ᐃᖃᓗᐃᑦ, ᓄᓇᕗᑦ, ᔫᓂ 27, 2024 – ᐅᓪᓛᖅ ᓄᓇᕗᑦ ᐃᖅᑲᖅᑐᐃᕕᐊᓂ, ᐱᒃᑯᓇᖅᑐᖅ ᒥᐊ ᒪᓅᑦᓯᐅ ᐃᓱᒪᓕᐅᕈᑎᖃᖅᑲᐅᒻᒪᑦ ᑖᓐᓇ ᐱᔾᔪᑎᒋᓪᓗᒍ ᐊᕐᓇᖅ ᑲᕇᒪ ᒫᓐᔨ ᐱᖓᓱᓄᑦ−ᐊᕐᕌᒍᓄᑦ ᑎᒍᔭᐅᖅᑲᖁᓪᓗᒍ ᐊᒻᒪᓗ ᐊᑭᓖᖁᓪᓗᒍ ᑕᒪᕐᒥᒃ ᑲᑎᑦᑐᒋᑦ ᐊᒥᓲᓂᓕᓐᓂᑦ $28,254.05ᓂᑦ ᑲᑭᕙᒃ ᑲᑐᔾᔨᖃᑎᒌᒃᑯᓐᓄᑦ. ᑖᓐᓇ ᖃᓄᐃᓕᔭᐅᓂᖓ ᑕᐃᒫᒃ ᐱᖁᔭᐅᓯᒪᔪᖅ ᐱᕋᔭᔅᓯᒪᓂᖓᓄᑦ ᓯᓚᐃᕐᕆᑦᑎᓯᒪᓪᓗᓂ ᓄᓇᕗᒻᒥᐅᓂᑦ ᐃᓄᓐᓂᑦ ᓄᓇᖃᖅᑳᖅᑐᓃᙶᕐᓯᒪᓂᕋᐃᓪᓗᓂ ᑎᓪᓕᒐᕈᑎᖃᕐᓯᒪᓂᕐᒧᑦ ᐊᒻᒪᓗ ᓯᕗᓪᓕᕐᐹᖑᓪᓗᓂ ᑕᐃᒫᒃ ᐱᕋᔭᓐᓂᕐᒧᑦ ᖃᓄᐃᓕᔅᓯᒍᑕᐅᒻᒪᑦ ᑲᓇᑕᒥ.

ᑎᓴᒪᐅᔪᙱᒐᖅᑐᑦ ᐊᕐᕌᒍᑦ ᐊᓂᒍᕐᖓᑕ ᐱᕋᔭᖃᑦᑕᓚᐅᖅᑎᓪᓗᒍ ᐱᒋᐊᕐᓂᑰᓪᓗᓂ 2016ᖑᑎᓪᓗᒍ ᐊᒻᒪᓗ ᖃᐅᔨᔭᐅᓕᓚᐅᕐᓯᒪᒻᒪᑦ 2023 ᐱᒋᐊᙵᕐᓂᖓᓂ, ᓈᒻᒪᖏᑦᑐᓕᓂᕐᒧᑦ ᐃᓄᓐᓄᑦ ᑖᓐᓇ ᐊᕐᓇᖅ ᒫᓐᔨ ᑭᒃᑰᓂᖏᓐᓂᒃ ᓯᓚᐃᕐᕆᑦᑎᔾᔪᑎᖃᕐᓯᒪᓪᓗᓂ ᐅᖓᑖᓄᑦ ᐱᓯᒪᒻᒪᑦ ᑮᓇᐅᔭᓂᑦ ᐊᓯᐅᔨᓂᑐᐃᓐᓇᐅᖏᒻᒪᑦ ᐊᒻᒪᓗ ᐱᓇᓱᐊᕋᔅᓴᓂᑦ ᐊᓯᐅᔨᓂᑐᐃᓐᓇᐅᖏᒻᒪᑦ ᐃᓄᓐᓄᑦ ᐃᓕᓐᓂᐊᖅᑎᓄᑦ ᑭᓯᐊᓂᓕ ᓈᒻᒪᖏᓪᓚᕆᑦᑐᒥᒃ ᐊᑐᕐᓯᒪᒻᒪᑦ ᐱᓇᓱᐊᕈᑕᐅᓯᒪᓪᓚᕆᑦᑐᓂᑦ ᐃᓱᒪᒋᔪᓐᓇᐃᖅᑎᒌᓯᒪᓗᑎᒃ ᓴᐃᒪᖃᑎᒌᓐᓂᕐᒥᒃ ᑲᓇᑕᒥᐅᓂᑦ ᓄᓇᖅᑲᑎᒌᓂᑦ. ᐅᓪᓗᒥ, ᓄᓇᕗᑦ ᐃᖅᑲᖅᑐᐃᕕᐊ ᑲᒪᒋᔭᖃᕈᓐᓇᖅᑲᐅᔪᑦ ᐃᓚᖏᓐᓂᒃ ᓈᒻᒪᖏᑦᑐᓕᒍᑕᐅᓯᒪᔪᓂᑦ ᐊᒻᒪᓗ ᑕᒪᒃᑭᑦᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᑦ  ᓂᕆᐅᑦᑐᑦ ᑖᓐᓇ ᑐᑭᑖᕈᑕᐅᔪᖅ ᓄᓇᓕᓐᓄᑦ ᐃᓱᒫᓗᖓᐃᕐᔫᒥᒍᑕᐅᓂᕆᐊᖓ ᑕᒪᑐᒧᖓ ᐊᑯᓂᐊᓗᒃ ᓈᒻᒪᖏᑦᑐᓕᒍᑕᐅᓯᒪᔪᒥᒃ ᓄᓇᓕᖁᑎᑦᑎᓐᓄᑦ. ᖁᔭᓐᓇᒦᕈᒪᔭᕗᑦ ᓄᐊᒃᑯᑦ ᐃᓚᒌᑦ ᑕᒪᑐᒥᖓ ᓈᒻᒪᖏᑦᑐᓕᔾᔪᑕᐅᓯᒪᔪᒥᒃ ᐅᖃᐅᓯᖃᓚᐅᕐᓯᒪᒻᒪᑕ ᐊᒻᒪᓗ ᖃᐅᔨᒪᒋᐊᑦᑎᐊᕈᑕᐅᖃᑦᑕᓂᐊᕐᖓᑦ ᐃᓚᒋᔭᐅᔾᔪᑎᑖᕐᓂᕐᒧᑦ ᐱᓕᕆᔾᔪᓯᐅᕙᑦᑐᑦ ᐱᑦᑎᐊᕐᓯᒪᖃᑦᑕᕋᓗᐊᕐᒪᖔᑕ ᓇᓗᓇᐃᔭᖅᑕᐅᓇᓱᑦᑎᓪᓗᒋᑦ ᑖᓐᓇ ᐱᔾᔪᑎᒋᓪᓗᒍ.

ᐊᒥᓱᕈᕐᐸᓪᓕᐊᑐᐃᓐᓇᕐᓂᖏᑦ ᓄᓇᖃᖅᑳᖅᑑᓂᕋᖅᑐᑎᒃ ᓯᓚᐃᕐᕆᔭᐅᓇᓱᑉᐸᑦᑐᑦ ᑲᖐᓱᕋᕈᑕᐅᖃᑦᑕᓕᕐᖓᑦ ᑕᒫᓂ ᐊᒻᒪᓗ ᐊᓯᖏᓐᓂᒃ ᓄᓇᖃᖅᑳᖅᑐᑦ ᓄᓇᓕᖏᓐᓂᑦ ᑕᒪᓐᓇ ᐅᖁᒪᐃᓪᓕᐅᕈᑕᐅᓪᓗᓂ ᓈᒻᒪᒍᓐᓃᖅᑎᑕᐅᔭᕇᕐᓂᑰᑎᓪᓗᒍ ᐃᓕᖅᑯᓯᖅᑎᒍᑦ ᐃᓕᓴᕐᓇᕈᑎᖏᓐᓂᒃ ᐊᒻᒪᓗ ᓄᓇᓕᓐᓂᑦ ᑕᒪᓐᓇ ᐊᑐᕈᑕᐅᔭᕇᕐᓯᒪᒻᒪᑦ ᐊᔾᔨᒌᙱᑐᒡᒍᑎᓂᑦ ᐃᓕᖅᑯᓯᕐᒥᒃ ᐊᓯᐅᑎᑦᑎᓂᕐᒥᒃ. ᑭᓪᓕᖃᖅᑐᑎᒃ ᒪᑭᑉᐸᓪᓕᕈᑎᒋᓯᒪᔭᖏᑦ ᐃᓱᒪᒋᔪᓐᓇᐃᖅᑎᒌᓐᓂᒃᑯᑦ ᐊᒻᒪᓗ ᐊᕐᕌᒍᒐᓵᓗᓐᓂᑦ ᐃᖅᑲᓇᐃᔮᖑᓯᒪᔪᑦ ᐋᔩᖃᑎᒌᒍᑎᖃᖅᑐᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᖃᕋᓱᐊᖅᑎᓪᓗᒋᑦ ᑕᒪᓐᓇ ᐊᐅᓚᔾᔭᑦᑕᐅᖃᑦᑕᕐᖓᑦ ᓄᓇᖃᖅᑳᕐᓯᒪᙱᑦᑐᑦ ᑭᒃᑯᑐᐃᓐᓇᐃᑦ ᑎᓪᓕᒐᖅᑎᓪᓗᒋᑦ ᐃᑲᔫᑎᐅᕙᑦᑐᓂᑦ ᑐᕌᖓᔪᓂᑦ ᓴᐳᔾᔨᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ. ᑕᐃᒫᒃ ᐱᕋᔭᖃᑦᑕᕐᓂᖅ ᑕᑯᔾᔪᑎᐅᒻᒪᑦ ᐃᑉᐱᒍᓱᙱᓐᓂᑐᐃᓐᓇᐅᖏᑦᑐᒥᒃ ᑕᒪᑐᒥᖓ ᐊᔅᓱᕈᐊᖑᓯᒪᓪᓚᕆᑦᑐᒥᒃ ᐊᒻᒪᓗ ᐊᑯᓂᐊᓗᒃ ᐃᖅᑲᓇᐃᔮᖑᓚᐅᖅᑐᓂᒃ ᐋᔩᖃᑎᒌᒍᑎᖃᖅᑎᓪᓗᒋᑦ ᐃᓄᐃᑦ ᓯᕗᓕᖅᑎᖏᓐᓄᑦ ᑭᓯᐊᓂᓕ ᐱᓕᕆᔾᔪᓯᕗᑦ ᓇᒻᒥᓂᖅ−ᒐᕙᒪᖃᕐᓂᕐᒥᒃ ᐊᒻᒪᓗ ᐃᓄᓐᓄᑦ ᓄᓇᖅᑲᑎᒌᓄᑦ ᑕᒪᕐᒥᒃ.

ᕿᑭᖅᑕᓂᒃᑯᑦ ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᑦ ᓂᕆᐅᑉᐳᑦ ᑖᓐᓇ ᖃᓄᐃᓕᔅᓯᒍᑕᐅᔪᖅ ᑐᑭᓯᒍᑕᐅᓪᓚᕆᓐᓂᐊᕆᐊᖓ ᑭᓇᑐᐃᓐᓇᕐᒧᑦ ᐱᕋᔭᐃᒐᔭᕆᐊᔅᓴᖅ ᐃᓱᒪᖃᕐᓯᒪᔪᓄᑦ ᐱᕋᔭᑦᑕᐃᓕᒍᑕᐅᓗᓂ ᐃᓄᓐᓄᑦ ᓄᓇᓕᓐᓄᑦ ᓯᕗᓂᔅᓴᑎᓐᓂ. ᑕᐃᒫᒃ ᓱᓕ, ᓂᐱᒋᔭᐅᖃᑦᑕᓂᐊᖅᑐᒍᑦ ᐃᓄᐃᑦ ᐱᔪᓐᓇᐅᑎᖏᑦ ᐱᔾᔪᑎᒋᓪᓗᒋᑦ, ᐃᓚᒋᔭᐅᓪᓗᑎᒃ ᐃᓕᓐᓂᐊᕐᓂᓕᕆᓃᑦ ᐊᒻᒪᓗ ᐱᔪᓐᓇᐅᑎᑖᖅᑎᑦᑎᒍᑕᐅᓯᒪᔪᑦ ᐃᓄᓐᓄᑦ ᓄᓇᕗᑦ ᐊᖏᖃᑎᒌᒍᑎᖏᑎᒍᑦ.

ᑐᑭᓯᒃᑲᓐᓂᕆᐊᖃᕈᕕᑦ, ᖃᐅᔨᒋᐊᕐᕕᒃᓴᖅ:

ᑭᐊᕋᓐ ᕙᓚᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓂᒃ ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅ) 867.975.8398
ᐊᑭᖃᙱᑦᑐᒧᓪᓘᓐᓃᑦ 1.800.667.2742
kflaherty@qia.ca

ᒥᐅᕆᐊᓇ ᐹᓂ
ᐊᐅᓚᑦᑎᔨ, ᓂᐅᕐᕈᑎᓅᖓᔪᓂᑦ, ᑐᓴᐅᒪᖃᑦᑕᐅᑎᔾᔪᑎᓄᑦ ᐊᒻᒪᓗ ᑐᓴᐅᒪᑎᑦᑎᖃᑦᑕᓂᕐᒧᑦ
ᑲᑭᕙᒃ ᑲᑐᔾᔨᖃᑎᒌᑦ
ᐃᕐᖐᓈᖅᑕᐅᑖ: Mbarney@kakivak.ca
ᐅᖄᓚᐅᑖ: 867-979-8970