ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔮᔅᓴᖅ
ᐃᖅᑲᓇᐃᔮᖅ: ᓄᓇᓕᓐᓂᑦ ᑐᓴᐅᒪᑎᑦᑎᔨ
ᐋᖅᑭᓯᒪᓂᖓ: ᐃᖅᑲᓇᐃᔮᖑᐃᓐᓇᓂᐊᖅᑐᖅ
ᓇᒥ: ᑭᒻᒥᕈᑦ, ᓄᓇᕗᑦ
ᐃᖅᑲᓇᐃᔮᔅᓴᖅ ᓄᓇᕗᒻᒥᐅᓄᑦ ᐃᓄᓐᓄᑐᐊᖅ ᑐᕌᖓᓪᓗᓂ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐃᖅᑲᓇᐃᔭᖅᑎᓴᕐᓯᐅᕐᖓᑕ ᑐᕚᕆᔭᐅᔪᓐᓇᖅᑐᒥᒃ, ᓄᓇᓕᓐᓂᑦ ᖃᐅᔨᒪᑦᑎᐊᖅᑐᒥᒃ, ᐱᖃᓐᓂᖅᑐᒥᒃ ᐊᒻᒪᓗ ᐱᔪᒪᓂᖃᑦᑎᐊᖅᑐᒥᒃ ᐃᖅᑲᓇᐃᔮᖃᕋᔭᖅᑐᒥᒃ ᓄᓇᓕᓐᓂᑦ ᑐᓴᐅᒪᑎᑦᑎᔨᐅᓂᕐᒥᒃ, ᑕᕝᕙᓂ ᐃᖅᑲᓇᐃᔮᕐᒥ ᐃᑲᔪᖃᑦᑕᕋᔭᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ (ᕿᑭᖅᑕᓂᒃᑯᓐᓂ), ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ (ᓄᓇᕗᑦ ᑐᙵᕕᒃᑯᓐᓂᑦ), ᑐᓴᐅᒪᖃᑦᑕᐅᑎᖃᑎᖃᖃᑦᑕᕐᓗᓂ ᓄᓇᓕᓐᓂᑦ ᐱᔾᔪᑎᒋᓪᓗᒋᑦ ᐃᖅᑲᓇᐃᔮᕐᒨᖓᔪᑦ ᐃᓄᐃᑦ ᑎᒥᖁᑎᖏᓐᓅᖓᔪᑦ.
ᓄᓇᓕᓐᓂᑦ ᑐᓴᐅᒪᑎᑦᑎᔨ (ᑐᓴᐅᒪᑎᑦᑎᔨ) ᐊᐅᓚᓂᕐᓄᑦ ᐃᖅᑲᓇᐃᔮᖃᓪᓗᐊᑕᓲᖑᒻᒪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ. ᒪᓕᑉᐸᑦᑐᓂ ᑎᓕᓯᔾᔪᑎᒋᕙᑦᑕᖏᓐᓂᒃ ᑐᓴᐅᒪᑎᑦᑎᔨᐅᑉ ᑐᑭᒧᐊᑦᑎᑦᑎᔨᖓᓂᒃ, ᐊᖏᔪᖅᑲᐅᑏᑦ ᐊᓪᓚᕝᕕᐊᓂ, ᑐᓴᐅᒪᑎᑦᑎᔨ ᐊᐅᓚᑦᑎᔾᔪᑕᐅᕙᑦᑐᓄᑦ, ᑐᓴᐅᒪᑎᑦᑎᔨᐅᖃᑦᑕᕐᖓᑦ ᓄᓇᓕᓐᓂᑦ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐃᓄᐃᑦ ᓄᓇᖓᓐᓂ ᐱᕚᓪᓕᕈᑎᖃᖃᑦᑕᕋᓗᐊᕐᒪᖔᑕ ᐊᑐᓕᖅᑎᑦᑎᕙᓪᓕᐊᓂᕐᒥᒃ ᕿᑭᖅᑕᓂᒃᑯᓐᓂᑦ ᐱᕚᓪᓕᕈᑎᔅᓴᓂᑦ, ᓄᓇᕗᑦ ᐊᖏᖃᑎᒌᒍᑎᖏᓐᓂᒃ (NA), ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ (ᓄᓇᕗᑦ ᑐᙵᕕᒃᑯᓐᓂᑦ) ᐃᑲᔫᑎᐅᕙᑦᑐᓂᑦ.
ᑕᕝᕙᓂ ᐃᖅᑲᓇᐃᔮᕐᒥ ᐃᑲᔪᖃᑦᑕᓂᐊᖅᑐᖅ ᕿᑭᖅᑕᓂᒃᑯᑦ ᐊᑑᑎᓕᒻᒥᒃ ᐃᓪᓗᒌᓐᓂᒃ ᑐᓴᐅᒪᖃᑦᑕᐅᑎᖃᑎᖃᖃᑦᑕᕆᐊᖃᕐᓂᖏᓐᓂᒃ ᓄᓇᓕᓐᓂᑦ. ᑐᓴᐅᒪᑎᑦᑎᔨ ᑐᕚᕆᔭᐅᖃᑦᑕᓂᐊᕐᖓᑦ ᑐᓂᓯᐅᖅᑲᐃᖃᑦᑕᓂᕐᒧᑦ ᑐᑭᓯᓯᒪᔾᔪᑎᔅᓴᓂᑦ ᓄᓇᖅᑲᑎᓐᓄᑦ ᐊᒻᒪᓗ ᓄᐊᑦᑎᖃᑦᑕᕐᓗᓂ ᑐᑭᓯᐅᒪᔾᔪᙱᔅᓴᓂᑦ ᐊᒻᒪᓗ ᑭᐅᔾᔪᑕᐅᕙᑦᑐᓂᑦ ᑐᓴᖅᑎᑦᑎᖃᑦᑕᓂᕐᒥᒃ ᐊᓪᓚᕕᒻᒧᑦ. ᑕᕝᕙᓂ ᐃᖅᑲᓇᐃᔮᕐᒥ ᐃᓘᓐᓇᖏᓐᓅᖓᔪᓂᑦ ᐃᖅᑲᓇᐃᔮᖃᖃᑦᑕᓂᐊᖅᑐᖅ ᑕᐃᒫᒃ ᖃᐅᔾᔨᑎᖃᑦᑎᐊᕆᐊᖃᖃᑦᑕᓂᐊᖅᑐᖅ ᓯᕕᑐᔪᒨᖓᔪᓂᑦ ᕿᑭᖅᑕᓂᒃᑯᑦ ᑎᑎᖅᑲᖁᑎᖏᓐᓂᒃ, ᐊᑐᐊᒐᖏᓐᓂᒃ, ᐊᐅᓚᔾᔪᓯᖏᓐᓂᓪᓗ ᐃᖅᑲᓇᐃᔮᓕᒃ ᑕᐃᒫᒃ ᐊᑑᑎᓕᒻᒥᒃ ᑲᔪᓯᑎᑦᑎᑎᐊᖃᑦᑕᓂᐊᕐᖓᑦ ᑲᒪᒋᖃᑦᑕᕆᐊᓕᖏᓐᓂᒃ ᐊᒻᒪᓗ ᐊᑑᑎᖃᕐᓂᕆᒋᐊᖃᖅᑕᖓᓂᒃ ᑲᔪᓯᑎᑦᑎᑎᐊᕐᓂᐊᕐᖓᑦ ᐃᖅᑲᓇᐃᔮᖓᓂᒃ.
ᐃᖅᑲᓇᐃᔮᖃᕐᓂᐊᖅᑐᖅ ᑐᓴᐅᒪᖃᑦᑕᐅᑎᖃᑎᖃᕈᓐᓇᑦᑎᐊᕆᐊᓕᒃ ᐊᒻᒪᓗ ᐱᓕᕆᖃᑎᖃᕈᓐᓇᑦᑎᐊᕆᐊᓕᒃ, ᐊᓪᓚᕕᒻᒥ ᐊᐅᓚᑦᑎᔾᔪᑕᐅᕙᑦᑐᓂᑦ ᐃᓕᓯᒪᑦᑎᐊᕐᓗᓂ, ᐊᒻᒪᓗ ᓇᒻᒥᓂᕐᓱᕐᓗᓂ ᐃᖅᑲᓇᐃᔭᕈᓐᓇᕐᓗᓂ, ᐊᒻᒪᓗᑦᑕᐅᖅ ᑲᒪᒋᔭᖃᕈᓐᓇᕐᓗᓂ ᐱᔭᕆᐊᑐᔪᓂᑦ ᖃᓄᐃᓐᓂᐅᔪᓂᑦ. ᐊᓪᓚᕝᕕᒻᒥ ᐊᐅᓚᑦᑎᔾᔪᑎᓂᑦ ᐃᖅᑲᓇᐃᔮᖃᕐᓯᒪᓗᓂ, ᐊᒻᒪᓗᑦᑕᐅᖅ ᖃᐅᔾᔨᑎᖃᑦᑎᐊᕐᓗᓂ ᖃᕋᓴᐅᔭᒃᑯᑦ ᑎᑎᖅᑭᕆᔾᔪᑕᐅᓲᓂᑦ. ᐃᑲᔪᖅᑕᐅᔭᖅᑐᐸᑦᑐᓄᑦ ᐃᑲᔪᖃᑦᑕᓂᕐᒥᒃ ᐃᖅᑲᓇᐃᔮᖃᕐᓯᒪᔭᕆᐊᓕᒃ. ᑕᕝᕙᓂ ᐃᖅᑲᓇᐃᔮᕐᒥ ᑐᑭᓕᐅᕆᖃᑦᑕᕆᐊᖃᕋᔭᖅᑐᖅ ᑕᐃᒫᒃ ᐃᓄᒃᑎᑑᕈᓐᓇᑦᑎᐊᕆᐊᓕᒃ ᖃᓪᓗᓇᐅᔭᕈᓐᓇᑎᐊᕐᓗᓂᓗ.
ᐱᐅᓯᕆᔭᐅᒐᔪᑦᑐᖅ, ᐃᓕᓐᓂᐊᕐᕕᐊᓗᒻᒥ ᐱᔭᕇᕐᓯᓯᒪᓂᖓᓄᑦ ᐸᐃᑉᐹᖃᕆᐊᓕᒃ ᐅᕝᕙᓘᓐᓃᑦ ᓇᓕᒧᑕᖓᓂᒃ. ᐊᓪᓚᕝᕕᒻᒥ ᐊᐅᓚᑦᑎᔾᔪᑎᓕᕆᓂᕐᒥᒃ ᐸᐃᑉᐹᖅᑖᕐᓯᒪᓗᓂ ᐊᑑᑎᖃᑦᑎᐊᕋᔭᕐᒥᔪᖅ. ᑕᒪᒃᑮᓐᓂᒃ ᑕᒪᑐᒪ ᒥᔅᓵᓄᑦ ᐃᓕᓐᓂᐊᕐᓯᒪᑉᐸᑦ ᐃᖅᑲᓇᐃᔮᖃᕐᓯᒪᑉᐸᓪᓗ ᓈᒻᒪᒋᔭᐅᔪᓐᓇᕐᒥᔪᖅ ᓇᓕᒧᑦᑎᓂᖓᓄᑦ ᑕᒪᑐᒥᖓ.
ᑮᓇᐅᔾᔭᔅᓵᖏᑦ ᐱᒋᐊᕈᑎᔅᓴᓖᑦ ᐊᒥᓲᓂᓕᓐᓂᑦ $64,698ᓂᑦ $97,890ᓄᑦ/ ᐊᕐᕌᒍᑕᒫᑦ, ᐊᒻᒪᓗᑦᑕᐅᖅ $27,600/ᐊᕐᕌᒍᑕᒫᑦ− ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐃᑲᔫᓯᐊᖅᑖᖃᑦᑕᕐᓗᓂ. ᐃᓪᓗᖃᖅᑎᑦᑎᒍᑕᐅᔾᔮᖏᑦᑐᖅ.
ᑕᐃᒃᑯᐊ ᑭᓯᒥ ᐊᐱᖅᓱᖅᑕᐅᔪᒪᔪᑦ ᖃᐅᔨᒋᐊᖅᑕᐅᓂᐊᖅᑐᑦ.
ᐃᖅᑲᓇᐃᔮᖅᑖᕋᓱᐊᕈᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᑐᔫᑎᒋᓗᒋᑦ ᐅᕗᖓ:
Human Resources ᐅᖄᓚᐅᑖ: (867) 975-8400
Qikiqtani Inuit Association ᓱᒃᑲᔪᒃᑰᕈᑖ: (867) 979-3238
200-922 Sivumugiaq St ᐃᕐᖐᓈᖅᑕᐅᑖ: Resumes@qia.ca
Iqaluit, NU X0A 3H0
ᒪᑐᕕᔅᓴᓕᒃ: ᐅᑐᐱᕆ 4, 2024 5:00ᒥ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ
