ᓴᖅᑭᑕᖅ: ᐄᐳᓪ 27, 2021
ᐱᔾᔪᑦ: ᕿᑭᖅᑕᓃᒃᑯᑦ ᓄᖅᑲᖓᑎᑦᑎᔪᑦ ᐃᓚᓕᐊᕆᐊᓕᖕᓄᑦ ᐃᓚᙵᖅᑐᓄᓪᓗ ᐱᓕᕆᐊᖓᓂ ᓄᕙᓐᓇᕐᔪᐊᖅ-19 ᓯᐊᒻᒪᒃᐸᓪᓕᐊᓂᖓᓄᑦ ᐃᖃᓗᓐᓂ ᑭᙵᕐᓂᓗ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᓄᖅᑲᖓᑎᑦᑎᑲᐃᓐᓇᕐᓂᐊᖅᑐᑦ ᐃᓚᙵᖅᑐᓄᑦ ᐃᓚᓕᐊᕆᐊᓕᖕᓄᓪᓗ ᐱᓕᕆᐊᖓᓂᒃ ᑎᑭᓪᓗᒍ ᑕᒪᑐᒪᐅᑉ ᒥᒃᓵᓄᑦ ᑐᓴᖅᑎᑦᑎᓚᐅᙲᓐᓇᖅᑎᓪᓗᒋᑦ. ᑖᓐᓇ ᑐᑭᑖᕈᑎᒋᔭᐅᔪᖅ ᑲᔪᓯᓚᐅᖅᑐᖅ ᑎᓕᐅᖅᑕᐅᑎᓪᓗᒋᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓯᕗᓕᖅᑎᐅᔪᓄᑦ ᓄᖅᑲᖓᖁᔨᓯᒪᑎᓪᓗᒋᑦ ᐊᐅᓚᖃᑦᑕᕐᓂᕐᒥᒃ ᓯᐊᒻᒪᖁᓇᒍᑦ ᓄᕙᓐᓇᕐᔪᐊᖅ-19 ᕿᑭᖅᑕᓂ ᓄᓇᓕᖕᓄᑦ.

ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᖃᑎᖃᖅᑐᑦ ᐃᓚᒌᓂ ᒫᓐᓇ ᐃᖏᕐᕋᔪᓄᑦ ᐃᓚᙵᖅᑐᓄᑦ ᐃᓚᓕᐊᕆᐊᓕᖕᓄᓪᓗ ᐊᑐᖅᑐᓂᒃ ᐃᑲᔪᖅᑐᖅᑕᐅᑦᑎᐊᖏᓐᓇᖁᓪᓗᒋᑦ.  ᓈᒻᒪᒃᐸᑦ, ᕿᑭᖅᑕᓃᒃᑯᑦ ᐃᑲᔪᕈᓐᓇᖅᑐᑦ ᐃᓄᖕᓂᑦ ᐊᖏᕐᕋᕈᑎᒃᓴᓄᑦ ᐊᑦᑕᕐᓇᙱᓐᓂᖅᐹᒃᑯᑦ.

ᑭᓇᑐᐃᓐᓇᖅ ᐊᐅᓚᓚᐅᕈᓂᒃ ᐃᖃᓗᓐᓂᑦ ᐄᐳᓪ 7, 2021 ᑭᖑᓂᐊᓂᑦ ᑎᓕᔭᐅᓯᒪᕗᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓯᕗᓕᖅᑎᖏᓐᓄᑦ ᐃᓄᑑᒋᐊᖃᕐᓗᑎᒃ 14ᓄᑦ ᐅᓪᓗᓄᑦ ᐊᒻᒪᓗ ᐃᖕᒥᓂᒃ ᖃᐅᔨᓴᐃᓐᓇᕐᓗᓂ ᐃᒃᐱᖕᓂᐊᓕᙱᒃᑲᓗᐊᕐᒪᖔᑦ ᓄᕙᓐᓇᕐᔪᐊᖅ-19ᒥᑦ ᓱᕐᓗ ᐆᓇᖅᓯᖃᑦᑕᓕᕈᕕᑦ, ᖁᐃᖅᓱᖃᑦᑕᕈᕕᑦ ᐅᕝᕙᓘᓐᓃᑦ ᐊᓂᖅᓵᖅᑐᑦᑎᐊᕈᓐᓇᙱᒃᑯᕕᓪᓘᓐᓃᑦ.

ᐃᓚᒌᑦ ᓇᔪᖃᑎᖃᖅᑐᓄᑦ ᐃᓄᑑᒋᐊᖃᖅᑐᓂᒃ, ᐊᐅᓪᓚᓚᐅᙱᒃᑲᓗᐊᖅᑎᓪᓗᒍ ᓇᖕᒥᓂᖅ, ᐃᖕᒥᓂᑦᑕᐅᖅ ᖃᐅᔨᓴᕐᓂᐊᖅᐳᑦ, ᐊᓂᑦᑕᐃᓕᓗᑎᒃ ᐊᒻᒪᓗ ᖃᓂᖃᓗᐊᖅᑕᐃᓕᓗᑎ  ᐊᒻᒪᓗ ᒪᑐᐊᖅᓯᒪᐃᓐᓇᕐᓗᑎ.

ᐱᐅᓂᖅᐹᖑᔪᒃᑯᑦ ᓴᐳᑎᓯᒪᔪᓐᓇᖅᑐᑎᑦ ᓄᕙᓐᓇᕐᔪᐊᖅ-19ᒥᑦ ᕿᑭᖅᑕᓂ ᑲᐱᔭᐅᓂᖅ ᓄᕙᓐᓇᕐᔪᐊᖅᑕᒌᒃᑯᑎᒥᒃ.  ᐊᑦᑕᕐᓇᙱᑦᑐᖅ ᐊᒻᒪᓗ ᓴᐳᑎᓯᒪᑦᑎᐊᕈᓐᓇᕐᒪᑦ ᐃᓕᖕᓂᑦ ᖃᓂᒪᓇᕐᒧᑦ.  18ᓂ ᐊᕐᕌᒍᖃᕈᕕᑦ, ᐊᑏᑦ ᐱᕕᖃᖅᐳᑎᑦ ᓱᓕ ᐃᓂᒃᓴᓕᐅᕈᒪᓗᑎᑦ ᐋᓐᓂᐊᕐᕕᔅᓯᓐᓄᑦ.

ᐅᓪᓗᒥ 49ᖑᔪᑦ ᓄᕙᓐᓇᕐᔪᐊᖅ-19ᑖᖅᓯᒪᔪᓂᒃ ᓄᓇᕗᙵ.  ᑭᒡᓕᖃᖅᑎᑦᑎᓂᖅ ᐃᖏᕐᕋᓂᕐᒥᒃ ᐃᑲᔪᕈᓐᓇᖅᑐᑦ ᓄᕙᓐᓇᕐᔪᐊᖅ−19ᑖᖅᑕᐃᓕᓂᕐᒧᑦ ᐃᓄᖕᓂ ᐊᒻᒪ ᓴᐳᑎᓯᒪᓂᐊᖅᖢᓂ ᓄᓇᓕᔅᓯᓐᓂ.

ᖃᓄᐃᓐᓂᐅᔪᑦ ᐊᓯᔾᔨᖅᐸᓪᓕᐊᖏᓐᓇᖅᑎᓪᓗᒋᑦ, ᕿᑭᖅᑕᓃᒃᑯᑦ ᑐᑭᑖᕈᑎᒋᓯᒪᔭᖓᓂᒃ ᕿᒥᕐᕈᖃᑦᑕᕐᓂᐊᖅᑐᑦ ᐱᐅᓂᖅᐹᒃᑯᑦ ᐱᔭᐅᔭᕆᐊᓖᑦ ᖃᓄᖅ ᑲᔪᓯᑎᑕᐅᔪᓐᓇᕋᔭᕐᓂᖏᑦ ᐃᓄᖕᓄᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᕕᐅᓪ ᕼᐋᑉᑭᓐᔅ,
ᑭᖑᕝᕕᖅᓯᒪᔪᖅ ᑐᑭᒧᐊᒃᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
876.975.8413 or
1.800.667.2742