ᐃᓄᐃᑦ ᐃᓘᓐᓇᖏᓐᓂ 13ᓂᑦ ᓄᓇᓕᓐᓃᙶᕐᓯᒪᔪᑦ ᒫᓐᓇ ᐃᖅᑲᓇᐃᔮᖅᑖᖃᑦᑕᕈᓐᓇᕐᓯᔪᑦ ᓄᓘᔮᓂᑦ
ᐃᖃᓗᐃᑦ, ᓄᓇᕗᑦ − ᒪᐃ 31, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᖁᕕᐊᓱᑉᐳᑦ ᐹᕕᓐᓛᓐᑯᑦ ᐃᖅᑲᓇᐃᔭᖅᑎᑖᖃᑦᑕᓕᕐᖓᑕ ᐊᒻᒪᓗ ᐅᓯᕙᑦᑐᑎᒃ ᐃᓄᓐᓂᑦ ᐃᖅᑲᓇᐃᔭᖅᑎᓂᑦ ᐃᓘᓐᓇᖏᓐᓂᒃ 13ᓂᑦ ᓄᓇᓕᓐᓃᙶᕐᓯᒪᔪᓂᑦ ᕿᑭᖅᑕᓂ.
ᑖᓐᓇ ᐃᓚᒋᔭᖅ ᐱᕚᓪᓕᕈᑎᔅᓴᓄᑦ ᓄᓘᔮᓕᕆᓂᕐᒥ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ ᐋᔩᕈᑕᐅᓯᒪᔪᓂᑦ ᑲᑐᔾᔨᖃᑎᒌᒃᑯᓐᓂ ᐹᕕᓐᓛᓐᑯᓐᓂᓪᓗ. ᑭᓯᐊᓂᓕ, ᐅᓪᓗᒥᒧᑦ ᑎᑭᑦᑐᒍ ᐊᑐᓕᖅᑎᑕᐅᓯᒪᙱᒻᒪᑦ ᐹᕕᓐᓛᓐᑯᓐᓂᑦ.
“ᐊᒥᓱᕈᕆᐊᖁᔨᓂᖅ ᐃᓄᓐᓂᑦ ᐃᖅᑲᓇᐃᔭᖅᑎᐅᕙᑦᑐᓂᑦ ᓄᓘᔮᓕᕆᓂᕐᒥ ᐱᔾᔪᑎᒋᓗᐊᕐᓯᒪᒐᑦᑎᒍ ᑲᑐᔾᔨᖃᑎᒌᒃᑯᓐᓂ,” ᐅᖃᖅᑐᖅ ᐊᖏᔪᖅᑳᖅ ᐸᐅᓗᓯ ᐊᕿᐊᕈᖅ, “ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᕈᑎᔅᓴᖏᓐᓄᓪᓗ ᐊᖏᕈᑏᑦ ᐋᔩᕈᑎᒋᓯᒪᔭᕗᑦ ᐹᕕᓐᓛᓐᑯᓪᓗ ᐋᖅᑭᓯᒪᒻᒪᑕ ᖃᐅᔨᒪᒍᑕᐅᓂᐊᕐᖓᑕ ᐱᕙᓪᓕᐊᓂᖏᑦ ᐃᓄᐃᑦ ᓄᓇᖁᑎᖓᓐᓂ ᐱᓇᓱᐊᕋᔅᓴᖃᖅᑎᑦᑎᒍᑕᐅᓂᐊᕐᓂᖏᓐᓂᒃ ᐃᖅᑲᓇᐃᔮᔅᓴᖃᖅᑎᑦᑎᒍᑕᐅᓂᐊᕐᓂᖏᓐᓂᓪᓗ ᐃᓄᓐᓄᑦ ᓄᓇᑦᑎᓐᓂ.”
ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ ᑲᔪᓯᑎᑦᑎᒍᓐᓇᕐᓯᒪᔪᑦ ᑕᒪᑐᒥᖓ ᐃᖅᑲᓇᐃᔮᖓᓐᓂᒃ ᐋᔩᖃᑎᒌᒍᑎᖃᒃᑲᓂᕐᓂᖏᓐᓂᒃ ᓄᓘᔮᓕᕆᓂᕐᒥ ᐊᖏᕈᑎᓂᑦ.
ᐹᕕᓐᓛᓐᑯᑦ ᒫᓐᓇ ᐊᑭᓖᖃᑦᑕᕐᓂᐊᓕᖅᑐᑦ ᐃᓘᓐᓇᖏᓐᓂᒃ ᒪᑯᓂᖓ ᖃᖓᑦᑕᐅᑏᑦ, ᑐᔪᕐᒥᔾᔪᑏᑦ, ᓂᕆᔾᔪᑏᑦ ᑐᕌᖓᔪᑦ ᐊᐅᓪᓚᖃᑦᑕᕐᓂᖏᓐᓄᑦ ᐹᕕᓐᓛᓐᑯᑦ ᐃᖅᑲᓇᐃᔭᖅᑎᖏᑕ ᕿᑭᖅᑕᓂ ᓄᓇᓕᓐᓂᑦ ᐊᐃᔭᐅᕕᒋᖃᑦᑕᓂᐊᖅᑕᖏᓐᓄᑦ ᓄᓘᔮᓂᑦ. ᐊᐃᔅᓯᕐᕕᐅᖃᑦᑕᓂᐊᖅᑐᑦ ᓄᓇᓖᑦ ᐅᑯᐊᖑᕗᑦ:
- ᐃᒃᐱᐊᕐᔪᒃ
- ᑲᖏᖅᑐᒑᐱᒃ
- ᓴᓂᕋᔭᒃ
- ᐃᒡᓗᓕᒃ
- ᐃᖃᓗᐃᑦ
- ᒥᑦᑎᒪᑕᓕᒃ
ᑕᒪᓐᓇ ᐱᒋᐊᖅᑎᑕᐅᔪᖅ ᐃᓚᓕᐅᔾᔨᓯᒪᓂᐊᕐᒥᔪᖅ ᐹᕕᓐᓛᓐᑯᓐᓄᑦ ᐃᖅᑲᓇᐃᔭᖅᑎᓂᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓂᑦ ᐃᓕᓐᓂᐊᕆᐊᕐᓯᒪᔪᓂᑦ ᐊᒻᒪᓗ ᓄᓇᓕᖏᓐᓃᑦᑐᓂᑦ ᑭᕝᕙᓪᓕᐅᑉ ᐅᕝᕙᓘᓐᓃᑦ ᕿᑎᕐᒥᐅᑦ ᐃᓚᒋᔭᐅᓪᓗᑎᒃ ᓇᓕᑐᐃᓐᓇᖏᓐᓄᑦ ᐅᓪᓗᒥ ᓯᕗᓂᔅᓴᑎᓐᓂᓪᓗ ᐱᓕᒻᒪᔅᓴᐃᔾᔪᑎᖏᓐᓄᑦ ᐊᒻᒪᓗ ᓴᓇᔭᕆᐅᕐᓴᓂᖏᓐᓄᑦ ᐸᕐᓇᐅᑎᖏᓐᓄᑦ.
ᐃᓄᓐᓄᑦ ᐃᓘᓐᓇᖏᓐᓂ ᓄᓇᓕᓐᓃᙶᕐᓯᒪᔪᑦ ᐱᓇᓱᐊᖃᑕᐅᖃᑦᑕᕈᓐᓇᑎᐊᖅᑐᑦ ᐃᖅᑲᓇᐃᔮᔅᓴᓂᑦ ᐹᕕᓐᓛᓐᑯᓐᓂ ᐊᑎᓕᐅᕐᓗᑎᒃ ᑲᑐᔾᔨᖃᑎᒌᒃᑯᑦ ᑐᑭᓯᒋᐊᕈᑎᖃᕐᕕᑦᑖᖅᑲᐅᖓᓄᑦ ᐃᓄᓐᓄᑦ ᐃᖅᑲᓇᐃᔭᖅᑎᒋᔭᐅᔪᓐᓇᖅᑐᓄᑦ, ᑐᑦᑕᕐᕕᒃ.
ᑐᑦᑕᕐᕕᒃ, ᐱᔪᒐᕐᓴᐅᑎᓕᐅᕐᐸᒌᖃᑦᑕᓂᐊᖅᑐᖅ ᑭᓇᑐᐃᓐᓇᕐᒧᑦ ᐊᑎᓕᐅᕐᓯᒪᔪᒧᑦ ᑕᕝᕗᖓ ᐊᒻᒪᓗ ᑲᓲᒪᑎᑦᑎᖃᑦᑕᓂᐊᖅᑐᑎᒃ ᐃᖅᑲᓇᐃᔮᔅᓴᓄᑦ ᓴᖅᑭᖃᑦᑕᓂᐊᖅᑐᓄᑦ ᕿᑭᖅᑕᓂ ᓄᓇᓕᓕᒫᓂᑦ. ᐃᓄᐃᑦ ᐊᑎᓕᐅᕐᓯᒪᒧᑦ ᑐᑦᑕᕐᕕᒻᒥ ᐱᖃᑕᐅᖃᑦᑕᕈᓐᓇᓂᐊᕐᒥᔪᑦ ᐱᓕᒻᒪᔅᓴᕈᑎᓂᑦ ᐃᓕᓐᓂᐊᕈᑎᓂᓪᓗ, ᐃᓚᒋᔭᐅᓪᓗᑎᒃ ᐅᑯᐊ ᐃᓕᓯᒪᔭᕆᐊᓕᖏᓐᓂᒃ ᐱᓕᒻᒪᓴᕐᓂᖅ, ᓴᓇᔭᕆᐅᕐᓴᓂᖅ ᐊᒻᒪᓗ ᓯᓚᑦᑐᓴᕐᕕᒻᒥ ᐃᓕᓐᓂᐊᕋᔅᓴᓂᑦ.
ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ ᐳᓚᕋᑦᑐᑦ ᕿᑭᖅᑕᓂ ᓄᓇᓕᓐᓄᑦ ᑐᑭᓯᒍᒪᓪᓗᑎᒃ ᐊᒻᒪᓗ ᐃᑲᔪᕆᐊᕐᓯᒪᓪᓗᑎᒃ ᐱᔭᕇᖅᑕᐅᑦᑎᐊᖃᑦᑕᓂᐊᕐᖓᑕ ᐱᓇᓱᐊᕈᑏᑦ.
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᓰᒪ ᓴHᐊ ᔨᐅᕋHᐃ, ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
szerehi@qia.ca
(867) 975.8413
1.800.667.2742
ᐱᕙᓪᓕᐊᓯᒪᓂᖓ
ᓄᓘᔮᓕᕆᓂᕐᒥ ᐊᖏᕈᑏᑦ ᑖᒃᑯᓇᙵᑦ ᑲᑐᔾᔨᖃᑎᒌᒃᑯᓐᓂ ᐹᕕᓐᓛᓐᑯᓐᓂᓪᓗ ᐱᔾᔪᑎᒋᓪᓗᒋᑦ ᐃᓄᓐᓂᑦ ᐃᖅᑲᓇᐃᔭᖅᑎᑖᖃᑦᑕᓂᕐᒧᑦ ᐱᐅᓯᕆᕙᑦᑕᖏᑦ:
ᐃᓛᒃᑯᑦ 7.5 – ᐃᖅᑲᓇᐃᔭᖅᑎᑖᕆᖃᑦᑕᓂᐊᖅᑕᖏᓐᓂᒃ ᓯᕗᓪᓕᐅᔾᔨᓯᒪᓂᖏᑦ
ᐃᓄᐃᑦ ᓯᕗᓪᓕᐅᔾᔭᐅᖃᑦᑕᓂᐊᕐᖓᑕ ᐊᓯᖏᑕ ᐱᓇᓱᐊᕐᓯᒪᔪᑦ ᓴᓂᐊᓂ. ᓯᕗᓪᓕᐸᐅᑦᑎᐅᔾᔭᐅᖃᑦᑕᓂᐊᖅᑐᑦ ᐃᓄᐃᑦ ᐅᑯᓇᓂ ᓄᓇᓕᓐᓃᙶᕐᓯᒪᔪᑦ ᒥᑦᑎᑕᒪᓕᒃ, ᐃᒡᓗᓕᒃ, ᑲᖏᖅᑐᒑᐱᒃ, ᓴᓂᕋᔭᒃ ᐊᒻᒪᓗ ᐃᒃᐱᐊᕐᔪᒃ. ᑭᖑᓂᐊᒍᑦ ᓯᕗᓪᓕᐅᔾᔭᐅᖃᑦᑕᕐᓂᐊᕆᓪᓗᑎᒃ ᐃᓄᐃᑦ ᓄᓇᓖᑦ ᕿᑭᖅᑕᓂ ᓄᓇᓕᓐᓂᑦ ᐊᒻᒪᓗ ᑭᖑᓂᐊᒍᑦ ᐃᓘᓐᓇᑎᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓄᑦ ᓄᓇᑖᖃᑕᐅᓯᒪᔪᑦ.
ᐃᓛᒃᑯᑦ 7.6.2 – ᐃᖅᑲᓇᐃᔭᖅᑎᑖᕐᕕᐅᕙᑦᑐᑦ
ᑎᒥᐅᔪᖅ ᖃᖓᑕᓲᒃᑯᑦ ᖃᖓᑦᑕᐅᓰᓯᒪᖃᑦᑕᓂᐊᖅᑐᑦ ᐃᓄᓐᓂᑦ ᐃᖅᑲᓇᐃᔭᖅᑎᓂᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓂᑦ ᐅᔭᕋᓐᓂᐊᕐᕕᒻᒧᑦ ᐅᑎᒧᓪᓗ ᐅᕝᕙᓘᓐᓃᑦ ᐱᓕᕆᕕᒻᒧᑦ ᐊᑭᓖᒋᐊᑐᙱᓪᓗᓂ ᐃᖅᑲᓇᐃᔭᖅᑎ. ᖃᖓᑕᓲᒃᑯᑦ ᐃᖏᕐᕋᔾᔪᑏᑦ ᐃᒪᐃᑦᑑᖃᑦᑕᓂᐊᖅᑐᑦ ᐊᑭᓕᖅᑕᐅᓯᒪᔪᑦ ᖃᖓᑕᓲᑦ ᑎᒥᐅᔪᒧᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᖅᑎᑎᒍᑦ ᖃᖓᑕᓲᒃᑯᑦ ᐊᔪᕐᓇᙱᒐᐃᑉᐸᑦ, ᑎᒥᐅᑉ ᑕᒪᓐᓇ ᐃᓱᒪᕐᓲᑎᒋᖃᑦᑕᓂᐊᖅᑕᖓ ᓇᒻᒥᓂᖅ.
ᐊᖏᕈᑏᑦ ᐋᔩᕋᕈᑕᐅᒃᑲᓂᕐᓂᖏᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᔾᑐᔨᖃᑎᒌᖏᑦ) ᐃᓚᒋᔭᐅᒻᒪᑕ ᐋᔩᖃᑎᒌᒍᑎᖃᒃᑲᓂᕐᓂᕐᒥᒃ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ (ᐊᖏᕈᑏᑦ) ᑖᒃᑯᓇᙵᑦ ᑲᑐᔾᔨᖃᑎᒌᒃᑯᓐᓂᑦ ᐊᒻᒪᓗ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᓂᑦ.
ᐃᓛᒃᑯᑦ 22.2 ᐊᖏᖃᑎᒌᒍᑎᖏᓐᓂ ᐹᕕᓐᓛᒃᑯᑦ ᑲᑐᔾᔨᖃᑎᒌᒃᑯᓪᓗ, ᐃᒪᐃᓕᖓᒻᒪᑦ ᐊᖏᕈᑎᓂᑦ ᕿᒥᕐᕈᖃᑦᑕᓂᐊᕐᖓᑕ ᐱᖓᓱᑦ ᐊᕐᕌᒍᑦ ᓈᔭᕋᐃᑉᐸᑕ ᐊᓯᔾᔨᖅᑐᖃᕆᐊᖃᕐᒪᖔᖅ ᐊᒻᒪᓗ ᐋᖅᑭᒋᐊᕆᐊᖃᖅᑐᖃᕐᒪᖔᕐᓗ ᐊᖏᕈᑎᓂᑦ. ᒪᓕᑦᑐᒍ ᑖᓐᓇ ᕿᒥᕐᕈᓂᖅ, ᐃᓚᖏᑦ ᐃᓛᒃᑰᖓᓂᖏᑦ ᐋᔩᖃᑎᒌᒍᑕᐅᒃᑲᓐᓂᕈᓐᓇᕐᖓᑕ, ᑕᐃᒫᒃ ᑎᑎᕋᖅᑕᐅᓯᒪᒻᒪᑦ ᐃᓛᒃᑯᑦ 22.4ᒥ.
ᐃᓚᒋᔭᐅᓪᓗᓂ ᑕᒪᑐᒧᖓ ᐃᖅᑲᓇᐃᔮᕐᒧᑦ ᐄᐳᓗ 4ᒥ 12ᒧᑦ, ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔭᖅᑎᖏᑦ ᓯᕗᓕᕐᓯᓪᓗᓂ ᐄᕙ ᐋᕆᐊᒃ, ᐊᖏᕈᑎᓂᑦ ᐋᔩᕋᖅᑎᓪᓗᐊᑕᖅ ᐊᒻᒪᓗ ᔪᐊᔾ ᖁᓚᐅᑦ, ᐋᔩᖃᑎᒌᑦᑎ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᓄᓘᔮᓕᕆᓂᕐᒧᑦ ᐳᓚᕋᔪᔫᒃ − ᐃᒡᓗᓕᖕᒧᑦ, ᐃᒃᐱᐊᕐᔪᖕᒧᑦ, ᒥᑦᑎᒪᑕᓕᒻᒧᑦ, ᓴᓂᕋᔭᒻᒧᑦ, ᑲᖏᖅᑐᒑᐱᒻᒧᓪᓗ − ᑕᓪᓕᒪᑦ ᓄᓇᓖᑦ ᓱᕐᕋᑦᑕᐅᕐᓯᒪᔪᑦ ᐅᔭᕋᓐᓂᐊᕐᕕᒻᒧᑦ.
ᓄᓇᓕᓐᓂᑦ ᑲᑎᒪᖃᑎᖃᖅᑎᓪᓗᒋᑦ ᑲᑎᒪᖃᑎᖃᖃᑦᑕᓚᐅᖅᑐᑦ ᒪᐅᓇᑐᐃᓐᓇᖅ ᐅᑯᓂᖓ Hᐊᒪᓚᒃᑯᑦ ᑲᑎᒪᔨᖏᑦ, ᐊᖑᓇᓱᑦᑐᓕᕆᔩᑦ, ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᐊᒻᒪᓗᑦᑕᐅᖅ ᐃᓄᓕᒫᓂᑦ ᑲᑎᒪᑎᑦᑎᕙᑦᑐᑎᒃ ᓄᓇᓕᓐᓂᑦ.
ᓄᓇᓕᓐᓂᑦ ᑲᑎᒪᑎᑦᑎᓂᕐᒥ ᐱᕕᖃᖅᑎᑦᑎᖃᑦᑕᓚᐅᖅᑐᑦ ᐃᓄᓐᓂᑦ ᐃᓱᒪᒋᔭᖏᓐᓂᒃ ᐅᖃᐅᓯᖃᕐᓂᕐᒥᒃ ᐊᒻᒪᓗ ᐃᑲᔪᕐᓯᕆᐊᕈᑎᖏᓐᓂᓪᓗ ᑲᑐᔾᔨᖃᑎᒌᒃᑯᓐᓄᑦ ᐊᖏᕈᑏᑦ ᐋᔩᕋᕈᑕᐅᒃᑲᓂᕐᓂᖏᓐᓄᑦ ᓄᓘᔮᓕᕆᓂᕐᒧᑦ.