ᐃᓴᒪᖃᑎᒌᓐᓂᖅ ᐊᑭᓕᕐᓱᐃᓂᕐᒥᒃ ᐊᑐᙱᖔᕐᓗᑎᒃ – ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ
ᓱᒻᒪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᑭᒃᑯᑐᐃᓐᓇᕐᓄᑦ ᐊᑭᓕᖅᑕᐅᔾᔪᑎᔅᓴᓂᑦ ᐱᓇᓱᐊᕈᑎᖃᕐᓯᒪᙱᓚᑦ ᐃᓄᓐᓄᑦ ᐊᑑᑎᕕᐅᓯᒪᔪᓄᑦ ᐃᓅᓯᖏᑦ ᐊᓯᕈᖅᑕᐅᒐᓱᑦᑎᓪᓗᒋᑦ ᐊᑐᐊᒐᓕᐊᓄᑦ ᐱᓕᕆᔾᔪᓯᐅᔪᓄᓪᓗ ᑕᒪᒃᑯᐊ ᑎᑎᕋᕈᑕᐅᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ (ᑭᓪᓕᓯᓂᐊᖅᑎᓂᑦ)?
- ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔾᔪᑎᖃᕐᓂᕐᓴᐅᔪᔪᑦ ᓴᐃᒻᒪᖃᑎᒌᓐᓂᕐᒥᒃ, ᐊᑭᓕᕐᓱᐃᔾᔪᑎᔅᓴᐅᙱᖔᖅᑐᓂᑦ.
- ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐋᖅᑭᑦᑕᐅᓚᐅᕐᓯᒪᔪᑦ, ᐱᓇᓱᐊᕋᔅᓴᖃᖅᑐᑎᒃ “ᐊᑐᖅᑎᑦᑎᒋᐊᒃᑲᓂᕐᓂᕐᒥᒃ ᒪᒥᓴᕐᓂᕐᒥᒃ ᑕᐃᒃᑯᓄᖓ ᐱᒡᒐᓇᖅᑐᒃᑰᕈᑎᖃᕐᓯᒪᔪᓂᑦ ᐱᑦᑎᐊᖅᑕᐅᓯᒪᙱᑦᑐᓄᑦ ᐊᒻᒪᓗᑦᑕᐅᖅ ᓴᐃᒻᒪᖃᑎᒌᖁᓪᓗᒋᑦ ᐃᓄᐃᑦ ᒐᕙᒪᒃᑯᓪᓗ ᐱᕕᖃᖅᑎᑦᑎᓗᑎᒃ ᓴᖅᑭᐊᑎᑦᑎᓂᕐᒥᒃ ᐃᓘᓐᓇᖏᓐᓂᒃ ᑕᒪᑐᒪ ᒥᔅᓵᓅᖓᔪᓂᑦ ᐊᑐᖅᑕᐅᓯᒪᔪᓂᑦ ᐊᒻᒪᓗ ᐱᕕᖃᖅᑎᑦᑎᓗᑎᒃ ᐃᓕᓴᕐᓯᓂᕐᒥᒃ ᐃᓱᒪᒋᔪᓐᓇᐃᕐᓯᓂᕐᒥᓪᓗ.”
- ᐊᑐᐊᒐᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐃᒪᐃᓕᖓᓪᓚᑦᑖᕐᖓᑕ “ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᑭᓕᕐᓱᐃᔪᓐᓇᖏᑦᑐᑦ, ᑭᓯᐊᓂᓕ ᐊᑐᓕᖁᔨᔾᔪᑎᓕᐅᕈᓐᓇᖅᑐᑦ ᓴᐃᒻᒪᖃᑎᒌᓐᓂᕐᒥᒃ ᐊᑐᖅᑕᐅᑎᑦᑎᒋᐊᒃᑲᓐᓂᖁᔨᓂᕐᒥᒃ.”
- ᕿᑭᖅᑕᓂᒃᑯᑦ ᑐᑭᑖᕈᑎᖃᕐᓯᒪᔪᑦ ᑲᔪᓯᑎᑦᑎᒍᒪᓪᓗᑎᒃ ᓴᐃᒪᖃᑎᒌᓐᓂᕐᒥᒃ, ᐃᓱᒪᒋᔪᓐᓇᐃᖅᑎᒌᓪᓗᑎᒃ ᐅᐊᑦᑎᐊᕈ ᐊᑭᕋᒥᓂᖏᓐᓂᒃ ᐱᖁᔨᕗᖔᕈᑎᒃᑯᑦ RSA 15-10-17.
- ᑖᓐᓇ ᐱᔾᔪᑎᒋᓪᓗᒍ, ᕿᑭᖅᑕᓂᒃᑯᑦ ᑲᑎᒪᔨᖏᑦ ᐱᖁᔨᕗᖔᕈᑎᖃᓚᐅᕐᓯᒪᔪᑦ ᕿᑭᖅᑕᓂᒃᑯᑦ ᐱᓇᓱᐊᕈᑎᖃᔾᔮᖏᒋᐊᔅᓴᖏᓐᓂᒃ ᓇᒻᒥᓂᖅ ᐊᑭᓕᖅᑕᐅᔾᔪᑎᔅᓴᓂᑦ.
- ᕿᑭᖅᑕᓂ ᓄᓇᓖᑦ ᐃᓄᐃᑦ, ᑭᓯᐊᓂᓕ, ᐃᓱᒪᕐᓱᖅᑐᑦ ᐱᓇᓱᐊᕈᒪᒍᑎᒃ ᓇᒻᒥᓂᖅ ᐊᑭᓕᖅᑕᐅᔾᔪᔅᓴᓂᑦ.
ᐱᓇᓱᐊᕈᒪᓂᐊᕈᔅᓯ ᓇᒻᒥᓂᖅ ᐊᑭᓕᖅᑕᐅᔾᔪᑎᔅᓴᓂᑦ:
- ᑐᑭᓯᒋᐊᕐᕕᖃᕈᓐᓇᖅᑐᓯ ᒪᓕᒐᓕᕆᔨᒥᒃ ᒪᓕᒐᓕᕆᔾᔪᑏᑦ ᒥᔅᓵᓄᑦ ᑐᑭᓯᒋᐊᕐᕕᒋᓗᒋᑦ.
- ᒪᓕᒐᓕᕆᔩᑦ ᓄᓇᕗᒻᒥ ᐊᐅᓚᓂᖃᕐᐸᑦᑐᑦ ᑕᑯᔭᔅᓴᐅᕗᑦ ᓄᓇᕗᑦ ᒪᓕᒐᓕᕆᓂᕐᒧᑦ ᑲᑐᔾᔨᖃᑎᒌᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂ lawsociety.nu.ca
Recommended Posts