ᐃᖅᑲᓇᐃᔭᖅᑎᓄᑦ/ᐃᓄᓕᒫᓄᑦ ᐃᖅᑲᓇᐃᔮᔅᓴᖅ
ᐃᖅᑲᓇᐃᔮᖅ: ᐊᐅᓚᑦᑎᔨ ᑐᓴᐅᖃᑦᑕᐅᑎᔾᔪᑎᓄᑦ
ᐋᖅᑭᓯᒪᓂᖓ: ᐃᖅᑲᓇᐃᔮᖑᐃᓐᓇᕈᒫᕐᓂᐊᖅᑐᖅ
ᓇᒥ: ᐃᖃᓗᐃᑦ, ᓄᓇᕗᑦ
ᒪᑐᐃᖓᔪᖅ: ᓯᕗᓪᓕᐅᔾᔭᐅᓂᐊᖅᑐᑦ ᐃᓄᐃᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᐊᖏᖃᑎᒌᒍᑎᖏᓐᓂᑦ
ᑐᓴᐅᒪᔾᔪᑕᐅᔭᕆᐊᓕᓐᓂᑦ ᑐᓴᐅᒪᑎᑦᑎᖃᑦᑕᓲᖑᕖᑦ ᐃᑉᐱᒍᓱᓪᓚᕆᑦᑐᑎᓪᓗ ᓄᓇᓕᓐᓂᑦ ᐃᓚᒋᔭᐅᑎᑦᑎᖃᑦᑕᕆᐊᔅᓴᖅ? ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᖅᑲᓇᐃᔭᖅᑎᓴᕐᓯᐅᕐᖓᑕ ᐊᐅᓚᑦᑎᔨᔅᓴᒥᒃ ᑐᓴᐅᒪᖃᑦᑕᐅᑎᔾᔪᑎᓄᑦ ᓯᕗᓕᕐᓯᖃᑦᑕᓂᐊᖅᑐᒥᒃ ᐃᓄᓕᒫᓅᖓᔪᓂᑦ, ᖃᕋᓴᐅᔭᒃᑯᑦ ᑐᓴᐅᒪᒍᑕᐅᖃᑦᑕᕆᐊᓕᓐᓂᑦ ᐊᒻᒪᓗ ᑐᓴᕋᔅᓴᓂᑦ ᑐᓴᐅᒪᑎᑦᑎᒍᑕᐅᔭᕆᐊᓕᓐᓂᑦ.
ᐊᐅᓚᑦᑎᔨ ᐸᕐᓇᐃᓲᖅ, ᑐᑭᒧᐊᑦᑎᑦᑎᓱᖅ ᐊᒻᒪᓗ ᖃᐅᔨᓴᖃᑦᑕᓲᖅ ᖃᐅᑕᒫᑦ ᑐᓴᐅᒪᑎᑦᑎᒍᑕᐅᖃᑦᑕᕆᐊᓕᓐᓂᑦ ᐊᒻᒪᓗ ᑐᓴᐅᒪᑎᑦᑎᓂᕐᒧᑦ ᐸᕐᓇᐃᓂᕐᒧᑦ ᐅᖃᐅᔾᔨᒋᐊᖃᑦᑕᓲᖅ ᐊᓪᓚᕝᕕᖓᓐᓂ, ᖃᐅᔨᒪᒋᐊᑦᑎᐊᖃᑦᑕᖅᑐᓂᓗ ᐃᓘᓐᓇᑎᒃ ᑐᓴᐅᒪᑎᑦᑎᖃᑦᑕᓂᕐᒨᖓᔪᑦ ᑲᒪᒋᔭᐅᖃᑦᑕᕋᓗᐊᕐᒪᖔᑕ ᑐᑭᒧᐊᑦᑎᑕᐅᑦᑎᐊᖅᑐᑎᒃ ᑐᓴᐅᒪᔭᐅᔾᔪᑎᒋᖃᑦᑕᓂᐊᖅᑕᖏᓐᓂᒃ ᐊᒻᒪᓗ ᑐᓴᐅᒪᒃᑲᓐᓂᕈᑕᐅᖃᑦᑕᓂᐊᖅᑐᓂᑦ ᑎᒥᐅᑉ ᒪᑭᑕᑦᑎᐊᕐᓂᖓᓂᒃ ᐊᒻᒪᓗ ᑐᓴᕈᒥᓇᖅᑐᓂᑦ ᑕᕝᕙᙶᖅᑐᓂᑦ.
ᑕᕝᕙᓂ ᐊᑑᑎᖃᓪᓚᕆᑦᑐᒥᒃ ᐃᖅᑲᓇᐃᔮᕐᒥ, ᒪᑯᓂᖓ ᐃᖅᑲᓇᐃᔮᖃᖃᑦᑕᓂᐊᖅᑐᑎᑦ:
- ᐃᖅᑲᓇᐃᔮᖃᖃᑦᑕᕐᓗᑎᑦ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᕐᓂᖏᓐᓂᒃ ᐊᒻᒪᓗ ᐃᓄᓕᒫᓄᑦ ᑐᓴᕋᔅᓴᓕᕆᔾᔪᑕᐅᕙᑦᑐᓂᑦ;
- ᐃᖅᑲᓇᐃᔮᖃᖃᑦᑕᕐᓗᑎᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂᒃ ᑲᒪᔨᐅᓂᕐᒥᒃ;
- ᐋᖅᑭᔅᓱᐃᖃᑦᑕᕐᓗᑎᑦ ᐋᖅᑭᐅᒪᑎᑦᑎᖃᑦᑕᕐᓗᑎᓪᓗ ᐱᓕᕆᖃᑎᖃᖃᑦᑕᓂᔅᓯᓐᓂᒃ ᑐᓴᕋᔅᓴᓕᕆᔨᓂᑦ ᐊᒻᒪᓗ ᐊᑑᑎᕕᐅᓪᓗᐊᑕᕐᐸᑦᑐᓂᑦ;
- ᑐᓴᕋᔅᓴᓕᕆᔾᔪᑎᓂᑦ ᐃᑲᔪᕐᓱᐃᖃᑦᑕᕐᓗᑎᑦ ᓯᕗᓕᖅᑎᓪᓗᐊᑕᐅᔪᓂᑦ ᑐᓴᖅᑕᐅᑎᑦᑎᓂᐊᖅᑎᓪᓗᒋᑦ ᐊᒻᒪᓗ ᐊᐱᕐᓱᖅᑕᐅᓂᐊᖅᑎᓪᓗᒋᑦ ᖃᓄᖅ ᐅᖃᓕᒪᔭᕆᐊᖃᕐᒪᖔᑕ;
- ᖃᐅᔨᒪᒋᐊᑦᑎᐊᖃᑦᑕᕐᓗᑎᑦ ᑐᑭᓯᓇᑦᑎᐊᕋᓗᐊᕐᒪᖔᑕ, ᑕᐃᒫᔅᓴᐃᓐᓇᐅᒐᓗᐊᕐᒪᖔᖅ, ᐊᒻᒪᓗ ᐊᑑᑎᖃᖃᑦᑕᕋᓗᐊᕐᒪᖔᑕ ᑐᓴᐅᒪᑎᑦᑎᒍᑕᐅᕙᑦᑐᑦ ᐃᓄᓐᓄᑦ, ᐱᓇᓱᐊᕋᔅᓴᓕᐅᖅᑎᓄᑦ, ᒐᕙᒪᒃᑯᓐᓄᑦ ᐊᒻᒪᓗ ᐃᓄᓕᒫᓄᑦ.
ᑐᑭᒧᐊᑦᑎᑦᑎᔨᖃᕐᓗᓂ ᑐᑭᒧᐊᑦᑎᑦᑎᔨᖓᓐᓂᒃ ᑐᓴᐅᒪᖃᑦᑕᐅᑎᔾᔪᑎᓄᑦ, ᑕᕝᕙᓂ ᐃᖅᑲᓇᐃᔮᕐᒥ ᐸᕐᓇᐃᖃᑦᑕᓂᐊᖅᑐᖅ, ᐊᐅᓚᑦᑎᖃᑦᑕᕐᓗᓂᓗ ᓯᕗᓪᓕᐅᔾᔨᖃᑦᑕᕐᓗᓂᓗ ᕿᑭᖅᑕᓂᒃᑯᑦ ᐃᖅᑲᓇᐃᔭᕐᕕᖓᓐᓂ ᓯᓚᑖᓄᓪᓗ ᑐᓴᐅᒪᖃᑦᑕᐅᑎᔾᔪᑕᐅᔭᕆᐊᓕᓐᓂᑦ. ᑖᓐᓇ ᐱᓕᕆᖃᑎᒌᒍᑎᒋᖃᑦᑕᕆᐊᖃᕐᓂᐊᖅᑕᖓ ᑐᑭᒧᐊᑦᑎᑦᑎᔨᒧᑦ ᐊᒻᒪᓗ ᐊᓪᓚᕝᕕᖓᓂ ᓯᕗᓕᖅᑎᓂᑦ ᐋᖅᑭᔅᓱᐃᖃᑦᑕᓂᐊᕐᖓᑕ ᐱᓕᕆᔾᔪᓯᐅᖃᑦᑕᓂᐊᖅᑐᓂᑦ ᐊᒻᒪᓗ ᓇᓗᓇᐃᕐᓯᖃᑦᑕᓂᐊᕐᖓᑕ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᐋᖅᑭᒋᐊᕐᓯᖃᑦᑕᓂᕐᒧᑦ ᕿᑭᖅᑕᓂᒃᑯᓐᓂᑦ ᓯᓚᑖᓄᓪᓗ ᑐᓴᐅᒪᑎᑦᑎᔾᔪᑕᐅᔭᕆᐊᓕᓐᓂᑦ. ᐃᖅᑲᓇᐃᔮᓕᒃ ᐱᓕᕆᖃᑎᖃᕈᓐᓇᕆᐊᓕᒃ ᐊᓪᓚᕝᕕᓕᒫᖏᓐᓂᒃ ᐊᒻᒪᓗ ᓯᕗᓕᖅᑎᓪᓗᐊᑕᖏᓐᓂᒃ. ᐊᐅᓚᑦᑎᔨ, ᐅᖃᖃᑎᖃᕐᓯᒪᓗᓂ ᑐᑭᒧᐊᑦᑎᑦᑎᔨᒥᒃ, ᐋᖅᑭᔅᓱᐃᖃᑦᑕᓂᐊᖅᑐᖅ ᑐᓴᐅᒪᑎᑦᑎᔾᔪᑕᐅᔭᕆᐊᓕᓐᓂᑦ, ᐊᐅᓚᑦᑎᖃᑦᑕᕐᓗᓂᓗ ᐊᒻᒪᓗ ᐊᑐᓕᖅᑎᑦᑎᖃᑦᑕᕐᓗᓂ ᓄᓇᓕᓐᓄᑦ ᑐᑭᓯᒋᐊᕈᑎᓂᑦ, ᑐᓴᕋᔅᓴᓕᕆᒍᑕᐅᓂᐊᖅᑐᓂᑦ ᐊᒻᒪᓗᑦᑕᐅᖅ ᐃᓄᓕᒫᓄᑦ ᑲᑎᖃᑎᒌᒍᑕᐅᓂᐊᖅᑐᓂᑦ. ᑖᓐᓇ ᐃᖅᑲᓇᐃᔮᖅ ᐃᑲᔪᕐᓰᒍᑕᐅᓲᖅ ᑎᒥᐅᔪᒧᑦ ᐊᑐᓕᖅᑎᑦᑎᖃᑦᑕᓂᒃᑯᑦ ᑐᓴᐅᒪᑎᑦᑎᒍᑎᔅᓴᓂᑦ ᐊᒻᒪᓗ ᐸᕐᓇᐅᑎᓂᑦ ᐱᔾᔪᑎᓕᓐᓂᑦ ᕿᑭᖅᑕᓂᒃᑯᑦ ᐃᖅᑲᓇᐃᔮᕆᕙᑦᑕᖏᓐᓂᒃ ᐱᓕᕆᐊᕆᕙᑦᑕᖏᓐᓂᓪᓗ ᐃᑲᔫᑎᒋᓪᓗᒋᑦ. ᐊᐅᓚᑦᑎᔨ ᖃᐅᔨᓴᖃᑦᑕᓂᐊᖅᑐᖅ ᐃᓗᓕᖏᓐᓂᒃ, ᐅᐸᓗᖓᐃᔭᐃᖃᑦᑕᕐᓗᓂ ᐅᓂᒃᑳᓂᑦ, ᑎᑎᕋᕈᑕᐅᓯᒪᔪᓂᑦ ᐊᒻᒪᓗ ᐃᓕᓐᓂᐊᕈᑎᔅᓴᓅᖓᔪᓂᑦ ᑕᐃᒫᒃ ᑲᒪᒋᔭᕆᐊᓕᖏᑦ ᒪᓕᓪᓗᒋᑦ.
ᐊᐅᓚᑦᑎᔨ ᓯᕗᓕᕐᓯᖃᑦᑕᓂᐊᖅᑐᖅ ᑐᑭᒧᐊᑦᑎᑦᑎᖃᖃᑦᑕᕐᓗᓂᓗ ᑐᓴᐅᒪᖃᑦᑕᐅᑎᑎᑦᑎᓂᕐᒧᑦ ᐃᖅᑲᓇᐃᔭᖃᑎᒌᓂᑦ, ᐊᐅᓚᑦᑎᖃᑦᑕᕐᓗᓂ ᖃᕋᓴᐅᔭᒃᑯᑦ ᑐᓴᕋᔅᓴᓕᕆᕕᑦᑎᒍᓪᓗ ᑐᓴᐅᒪᑎᑦᑎᔾᔪᑕᐅᒋᐊᓕᓐᓂᑦ, ᐋᖅᑭᔅᓱᐃᖃᑦᑕᕐᓗᓂ ᐱᓕᕆᖃᑎᒌᓐᓂᐅᓂᐊᖅᑐᓂᑦ ᓴᓇᐅᒐᕐᓄᑦ ᐱᔨᑦᑎᕋᐅᑎᓄᓪᓗ, ᐋᖅᑭᔅᓱᐃᖃᑦᑕᕐᓗᓂ ᓈᒻᒪᑦᑐᓂᑦ ᐱᓕᕆᔾᔪᑎᓂᑦ ᐊᐅᓚᑦᑎᓂᕐᒧᑦ, ᑐᓂᓯᐅᖅᑲᐃᓂᕐᒧᑦ ᐊᒻᒪᓗ ᓂᐱᓕᐅᕆᖃᑦᑕᓂᕐᒧᑦ ᑐᓴᐅᒪᖃᑦᑕᐅᑎᔾᔪᑎᓂᑦ. ᑕᕝᕙᓂ ᐃᖅᑲᓇᐃᔮᕐᒥ ᐱᕙᓪᓕᐊᖏᓐᓇᖅᑐᓂᑦ ᐊᒻᒪᓗ ᓄᑖᓂᑦ ᐃᓱᒪᖃᐃᓐᓇᕆᐊᓕᒃ ᑕᐃᒫᒃ ᑐᓴᐅᒪᑎᑕᐅᖃᑦᑕᓂᐊᕐᖓᑕ ᑐᓴᐅᒪᑎᑕᐅᕙᑦᑐᑦ ᓄᑖᓂᑦ ᐊᑐᖃᑦᑕᕐᓗᑎᒃ ᐊᒻᒪᓗ ᐃᓕᑦᑐᐸᓪᓕᐊᓗᑎᒃ ᓄᑖᓄᑦ ᐱᐅᓯᕆᔭᐅᕙᓪᓕᐊᔪᓄᑦ ᑐᓴᕋᔅᓴᓕᕆᓂᕐᒥ ᐃᓱᕐᕆᐅᑎᓕᕆᓂᕐᒥᓪᓗ. ᑕᕝᕙᓂ ᐃᖅᑲᓇᐃᔮᕐᒥ ᕿᒥᕐᕈᓲᑦ ᖃᐅᔨᓴᖃᑦᑕᓲᖑᓪᓗᑎᓪᓗ ᑐᓴᐅᒪᑎᑦᑎᓂᕐᒧᑦ ᑐᔅᓯᕋᐅᑕᐅᓯᒪᔪᓂᑦ ᐊᒻᒪᓗ ᐅᖃᐅᔾᔨᒋᐊᕈᑕᐅᓲᖑᓪᓗᑎᒃ ᑐᓴᐅᒪᖃᑦᑕᐅᑎᓂᕐᒧᑦ ᐸᕐᓇᐅᑎᓂᑦ ᐊᐅᓚᔾᔪᓯᐅᔭᕆᐊᓕᓐᓂᓪᓗ. ᐃᓚᒋᔭᐅᑎᑦᑎᒍᓐᓇᕆᐊᓕᒃ ᑭᒃᑯᑐᐃᓐᓇᕐᓄᑦ ᐊᑑᑎᕕᐅᕙᑦᑐᓂᑦ, ᐃᓚᒋᔭᐅᓪᓗᑎᒃ ᒐᕙᒪᒃᑯᓐᓂᑦ ᐱᓕᕆᕝᕕᐅᔪᑦ, ᓄᓇᓕᓐᓂᑦ ᑲᑐᔾᔨᖃᑎᒌᑦ, ᐊᒻᒪᓗ ᓴᓇᕕᒻᒥ ᑲᑐᔾᔨᖃᑎᒋᕙᑦᑕᖏᑦ. ᓯᕗᓕᕐᓯᖃᑦᑕᓂᕐᒥᒃ ᐊᔪᙱᓐᓂᖃᑦᑎᐊᕆᐊᓕᒃ ᐊᒻᒪᓗ ᐅᖃᐅᓯᒃᑯᑦ ᑎᑎᖅᑲᑎᒍᓪᓗ ᑐᓴᐅᒪᖃᑦᑕᐅᑎᖃᑎᖃᕈᓐᓇᑦᑎᐊᕆᐊᓕᒃ ᑕᕝᕙᓂ ᐃᖅᑲᓇᐃᔮᖃᑦᑎᐊᕈᓐᓇᓂᐊᕐᖓᑦ.
ᑕᕝᕙᓂ ᐃᖅᑲᓇᐃᔮᓕᒃ ᑐᑭᓯᐅᒪᑦᑎᐊᕆᐊᓕᒃ ᑐᓴᐅᒪᖃᑦᑕᐅᑎᓂᕐᒧᑦ ᐱᐅᓯᕆᔭᐅᓲᓂᑦ, ᐊᑐᖅᑕᐅᒐᔪᑉᐸᑦᑐᓂᑦ, ᓇᓗᓇᐃᒃᑯᑕᐅᕙᑦᑐᓂᑦ, ᑐᓴᕋᔅᓴᓕᕆᒍᑕᐅᕙᑦᑐᓂᑦ ᐊᒻᒪᓗ ᑐᓴᐅᒪᑎᑕᐅᕙᑦᑐᓂᑦ ᐃᓚᒋᔭᐅᑎᑦᑎᖃᑦᑕᓂᕐᒥᒃ. ᐃᖅᑲᓇᐃᔮᖅᑖᕋᓱᑦᑐᑦ ᑐᑯᑎᑦᑎᓯᒪᔭᕆᐊᓕᒃ ᑎᓴᒪᓂᑦ (4) ᐊᕐᕌᒍᓂᑦ ᐃᖅᑲᓇᐃᔮᖃᕐᓯᒪᓂᖓᓂᒃ ᐱᕙᓪᓕᐊᔾᔪᑎᒋᓪᓗᒍ ᑐᓴᐅᒪᑎᑦᑎᖃᑦᑕᓂᕐᒧᑦ ᐃᖅᑲᓇᐃᔮᕆᓯᒪᔭᖏᓐᓂᒃ. ᑲᒪᖃᑦᑕᓕᓂᐅᒋᐊᓕᒃ ᐅᐸᓗᖓᐃᔭᐃᖃᑦᑕᓂᕐᒥᒃ, ᐅᖃᓕᒫᑦᑎᐊᖃᑦᑕᓂᕐᒥᒃ ᐊᒻᒪᓗ ᓇᑲᑎᕆᖃᑦᑕᓂᕐᒥᒃ ᑐᓴᕋᔅᓴᓂᑦ, ᐅᖃᐅᓯᐅᓂᐊᖅᑐᓂᑦ, ᑐᑭᓯᑎᑦᑎᒍᑕᐅᓂᐊᖅᑐᓂᑦ ᐊᒻᒪᓗ ᐊᓯᖏᓐᓂᒃ ᑐᓴᐅᒪᑎᑦᑎᒍᑕᐅᓂᐊᖅᑐᓂᑦ. ᐋᖅᑭᔅᓱᐃᔪᓐᓇᕆᐊᓕᒃ ᖃᕋᓴᐅᔭᒃᑯᑦ ᑐᓴᐅᒪᑎᑦᑎᒍᑕᐅᓂᐊᖅᑐᓂᑦ ᓴᖅᑭᔮᖅᑎᑦᑎᒍᑕᐅᓂᐊᖅᑐᓂᓪᓗ, ᐊᒻᒪᓗ ᖃᐅᔨᓴᖃᑦᑕᕐᓗᓂ ᐊᑑᑎᖃᑦᑎᐊᕐᒪᖔᑕ ᕿᒥᕐᕈᖃᑦᑕᓂᒃᑯᑦ ᐊᒻᒪᓗ ᑎᑎᖅᑲᑎᒍᑦ. ᓯᕗᓕᕐᓯᖃᑦᑕᕐᓯᒪᔭᕆᐊᓕᒃ ᐃᖅᑲᓇᐃᔭᖃᑎᒌᓂᑦ ᐅᕝᕙᓘᓐᓃᑦ ᑐᑭᒧᐊᑦᑎᑦᑎᖃᑦᑕᕐᓯᒪᓗᓂ ᐊᓯᖏᓐᓂᒃ ᑕᒪᓐᓇ ᐊᑑᑎᖃᑦᑎᐊᕋᔭᕐᒥᔪᖅ ᑕᕝᕙᓂ ᐃᖅᑲᓇᐃᔮᔅᓴᒥ. ᓇᓗᖅᑯᑎᙱᑎᐊᕐᓗᓂ ᐃᓄᓕᒫᑦ ᓵᖓᓂ ᓂᓪᓕᐊᖃᑦᑕᓂᕐᒥᒃ ᐊᒻᒪᓗ ᐅᓂᒃᑳᖃᑦᑕᓂᕐᒥᒃ ᑕᒪᓐᓇ ᐊᑑᑎᖃᕐᓂᕐᐹᖑᓂᐊᕐᒥᔪᖅ ᑕᕝᕙᓂ ᐃᖅᑲᓇᐃᔮᔅᓴᒥ. ᐃᖅᑲᓇᐃᔮᖅᑖᕋᓱᑦᑐᑦ ᐃᓄᑦᑎᑑᕈᓐᓇᑎᐊᖅᑐᑦ ᐃᖅᑲᓇᐃᔭᖅᑎᑖᖑᔪᒪᔪᑦ.
ᐱᔭᕇᕐᓯᓯᒪᔪᑦ ᑐᓴᐅᒪᖃᑦᑕᐅᑎᖃᑦᑕᓂᕐᒥᒃ, ᖃᕋᓴᐅᔭᒃᑯᑦ ᓴᖅᑭᔮᖅᑐᔅᓴᓕᕆᓂᕐᒥᒃ, ᐃᓄᓕᒫᓅᖓᔪᓂᑦ ᑐᓴᕋᔅᓴᓕᕆᓂᕐᒥᒃ ᐅᕝᕙᓘᓐᓃᑦ ᓂᐅᕐᕈᓯᕆᖃᑦᑕᓂᕐᒥᒃ ᑕᒪᒃᑯᓂᖓ ᐃᓕᓐᓂᐊᕐᓯᒪᖁᒍᒥᓇᖅᑐᑦ ᑖᔅᓱᒥᖓ ᐃᖅᑲᓇᐃᔮᖃᕈᒪᓂᐊᖅᑐᑦ. ᑕᒪᒃᑮᓐᓂᒃ ᑕᒪᑐᒪ ᒥᔅᓵᓄᑦ ᐃᓕᓐᓂᐊᕐᓯᒪᑉᐸᑦ ᐊᒻᒪᓗ ᐃᖅᑲᓇᐃᔮᖃᕐᓯᒪᑉᐸᑦ ᓈᒻᒪᒋᔭᐅᔪᓐᓇᕐᒥᔪᖅ ᓇᓕᒧᑦᑎᓂᖓᓂᒃ ᐃᓱᒪᒋᔭᐅᒐᔭᕐᖓᑦ. ᐱᓕᕆᐊᕐᒥ ᐊᐅᓚᑦᑎᖃᑦᑕᓂᕐᒥᒃ ᓇᓗᓇᐃᒃᑯᑕᖅᑖᕈᑎᖃᕐᓯᒪᑉᐸᑦ ᐊᑑᑎᖃᑦᑎᐊᕋᔭᖅᑐᖅ.
ᑮᓇᐅᔾᔭᔅᓵᕆᓂᐊᖅᑕᖏᑦ ᑖᔅᓱᒥᖓ ᐃᖅᑲᓇᐃᔮᔅᓴᒥᒃ ᑕᒫᓃᑦᑐᑦ $94,558ᓂᑦ $119,773ᓄᑦ ᐊᕐᕌᒍᑕᒫᑦ, ᐊᒻᒪᓗᑦᑕᐅᖅ ᓄᓇᕗᒻᒥ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐃᑲᔫᓯᐊᖅᑖᖃᑦᑕᕋᔭᖅᑐᓂ $27,600 ᐊᕐᕌᒍᑕᒫ.
ᓇᒻᒪᑦᑐᒥᒃ ᐱᕋᔭᓚᐅᕐᓯᒪᙱᒃᑲᓗᐊᕐᒪᖔᖅ ᖃᐅᔨᓴᖅᑕᐅᔾᔪᑎᖃᕐᓯᒪᔭᕆᐊᓕᒃ. ᐃᓪᓗᖃᖅᑎᑦᑎᒍᑕᐅᔾᔮᖏᑦᑐᖅ ᑖᓐᓇ.
ᐊᐱᕐᓱᖅᑕᐅᒍᒪᒐᔭᖅᑐᑦ ᑭᓯᐊᓂ ᐅᖃᕐᕕᐅᖃᑦᑕᓛᕐᒥᔪᑦ.
ᐃᖅᑲᓇᐃᔭᖅᑖᕋᓲᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᓇᔅᓯᐅᑎᓗᒋᑦ ᐅᕗᖓ:
Human Resources ᐃᕐᖐᓈᖅᑕᐅᑖ: Resumes@qia.ca
Qikiqtani Inuit Association ᐅᖄᓚᐅᑖ: (867) 975-8400
200-922 Sivumigiaq Street ᓱᒃᑲᔪᒃᑰᕈᑖ: (867) 979-3238
Igluvut building, 2nd floor ᑕᑯᓂᐊᕐᓗᒍ: Tuttarvik.qia.ca
Iqaluit, NU X0A 3H0
ᒪᑐᕕᔅᓴᖓᑕ ᐅᓪᓗᖓ: ᐄᐳᓗ 4, 2025, 5:00ᒥ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ
