ᑐᓴᖅᑎᑦᑎᕕᖓᑕ ᐅᓪᓗᖓ: ᐋᒡᒌᓯ 16, 2019

ᐱᔾᔪᑕᐅᔪᖅ: ᑐᔅᓯᕋᐅᓯᐅᖁᔨᔾᔪᑦ; ᑲᑭᕙᒃᑯᑦ ᐃᑲᔫᓯᐊᔅᓴᓄᑦ ᐊᑐᖅᑐᐊᕋᔅᓴᓄᓪᓗ ᐊᔪᐃᓐᓇᕆᐊᒃᑲᓂᕈᑎᓄᑦ ᑲᑎᒪᔨᕋᓛᕐᓄᑦ, ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ, ᐃᓕᖅᑯᓯᓕᕆᓂᕐᒧᑦ ᐊᒻᒪᓗ ᓄᓇᓕᓐᓂᑦ ᐊᐅᓚᔾᔭᐃᒋᐊᕈᑎᓄᑦ ᑲᑎᒪᔨᕋᓛᕐᓄᑦ ᐃᓅᓱᑦᑐᓄᒃ ᑭᒡᒐᑐᖅᑎᔅᓴᒥᒃ, ᑲᑐᔾᔨᓪᓗᑎᒃ ᒥᕐᖑᐃᓯᕐᕕᓕᕆᓂᕐᒧᑦ ᑲᑎᒪᔨᕋᓛᕐᓄᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᕐᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᕿᓂᕐᖓᑕ ᐆᒻᒪᑦᑎᐊᕆᑦᑐᓂᑦ ᐊᒻᒪᓗ ᐱᔪᒪᓂᖃᑦᑎᐊᖅᑐᓂᑦ ᑭᒃᑯᑐᐃᓐᓇᕐᓂᑦ ᑲᑎᒪᔨᐅᒐᔭᖅᑐᓂᑦ ᑲᑎᒪᔨᓂᑦ ᑲᑎᒪᔨᕋᓛᕐᓂᓪᓗ. ᐃᓱᒪᒋᔭᐅᒋᐊᕈᒪᑉᐸᑕ, ᐱᓇᓱᐊᖅᑐᑦ ᑲᑦᑐᖓᐃᕐᓯᒪᑦᑎᐊᕆᐊᓖᑦ ᓇᒻᒥᓂᕐᓗ ᐱᔪᒪᓂᖃᑦᑎᐊᕐᓗᑎᒃ ᑭᒡᒐᖅᑐᐃᓂᐊᕐᓂᕐᒧᑦ ᓄᓇᑖᖃᑕᐅᓯᒪᔪᓂᑦ ᕿᑭᖅᑕᓂ ᓄᓇᓕᓐᓂᑦ ᐊᒻᒪᓗᑦᑕᐅᖅ ᑐᑭᓯᐅᒪᑦᑎᐊᕆᐊᓖᑦ ᓄᓇᕗᑦ ᐊᖏᕈᑎᓂᑦ ᒪᓕᑦᑐᒋᑦ ᐃᖅᑲᓇᐃᔮᕆᓂᐊᖅᑕᖏᑦ ᐊᒻᒪᓗ ᐱᓇᓱᐊᒐᖏᑦ ᑕᕝᕙᓂ ᐃᓂᒋᓂᐊᖅᑕᖓᓂ.

ᑲᑭᕙᒃᑯᑦ ᐃᑲᔫᓯᐊᔅᓴᓄᑦ ᐊᑐᖅᑐᐊᕋᔅᓴᓄᓪᓗ ᐊᔪᐃᓐᓇᕆᐊᒃᑲᓂᕐᓂᕐᒧᑦ ᑲᑎᒪᔨᕋᓛᖏᓐᓄᑦ (ᐱᖓᓱᓂᑦ−ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ)

ᑲᑎᒪᔨᕋᓛᑦ ᑲᑎᖃᑦᑕᓲᑦ ᕿᒥᕐᕈᔭᕆᐊᖃᓕᕋᐃᒻᒪᑕ ᐊᔪᐃᓐᓇᕆᐊᒃᑲᓐᓂᕈᑕᐅᓯᒪᔪᓂᑦ ᐊᖏᖅᑕᐅᓯᒪᙱᑦᑐᓂᑦ ᑮᓇᐅᔭᓂᑦ ᑐᔅᓯᕋᐅᑎᓂᑦ ᑐᔅᓯᕋᐅᑕᐅᓯᒪᔪᓂᑦ ᑲᑭᕙᒃ ᑲᑐᔾᔨᖃᑎᒌᖏᓐᓄᑦ ᐊᔾᔨᒌᙱᑐᒡᒍᑎᓄᑦ ᐃᑲᔫᑎᒋᕙᑦᑕᖏᓐᓄᑦ ᐱᔨᑦᑎᕋᐅᑎᒋᕙᑦᑕᖏᓐᓄᓪᓗ. ᐱᓇᓱᐊᖅᑐᑦ ᐃᖅᑲᓇᐃᔭᖅᑎᐅᔭᕆᐊᖃᙱᑦᑐᑦ ᑲᑭᕙᒃᑯᓐᓄᑦ, ᕿᑭᖅᑕᓂᒃᑯᓐᓄᑦ, ᐅᕝᕙᓘᓐᓃᑦ ᓇᓕᑐᐃᓐᓇᖏᓐᓄᑦ ᑲᑐᔾᔨᖃᑎᒌᖑᔪᓄᑦ ᑎᒥᐅᔪᓄᓪᓘᓐᓃᑦ ᐊᐅᓚᑕᐅᔪᓄᑦ ᕿᑭᖅᑕᓂᒃᑯᓐᓂᑦ.

ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ (ᐱᖓᓱᓂᑦ−ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ)

ᕿᑭᖅᑖᓗᒃ ᑯᐊᐳᕇᓴᒃᑯᑦ ᓇᒻᒥᓂᕆᔭᐅᓪᓚᑦᑖᖅᑯᑦ ᐃᓄᓐᓄᑦ ᐱᒋᐊᖅᑎᑕᐅᓯᒪᓪᓗᑎᒃ ᐱᕙᓪᓕᐊᔪᓕᕆᔨᐅᓂᕐᒧᑦ ᑎᒥᐅᓂᕐᒧᑦ ᐱᓇᓱᐊᕋᔅᓴᖃᖅᑐᑎᒃ ᐃᖅᑲᓇᐃᔮᔅᓴᖃᖅᑎᑦᑎᖃᑦᑕᓂᕐᒥᒃ ᐊᒻᒪᓗ ᑮᓇᐅᔭᓂᑦ ᐱᓇᓱᐊᕋᔅᓴᖃᖅᑎᑦᑎᖃᑦᑕᓂᕐᒥᒃ ᐃᓄᓐᓄᑦ ᑐᕌᖓᔪᓂᑦ ᕿᑭᖅᑕᓂ ᓄᓇᓕᓐᓂᑦ. ᕿᑭᖅᑖᓗᒃ ᑯᐊᐳᕇᓴᒃᑯᑦ ᐱᓇᓱᐊᕈᑎᖃᕐᐸᑦᑐᑦ ᐃᑲᔪᖅᑎᓪᓚᕆᐅᒍᒪᓂᕐᒥᒃ ᐃᓘᓐᓇᖏᓐᓄᑦ ᐃᖅᑲᓇᐃᔭᕐᕕᐅᕙᑦᑐᓄᑦ ᓄᓇᕗᒥ ᒪᑭᒪᓇᓱᐊᕈᑎᖃᕐᕕᓐᓂᑦ, ᒪᑯᐊ ᐃᓚᒋᔭᐅᓪᓗᑎᒃ ᐃᖃᓗᓕᕆᔩᑦ, ᓂᐅᕕᕐᕕᕋᓛᓕᕆᔩᑦ, ᓇᒻᒥᓂᖁᑎᓂᑦ ᐱᕙᓪᓕᐊᔪᓕᕆᔩᑦ ᐊᒻᒪᓗ ᐊᐅᓚᑦᑎᔩᑦ ᐊᒻᒪᓗᑦᑕᐅᖅ ᐱᔨᑦᑎᕋᖃᑦᑕᓂᕐᒥᒃ ᓴᖅᑭᐊᕙᓪᓕᐊᔪᓂᑦ ᐅᔭᕋᓐᓂᐊᕐᕕᓐᓂᑦ ᐊᒻᒪᓗ ᓄᓇᒥᐅᑕᕐᓂᑦ ᐱᕙᓪᓕᐊᔪᓕᕆᓂᕐᒥᑦ

ᕿᑭᖅᑕᓂᒃᑯᑦ ᐃᓕᖅᑯᓯᓕᕆᓂᕐᒧᑦ ᐊᒻᒪᓗ ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᑲᑎᒪᔨᕋᓛᕐᓂᑦ ᐃᓅᓱᑦᑐᓂᑦ ᑭᒡᒐᑐᖅᑎᔅᓴᒥᒃ (ᐱᖓᓱᓂᑦ−ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ)

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐊᒻᒪᓗ ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᑲᑎᒪᔨᕋᓛᑦ ᐱᓇᓱᐊᕋᔅᓴᖅᑖᖅᑎᑕᐅᕙᒻᒪᑕ ᕿᑭᖅᑕᓂᒃᑯᑦ ᑲᑎᒪᔨᖏᓐᓂᑦ. ᑲᑎᒪᔨᕋᓛᑦ ᐅᖃᐅᔾᔨᒋᐊᖅᑎᐅᕙᑦᑐᑦ ᐊᒻᒪᓗ ᐊᑐᓕᖁᔨᔾᔪᑎᓕᐅᕐᐸᑦᑐᑎᒃ ᑲᑎᒪᔨᓄᑦ ᐱᔾᔪᑎᒋᓪᓗᒋᑦ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐱᔾᔪᑕᐅᕙᑦᑐᑦ ᐊᒻᒪᓗ ᐃᑲᔫᑎᔅᓴᓄᑦ ᐃᑲᔪᖅᑕᐅᔾᔪᑎᒋᒋᐊᖃᕐᐸᑦᑕᖏᓐᓄᑦ ᕿᑭᖅᑕᓂ ᓄᓇᓕᓐᓂᑦ. ᑲᑎᒪᔨᕋᓛᑦ ᑕᓪᓕᒪᐅᕙᑦᑐᑦ, ᐊᒻᒪᓗ ᐃᑲᔪᖅᑕᐅᕙᑦᑐᑎᒃ ᐃᓅᓯᓕᕆᓂᕐᒧᑦ ᐸᕐᓇᐃᔨᓂᑦ ᑐᑭᒧᐊᑦᑎᑦᑎᔨᖓᑎᒍᑦ.

ᐅᑯᐊ ᑲᑎᒪᔨᕋᓛᑦ ᐃᓚᒋᔭᐅᔪᔅᓴᓂᑦ ᑐᔅᓯᕋᕐᒥᒻᒪᑕ:

• ᑲᑐᔾᔨᓪᓗᑎᒃ ᒥᕐᖑᐃᓯᕐᕕᓕᕆᓂᕐᒧᑦ ᑲᑎᒪᔨᕋᓛᑦ, ᖁᑦᑎᓂᖅᐹᖅ (ᐱᖓᓱᓂᑦ−ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ), ᓄᓇᓕᓐᓂᑦ ᐅᑯᓇᓂ ᖃᐅᓱᐃᑦᑐᖅ ᐊᒻᒪᓗ ᐊᐅᓱᐃᑦᑐᖅ
• ᖃᐅᓱᐃᑦᑐᖅ (ᐱᖓᓱᓂᑦ ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ), ᖃᐅᓱᐃᑦᑐᕐᒥᐅᓂᑦ
• ᐊᐅᔪᐃᑦᑐᖅ ᒥᕐᖑᐃᓯᕐᕕᒻᒥ ᐸᕐᓇᐃᔨᓄᑦ (ᑲᑎᒪᔨᐅᖏᓐᓇᓂᐊᕐᓗᑎᒃ), ᓄᓇᓕᓐᓂᑦ ᐅᑯᓇᓂ ᐸᓐᓂᖅᑑᖅ ᐊᒻᒪᓗ ᕿᑭᖅᑕᕐᔪᐊᖅ
• ᐊᒡᒍᑎᓐᓂ (ᐱᖓᓱᓂᑦ−ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ), ᑲᖏᖅᑐᒑᐱᒻᒥᐅᓂᑦ (3ᓂᑦ ᑲᑎᒪᔨᔅᓴᓂᑦ)
• ᓄᓇᓕᓐᓂᑦ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᑦ, (ᐱᖓᓱᓂᑦ−ᐊᕐᕌᒍᓂᑦ ᑲᑎᒪᔨᐅᒐᔭᖅᑐᑦ), ᐃᖃᓗᒻᒥᐅᓂᑦ (ᒪᕐᕉᓐᓂᒃ ᑲᑎᒪᔨᔅᓵᓐᓂᒃ) ᐊᒻᒪᓗ ᑭᒻᒥᕈᕐᒥᐅᓂᑦ (ᒪᕐᕉᓐᓂᒃ ᑲᑎᒪᔨᔅᓵᓐᓂᒃ)
• ᕿᑭᖅᑕᓂᒃᑯᑦ ᑲᑎᒪᔨᔅᓴᓂᑦ ᑐᔅᓯᕋᕐᖓᑕ ᑲᑎᒪᔨᕋᓛᖑᓂᐊᓕᖅᑐᓄᑦ ᓄᓇᓕᓐᓂᑦ ᑲᑐᔾᔨᓪᓗᑎᒃ ᒥᕐᖑᐃᓯᕐᕕᒻᒥᒃ ᐸᕐᓇᐃᓂᕐᒧᑦ ᑲᑎᒪᔨᕋᓛᓂᑦ ᐋᖅᑭᑦᑕᐅᓂᐊᖅᑐᓂᑦ ᐊᐅᓱᐃᑦᑐᕐᒥ ᓇᐹᖅᑐᓕᒃ ᒥᕐᖑᐃᓯᕐᕕᒻᒧᑦ (ᐱᖓᓱᓂᑦ ᑲᑎᒪᔨᔅᓴᓂᑦ).

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖃᐅᔨᒪᑦᑎᐊᕈᒪᕙᒻᒪᑕ ᐃᓄᐃᑦ ᐱᖃᑕᐅᑎᑕᐅᑦᑎᐊᖃᑦᑕᕋᓗᐊᕐᒪᖔᑕ ᑲᔪᓯᑎᑦᑎᕙᓪᓕᐊᓂᖏᓐᓂ ᓄᓇᕗᑦ ᐊᖏᕈᑎᓂᑦ. ᑕᐃᒪᐃᒻᒪᑦ, ᑲᑐᔾᔨᖃᑎᒌᑦ ᑲᔪᓯᑎᑦᑎᓯᒪᒻᒪᑕ ᓴᖅᑭᔮᖅᑐᒥᒃ ᐊᒻᒪᓗ ᓵᙵᔭᔅᓴᐅᓂᖏᓐᓂᒃ ᐃᓱᒪᒋᔭᖃᕆᐊᖃᑦᑕᓂᕐᒥᒃ ᑲᒪᔪᓐᓇᑎᐊᖅᑐᓂᑦ ᓂᕈᐊᕋᔅᓴᓂᑦ.  ᖃᐅᔨᒪᓂᐊᕆᕗᓯ ᐱᕋᔭᓐᓂᑰᒻᒪᖔᑕ ᖃᐅᔨᓴᖅᑕᐅᔾᔪᑎᖃᕆᐊᖃᕋᔭᕐᒥᒻᒪᑕ ᑎᒃᑯᐊᖅᑕᐅᔪᔅᓴᐃᑦ/ᓂᕈᐊᕋᔅᓴᓕᐅᖅᑕᔪᔅᓴᐃᑦ.

ᐊᑏ ᑐᓂᓯᖃᑦᑕᓂᐊᖅᑯᓯ ᓇᓗᓇᐃᔭᕐᓯᒪᑦᑎᐊᖅᑐᓂᑦ ᐱᔪᒐᕐᓴᐅᑎᔅᓯᓐᓂᒃ ᓯᕗᓕᐊᕈᑕᖓᓂᓪᓗ ᑎᑎᖅᑲᕐᒥᑦ, ᐃᓄᒃᑎᑑᖓᓗᒋᑦ ᖃᓪᓗᓈᑎᑑᖓᓗᒋᓪᓗ, ᑎᑎᕋᕐᓯᒪᑦᑎᐊᕐᓗᒋᑦ ᐃᓕᓯᒪᔭᓯ ᐃᖅᑲᓇᐃᔮᕆᖃᑦᑕᕐᓯᒪᔭᓯᓗ ᐅᕗᖓ:

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

ᐃᒡᓗᕗᑦ, ᖁᓕᓕᕇᑦ ᐊᑯᓐᓂᖏᓐᓂᒃ

ᑎᑎᖅᑲᒃᑯᕕᒃ 1340, ᐃᖃᓗᐃᑦ, ᓄᓇᕗᑦ, X0A 0H0

ᐅᖄᓚᐅᑖ: (867) 975-8400

ᓱᒃᑲᔪᒃᑰᕈᑖ: (867) 979-3238

ᐅᖓᓯᑦᑐᒥᑦ ᐊᑭᖃᙱᑦᑐᖅ ᐅᖄᓚᐅᑖ: 1-800-667-2742

ᐃᕐᖐᓈᖅᑕᐅᑖ: nominations@qia.ca

ᑐᑭᓯᒋᐊᒃᑲᓐᓂᕈᒪᒐᐃᒍᔅᓯ ᐱᓇᓱᐊᕋᔅᓴᓪᓗᐊᑕᐅᔪᑦ ᒥᔅᓵᓄᑦ, ᐊᑏ ᑐᑭᓯᒋᐊᖃᑦᑕᓂᐊᖅᑯᓯ ᕿᑭᖅᑕᓂᒃᑯᓐᓄᑦ ᐅᕝᕙᓘᓐᓃᑦ ᓄᓇᔅᓯᓐᓂ ᑐᓴᐅᒪᑎᑦᑎᔨᔅᓯᓐᓄᑦ ᓄᓇᔅᓯᓐᓂ.

ᒪᑐᕕᔅᓴᓕᒃ ᐱᓇᓱᐊᕈᑎᓂᑦ ᑐᓂᓯᖃᑦᑕᓂᕐᒧᑦ ᓯᑎᐱᕆ 16, 2019 5:00ᒥ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᓪᓗᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

(867) 975.8413

1.800.667.2742