ᐱᔾᔪᑕᐅᔪᖅ: ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐊᖑᓇᓱᑦᑎᓄᑦ ᐃᑲᔫᑏᑦ
ᐊᑐᓯᕕᒋᓂᐊᖅᑕᖓ: ᐃᕐᖐᓐᓇᖅ

ᐅᓪᓗᖅ ᑐᓴᖅᑎᑦᑎᒍᑕᐅᓂᖓ: ᐅᑐᐱᕆ 4, 2021

ᐋᒡᒌᓯ 2021ᒥ, ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ (NTI) ᑲᑎᒪᔨᖏᑦ ᐊᖏᕐᓯᓚᐅᕐᓯᒪᒻᒪᑕ ᐊᓯᔾᔨᕐᓂᐅᔪᓂᑦ ᓄᓇᕗᒻᒥ ᐊᖑᓇᓱᑦᑎᓄᑦ ᐃᑲᔫᑎᓂᑦ (NHSP) ᑮᓇᐅᔭᓂᑦ ᐊᒻᒪᓗ ᐊᒥᓱᕈᖅᑎᑦᑎᒋᐊᔪᒻᒪᑕ ᐃᑲᔫᓯᖅᑖᖑᖃᑦᑕᕈᓐᓇᖅᑐᓂᑦ ᑖᒃᑯᓇᓂ ᐃᔫᑎᓂᑦ.

ᐱᔾᔪᑎᖃᕐᖓᑕ ᐃᑲᔫᑏᑦ ᐊᑐᖅᑕᐅᖏᓐᓇᖁᓪᓗᒋᑦ ᐊᒻᒪᓗ ᑲᔪᓯᑎᑕᐅᖁᓪᓗᒋᑦ ᓄᓇᕗᒻᒥ ᐃᓄᐃᑦ ᐊᖑᓇᓱᖃᑦᑕᓂᕐᒧᑦ ᐃᓕᖅᑯᓯᖏᑦ, ᐊᑐᖃᑦᑕᕐᓯᒪᔭᑐᖃᖏᑦ, ᐊᒻᒪᓗ ᐱᖅᑯᓯᖅᑎᒍᑦ ᐱᐅᓯᖏᑦ. ᐃᑲᔫᑏᑦ ᐃᑲᔫᑎᖃᖃᑦᑕᕐᖓᑕ ᐊᖅᑯᑎᒋᓪᓗᒋᑦ ᒥᑭᔫᑎᓄᑦ ᐊᒻᒪᓗ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᓱᓇᒃᑯᑖᓄᑦ ᐃᑲᔫᑏᑦ, ᐱᕐᕈᓗᐊᕿᔪᖃᖅᑎᓪᓗᒍ ᐃᑲᔫᑏᑦ ᐊᒻᒪᓗ ᓄᓇᓕᓐᓂᑦ ᐊᖑᓇᓱᓐᓂᕐᒧᑦ ᐃᑲᔫᑏᑦ. ᒫᓐᓇ ᑮᓇᐅᔭᖃᖅᑎᑦᑎᒍᑕᐅᕙᑦᑐᑦ ᐅᑯᐊᖑᒻᒪᑕ:

ᓄᓇᓕᓐᓄᑦ ᐊᖑᓇᓱᓐᓂᖅ: ᖃᐅᑕᒫᑦ ᐊᒻᒪᓗ ᐊᒥᓲᓂᕐᐹᕆᔪᓐᓇᖅᑕᖏᑦ ᐊᑭᖏᑕ ᐊᑭᑦᑐᕆᐊᕐᓂᖏᑦ ᐅᖅᓱᖅᑖᕈᑎᓄᑦ ᓂᕿᑖᕈᑎᓄᑦ, ᑎᑭᐅᒪᔪᑦ $5,000ᓄᑦ ᐊᑐᓂᑦ ᓄᓇᓕᓐᓄᑦ ᐊᖑᓇᓱᓐᓂᐅᓂᐊᖅᑐᓄᑦ.

ᒥᑭᔫᑎᓄᑦ ᐊᑦᑕᓇᖅᑐᒦᑦᑕᐃᓕᓂᕐᒧᓪᓗ ᓱᓇᒃᑯᑖᓄᑦ: ᐅᑎᕐᕕᐅᔾᔪᑎᒋᔪᓐᓇᖅᑕᖏᑦ ᐊᑭᑦᑐᕆᐊᖃᖅᑐᑦ 50 ᐳᓴᓐᑎᓂᑦ 75 ᐳᓴᓐᑎᓄᑦ ᓂᐅᕕᐅᑎᒥᓂᖏᓐᓄᑦ (ᐃᓚᒋᔭᐅᓪᓗᑎᒃ ᐅᓯᔭᐅᔾᔪᑎᖏᑕ ᐊᑭᖏᑦ) ᐊᒥᓲᓂᕐᐹᕆᔪᓐᓇᖅᑕᖏᑦ ᐊᒥᓲᓂᖃᖅᑐᑎᒃ $1,000ᓂᑦ ᐊᑐᓂᑦ ᑐᔅᓯᕋᐅᑎᓄᑦ ᐊᒻᒪᓗ $2,000 ᐊᑐᓂᑦ ᐃᓪᓗᒥᐅᖃᑎᒌᓄᑦ, ᐊᕐᕌᒍᒥ ᐊᑕᐅᓯᐊᕐᓗᑎᒃ ᐊᑐᓂᑦ ᑮᓇᐅᔭᓄᑦ ᐊᐅᓚᕕᒋᕙᑦᑕᑎᓐᓂ.

ᓇᓪᓕᐅᒃᑯᒫᓄᑦ ᒥᑭᔫᑎᓄᑦ ᐊᑦᑕᓇᖅᑐᒦᑦᑕᐃᓕᓂᕐᒧᓪᓗ ᓱᓇᒃᑯᑖᓄᑦ: ᐅᑎᕐᕕᐅᔾᔪᑎᒋᔪᓐᓇᖅᑕᖏᑦ ᑎᑭᐅᒪᔪᑦ 75 ᐳᓴᓐᑎᓄᑦ ᓇᓪᓕᐅᒃᑯᒫᖏᑦ ᐊᒥᓲᓂᕐᐹᕆᔪᓐᓇᖅᑕᖏᑦ $500 ᐊᑐᓂᑦ ᓱᓇᒃᑯᑖᓄᑦ ᐊᒻᒪᓗ $1,500 ᐊᑐᓂᑦ ᐃᓪᓗᒥᐅᖃᑎᒌᓄᑦ, ᐊᕐᕌᒍᒥ ᐊᑕᐅᓯᐊᕐᓗᑎᒃ ᐊᑐᓂᑦ ᑮᓇᐅᔭᓄᑦ ᐊᐅᓚᕕᒋᕙᑦᑕᑎᓐᓂ.

ᓇᓪᓕᐅᒃᑯᒫᓄᑦ ᐊᖏᔫᑎᓄᑦ ᓅᑦᑐᕐᓯᐅᑎᓄᑦ ᓱᓇᒃᑯᑖᓄᑦ: ᐅᑎᕐᕕᐅᔾᔪᑎᒋᔪᓐᓇᖅᑕᖏᑦ ᑎᑭᐅᒪᔪᑦ 75 ᐳᓴᓐᑎᖏᓐᓄᑦ ᓇᓪᓕᐅᒃᑯᒫᖓᓂ ᐊᒥᓲᓂᕐᐹᕆᔪᓐᓇᖅᑕᖏᑦ $1,000 ᐊᑐᓂᑦ ᓱᓇᒃᑯᑖᓄᑦ ᐊᒻᒪᓗ $2,000 ᐊᑐᓂᑦ ᐃᓪᓗᒥᐅᖃᑎᒌᓄᑦ, ᐊᕐᕌᒍᒥ ᐊᑕᐅᓯᐊᕐᓗᑎᒃ ᐊᑐᓂᑦ ᑮᓇᐅᔭᓄᑦ ᐊᐅᓚᕕᒋᕙᑦᑕᑎᓐᓂ.

ᐱᕐᕈᓗᐊᕿᔪᖃᖅᑎᓪᓗᒍ ᐃᑲᔫᑏᑦ ᐃᓘᓐᓇᖏᓐᓂᒃ ᐊᓯᐅᔨᑎᓪᓗᒋᑦ: ᐅᑎᕐᕕᐅᔾᔪᑎᒋᔪᓐᓇᖅᑕᖏᑦ ᐊᑭᑦᑐᕆᐊᖅᑐᑦ 50 ᐳᓴᓐᑎᓂᑦ 75 ᐳᓴᓐᑎᓄᑦ ᑭᖑᕝᕕᖅᑕᐅᔾᔪᑎᖏᓐᓄᑦ ᐊᑭᖏᓐᓄᑦ, ᓇᓕᐊᓐᓄᑐᐃᓐᓇᖅ ᐱᖁᑎᕐᔪᐊᓄᑦ ᓱᓇᒃᑯᑖᓄᑦ ᐊᓯᐅᔨᔭᐅᔪᓄᑦ ᓱᕋᑦᑐᓄᓪᓘᓐᓃᑦ ᓴᓇᔭᔅᓴᐅᒍᓐᓃᑎᓪᓗᒋᑦ ᐱᕐᕈᓗᐊᕿᔪᖃᖅᑎᓪᓗᒍ.

ᐱᕐᕈᓗᐊᕿᔪᖃᖅᑎᓪᓗᒍ ᐃᑲᔫᑏᑦ ᓱᕋᓪᓚᕆᑦᑎᓪᓗᒋᑦ: ᑎᑭᐅᒪᔪᑦ 75 ᐳᓴᓐᑎᓄᑦ ᓴᓇᔭᐅᓚᐅᖅᑎᓪᓗᒋᑦ, ᐊᑭᖃᖅᑎᓪᓗᒍ $2,000ᓂᑦ ᐅᖓᑖᓂᓘᓐᓃᑦ, ᑭᓱᑐᐃᓐᓇᖅ ᐱᖁᑎᕐᔪᐊᖅ ᓅᑦᑐᕐᓯᐅᑎ ᓱᕋᑦᑎᓪᓗᒍ ᐱᕐᕈᓗᐊᕿᓂᒃᑯᑦ.

ᑭᒃᑯᑦ ᐱᓇᓱᐊᖃᑕᐅᔪᓐᓇᖅᑲᑦ?

• ᕿᑭᖅᑕᓂ ᓄᓇᓖᑦ ᐃᓄᐃᑦ, ᐅᑭᐅᓖᑦ 16ᓂᑦ ᐅᖓᑖᓂᓘᓐᓃᑦ, ᐊᒻᒪᓗ ᐊᑎᓕᐅᖅᑕᐅᓯᒪᑉᐸᑕ ᓄᓇᕗᑦ ᐊᖏᖃᑎᒌᒍᑎᖏᓐᓂ;
• ᐊᖑᓇᓱᑦᑎ ᐱᖅᑯᓯᖅᑎᒍᑦ ᐊᐅᓇᓱᖃᑕᐅᕙᑦᑐᖅ; ᐊᒻᒪᓗ
• ᐃᓪᓗᒥᐅᖃᑎᒌᑦ ᐊᑐᕐᓯᒪᙱᑦᑐᑦ ᐃᓘᓐᓇᖏᓐᓂᒃ ᐊᕐᕌᖑᑕᒫᑦ ᑮᓇᐅᔭᖅᑖᕆᖃᑦᑕᕈᓐᓇᖅᑕᖏᓐᓂᒃ ($2,000) ᐊᑐᕐᕕᖓᓂ ᑮᓇᐅᔭᓄᑦ ᐊᐅᓚᕕᖓᓂ (ᖃᐅᔨᒪᔭᐅᔭᕆᐊᓕᒃ: ᐃᓪᓗᒥᐅᖃᑎᒌᑦ ᐅᑯᐊᖑᓪᓗᑎᒃ ᑐᔅᓯᕋᖅᑑᑉ ᑲᑎᑎᑕᐅᓯᒪᖃᑎᖓ ᐅᕝᕙᓘᓐᓃᑦ ᑲᑎᑎᑕᐅᓯᒪᒐᑎᒃ ᐊᐃᑉᐸᖓ ᐊᒻᒪᓗ ᓇᓕᑐᐃᓐᓇᖏᑦ ᐅᑭᐅᑭᑦᑐᑦ ᕿᑐᕐᖓᖏᑦ. ᑐᔅᓯᕋᖅᑑᑉ ᐊᖏᔪᖅᑳᖏᒃ, ᕿᑐᕐᖓᖏᑦ ᐅᕝᕙᓘᓐᓃᑦ ᐊᓯᖏᑦ ᐃᓚᓪᓚᑦᑖᖏᑦ ᐅᕝᕙᓘᓐᓃᑦ ᐃᓚᖏᑦ ᐃᓪᓗᖃᑎᖏᑦ ᐅᑭᐅᓖᑦ 16ᓂᑦ ᐅᖓᑖᓂᓘᓐᓃᑦ ᑐᑭᓯᔭᐅᓯᒪᔪᑦ ᐃᓛᒃᑯᑦ ᐃᓪᓗᒥᐅᖃᑎᒋᔭᕆᐊᔅᓴᖏᓐᓂᒃ).

ᑐᔅᓯᕋᐅᓯᐅᕈᒪᒍᔅᓯ ᑮᓇᐅᔭᓂᑦ ᓄᓇᕗᒥ ᐊᖑᓇᓱᑦᑎᓄᑦ ᐃᑲᔫᑎᓄᑦ ᖃᕋᓴᐅᔭᒃᑯᑦ, ᐅᕗᖓ ᑐᕌᕐᓗᑎᑦ https://www.qia.ca/nunavut-harvester-support-program/

ᖃᕋᓴᐅᔭᒃᑯᑦ ᐱᔪᒪᒍᕕᒋᑦ ᑐᔅᓯᕋᐅᑏᑦ ᐅᕗᖓ ᑐᕌᕐᓗᑎᑦ www.qia.ca/applications ᐅᕝᕙᓘᓐᓃᑦ ᐅᖃᕐᕕᖃᕐᓗᑎᑦ ᓄᓇᔅᓯᓐᓂ ᓄᓇᓕᓐᓂᑦ ᑐᓴᐅᒪᑎᑦᑎᔨᒥᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᐊᑏ ᐅᖃᕐᕕᒋᓂᐊᖅᑲᑦ:

ᓯᐴᓚ ᓅᐳᓪ
nhsp@qia.ca
867-975-8438