ᑐᓴᖅᑎᑦᑎᒍᑕᐅᓂᖓᑕ ᐅᓪᓗᖓ: ᒫᑦᓯ 16, 2020

ᐱᔾᔪᑎᒋᓪᓗᒋᑦ: ᕿᑭᖅᑕᓂᒃᑯᑦ ᐊᑐᓕᖅᑎᑦᑎᓂᖏᓐᓄᑦ ᐳᕝᕕᕆᓂᕐᒧᑦ ᖃᓂᒪᓐᓇᕐᒧᑦ COVID-19 ᖃᓂᒻᒪᑦᑕᐃᓕᓂᕐᒧᑦ ᐊᑐᖅᑕᐅᓂᐊᖅᑐᓂᑦ ᐊᒻᒪᓗ ᐸᓚᕐᔫᒥᑎᑦᑎᒋᐊᕐᓂᕐᒥᒃ

ᕿᑭᖅᑕᓂᒃᑯᑦ ᓯᕗᓪᓕᐅᔾᔨᖃᑦᑕᕐᖓᑕ ᐃᓅᓯᖏᓐᓂᒃ ᐃᖅᑲᓇᐃᔭᖅᑎᑦᑕ ᓄᓇᓕᖁᑎᑦᑕᓗ, ᐊᒻᒪᓗ ᑐᑭᑖᕈᑎᖃᕐᓯᒪᓪᓗᑎᒃ ᐃᑲᔪᕐᓱᐃᓂᐊᕐᓂᕐᒥᒃ ᐃᓄᓕᒫᓄᑦ ᐃᓅᓯᓕᕆᔨᐅᕙᑦᑐᓂᑦ ᐃᑲᔪᖅᑎᒌᑦᑐᑕ ᐃᖅᑲᓇᐃᔮᖃᖅᑎᓪᓗᑕ ᖃᓂᒻᒪᑦᑕᐃᓕᑎᑦᑎᓂᕐᒥᒃ ᐊᒻᒪᓗ ᓇᒧᓕᒫᖅ ᓯᐊᒻᒪᖁᓇᒍ ᐳᕝᕕᕆᓂᕐᒧᑦ ᖃᓂᒪᓐᓇᖅ COVID-19. ᕿᑭᖅᑕᓂᒃᑯᑦ ᐊᐅᓚᓂᖏᓐᓄᑦ ᑐᑭᑖᕈᑎᖃᖃᑦᑕᕐᓂᐅᓴᒻᒪᑕ ᐃᓱᒪᒋᓪᓗᒍ ᐳᕝᕕᕆᓂᕐᒧᑦ ᖃᓂᒪᓐᓇᖅ COVID-19 ᖃᓂᒻᒪᒍᑕᐅᖁᓇᒍ, ᐸᓚᕐᔫᒥᑎᑦᑎᒋᐊᕈᑕᐅᖁᓪᓗᒍ, ᐊᒻᒪᓗ ᖃᓄᖅᑑᕈᑎᖃᕐᓂᕐᒥᒃ ᐊᑐᕐᓗᑎᒃ ᓇᓗᓇᐃᕐᓯᒪᑦᑎᐊᓂᕐᐹᓂᑦ ᖃᐅᔨᒍᑕᐅᓯᒪᔪᓂᑦ.

ᖃᓄᐃᓐᓂᐅᔪᑦ ᐊᓯᔾᔨᐸᓪᓕᐊᓂᖏᓐᓄᑦ ᓱᒃᑲᓕᔪᐊᓗᒻᒥᒃ, ᑕᒪᒃᑯᐊ ᐅᑎᕐᕕᒋᖃᑦᑕᕐᓂᐊᕋᑦᑎᒍ ᐊᒻᒪᓗ ᖃᐅᔨᓴᒃᑲᓐᓂᖃᑦᑕᕐᓂᐊᕋᑦᑎᒍ ᑐᑭᑖᕈᑕᐅᕙᑦᑐᑦ ᑲᒪᒋᔫᒥᔭᒐᐃᓐᓇᕐᓗᒋᑦ.

ᑭᓇᑐᐃᓐᓇᖅ ᐃᑲᔪᖅᑕᐅᔭᕆᐊᓕᒃ ᕿᑭᖅᑕᓂᒃᑯᓐᓄᑦ ᓲᕐᓗ ᐃᑲᔪᖅᑕᐅᔭᕆᐊᖃᖅᑲᑦ ᕿᔅᓵᑦᑐᓄᑦ ᐃᓚᐃᖅᑐᓄᓪᓗ ᐃᑲᔫᓯᐊᔅᓴᓂᑦ, ᐅᖄᓚᖃᑦᑕᖁᔭᐅᕗᑦ, ᑎᑎᕋᖃᑦᑕᕐᓗᑎᓪᓘᓐᓃᑦ ᖃᕋᓴᐅᔭᒃᑯᑦ, ᐅᕝᕙᓘᓐᓃᑦ ᓱᒃᑲᔪᒃᑯᑦ ᐱᔾᔪᑎᖏᓐᓂᒃ ᓇᓗᓇᐃᕐᓯᖃᑦᑕᕐᓗᑎᒃ ᕿᑭᖅᑕᓂᒃᑯᓐᓄᑦ ᐊᓪᓚᕝᕕᖓᓐᓄᑦ ᐅᐸᒍᑎᙱᖔᖃᑦᑕᕐᓗᑎᒃ.

ᑲᑎᒪᖃᑎᖃᕆᐊᖃᖅᑲᑕ ᐃᖅᑲᓇᐃᔭᖃᑎᖏᓐᓂᒃ ᐊᓯᖏᓐᓂᒃ ᑎᒥᐅᔪᓃᑦᑐᓂᑦ ᐅᖄᓚᐅᑎᒃᑯᑦ ᑲᑎᒪᖔᖃᑦᑕᓂᐊᖅᑐᑦ ᑕᒪᑐᒪ ᒥᔅᓵᓅᖓᔪᓂᑦ ᖃᐅᔨᒃᑲᖅᑕᐅᒐᓱᓐᓂᖏᓐᓂ.

ᕿᑭᖅᑕᓂᒃᑯᑦ ᐋᖅᑭᒋᐊᕐᓯᓯᒪᔪᑦ ᐸᕐᓈᕆᓯᒪᔭᖏᓐᓂᒃ ᐅᑭᐅᖅ ᑲᑎᒪᔩᑦ ᑲᑎᒪᒋᐊᖃᕐᓯᒪᒐᓗᐊᕐᖓᑕ ᒫᑦᓯᒥ ᐊᒻᒪᓗ ᐅᖄᓚᐅᑎᒃᑯᑦ ᑲᑎᒪᖃᑎᖃᖔᓛᓕᖅᑐᑦ ᓄᓇᓕᓐᓂᑦ ᑲᑎᒪᔨᐅᔪᓂᑦ ᑲᒪᒋᔭᖃᕐᓗᑎᒃ ᐊᐅᓚᓂᕐᓄᑦ ᐊᑐᕆᐊᖃᕐᓂᐊᖅᑕᖏᓐᓂᒃ.

ᐊᑐᓕᖁᔨᔾᔪᑎᖃᕐᓯᒪᓂᖓᓄᑦ ᓄᓇᕗᒥ ᐋᓐᓂᐊᖅᑐᓕᕆᓂᕐᒧᑦ ᐊᐅᓚᑦᑎᔨᒻᒪᕆᒃ, ᕿᑭᖅᑕᓂᒃᑯᑦ ᓄᖅᑲᑎᑦᑎᑲᐃᓐᓇᖅᑐᑦ ᐊᐅᓪᓚᕈᑕᐅᔭᕆᐊᖃᓗᐊᙱᑦᑐᓂᑦ ᐅᕝᕙᓘᓐᓃᑦ ᐃᖅᑲᓇᐃᔮᕐᒨᖓᔪᓂᑦ ᐊᐅᓪᓚᕈᑕᐅᒋᐊᖃᕐᓯᒪᔪᓂᑦ ᑐᑭᓯᑎᑕᐅᓇᓱᓐᓂᖏᓐᓂ ᑕᒪᑐᒪ ᒥᔅᓵᓄᑦ ᖃᓄᐃᒍᑕᐅᔫᑉ.

ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᑦ ᑲᓇᑕᒥ ᖃᐅᔨᒪᖁᔨᔪᑦ ᐳᕝᕕᕆᓂᕐᒧᑦ ᖃᓂᒪᓐᓇᕐᒧᑦ COVID-19 ᖃᓄᐃᒍᑕᐅᕙᑦᑐᑦ ᐅᔾᔨᕐᓇᕐᓯᑦᑕᐅᑎᒋᖃᑦᑕᖏᒻᒪᑕ 14 ᐅᓪᓗᐃᑦ ᑭᓯᐊᓂ ᐊᓂᒍᕋᐃᒻᒪᑕ. ᑕᐃᒪᐃᒻᒪᑦ, ᐃᖅᑲᓇᐃᔭᖅᑎᓂᑦ ᐊᐅᓪᓚᖅᑐᖃᕐᓂᖅᑲᑦ ᖃᓪᓗᓈᑦ ᓄᓇᖓᓐᓄᑦ ᒫᓐᓇ ᐱᒋᐊᕐᕕᒋᓗᒍ ᐊᒻᒪᓗ ᐄᐳᓗ 30, 2020 ᓂᕆᐅᒋᔭᐅᓂᐊᖅᑐᑦ ᓇᒻᒥᓂᖅ−ᐊᓂᑦᑕᐃᓕᑲᐃᓐᓇᕆᐊᖃᕐᓂᐊᕐᓂᖏᓐᓂᒃ ᐊᖏᕐᕋᖏᓐᓂ ᐅᓪᓗᓂᑦ 14ᓂᑦ ᐅᑎᓚᐅᖅᑎᓪᓗᒋᑦ ᑕᒪᐅᖓ ᖃᓂᒪᒍᑕᐅᔪᒥᑦ ᖃᓄᐃᓐᓂᖃᖅᑑᔮᖅᑲᑕ ᖃᓄᐃᓐᓂᖃᖅᑑᔮᙱᒃᑲᓗᐊᖅᑲᑕᓘᓐᓃᑦ. ᑕᒪᓐᓇ ᐊᑐᖅᑕᐅᔪᖅ ᖃᐅᔨᓴᕈᑕᐅᒃᑲᓐᓂᓛᕐᒥᔪᖅ ᐄᐳᓗ 30 ᑭᖑᓂᐊᓂ.

ᕿᑭᖅᑕᓂᒃᑯᑦ ᐅᖃᕐᕕᖃᐃᓐᓇᖃᑦᑕᓂᐊᖅᑐᑦ ᐃᓘᓐᓇᖏᓐᓂᒃ ᕿᑭᖅᑕᓂᒃᑯᓐᓂᑦ ᐃᖅᑲᓇᐃᔭᖅᑎᓂᑦ ᐱᔾᔪᙱᒋᓪᓗᒋᑦ ᐃᖅᑲᓇᐃᔮᔅᓴᐃᑦ ᐸᕐᓇᑕᐅᔭᕆᐊᖃᕐᓂᖏᑦ ᐊᒻᒪᓗ ᐃᖅᑲᓇᐃᔭᕐᕕᒋᑲᐃᓐᓇᕆᐊᖃᕐᓂᐊᖅᑕᖏᓐᓂᒃ ᐋᖅᑭᔅᓲᔾᔭᐅᓯᒪᓂᐊᕐᖓᑕ.

ᕿᑭᖅᑕᓂᒃᑯᑦ ᖃᐅᔨᓴᒃᑲᓐᓂᖃᑦᑕᓂᐊᖅᑐᑦ ᐊᒻᒪᓗ ᖃᓄᖅᑑᑲᓐᓂᖃᑦᑕᕐᓗᑎᒃ ᑕᐃᒪᐃᒋᐊᖃᕐᓂᖏᑦ ᒪᓕᓪᓗᒋᑦ ᐃᑲᔪᕐᓗᑎᒃ ᐃᖅᑲᓇᐃᔭᖅᑎᓂᑦ ᓄᓇᖅᑲᑎᖏᓐᓂᓪᓗ ᖃᓄᐃᖁᔨᒐᑎᒃ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ

ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413

1.800.667.2742