ᐃᖃᓄᐃᑦ, ᓄᓇᕗᑦ, ᒫᔾᔨ 7, 2024- ᕿᑭᖅᑕᓂ ᐃᓄᐃᑦ  ᑲᑐᔾᔨᖃᑎᒌᑦ ᑲᑎᒪᔨᖏᑕ ᑲᑎᒪᓂᖓ ᐃᓱᓕᑉᐳᖅ ᐅᓪᓗᒥ. ᐊᑐᓕᖁᔨᔾᔪᑎᓂᒃ ᓴᖅᑭᑦᑏᔪᑦ ᑲᑎᒪᑎᓪᓗᒋᑦ, ᐅᑯᐊ ᐅᖃᐅᓯᕆᔭᐅᓪᓗᐊᑕᕆᓪᓗᑎᒃ:

• ᐊᖏᖅᑕᐅᔪᖅ ᑲᑭᕙᒃᑯᑦ ᐊᖏᖃᑎᒌᒍᑎᒃᑰᑦ ᓄᓇᕗᒻᒥ ᐃᒡᓗᓕᐅᖅᑎᒃᑯᑦ ᐃᒡᓗᕐᔪᐊᖃᑎᒌᖕᓂᐊᖅᑐᑦ ᓴᓂᕋᔭᖕᒥ ᐸᐃᕆᕕᒃᓴᒥᒃ.
• ᐊᖏᖅᑕᐅᔪᖅ ᑮᓇᐅᔭᑦ ᐃᓚᒋᐊᖅᑕᐅᒃᑲᓐᓂᖅᑐᑦ $1 ᒥᓕᐊᓐᓂᒃ ᑐᓂᔭᐅᓯᒪᒐᓗᐊᖅᑎᓪᓗᒋᑦ $5 ᒥᓕᐊᓐᓂᒃ ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᖅᓱᖅᑏᑦ. ᐅᖃᐅᓯᕆᔭᐅᓂᖓ, $3.5 ᒥᓕᐊᓐ $5 ᒥᓕᐊᓐᓂᖔᖅᑐᖅ ᑐᓂᔭᐅᔪᒪᓪᓗᓂ ᐃᓄᐃᑦ ᐱᖁᑎᖏᓐᓂᒃ ᓇᐅᑎᖅᓱᖅᑎᒃᑯᓐᓄᑦ ᐃᑲᔪᖅᑐᖅᑕᐅᖁᓪᓗᒍ ᐃᒡᓗᕐᔪᐊᒃᓴᖁᑖ ᐅᓪᓗᒥᒧᑦ ᓴᓇᔭᐅᕙᓪᓕᐊᓂᖓ.
• ᐊᖏᖅᑕᐅᔪᖅ ᐋᖅᑭᒋᐊᖅᓯᔪᒪᓪᓗᑎᒃ ᔫᓐ 2023ᒥ ᐊᑐᓕᖁᔭᐅᓚᐅᖅᓯᒪᔪᖅ ᑲᑎᒪᔨᓂᒃ ᐃᓚᐅᑎᑦᑎᖁᔨᓪᓗᑎᒃ ᕿᑭᖅᑖᓗᒃ ᓇᖕᒥᓂᖃᑎᓄᑦ ᐱᕙᓪᓕᐊᔪᓕᕆᔩᑦ ᐱᓕᕆᔨᐅᓂᐊᕐᓂᖏᓐᓄᑦ ᕿᑭᖅᑕᓃᒃᑯᑦ ᖃᐅᔨᕙᓪᓕᐊᓇᓱᒃᑎᓪᓗᒋᑦ ᐃᒡᓗᓂ ᐊᑭᑐᓗᐊᖏᓐᓂᖅᓴᐅᓗᓂ ᓴᓇᔭᐅᔪᓐᓇᖅᑐᓂᒃ ᐱᔭᕇᖅᓯᓂᐊᕈᒪᔪᑦ ᒫᔾᔨ 31, 2029
• ᐊᖏᖅᑕᐅᔪᖅ ᐃᑲᔪᖅᑐᕐᓗᒋᑦ ᐃᖃᓗᐃᑦ ᓄᒃᑭᒃᓴᐅᑎᓕᕆᓂᕐᒧᑦ ᐱᓕᕆᐊᖅ, ᓄᓇᕗᑦ ᓄᒃᑭᒃᓴᐅᑎᓕᕆᔨᒃᑯᓐᓂ ᐱᓕᕆᐊᖓ ᐱᖓᔪᒋᓕᖅᑕᖓᓂ ᐱᕙᓪᓕᐊᑎᑦᑎᔪᑦ.
• ᐊᖏᖅᑕᐅᔪᖅ ᐅᕙᓂ 2024-2025 ᑮᓇᐅᔭᓕᕆᕐᓂᕐᒧᑦ ᐊᕐᕌᒍᖓᑕ ᑮᓇᐅᔭᖏᑦ ᑐᓂᔭᐅᓚᐅᕐᒪᑕ ᑮᓇᐅᔭᓕᔨᒃᑯᑦ ᑲᑎᒪᔨᖏᓐᓄᑦ.
• ᐊᖏᖅᑕᐅᔪᖅ ᐊᑭᑦᑐᕆᐊᖅᑕᐅᓂᖓ 3%ᒥᒃ ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑕ ᑮᓇᐅᔭᓕᐊᖏᑦ ᐃᓱᒪᒋᔭᐅᓪᓗᓂ ᐅᓗᓪᓕᒫᒧᑦ ᐆᒪᔾᔪᑏᑦ ᐊᑭᑦᑐᕆᐊᖏᓐᓇᕐᓂᖏᓐᓂᒃ ᓄᓇᕗᒻᒥ.
• ᐊᖏᖅᑕᐅᔪᖅ ᐋᖅᑭᒃᑕᐅᒋᐊᖁᓪᓗᒍ ᓂᕈᐊᖅᑐᓕᕆᓂᕐᒧᑦ ᒪᓕᒐᖅ, ᓂᕈᐊᖅᑐᓕᕆᓂᐊᖅᑎᓪᓗᒋᑦ ᑐᓂᔭᐅᓯᒪᔭᕆᐊᓖᑦ. ᑕᒪᓐᓇ ᐊᓯᔾᔨᖅᑕᐅᓂᖓ ᓂᕈᐊᖅᓯᔾᔪᑏᑦ ᑐᓂᔭᐅᓯᒪᔭᕆᐊᖃᖃᑦᑕᕐᓂᐊᓕᖅᑐᑦ ᐱᓇᓱᐊᕈᓯᑦ ᑎᓴᒪᑦ ᓂᕈᐊᕐᓇᐅᑉ ᑐᖔᓂ.
• ᐊᖏᖅᑕᐅᔪᖅ ᐊᑎᓕᐅᖁᓪᓗᒋᑦ ᐊᓯᔾᔩᓂᕐᒧᑦ ᐊᖏᖃᑎᒌᒍᑎ ᕿᑭᖅᑖᓘᑉ ᒥᕐᖑᐃᖅᓯᕕᖏᑕ ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖏᓐᓄᑦ ᐃᑲᔫᓯᐊᖅᑖᕈᑎᓕᕆᓂᕐᒧᓪᓗ ᐊᖏᖃᑎᒌᒍᑎ, ᐋᔩᖃᑎᒌᒍᑎᐅᓕᕈᓐᓇᖁᓪᓗᒍ ᐃᓗᐊᖏᓐᓂᐅᔪᑦ ᑐᒃᓯᕋᖅᑕᐅᔪᒧᑦ ᐋᖅᑭᒃᑕᐅᓇᓱᒋᐊᓖᑦ.

ᓂᕈᐅᖅᑐᖃᐅᓚᐅᕐᒥᖕᒪᑦ ᐅᑯᓄᖓ ᑲᑎᒪᔨᕋᓛᒃᓴᓄᑦ: ᓄᓇᕗᒻᒥ ᑎᒥᒥᒍᑦ ᐊᔪᕈᑎᓖᑦ ᒪᑭᓐᓇᓱᐊᖅᑎᖏᑦ (ᓄᐊ ᐸᐸᑦᓯ), ᓄᓇᕗᒻᒥ ᐸᕐᓇᐃᔪᓕᕆᔨᒃᑯᑦ (ᐱᐊᓐ ᖁᕕᖅ), ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᖏᓐᓄᑦ (ᓗᐊᕋ ᓇᐅᔪᒃ) ᑲᑭᕙᒃᑯᑦ ᐃᑲᔫᑏᑦ ᐊᐃᑦᑑᑏᑦ ᕿᒥᕐᕈᔨᖏᑕ ᑲᑎᒪᔨᕋᓛᑦ (ᓄᐊᒪᓐ ᒪᐃᒃ). ᓂᕈᐊᒐᒃᓴᖅᑕᖃᓚᐅᖏᑦᑐᖅ ᖃᐅᓱᐃᑦᑐᖅ ᒥᕐᖑᐃᖅᓯᕕᖓᑕ ᑲᑐᔾᔨᖃᑎᒌᖕᓕᒃᑯᑦ ᑲᑎᒪᔨᕋᓛᒃᑯᓐᓄᑦ, ᑕᒪᐃᓐᓂᖓᓄᑦ ᐱᔪᒥᓴᐅᑎᒃᑰᒃᑲᓪᓕᕆᐊᓕᒃ ᑕᒪᓐᓇ, ᑕᑯᒋᐊᖅᑕᐅᖃᑦᑕᕐᓂᐊᖅᐳᑦ ᕿᑭᖅᑕᓃᒃᑯᑦ ᑐᓴᐅᑎᖏᑎᒍᑦ ᕿᑭᖅᑕᓃᒃᑯᓪᓗ ᐃᑭᐊᖅᑭᕕᖓᒍᑦ ᓂᕈᐊᕈᑎᒃᓴᓄᑦ ᑖᒃᑯᓄᖓ.

ᑐᓴᒐᒃᓴᓂᒃ ᑐᓴᕆᐊᒃᑲᓐᓂᕈᒪᒍᕕᑦ, ᑐᓴᕆᐊᕐᕕᒋᒍᒃ:
ᑭᐅᕆᓐ ᕕᓕᐅᕋᑎ
ᑐᑭᒧᒃᑎᑦᑎᔨ, ᑐᓴᐅᒪᔾᔪᑎᓕᕆᔾᔪᑎᓂᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅ) 867.975.8398 ᐊᑭᖃᖏᑦᑐᖅ 1.800.667.2742

kflaherty@qia.ca