ᐊᕐᕌᒍᑦᑎᓐᓂ ᕿᑭᖅᑕᓂᒃᑯᑦ ᐊᕐᕌᒍᑖᒪᕐᓯᐅᒻᒥᒃ ᐊᒻᒪᓗ ᑲᑎᒪᔩᑦ ᑲᑎᒪᓂᖓ ᐃᖃᓗᓐᓂ ᖁᕕᐊᓲᑎᖃᕈᓐᓇᓚᐅᖅᑐᒍᑦ ᑲᔪᓯᐊᓯᒪᔪᕐᔪᐊᕌᓗᓐᓂᒃ. ᐅᓄᖅᑐᓂᒃ ᑎᒍᓯᒍᓐᓇᕐᓯᓚᐅᖅᑐᑦ ᕿᑭᖅᑕᓂ ᐃᓄᐃᑦ 2017-2018 ᐊᒻᒪᓗ ᐱᕈᕐᐸᓕᕐᓯᒪᔪᖅ ᑲᑐᔾᔨᖃᑎᒌᑦ ᐊᐅᓚᑦᓯᒍᓐᓇᓯᓪᓗᑎᒃ ᐅᓄᖅᑐᓂᒃ ᐃᑲᔫᑎᒃᓴᑲᓐᓂᕐᓂᒃ ᓄᓇᓕᖁᑎᑦᑎᓐᓄᑦ.

ᐊᕐᕌᒍᑦᑎᓐᓂ ᐊᐅᓚᑦᓯᒍᑎᖃᖅᑐᒍᑦ ᐊᖏᓂᕐᐹᖑᓯᒪᔪᓂᒃ ᑮᓇᐅᔭᖅᑑᑎᒃᓴᓂᒃ ᕿᑭᖅᑕᓂᒃᑯᑦ ᑕᐃᒪᓐᖓᓂᒃ ᓴᖅᑭᓚᐅᕐᓯᒪᒻᒪᑕᓂᒃ. ᑮᓇᐅᔭᖅᑑᑎᒃᓴᑦ ᑕᑯᒋᐊᕈᑎᒃᓴᐅᔪᑦ ᐱᕈᕐᐸᓕᕐᓯᒪᓂᖏᓐᓂᒃ ᐱᓕᕆᐊᒃᓴᖁᑎᑦᑎᒍᑦ ᐊᒻᒪᓗ ᐃᑲᔫᑎᒃᓴᓄᑦ ᐊᖏᖃᑎᒌᒍᑏᑦ.

ᑲᑎᒪᓂᕗᑦ ᑲᑎᒪᔨᓄᑦ ᐃᖅᑲᓇᐃᔭᖅᑎᓄᓪᓗ ᐱᖕᒪᕆᐅᔪᓂᒃ ᑲᑎᒪᔾᔪᑎᖃᕈᓐᓇᕈᑕᐅᓚᐅᖅᑎᓪᓗᒍ ᐃᖅᑲᓇᐃᔮᑦᑎᓐᓂᒃ ᐊᒻᒪᓗ ᐱᓕᕆᐊᕆᒋᐊᖃᕐᓂᐊᓕᖅᑕᑎᓐᓂᒃ, ᐱᕕᒃᓴᓕᐅᕐᓯᒪᓚᐅᕐᒥᔪᒍᑦ ᐃᓚᒋᔭᐅᓂᕐᒥᒃ ᓇᓪᓕᐅᓂᕐᓯᐅᖅᑐᓄᑦ ᑕᒪᒃᑯᑎᒎᓴ ᓂᔾᔭᐅᓯᔭᖅᑐᑦ, ᐃᓄᓕᖅᑕᓂᒃ ᓂᕆᕕᔾᔪᐊᖅᑐᑦ ᐊᒻᒪᓗ ᓵᓚᒃᓴᐅᓯᐊᖃᑦᑕᖅᑐᑦ ᓄᓇᓖᑦ ᓂᕆᕕᔾᔪᐊᖅᑎᑕᐅᓂᖏᓐᓂ.

ᑖᒃᑯᐊ ᑕᕚ ᐃᓚᖏᑦ ᐅᔾᔨᕐᓇᓗᐊᕐᓂᕆᓚᐅᖅᑕᖏᑦ ᑲᑎᒪᓂᑦᑎᓐᓂ.

ᓂᕆᕕᔾᔪᐊᑎᑦᓯᓂᕗᑦ

ᐊᐅᓚᑦᓯᓚᐅᖅᑐᒍᑦ ᐱᐅᔪᕐᔪᐊᒥᒃ ᓂᕆᕕᔾᔪᐊᑎᑦᓯᓂᕐᒥᒃ ᐃᖃᓗᓐᓂ ᐃᓄᒃᓱᒃ ᐃᓕᓐᓂᐊᕐᕕᐊᓗᐊᓂ ᐊᐃᑉᐱᕐᒥ ᐅᓐᓄᒃᑯᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᒌᕋᑦᑕ.

500 ᐅᖓᑖᓃᑦᑐᑦ ᓂᕆᕕᔾᔪᐊᕆᐊᖅᑐᓚᐅᖅᑐᑦ ᐃᓄᓕᖅᑕᓂᒃ, ᑐᓴᕋᑦᓈᖅᑎᑕᐅᓪᓗᑎᒃ ᓂᔾᔭᐅᓯᔭᖅᑎᓂᒃ ᑲᒫᓗᑯᑖᑦ ᐊᒻᒪᓗ ᓇᓪᓕᓇᖅᑐᑯᓗᓐᓂᒃ ᓄᑕᖅᑲᓂᒃ ᑐᒥᑯᓗᐃᑦ ᐃᓐᖏᖅᑎᖏᑦ.

ᐱᐅᔪᕐᔪᐊᕌᓗᓐᓂᒃ ᓇᓚᐅᑦᓵᕈᑎᓄᑦ ᓵᓚᒃᓴᐅᓯᐅᖃᑦᑕᓚᐅᖅᑐᑦ ᖃᖓᑦᑕᐅᑎᑖᖅᑐᖃᖅᑐᓂᓗ ᑐᓂᓚᐅᖅᑕᖏᓐᓂᒃ ᕘᔅᑎᐊ ᐊᒻᒪᓗ ᑲᓇᐃᑎᔭᓐ ᓄᐊᑦ, ᐅᖅᓱᖅᑖᕈᑎᒃᓴᑦ ᐊᒻᒪᓗ ᓂᐅᕕᕈᑎᒃᓴᑦ ᓂᕿᓂᒃ ᑐᓂᔭᐅᓚᐅᖅᑐᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ (QC) ᐊᒻᒪᓗ ᐊᓯᖏᓐᓂᒃ ᓲᕐᓗ ᖃᕆᓴᐅᔭᕋᓛᖅ ᓴᕐᓕᐊᒐᖅ ᐃᓕᓐᓂᐊᖅᑎᓄᑦ ᐊᒻᒪᓗ ᒥᖅᓲᑦ ᐊᒻᒪᓗ ᕿᓰᑦ.

ᐸᕐᓚᑎᑦᓯᓪᓗᑎᒃ ᓄᖅᑲᕈᑎᖃᓚᐅᖅᑐᑦ ᐅᓐᓄᒃ − ᐊᖏᕐᕋᑐᐃᓐᓇᐅᓕᓚᐅᖅᑐᑦ ᐊᕿᐊᑦᑐᓱᑦᑐᑦ ᐊᒻᒪᓗ ᑐᓵᖅᑲᐅᔭᒥᓂᒃ ᓂᔾᔭᐅᓯᔭᖅᑐᓂᒃ ᐃᓱᒪᒥᐅᑕᖃᖅᑐᑎᒃ.

ᐊᒃᑐᖅᑕᐅᓂᖓᓄᑦ ᐃᑲᔫᓯᐊᖅᑖᓂᕐᒧᓪᓗ ᐊᖏᖃᑎᒌᒍᑦ (IIBA).

IIBA-ᓕᕆᔨᒋᔭᕗᑦ ᓯᑕᒪᐅᔪᕐᓱᐃᑕᕐᓱᑎᒃ ᑲᑎᒪᖃᑎᖃᕐᓯᒪᔪᑦ ᐋᔩᕋᖅᑎᖏᓐᓂᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᕐᔪᐊᒃᑯᑦ ᐊᒻᒪᓗ ᐊᖓᔪᖅᑳᕗᑦ ᑲᑎᒪᖃᑎᖃᖃᑦᑕᕐᓯᒪᔪᖅ ᓯᑕᒪᐃᕐᓱᖅᑐᒥᒃ ᐊᕐᕌᒍᒥ ᒥᓂᔅᑕ ᒪᑭᓇᒥᒃ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ.

 

ᓄᓐᖑᐸᓗᐊᓂ ᔪᓚᐃ ᕿᑭᖅᑕᓂᒃᑯᑦ ᓴᖅᑮᓚᐅᖅᑐᑦ ᐆᑦᑐᕋᐅᑎᑦᑎᓐᓂᒃ ᐅᐊᑦᑎᔩᑦ ᐱᓕᕆᐊᖅ ᐃᑉᐱᐊᔪᒻᒥ. ᐃᓄᐃᑦ ᒥᐊᓂᕐᓯᓂᕐᒧᑦ ᐱᓕᕆᐊᖓ ᐊᐅᓚᑕᐅᕙᓪᓕᐊᓕᖅᑐᖅ ᐋᔩᕋᕈᑎᖃᖅᑎᓪᓗᑕ ᑕᓪᓗᕈᑎᐅᑉ ᐃᒪᖓᓄᑦ IIBA−ᓂᒃ. ᑕᑉᕙᓐᖓᑦ ᐃᖅᑲᓇᐃᔭᖅᑎᑦᓯᓕᖅᑐᒍᑦ ᑕᓪᓕᒪᓂᒃ ᐃᓄᓐᓂᒃ ᐃᑉᐱᐊᔪᒻᒥ ᐅᐊᑦᑎᔩᑦ ᐱᓕᕆᐊᒥᒃ, ᑐᕌᒐᖓ ᓯᐊᒻᒪᑎᑦᓯᕙᓪᓕᐊᓂᖅ ᑖᑦᓱᒥᖓ ᐊᒃᑐᖅᑕᐅᓯᒪᔪᓄᑦ ᐊᓯᖏᓐᓄᑦ ᓄᓇᓕᓐᓄᑦ ᐱᐊᓂᒃᑕᐅᑉᐸᑦ ᑖᓐᓇ ᐆᑦᑐᕋᐅᑦ.

ᐱᓕᕆᐊᑦᑎᓐᓂᒃ ᐱᐊᓂᒃᐸᓪᓕᐊᑎᓪᓗᑕ ᐋᔩᕋᕈᑕᐅᓂᖓᓂᒃ ᑕᓪᓗᕈᑎᐅᑉ ᐃᒪᖓᓄᑦ IIBA−ᓂᒃ ᐃᖅᑲᓇᐃᔭᖃᑎᖃᖃᑦᑕᕐᓯᒪᒻᒥᔪᒍᑦ ᐱᓇᓱᐊᖃᑎᒋᓪᓗᒍ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᕐᔪᐊᑯᓐᓂᒃ ᑎᑎᕋᕆᐊᓐᖓᐅᑎᓕᐅᖅᑐᑕ ᐊᐅᓚᑦᓯᔾᔪᑕᐅᓚᐅᐱᓪᓚᓂᐊᖅᑐᓂᒃ ᐸᕐᓇᐅᑎᓂᒃ ᑖᑦᓱᒧᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ.

ᑕᑉᕗᖓ ᐃᓱᐊᓄᑦ, ᐱᓕᕆᔨᒋᔭᕗᑦ ᑕᒪᐃᓐᓄᑦ ᑕᓪᓕᒪᓄᑦ ᑕᓪᓗᕈᑎᐅᑉ ᐃᒪᖓᓄᑦ ᓄᓇᓕᖕᓄᐊᖃᑦᑕᓚᐅᖅᑐᑦ ᓄᐊᑦᑎᓪᓗᑎᒃ ᐅᖃᐅᓯᒃᓴᓂᒃ ᐊᒻᒪᓗ ᑐᓴᖅᑎᑦᓯᒋᐊᖅᑐᕐᖢᑎᒃ ᐊᐅᓚᑦᓯᔾᔪᑎᓄᑦ ᐸᕐᓇᐅᑎᓂᒃ.

ᐋᔩᕋᕈᑕᐅᓂᓕᒫᖏᓐᓂ, ᐊᔪᐃᓐᓈᕇᓐᓇᕐᓯᒪᔭᕗᑦ ᐃᓚᒋᔭᐅᒍᒪᓂᖅ ᐅᓄᖅᑐᓂᒃ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓂᒃ, ᐊᓯᖏᓐᓂᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᕐᔪᐊᒃᑯᑦ.

ᓄᓐᖑᐊᓂ ᔪᓚᐃ ᑲᑎᒪᖃᑎᒋᓚᐅᕐᒥᔭᕗᑦ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᐊᓪᓚᑉᕕᖓ ᑲᑎᒪᔾᔪᑎᖃᕐᖢᑕ IIBA ᐊᔩᕋᕈᑎᖃᕐᓂᕐᒥᒃ.

ᑲᔪᓯᐊᕙᓪᓕᐊᔪᒻᒪᕆᐅᔪᒍᑦ ᐋᔩᕋᕈᑕᐅᔪᒧᑦ ᐊᒻᒪᓗ ᑐᓂᓯᓚᐅᖅᑐᒍᑦ ᑎᑎᕋᕆᐊᓐᖓᐅᑎᓂᒃ ᐊᖏᖃᑎᒌᒍᑎᓂᒃ ᓯᕗᓪᓕᐹᕐᓯᐅᑎᓂᒃ ᑲᓇᑕ ᒐᕙᒪᖓᓄᑦ.

ᐊᑎᓕᐅᖅᑕᐅᓂᖓ IIBA ᐱᕙᓪᓕᐊᖏᓐᓇᖅᑐᖅ ᒫᑦᓯ 2019-ᒧᓄᑦ ᐱᕕᒃᓴᖃᓗᐊᕌᓗᓐᖏᑦᑐᖅ ᐱᑉᕕᒃᓴᖃᖅᑎᑕᐅᕕᐅᔪᖅ.

Mary River Project

As you know, QIA was renegotiating the Mary River IIBA with Baffinland this year.

Our negotiations team was led by former Nunavut premier Eva Aariak, who acted as IIBA Chief Negotiator and George Qulaut, who was the advisor.

ᓄᓘᔮᓐᓂ ᐱᓕᕆᐊᖅ

ᖃᐅᔨᒪᒐᑦᓯ, ᕿᑭᖅᑕᓂᒃᑯᑦ ᐋᔩᕋᕈᑎᖃᒃᑲᓂᖅᑐᑦ ᓄᓘᔮᓐᓂ IIBA ᐹᕕᓐᓛᑯᓐᓂᒃ ᐊᕐᕌᒍᑦᑎᓐᓂ.

ᐋᔩᕋᖅᑎᕗᑦ ᓯᕗᓕᖅᑕᐅᔪᑦ ᓄᓇᕗᒻᒥ ᓯᕗᓕᖅᑎᑕᐅᓚᐅᕐᓯᒪᔪᔪᑦ ᐄᕙ ᐋᕆᐊᒃ, IIBA ᐊᐃᕙᔨᒻᒪᕆᐅᓚᐅᐱᓪᓚᑦᑐᖅ ᐊᒻᒪᓗ ᔪᐊᔾ ᖁᓚᐅᑦ, ᖃᐅᔨᒪᔨᑕᐅᓚᐅᖅᑐᖅ.

ᑲᑎᒪᓂᑦᑎᓐᓂ, ᐊᖓᔪᖅᑳᕗᑦ ᑐᓐᖓᓴᐃᒍᓐᓇᕐᓯᓚᐅᕐᒥᔪᖅ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᑎᒃᑯᑦ ᐊᖓᔪᖅᑳᖓᓂᒃ ᐊᐅᓚᑦᓯᔨᒻᒪᕆᐅᓯᓐᓈᑦ ᕗᕋᐃᔭᓐ ᐱᐊᓂ. ᒪᕐᕉᒃ ᐊᖓᔪᖅᑳᒃ ᑭᐳᖃᑦᑕᐅᑎᓪᓗᑎᒃ ᑐᓂᖃᑦᑕᐅᑎᓚᐅᖅᑑᒃ ᖁᕕᐊᓲᑎᒥᓂᒃ ᐊᒻᒪᓗ ᓂᓪᓕᐊᕕᖃᖅᑐᑎᒃ ᐱᕙᓪᓕᐊᔪᓕᕆᔨᓂᒃ ᐋᖅᑭᒋᐊᖅᑕᐅᓯᒪᔪᖅ ᓄᓘᔮᓐᓂ IIBA ᒥᑦᓵᓄᑦ.

ᐹᕕᓐᓛᓐ ᑐᓂᓚᐅᖅᑕᖓ ᕿᑭᖅᑕᓂᒃᑯᓐᓄᑦ $25,000 ᑐᓐᓂᖅᑯᑎᖓ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒻᒥ ᐊᕙᑎᓕᕆᓂᕐᒥᒃ ᐃᓕᓐᓂᐊᖅᑐᓄᑦ ᑮᓇᐅᔭᓕᑕᐅᓯᒪᒍᑎᖏᓐᓄᑦ.

ᓱᓕᒃᑲᓐᓂᖅ, ᐹᕕᓐᓛᓐ ᐃᓚᓕᐅᔾᔨᓂᐊᖅᑐᖅ ᐊᐅᓱᐃᑦᑐᒥᒃ ᖃᐅᓱᐃᑦᑐᒥᓪᓗ ᓄᓇᓕᓐᓂ ᑎᑎᖅᑭᕆᓂᕐᒧᑦ ᐃᓕᓐᓂᐊᕈᑎᓄᑦ ᑖᒃᑯᓄᖓᑐᐊᖅ ᑐᓂᔭᐅᖃᑦᑕᓚᐅᖅᑑᒐᓗᐊᓂᒃ ᑕᓪᓕᒪᓄᑦ ᓄᓘᔮᓐᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᓐᓄᑦ.

ᐊᖓᔪᖅᑳᕗᑦ, ᐲᔭᐃ ᐊᕿᐊᕈᖅ, ᑐᓂᓯᓚᐅᖅᑐᖅ ᕗᕋᐃᔭᓐ ᐱᐊᓂᒥᒃ ᕿᓯᒻᒥᒃ ᐅᐊᓯᑯᐊᒥᒃ, ᐊᑐᖃᑦᑕᓂᐊᖅᑕᖓᓂᒃ ᓄᓇᕗᑦ ᓄᓇᓕᖏᓐᓄᑦ ᐳᓚᕋᓕᕋᐃᒍᓂ. ᐅᐊᓯᑯᐊᒃ ᓇᓗᓇᐃᒃᑯᑕᖅ ᑲᓲᒪᓂᖏᓐᓂᒃ ᐃᓄᐃᑦ ᑕᒪᐅᖓ ᓄᓇᒧᑦ.

ᐱᒋᐊᓚᐅᓐᖏᓐᓂᖏᓐᓂ IIBA ᐋᔩᕋᕈᑕᐅᑲᓐᓂᕐᓂᖓ ᕿᑭᖅᑕᓂᒃᑯᑦ ᓄᓇᓕᖕᓄᐊᖃᑦᑕᓚᐅᖅᑐᑦ ᓄᐊᑦᓯᓪᓗᑎᒃ ᖃᐅᔨᒪᓂᕆᔭᐅᔪᓂᒃ ᑕᓪᓕᒪᓂᒃ ᐊᒃᑐᖅᑕᐅᓯᒪᔪᓂᒃ ᕼᐊᒻᓚᓂᒃ ᑭᓱᑦ ᐱᕚᓪᓕᕐᓯᒪᒻᒪᖔᑕ ᑕᑯᒍᒪᓚᐅᖅᑕᖏᓐᓂ. ᕼᐊᒻᓚᐃᑦ, HTO ᐊᒻᒪᓗ CLARC ᑲᑎᒪᖃᑕᐅᖃᑦᑕᓚᐅᖅᑐᑦ ᐊᒻᒪᓗ ᓄᓇᓕᓐᓂ ᐃᓄᓕᒫᖅᑎᑦᓯᖃᑦᑕᕐᓱᑎᒃ.

ᑐᓴᓚᐅᖅᑕᑎᓐᓂᒃ ᓄᓇᓕᓐᓂᒃ, ᕿᑭᖅᑕᓂᒃᑯᑦ ᑐᕌᒐᖏᑦ ᐋᔩᕋᕈᑕᐅᒃᑲᓂᕐᓂᖓᓂ ᑐᕌᖓᓚᐅᖅᑐᑦ ᑐᓐᖓᕕᖃᓗᐊᓐᖑᐊᖅᑐᑎᒃ ᐊᑐᐃᓐᓇᖃᒃᑲᓐᓂᕆᐊᖃᕐᓂᕐᒥᒃ ᐱᓕᖕᒪᒃᓴᐅᑎᓂᒃ ᐊᒻᒪᓗ ᐃᓕᓐᓂᐊᓂᕐᒧᑦ ᐱᑉᕕᒃᓴᖃᖅᑎᑕᐅᓂᕐᒥᒃ ᐊᒻᒪᓗ ᓯᕗᓪᓕᐅᔾᔭᐅᔭᕆᐊᓕᓐᓂᒃ ᓇᓕᒧᖏᓐᓂᒃ ᐃᓄᐃᑦ ᐃᖅᑲᓇᐃᔮᖏᓐᓂᒃ.

ᖁᕕᐊᓱᑉᐳᖓ ᖃᐅᔨᒃᑲᐃᔾᔪᑎᖃᕆᐊᒃᓴᖅ ᑲᔪᓯᑎᑦᓯᓯᒪᔪᒍᑦ ᐊᒥᓱᐊᓗᓐᓂᒃ ᐋᔩᕋᒃᑲᓂᕐᓂᐅᔪᒥᒃ.

ᐅᑯᐊ ᑕᒡᕙ ᐅᔾᔨᕐᓇᓗᐊᕐᓂᖏᑦ:

• $10 ᒥᓂᔭᑖᕈᓐᓇᕐᓯᓚᐅᖅᑐᒍᑦ ᑐᕌᖓᓂᐊᖅᑐᓂᒃ ᓴᓇᒻᒪᖓᓄᑦ ᓴᓇᔭᐅᓂᖓᓄᓪᓗ ᐊᕕᑦᑐᕐᓯᒪᓂᕐᒥ ᐱᓕᖕᒪᓴᕐᕕᒃᓴᖅ ᒥᑦᑎᒪᑕᓕᒻᒥ
• ᐊᖏᓪᓕᒋᐊᕐᓯᔪᓐᓇᕐᓯᓯᒪᔪᒍᑦ ᐃᓄᐃᑦ ᐱᓕᖕᒪᓴᕐᓂᕐᒧᑦ ᑮᓇᐅᔭᖅᑑᑎᒃᓴᖏᓐᓂᒃ.
  • ᒫᓐᓇ $2.25 ᒥᓕᔭᑖᕐᓯᒪᓕᖅᑐᒍᑦ ᐊᕐᕌᒍᑕᒫ 2018−ᒥᓂᒃ 2021-ᒧᓄᑦ
  • ᐊᒻᒪᓗ $1.5 ᒥᓕᔭᓐ ᐊᐅᓚᑕᐅᓂᖓᓄᑦ ᐱᓕᒻᒪᓴᕐᓂᖅ ᐃᓄᓐᓄᑦ 2021-ᒥᓂᒃ 2031-ᒧᓄᑦ

ᓇᓗᓇᐃᖅᑐᕐᓯᒪᓂᕐᓴᐅᔪᑦ ᑲᔪᓯᑎᖃᑦᑕᕐᓯᒪᔭᑦᑎᓐᓂᒃ ᐋᔩᕋᕈᑕᐅᒃᑲᓂᕐᓂᖓᓄᑦ ᓄᓘᔮᓐᓂ IIBA ᑕᑯᒋᐊᕋᑦᓴᖅ ᓴᖅᑭᕐᓯᒪᔭᑦᑎᓐᓂᒃ ᑕᐃᒎᓯᓕᒃ: ᑭᓱᓂᒃ ᕿᑭᖅᑕᓂᒃᑯᑦ ᑲᔪᓯᑎᑦᓯᓯᒪᒻᒪᖔᑕ ᓄᓘᔮᓐᓂ IIBA ᐋᔩᕋᕈᑕᐅᒃᑲᓂᕐᓂᖓᒍᑦ.

Q-STEP ᐊᒻᒪᓗ ᑐᑦᑕᕐᕕᒃ

ᑕᐃᒪᐃᑎᓪᓗᒍ, ᐃᖅᑲᓇᐃᔮᕗᑦ ᐊᖏᓪᓕᕙᓪᓕᐊᑎᓪᓗᒋᑦ ᐃᖅᑲᓇᐃᔮᑦᓴᑦ ᐱᓕᒻᒪᒃᓴᐅᑎᑦᓴᓪᓗ ᐃᓄᓐᓄᑦ ᑲᔪᓯᕙᓪᓕᐊᖏᓐᓇᖁᓪᓗᒋᑦ.

ᑕᐃᒪᓐᖓᓂᒃ ᓴᖅᑮᓚᐅᕋᑦᑕ ᓯᑕᒪᓂᒃ ᐊᕐᕌᒍᓂᒃ ᐃᓄᐃᑦ ᐃᖅᑲᓇᐃᔮᒃᓴᖏᑦ ᐊᒻᒪᓗ ᐱᓕᒻᒪᒃᓴᐅᑏᓄᑦ ᐱᓕᕆᐊᒃᓴᑦ ᐅᑭᐊᑦᓵᖑᓚᐅᖅᑐᒥ ᐊᖏᔪᒻᔪᐊᓂᒃ ᓴᖅᑭᕐᓯᒪᔪᖃᖅᑐᖅ.

ᐃᖅᑲᓇᐃᔭᖃᑎᒋᑦᓯᐊᖅᑕᕗᑦ ᐱᓇᓱᐊᖃᑎᒋᔭᕗᑦ: ᑲᓇᑕ ᒐᕙᒪᒃᑯᖏᑦ, ᓄᓇᕗᑦ ᒐᕙᒪᒃᑯᖏᑦ, ᑲᑭᕙᒃ ᐊᒻᒪᓗ ᐹᕕᓐᓛᓐ.

ᑖᒃᑯᑎᒎᓇ ᕿᑭᖅᑕᓂ ᐊᔪᕈᓐᓃᕐᓴᐅᑎᓄᑦ ᐱᓕᒻᒪᒃᓴᐅᑎᓄᓪᓗ ᐃᖅᑲᓇᐃᔮᒃᓴᓄᑦ ᐱᓇᓱᐊᖃᑎᒌᑦ (Q-STEP) ᐱᓕᕆᐊᒃᑯᑦ ᐃᖅᑲᓇᐃᔮᕗᑦ ᐱᕙᓪᓕᐊᑎᑦᓯᓂᖅ ᐊᔪᕈᓐᓃᕐᓴᐅᑎᒃᓴᓂᒃ ᕿᑭᖅᑕᓂ ᓄᓇᖓᓂ.

ᑕᖅᑮᑦ ᐊᒥᓲᓐᖏᑦᑐᑦ ᓈᒐᐃᒻᒪᑕ ᓄᑖᓂᒃ ᐃᓕᓐᓂᐊᕌᓂᑦᑐᖃᖃᑦᑕᖅᑐᖅ ᐱᓕᖕᒪᒃᓴᐅᑎᓂᒃ ᐊᒻᒪᓗ ᐱᓕᕆᒡᕕᒃᑯᑦ ᐃᓕᓐᓂᐊᖅᑐᓂᒃ ᐊᒃᑐᐊᔪᓂᒃ Q-STEP−ᑯᓐᓄᑦ.

ᑖᓐᓇ ᐱᓕᕆᐊᖑᔪᖅ ᐊᑐᖅᑐᖅ ᐊᒻᒪᓗ ᐱᔨᑦᓯᕈᑕᐅᔪᖅ ᐆᑦᑐᕋᑕᐅᓪᓗᓂ ᑲᔪᓯᐊᔪᓐᓇᖅᑐᓂᒃ ᓇᓗᓇᐃᕐᓯᒪᔪᒃᑯᑦ ᐱᕚᓪᓕᕈᑕᐅᔪᓐᓇᖅᑐᓂᒃ ᐃᓅᓯᖏᓐᓄᑦ ᐃᓄᐃᑦ.

ᑲᑐᔾᔨᖃᑎᒋᕙᐅᓪᓗᑎᒃ Q-STEP, ᕿᑭᖅᑕᓂᒃᑯᑦ ᓴᓇᓯᒪᔪᑦ ᐃᓄᐃᑦ ᐃᖅᑲᓇᐃᔭᖅᑏᑦ ᓇᓗᓇᐃᖅᑐᐃᕕᖓᓂᒃ ᑲᑎᕐᓱᐃᕕᒻᒥᒃ, ᑐᑦᑕᕐᕕᒃ.

ᑐᑦᑕᕐᕕᒃ ᐋᖅᑭᑦᑕᐅᓯᒪᔪᖅ ᖃᐅᔨᒋᐊᕐᕕᓴᓪᓗᐊᑕᖅ ᐃᑲᔪᖅᑕᐅᔾᔪᑎᑦᓴᓂᒃ ᐃᖅᑲᓇᐃᔭᕐᕕᓐᓄᑦ ᖃᐅᔨᓇᓱᐊᖅᑎᓪᓗᒋᑦ ᐃᓄᓐᓂᒃ ᐊᔪᓐᖏᔾᔪᑎᓕᓐᓂᒃ ᐃᖅᑲᓇᐃᔮᑦᓴᓄᑦ ᐅᑉᕙᓘᓐᓃᑦ ᐱᓕᖕᒪᒃᓴᕈᒪᔪᓄᑦ ᓴᓇᕕᓐᓂ ᓇᓕᑐᐃᓐᓇᖏᓐᓂᒃ.

ᑐᓴᐅᒪᔾᔪᑎᒃᓴᓂᒃ ᐃᖅᑲᓇᐃᔭᖅᑎᑖᕋᓱᐊᕐᓂᒧᓪᓗ ᐊᐅᓚᔾᔪᑎᖓ ᑐᑦᑕᕐᕕᒃ ᐊᐅᓚᐃᓐᓇᕐᓯᒪᔪᖅ ᕿᑭᖅᑕᓂ ᓄᓇᓕᖏᓐᓂ ᐊᕐᕌᒍᑦᑎᓐᓂ.

600 ᐅᖓᑖᓃᓕᖅᑐᑦ ᐊᑎᓕᐅᕐᓯᒪᔭᕗᑦ ᑐᑦᑕᕕᒻᒥ ᐅᓪᓗᒥᒧᑦ.

ᒥᑦᑎᑕᒪᓕᒻᒥ ᓄᓇᓕᑦᑎᒍᑦ ᖃᐅᔨᓴᕐᓂᕐᒧᑦ ᐱᓕᕆᐊᖅ

ᒥᑦᑎᒪᑕᓕᒻᒥ ᓄᓇᓕᑦᑎᒍᑦ ᖃᐅᔨᓴᕐᓂᕐᒧᑦ ᐱᓕᕆᐊᖅ ᐊᕐᕌᓂ ᐊᐅᓚᔾᔭᓚᐅᖅᑕᕗᑦ ᐱᕈᕐᐸᓕᐊᒻᒥᔪᖅ.

ᒫᓐᓇ ᑮᓇᐅᔭᓕᑕᐅᓯᒪᓕᖅᑐᒍᑦ ᓄᓇᖃᖅᑳᕐᓯᒪᔪᑦ ᓄᓇᓕᑦᑎᒍᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐱᓕᕆᐊᒥᒃ ᑲᔪᓯᔾᔪᑎᒃᓴᖓᓂᒃ ᑖᓐᓇ ᐱᓕᕆᐊᖑᔪᖅ ᑎᑭᐅᑎᓯᒪᔪᓂᒃ ᐊᕐᕌᒎᓐᓄᑦ ᒪᕐᕈᑲᓐᓃᓐᓄᑦ.

ᐊᕐᕌᓂᓂᑦ, ᐊᕐᕕᓂᓖᑦ ᐱᓇᓱᐊᖃᑕᐅᓯᒪᓕᖅᑐᑦ ᑕᑉᕗᖓ ᐱᓕᕆᐊᒧᑦ ᓄᓇᓕᓐᓂ ᖃᐅᔨᓴᖅᑎᐅᓪᓗᑎᒃ.

 

ᕿᑭᖅᑕᓂ ᐃᓕᖅᑯᓯᕐᒧᑦ ᐊᐅᓚᔾᔪᑎᒃᓴᓄᑦ ᐱᓕᕆᐊᖅ ᑮᓇᐅᔭᓕᑕᐅᓚᐅᖅᑐᑦ ᐃᑲᔫᓯᐊᒃᓴᓂᒃ ᐱᕈᕐᐸᓕᕐᓯᒪᓕᖅᑐᖅ.

ᒪᕐᕈᐃᓱᖅᑐᑕ ᓴᖅᑮᓯᒪᓕᖅᑐᒍᑦ ᑐᒃᓯᕋᐅᓯᐅᖁᔨᔾᔪᑎᓂᒃ ᒫᑦᓯᒥ ᒪᐃᒥᓗ.

ᓄᓇᓖᑦ ᑕᒪᕐᒥᒃ ᑐᓂᓯᓯᒪᔪᑦ ᐊᑕᐅᓯᕐᒨᖓᔪᓂᒃ ᑲᔪᓯᐊᓯᒪᔪᓂᒃ ᐱᓕᕆᐊᒃᓴᒧᑦ ᑐᒃᓯᕋᐅᑎᒥᒃ.

ᑲᔪᓯᐊᑦᓯᐊᕐᓯᒪᔪᑦ ᐱᓕᕆᐊᑦ ᑎᑭᐅᑎᓯᒪᔪᑦ ᐊᐅᓚᔾᔪᑎᓂᒃ ᓲᕐᓗ ᐊᖑᓇᓱᓐᓂᕐᒧᑦ ᐊᒻᒪᓗ ᓄᓇᒧᐊᖃᑦᑕᓂᕐᒧᑦ, ᑲᑕᔾᔭᓂᕐᒧᑦ ᐊᒻᒪᓗ ᑎᑎᖅᑐᒐᕆᐅᕐᓴᓂᕐᓄᑦ.

ᐸᐃᕆᕕᓐᓄᑦ ᐃᑲᔫᑏᑦ

ᐊᓯᐊᑦᑕᐅᖅ ᐱᓕᕆᐊᖅ ᐋᖅᑭᑦᑕᐅᓯᒪᔪᖅ ᐃᑲᔫᓯᐊᒃᓴᓕᕆᔨᒃᑯᑦᑎᒍᑦ ᐸᐃᕆᕕᓐᓄᑦ ᐃᑲᔫᑏᑦ.

ᕿᑭᖅᑕᓂᒃᑯᑦ ᑲᑎᒪᔨᖏᑦ ᐅᓄᕐᓯᒋᐊᕆᓚᐅᖅᑐᑦ ᐃᑲᔫᑎᓂᒃ ᒪᐃᒥ ᑲᑎᒪᓂᕐᒥ, $5-ᒥᒃ $10-ᒧᑦ.

ᕿᑭᖅᑕᓂ ᐃᓄᐃᑦ ᕿᑐᕐᖓᓖᑦ ᒫᓐᓇ ᐃᑲᔪᖅᑕᐅᖃᑦᑕᖅᑐᑦ ᑲᑭᕙᒃᑯᑦ $19/ᐅᓪᓗᖅ ᐃᑲᔫᑎᒥᒃ ᑐᓂᔭᐅᒃᑲᓐᓂᖃᑦᑕᕈᓐᓇᓕᖅᑐᑦ $10−ᒥᒃ ᐊᖏᓂᕐᐹᖓ $29/ᐅᓪᓗᖅ ᐃᑲᔫᑎᓂᒃ ᐸᐃᕆᕕᓐᓄᑦ.

ᐃᑲᔫᑎ ᒪᓂᒪᑎᑕᐅᓂᐊᖅᑐᖅ ᒫᑦᓯ 2020−ᒧᓄᑦ ᓄᑖᓐᖑᕆᐊᖅᑕᐅᑐᐃᓐᓇᕆᐊᖃᓛᕐᒥᔪᖅ.

ᓄᑖᑦ ᐃᑲᔫᑎᒃᓴᑦ ᐸᐃᕆᕕᓐᓄᑦ

ᐃᓚᒋᔮ ᐃᑲᔫᓯᐊᒃᓴᓕᕆᔨᒃᑯᑎᒍᑦ ᐱᓕᕆᐊᑦ ᕿᑭᖅᑕᓂᒃᑯᑦ ᓴᓇᔪᑦ ᐃᓄᒃᑎᑑᖅᑐᓂᒃ ᒥᑭᓂᖏᓐᓂ ᓄᑕᖅᑲᑦ ᐃᓕᓐᓂᐊᓵᓕᓂᕐᒧᑦ ᐸᐃᕆᕕᖕᓄᑦ ᐊᒻᒪᓗ ᐃᓚᒌᓄᑦ.

ᕿᑭᖅᑕᓂᒃᑯᑦ ᓴᖅᑭᓂᐊᖅᑕᖓ ᓄᑖᑦ ᐃᑲᔫᑎᒃᓴᑦ ᒫᑦᓯ 2019−ᒥ.

ᐃᑲᔫᑎᒃᓴᑦ ᑐᓂᐅᖅᑲᖅᑕᐅᓛᖅᑐᑦ ᕿᑭᖅᑕᓂ ᐸᐃᕆᕕᓕᒫᖏᓐᓄᑦ ᑲᑎᒪᕐᔪᐊᓚᐅᖅᑎᓪᓗᒋᑦ.

ᕿᑭᖅᑕᓂᒃᑯᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᖏᑦ

ᓯᑉᑎᒻᕙᒥ ᑐᓴᖅᑎᑦᓯᓚᐅᖅᑐᒍᑦ ᑐᓂᔭᐅᔪᓂᒃ 80 ᕿᑭᖅᑕᓂᒃᑯᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᖏᓐᓂᒃ 2018−2019 ᐃᓕᓐᓂᐊᕐᓇᐅᑉ ᐊᕐᕌᒍᐊᓂ.

ᑖᓐᓇ ᑐᒡᓕᕆᓕᖅᑕᖓ ᐊᕐᕌᒍ ᒪᓂᒪᑎᑦᓯᓂᕗᑦ ᑖᒃᑯᓂᖓ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᐃᓄᓐᓄᑦ ᐃᓕᓐᓂᐊᖅᑎᓄᑦ ᓄᓇᓕᖁᑎᑦᑎᓐᓂ.

ᖁᕕᐊᓇᖅᑐᖅ ᑕᑯᔭᕆᐊᒃᓴᖅ ᑭᒡᒍᑎᒋᖃᑦᑕᓚᐅᖅᑕᖏᓐᓂᒃ ᐃᓕᓐᓂᐊᖅᑎᑦ ᐅᕙᑦᑎᓐᓄᑦ ᖃᓄᖅ ᑖᒃᑯᐊ ᑮᓇᐅᔭᑦ ᐊᑑᑎᖃᓚᐅᕐᓂᖏᓐᓂᒃ ᐃᓕᓐᓂᐊᖅᑕᒥᓄᑦ.

ᐃᐱᑎᑭ

ᐃᐱᑎᑭ ᑮᓇᐅᔭᓕᑕᐅᓯᒪᔪᖅ $500,000-ᓂᒃ ᐊᖏᖃᑎᒌᒍᑎᒃᑯᑦ ᒪᑭᒋᐊᖅᑕᑯᓐᓂᒃ ᒪᕐᕉᓐᓄᑦ ᑮᓇᐅᔭᓕᕆᓐᓈᒃ ᐊᕐᕌᒍᖏᓐᓄᑦ.

ᑖᒃᑯᓄᓐᖓᖓᔪᓂᒃ ᐱᓕᕆᐊᒃᓴᓄᑦ ᐋᖅᑭᑦᓱᐃᔪᒍᑦ:

• ᐊᑐᕋᑦᓴᓂᒃ ᐃᑲᔫᑎᒃᓴᓄᑦ ᐃᓐᓇᐃᑦ ᐃᓚᒋᔭᐅᒍᑎᒃᓴᖏᓐᓄᑦ ᐸᐃᕆᕕᓐᓄᑦ
• ᐃᓚᒌᑦ ᑎᑎᖅᑭᕆᔾᔪᑎᒃᓴᖏᓐᓄᑦ ᑲᑎᑕᐅᓯᒪᔪᑦ
• ᐸᐃᕆᕕᓕᕆᔨᓄᑦ ᑲᑎᒪᓂᕐᔪᐊᖅ ᐃᓕᓐᓂᐊᓂᕐᓗ
• ᐋᖅᑭᓱᖅᑕᐅᓯᒪᔪᖅ ᐃᓕᓐᓂᐊᕈᑎᒃᓴᑦ ᐸᐃᕆᕕᒻᒥ ᑲᑎᒪᔨᖏᓐᓄᑦ

ᕿᑭᖅᑕᓂᒃᑯᑦ ᖁᕕᐊᓱᓪᓚᕆᑦᑐᑦ ᑖᑦᓱᒥᖓ ᐃᐱᑎᑭ ᒪᑭᑉᐸᓪᓕᐊᒍᑕᐅᓂᖓᓄᑦ ᐃᓚᒌᓄᑦ ᐃᑲᔪᖅᑕᐅᔾᔪᑎᒃᓴᑦ ᓄᑕᖅᑲᑦ ᒥᑭᓂᖏᓐᓂ ᐃᓕᓐᓂᐊᕈᑎᓂᒃ ᐊᒻᒪᓗ ᕿᑭᖅᑕᓂ ᐃᓄᖏᓐᓄᑦ ᐊᐅᓚᑦᓯᒍᑎᒃᓴᓂᒃ ᓄᑕᖅᑲᑦ ᒥᑭᓂᖏᓐᓂ ᐱᔨᑦᓯᕈᑎᒃᓴᓂᒃ.

ᕿᑭᖅᑕᓂᒃᑯᑦ ᐃᓵᔪᓄᑦ ᐊᑐᐊᒐᖅ ᐊᒻᒪᓗ ᐃᑲᔫᑎᒃᓴᑦ ᑮᓇᐅᔭᑦ ᐊᑐᐊᒐᖓ

ᓴᖅᑮᓯᒪᒻᒥᔪᒍᑦ ᓯᕗᓪᓕᕐᐹᑦᓯᐊᒥᒃ ᐃᑲᔫᑎᒃᓴᓂᒃ ᑮᓇᐅᔭᓂᒃ ᐊᒻᒪᓗ ᓴᓂᕐᕚᕆᕕᖕᒧᑦ ᑮᓇᐅᔭᓂᒃ ᐅᓂᒃᑳᓂᒃ ᐊᕐᕋᒍᑦᑎᓐᓂ.

ᑖᒃᑯᐊ ᑮᓇᐅᔭᑦ ᓴᖅᑭᕐᓯᒪᔪᑦ ᐱᕚᓪᓕᕐᓯᒪᓂᖏᓐᓂᒃ ᐃᓵᔪᓄᑦ ᐊᑐᐊᒐᖏᑦ ᕿᑭᖅᑕᓂᒃᑯᑦ.

ᑖᒃᑯᐊ ᐊᑐᐊᒐᑦ ᖃᐅᔨᒪᒋᐊᕈᑏᑦ ᑮᓇᐅᔭᖅᑖᕆᔭᐅᓯᒪᔪᑦ ᕿᑭᖅᑕᓂᒃᑯᓐᓂᒃ ᑎᑎᕋᖅᑕᐅᓯᒪᓗᑎᒃ ᐊᐅᓚᑕᐅᑦᓯᐊᕐᓯᒪᖁᓪᓗᒋᓪᓗ ᓴᖅᑭᔮᑦᓯᐊᑐᒃᑯᑦ.

ᑖᒃᑯᑎᒎᓇ ᐃᓵᔪᓄᑦ ᐊᑐᐊᒐᖅᑎᒍᑦ ᑮᓇᐅᔭᖅᑖᕆᔭᐅᓯᒪᔪᑦ ᐴᖅᑕᐅᖃᑦᑕᖅᑐᑦ ᕿᑭᖅᑕᓂᒃᑯᑦ ᓴᓂᕐᕚᔭᖏᓐᓄᑦ ᑮᓇᐅᔭᓄᑦ, ᐃᖕᒥᒃᑰᖓᔪᑦ ᕿᑭᖅᑕᓂᒃᑯᑦ ᐊᐅᓚᔾᔪᑎᖏᓐᓄᑦ ᐊᒃᑐᐊᖏᑦᑐᑦ.

ᐊᕐᕌᒍᑕᒫᑦ ᐃᓚᓐᖓᖅᑕᐅᖃᑦᑕᖅᑐᑦ ᑮᓇᐅᔭᑦ ᕿᑭᖅᑕᓂᒃᑯᑦ ᓴᓂᕐᕚᔭᖏᑦ ᐊᑐᖅᑕᐅᓪᓗᑎᒃ ᑮᓇᐅᔭᓖᒍᑕᐅᕙᑦᑐᑦ ᐱᓕᕆᐊᒃᓴᓄᑦ ᕿᑭᖅᑕᓂᒃᑯᑦ ᐃᑲᔫᑎᒃᓴᖏᑎᒍᑦ.

ᑮᓇᐅᔭᑦ ᐅᓄᕐᓯᕙᓪᓕᐊᓂᖏᓐᓂ ᓴᓂᕐᕚᔭᐅᓯᒪᔪᓂ ᑕᐃᒫᑦᑕᐅᖅ ᒪᓕᒃᓴᖃᑦᑕᖅᑐᑦ ᐅᓄᕐᓂᖏᑦ ᐊᑐᖅᑕᐅᔪᑦ ᐃᑲᔫᓯᐊᒃᓴᖏᓐᓂᒃ.

ᑕᐃᒪᐃᓕᖓᑎᓪᓗᒍ ᑮᓇᐅᔭᖅᑖᖏᑦ ᕿᑭᖅᑕᓂᒃᑯᑦ, ᓲᕐᓗ ᓂᖏᖅᑕᐅᑎᓄᑦ ᐊᖏᖃᑎᒋᒍᑏᑦ ᐊᒻᒪᓗ ᖄᖏᕐᓂᑯᓕᐊᓂᒃ ᐅᑎᕐᕕᐅᒍᑏᑦ, ᐊᑐᖅᑕᐅᖃᑦᑕᖅᑐᑦ ᐃᑲᔫᑕᐅᓪᓗᑎᒃ ᑕᒪᒃᑮᓐᓄᑦ ᐊᑯᓂᐅᔪᒧᑦ−ᑐᕌᒐᓕᐊᖑᓯᒪᔪᒧᑦ ᒪᑭᒪᔾᔪᑎᒃᓴᖏᓐᓄᑦ ᐃᓄᐃᑦ.

ᑭᓯᐊᓂ ᑮᓇᐅᔭᑦ ᐊᑐᖅᑕᐅᖃᑦᑕᕐᒥᔪᑦ ᒫᓐᓇᐃᓇᕐᒧᑦ ᑐᕌᒐᕐᒧᑦ ᐃᑲᔫᑕᐅᓪᓗᑎᒃ ᐃᓄᓐᓄᑦ ᐅᓪᓗᒥ.

ᐅᐱᒍᓱᑦᑐᖓ ᕿᑭᖅᑕᓂᒃᑯᑦ ᓴᖅᑮᓯᒪᓂᖏᓐᓂᒃ ᓴᖅᑭᐅᒪᒋᐊᖃᕐᓂᖏᓐᓂᒃ ᐊᐅᓚᑦᓯᒍᑎᑦᑎᓐᓂᒃ ᐊᐅᓚᑕᑦᑎᓐᓄᑦ ᐃᓵᔪᓄᑦ.

ᑕᐃᑲᓂᐅᒍᒫᖅᑐᖅ ᑖᒃᑯᐊ ᐊᑐᐊᒐᑦ ᕿᑭᖅᑕᓂᒃᑯᓐᓄᑦ ᑐᕋᐃᓐᓇᖅᑐᒥᒃ ᐱᕚᓪᓕᑎᑦᓯᒍᑕᐅᓂᐊᖅᑐᑦ ᐃᓅᓯᖏᓐᓂᒃ ᐃᓄᐃᑦ.

ᑕᑯᔪᓐᓇᖅᑕᑎᑦ ᐊᑕᖏᖅᑐᑦ ᐅᓂᒃᑳᑦ ᐃᖅᑲᓇᐃᔮᕆᓯᒪᔭᑦᑎᓐᒃᓂ ᑕᑯᒋᐊᕐᓗᒋᑦ ᐊᕐᕌᒍᑕᒫᕐᓯᐅᑏᑦ ᐅᓂᒃᑳᑦ − ᑖᑉᕙᓂ ᐊᕐᕌᒍᑦᑎᓐᓂ ᐊᑕᖐᓯᒪᓂᕐᓴᐅᔪᑦ ᐊᕐᕌᒎᖃᑦᑕᕐᓯᒪᔪᓂᒃ.

ᖃᐅᔨᔪᒥᓇᐅᓕᖅᑐᖅ ᑭᓱᓂᒃ ᓴᖅᑭᕐᕕᐅᑲᓐᓂᑦᑕᓛᕐᒪᖔᑦᑕ ᐊᕐᕌᒍ.