ᐅᐱᒍᓱᒃᐳᒍᑦ ᑭᖑᓪᓕᖅᐹᖑᓚᐅᖅᑐᓂᒃ ᐃᓕᓐᓂᐊᕌᓂᓚᐅᖅᑐᓂᒃ ᐅᖁᒪᐃᑦᑐᓕᕆᔾᔪᑎᓂᒃ ᓄᓇᓯᐅᕈᓐᓇᖅᓯᓂᕐᒥᒃ ᐃᓕᓐᓂᐊᖅᑎᓪᓗᒋᑦ ᒧᐊᕆᔅᐳᒡ ᐋᓐᑎᐊᕆᐆᒥ ᑎᓯᐱᕆ 10, 2018ᒥ.

ᑖᓐᓇ ᐃᓕᓐᓂᐊᕐᓂᖅ ᐱᒋᐊᕈᑕᐅᓯᒪᔪᒥᒃ ᕿᑭᖅᑕᓃᒃᑯᑦ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᑎᓂᕐᒧᓪᓗ ᐃᖅᑲᓇᐃᔮᒃᓴᓄᑦ ᑲᑐᔾᔨᒍᑕᐅᔪᒥᒃ ᐱᔪᓐᓇᕐᓂᖅᑖᕈᑕᐅᓂᐊᖅᑐᓂᒃ ᕿᑭᖅᑕᓂ ᓄᓇᓕᖕᓂ, ᑐᕌᖓᓂᖅᓴᐅᓪᓗᓂ ᐅᔭᕋᕐᓂᐊᕐᕕᖕᒥ ᐃᖅᑲᓇᐃᔭᕈᓐᓇᖅᓯᓂᕐᒧᑦ.  ᑖᓐᓇ ᕿᑭᖅᑕᓃᒃᑯᑦ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᑎᒧᓪᓗ ᐃᖅᑲᓇᐃᔮᒃᓴᓄᑦ ᑲᑐᔾᔨᒍᑕᐅᔪᒥᒃ ᐊᐅᓚᑕᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᑲᑐᔾᔨᖃᑎᖃᖅᖢᑎᒃ ᐸᕕᓐᓛᓐ ᓴᕕᕋᕙᒃᓴᓂᒃ ᐅᔭᕋᕐᓂᐊᕐᕕᓕᕆᔨᒃᑯᓐᓂᑦ, ᒐᕙᒪᑐᖃᒃᑯᓐᓂᑦ, ᓄᓇᕗᑦ ᒐᕙᒪᒃᑯᓐᓂ ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᒃᑯᑦ ᑎᓴᒪᒧᓄᑦ ᐊᕐᕌᒍᓄᑦ ᐱᓕᕆᐊᖑᓗᓂ ᑭᓪᓕᒋᔭᐅᓪᓗᓂ ᒪᔾᔨ 21, 2021ᒥ.

ᑎᓴᒪᐅᔪᖅᑑᔪᑦ ᕿᑭᖅᑕᓂᓐᖔᖅᑐᓂᒃ ᐃᓄᖕᓂᑦ ᐃᓕᓐᓂᐊᕌᓂᒃᑐᖃᓚᐅᖅᑐᖅ ᐅᖁᒪᐃᑦᑐᓕᕆᔾᔪᑎᓂᒃ ᓄᓇᓯᐅᑎᑐᕆᐅᕈᓐᓇᕐᓂᕐᒥᒃ ᑎᓯᐱᕆ 20, 2018ᒥ.  ᑖᓐᓇ ᐱᓕᒻᒪᒃᓴᖅᑎᑦᑎᓂᖅ ᐃᓕᓐᓂᐊᖅᑎᑦᑎᓂᕐᓗ ᐱᒋᐊᖅᓯᒪᓕᖅᑎᓪᓗᒍ ᓄᕖᕝᕙ 2017ᒥ, ᓇᓗᓇᐃᒃᑯᑕᖅᑖᖅᑎᑦᑎᓯᒪᓕᖅᑐᒍᑦ 54ᓂ ᐅᖁᒪᐃᑦᑐᓕᕆᔾᔪᑎᓂ ᓄᓇᓯᐅᕈᓐᓇᖅᓯᔪᓂᒃ.  ᐊᓯᖏᑦ ᐃᓕᓐᓂᐊᖃᑕᐅᓚᐅᖅᑐᑦ 53ᖑᓚᐅᖅᑐᑦ ᐃᖅᑲᓇᐃᔮᒃᓴᓄᑦ ᐸᕐᓇᒃᑕᐅᓪᓗᑎᒃ.  8ᖑᔪᑦ ᐃᓕᓐᓂᐊᓯᓐᓈᖅᑐᑦ ᐃᖅᑲᓇᐃᔭᖅᑎᑕᐅᓯᓐᓈᖅᑐᑦ ᐃᖅᑲᓇᐃᔭᓯᓐᓈᖅᑐᑎᒃ ᐃᓕᓐᓂᐊᖅᑎᑕᐅᕙᓪᓕᐊᔪᑦ ᐱᔭᕇᖅᐸᓪᓕᐊᓪᓗᑎᒃ.  ᑖᒃᑯᐊ ᐃᓕᓐᓂᐊᓯᓐᓈᖅᑐᑦ ᐃᖅᑲᓇᐃᔭᓯᓐᓈᖅᑐᓪᓗ ᐃᓕᓐᓂᐊᖅᑎᑕᐅᕙᑦᑐᑦ ᓴᓇᔪᓕᕆᓂᕐᒥᒃ ᐃᖅᑲᓇᐃᔮᕆᔭᐅᔪᓂᒃ ᓱᕐᓗ ᕿᔪᓕᕆᓂᕐᒥ, ᐅᐊᔭᓕᕆᓂᕐᒥ ᓱᓪᓗᓕᕆᓂᕐᒥ, ᐊᐅᖅᑲᖅᓴᐃᔨᐅᓂᕐᒥ ᐊᒻᒪᓗ ᐊᓯᖏᑦ.  ᑐᕌᒐᖃᖅᑐᑦ ᐃᖅᑲᓇᐃᔭᖅᑎᑦᑎᔪᒪᓪᓗᑎᒃ 25ᓂ ᓄᑖᓂᒃ ᐃᓕᓐᓂᐊᓯᓐᓈᕐᓂᐊᖅᑐᓂᒃ ᐃᖅᑲᓴᐃᔭᓯᓐᓈᕐᓂᐊᖅᑐᓂᓪᓗ ᓯᕗᓂᑦᑎᓐᓂ.

ᐃᓕᓐᓂᐊᖃᑕᐅᔪᒪᒍᕕᑦ ᑖᒃᑯᓇᓂ ᕿᑭᖅᑕᓃᒃᑯᑦ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᑎᓂᕐᒧᓪᓗ ᐃᖅᑲᓇᐃᔮᒃᓴᓄᑦ ᑲᑐᔾᔨᒍᑕᐅᔪᒥᒃ ᐊᑎᓕᐅᕈᓐᓇᖅᑐᑦ ᑕᑕᑎᕐᓗᒍ ᕿᑭᖅᑕᓃᒃᑯᑦ ᐃᓄᖕᓂᑦ ᐃᖅᑲᓇᐃᔭᕈᒪᔪᓂᒃ ᑐᑭᓯᒋᐊᕐᕕᖓᓄᑦ, ᑐᑦᑕᕐᕕᖕᒧᑦ.  ᑐᑦᑕᕐᕕᒃ ᐊᑎᓕᐅᖅᑐᖃᑐᐊᖅᑲᑦ ᐋᖅᑭᒃᓱᐃᒍᔾᔭᐅᑲᐅᑎᒋᓇᔭᖅᑐᖅ ᐊᒻᒪᓗ ᖃᐅᔨᒪᑎᑕᐅᖃᑦᑕᕐᓗᑎᒃ ᐃᖅᑲᓇᐃᔮᒃᓴᐅᔪᓂᒃ ᕿᑭᖅᑖᓗᖕᒥ.  ᑕᐃᒃᑯᐊ ᐊᑎᓕᐅᖅᓯᒪᔪᑦ ᐃᓚᒋᔭᐅᖃᑕᐅᖃᑦᑕᕈᓐᓇᖅᑐᑦ ᐃᓕᓐᓂᐊᕐᓂᕐᓂᒃ ᐱᓕᒻᒪᒃᓴᕐᓂᕐᓂᓪᓗ, ᐃᓚᒋᓗᒍ ᐃᓘᓐᓇᖏᓐᓂᒃ ᐃᓕᓐᓂᐊᕈᓐᓇᕐᓂᕐᒥᒃ, ᐃᓕᓐᓂᐊᓯᓐᓈᕐᓂᖅ ᐃᖅᑲᓇᐃᔭᓯᓐᓈᕈᓐᓇᕐᓂᕐᒥᓗ ᐊᒻᒪᓗ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᒐᒃᓴᖏᓐᓂᒃ ᐃᓕᓐᓂᐊᖃᑕᐅᔪᓐᓇᕐᓂᕐᒥᒃ.  550ᖑᔪᑦ ᐊᑎᓕᐅᖅᓯᒪᔪᑦ ᑐᑦᑕᕐᕕᒃᑯᓐᓄᑦ , ᐊᒻᒪᓗ ᑐᕌᒐᕆᔭᐅᓪᓗᑎᒃ ᐊᑎᓕᐅᖅᑐᖃᒃᑲᓐᓂᓛᕐᓂᖓᓂᒃ 1,500ᖑᔪᓂᒃ 2021ᖑᖅᓴᓂᖓᓄᑦ.

2018ᒥ, ᕿᑭᖅᑕᓃᒃᑯᑦ ᐋᔩᕋᕈᑎᖃᓚᐅᕐᒪᑕ ᓄᓘᔮᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᖅᑖᕐᓂᖏᓐᓂᒃ ᐊᖏᕈᑎᒥᒃ.  ᐊᖏᕈᑎᓂᑦ, ᐸᕕᓐᓛᓐᑯᑦ ᐃᖅᑲᓇᐃᔭᖅᑎᑖᖃᑦᑕᓕᖅᑐᑦ ᑎᑭᑎᑦᑎᕙᒃᖢᑎᒃ ᐃᓄᖕᓂᑦ 13ᓂᑦ ᓄᓇᓕᓕᒫᓂᑦ ᕿᑭᖅᑖᓗᖕᒥ.