ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᐅᔾᔨᕈᓱᑦᑐᑦ ᐸᓯᑦᑎᒍᑕᐅᓯᒪᔪᓂᑦ ᐃᖅᑲᓇᐃᔭᕐᕕᒻᒥ ᐸᕝᕕᓴᑦᑕᐅᓯᒪᓂᕋᕐᓂᕋᖅᑐᓂ ᐃᓄᒃ ᐊᕐᓇᖅ ᐃᖅᑲᓇᐃᔭᖅᑐᖅ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᕐᕕᒻᒥ ᓄᓘᔮᓂᑦ ᐱᓕᕆᕕᒻᒥ.

ᐃᓚᒋᔭᐅᓪᓗᓂ ᑲᑐᔾᔨᖃᑎᒌᒃᑯᑦ ᑕᑯᖃᑦᑕᕈᒪᓂᖏᓐᓂᒃ ᐃᓄᓐᓂᑦ ᐱᕚᓪᓕᕈᑎᖃᕐᐸᓪᓕᐊᔪᓂᑦ ᓄᓘᔮᓂᑦ ᐱᓕᕆᕕᒻᒥ ᐊᒻᒪᓗ ᐃᑲᔪᖃᑦᑕᕈᒪᓪᓗᑎᒃ ᐃᓄᓐᓂᑦ ᐃᖅᑲᓇᐃᔭᖅᑎᐅᔪᓂᑦ ᐱᓕᕆᕕᒻᒥ ᑎᑎᕋᕐᓯᒪᒐᑦᑕ ᐊᑲᕐᓴᖏᓐᓂᕐᒧᑦ ᐅᓐᓂᕐᓗᒍᑎᖃᕐᓂᒧᓪᓗ ᐱᓕᕆᔾᔪᓯᐅᖃᑦᑕᕆᐊᓕᓐᓂᑦ ᐃᓄᓐᓄᑦ ᐃᑲᔪᖅᑕᐅᒍᒪᑎᓪᓗᒋᑦ ᐊᒻᒪᓗ ᖃᐅᔨᓇᓱᐊᖃᑦᑕᓂᐊᖅᑐᑕ ᐋᖅᑭᒍᑎᔅᓴᓂᑦ ᐊᑲᐅᙱᓕᐅᕈᑕᐅᔪᓄᑦ ᖃᓄᐃᑦᑐᑐᐃᓐᓇᕐᓄᑦ ᓴᖅᑭᖅᑐᓄᑦ ᐅᔭᕋᓐᓂᐊᕕᒻᒥ. ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᒋᔭᐅᒐᔪᖃᑦᑕᕐᖓᑕ ᐃᓄᓐᓄᑦ ᐃᖅᑲᓇᐃᔭᖅᑐᓄᑦ ᐅᔭᕋᓐᓂᐊᕐᕕᒻᒥ ᑖᒃᑯᐊ ᐱᔾᔪᑎᒋᓪᓗᒋᑦ. ᐅᓐᓂᕐᓗᒍᑕᐅᔪᑦ ᑲᑐᔾᔨᖃᑎᒌᒃᑯᓐᓄᑦ ᑐᓂᔭᐅᖃᑦᑕᓂᐊᕐᖓᑕ ᐹᕕᓐᓛᓐᑯᓐᓄᑦ ᐊᖅᑯᑎᒋᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓄᑦ (ᐊᖏᕈᑎᓄᑦ) ᑲᑎᒪᔨᕋᓛᑦ ᐋᖅᑭᑦᑕᐅᔪᓐᓇᖁᓪᓗᒋᑦ.

ᑕᖅᑭᓂᑦ ᐊᒥᓲᙱᑦᑐᓂᑦ ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ ᐃᑲᔪᖃᑦᑕᓚᐅᕐᖓᑕ ᐃᓄᒻᒥᒃ ᖃᐅᔨᒃᑲᐃᓯᒪᔪᒥᒃ ᐸᕝᕕᓴᑦᑕᐅᖃᑦᑕᕐᓂᖓᓂᒃ ᐅᓐᓂᕐᓗᒍᑕᐅᔪᑦ ᑲᒪᒋᔭᐅᕕᒋᕙᑦᑕᖓᑎᒍᑦ. ᑲᑐᔾᔨᖃᑎᒌᒃᑯᑦ ᑲᒪᒋᔭᓖᑦ ᑕᒪᑐᒥᖓ ᐱᖃᑎᖃᖅᑐᑎᒃ ᐹᕕᓐᓛᓐᑯᑦ ᐊᐅᓚᑦᑎᔨᖏᓐᓂᒃ. ᑲᑐᔾᔨᖃᑎᒌᒃᑯᑦ ᐃᑉᐱᒍᓱᓪᓚᕆᑦᑐᑦ ᐱᔾᔪᑎᖃᖅᑎᓪᓗᒋᑦ ᖁᓄᔪᕐᓂᐊᓂᕐᒧᑦ ᐸᕝᕕᓴᒍᑕᐅᓯᒪᔪᒥᒃ ᐊᒻᒪᓗ ᖃᐅᔨᒪᑦᑎᐊᖃᑦᑕᕈᒪᓪᓗᑎᒃ ᐃᓄᓕᒫᑦ ᐊᑦᑕᓇᖅᑐᒦᙱᓐᓂᖏᓐᓂᒃ, ᐃᑲᔪᖅᑕᐅᖃᑦᑕᕐᓂᖏᓐᓂᒃ ᓴᐳᑎᔭᐅᓯᒪᓂᖏᓐᓂᓪᓗ ᐃᑉᐱᒍᓱᖃᑦᑕᕋᓗᐊᕐᒪᖔᑕ ᐃᖅᑲᓇᐃᔭᕐᕕᒻᒥ. ᖃᐅᔨᒪᑦᑎᐊᖃᑦᑕᕈᒪᒐᑦᑕ ᐊᑐᖅᑕᐅᔪᓐᓇᖅᑐᓂᑦ ᐊᑐᐊᒐᖅᑕᐅᖃᐅᕐᒪᖔᖅ ᐊᐅᓚᔾᔪᓯᐅᔭᕆᐊᓕᓐᓂᓪᓗ ᐱᑕᖃᕋᓗᐊᕐᒪᖔᖅ ᓄᓘᔮᓂᑦ ᐃᑲᔫᑕᐅᔪᓐᓇᖅᑐᓂᑦ ᓇᓕᑐᐃᓐᓇᖏᓐᓄᑦ ᐃᓄᓐᓄᑦ ᐃᖅᑲᓇᐃᔭᖅᑎᐅᔪᓄᑦ ᐃᖅᑲᓇᐃᔭᕐᕕᒻᒥ ᐸᕝᕕᓴᑦᑕᐅᖃᑦᑕᑎᓪᓗᒋᑦ.

ᐅᓐᓂᕐᓗᒍᑕᐅᓯᒪᔪᒥᒃ ᖃᐅᔨᓴᕈᑎᖃᕐᓂᖏᓐᓄᑦ, ᑲᑐᔾᔨᖃᑎᒌᒃᑯᑦ ᐅᖃᐅᓯᖃᔾᔮᖏᑦᑐᑦ ᐃᓗᓕᖏᓐᓂᒃ ᐱᔾᔪᑕᐅᔫᑉ ᒥᔅᓵᓄᑦ. ᑭᓯᐊᓂᓕ, ᖃᐅᔨᒪᖁᔨᔪᒍᑦ ᐃᓘᓐᓇᑎᒃ ᐸᓯᑦᑎᒍᑕᐅᔪᑦ ᐃᖅᑲᓇᐃᔭᕐᕕᒻᒥ ᐸᕝᕕᓴᑦᑕᐅᓂᕋᕐᓂᕐᒧᑦ ᑲᒪᒋᔭᐅᖃᑦᑕᓂᐊᕐᖓᑕ ᐱᒻᒪᕆᐅᓗᒋᑦ ᑲᑐᔾᔨᖃᑎᒌᑦᑎᓐᓂ.

ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᕐᒥᔪᑦ ᑲᒪᒋᔭᖃᖅᑐᑎᒃ ᐊᓯᖏᓐᓂᒃ ᐊᑲᐅᑎᓕᐅᕈᑕᐅᔪᓂᑦ ᒪᑯᐊᓕ ᒥᔅᓵᓅᖓᔪᓂᑦ ᐃᓄᐃᑦ ᐃᖅᑲᓇᐃᔭᖃᑦᑕᕐᓂᖏᑦ, ᐃᓕᓐᓂᐊᖃᑦᑕᕐᓂᖏᑦ ᐊᒻᒪᓗ ᐃᖅᑲᓇᐃᔭᖅᑎᒋᔭᐅᖏᓐᓇᕈᒪᓂᖏᑦ
ᓄᓘᔮᓕᕆᓂᕐᒥ ᐊᖅᑯᑎᒋᓪᓗᒍ ᐊᖏᕈᑎᓂᑦ ᐋᔩᖃᑎᒌᒍᑎᖃᒃᑲᓐᓂᐅᔪᑦ ᒫᓐᓇ ᑲᒪᒋᔭᐅᓪᓗᓂ. ᒪᓕᑦᑐᒋᑦ ᐊᑐᖅᑕᐅᖃᑦᑕᕐᓯᒪᔪᑦ ᐃᓄᓐᓄᑦ ᐃᖅᑲᓇᐃᔭᖅᑐᓄᑦ ᓄᓘᔮᓕᕆᓂᕐᒥ ᑲᑐᔾᔨᖃᑎᒌᒃᑯᑦ ᑐᓂᓯᓯᒪᔪᑦ ᐊᑐᖅᑕᐅᖁᒐᔭᙳᐊᖅᑕᖏᓐᓂᒃ ᖃᓄᖅ ᐋᖅᑭᒋᐊᕈᓐᓇᕋᔭᕐᒪᖔᑕ ᐃᓄᐃᑦ ᐃᖅᑲᓇᐃᔭᖃᑦᑕᕐᓂᖏᓐᓂᒃ ᐊᒻᒪᓗ ᐃᖅᑲᓇᐃᔭᕐᕕᒻᒥ ᖃᓄᐃᓕᖓᓂᖏᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
867.975.8413 or 1.800.667.2742
szerehi@qia.ca