯᑦ ᐊᑐᓕᖁᔨᔾᔪᑎᖏᑦ ᖃᐅᔨᒃᑲᐃᒍᑕᐅᒐᔭᖅᑐᑦ ᐊᕙᑎᓕᕆᔨᒃᑯᓐᓄᑦ ᑐᑭᒧᐊᒍᑎᔅᓴᓂᑦ ᐊᕙᑎᓕᕆᓂᕐᒥ ᖃᐅᔨᓴᕈᑕᐅᓯᒪᔪᓂᑦ ᐅᓂᒃᑳᓂᑦ ᑐᓂᔭᐅᒐᔭᖅᑐᑎᒃ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ. ᕿᑭᖅᑕᓂᒃᑯᑦ ᖃᐅᔨᓴᕈᑎᖏᑦ ᐊᑐᓕᖁᔨᔾᔪᑎᒋᓯᒪᔭᖏᓪᓗ ᐃᑲᔪᖅᑕᐅᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᖃᐅᔾᔨᒋᐊᖅᑎᓄᑦ ᐊᒻᒪᓗ ᓄᓇᕗᑦ ᐊᖏᖃᑎᒌᒍᑎᖏᓐᓂᑦ ᐱᔾᔪᑕᐅᔪᓂᑦ.
